Sukta 20

20.1

Rayisanvardhanam, 1-10 vasishthah, 1-2 agnihcha 3 aryama, bhagah, brihaspatih, devih, 4 somah, agnih, adityah, vishnuh, brahma, brihaspatih, 5 agnih, 6 indravayu, 7 aryama, brihaspatih, indrah, vatah, vishnuh, sarasvati, savita, vaji, 8 vishva bhuvanani, 9 pancha pradishah, 10 vayustvashta, anushtup, 6 pathyapanktih, 8 virad jagati

अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
तं जा॒नन्न॑ग्न॒ आ रो॒हाधा॑ नो बर्धय र॒यिम् ॥१॥

Ayam te yonirritviyo yato jato arochathah
Tam janannagna a rohadha no bardhaya rayim

20.2

अग्ने॒ अच्छा॑ वदे॒ह नः॑ प्र॒त्यङ् नः॑ सु॒मना॑ भव ।
प्र णो॑ यच्छ विशां पते धन॒दा अ॑सि न॒स्त्वम् ॥२॥

Agne achchha vadeha nah pratyang nah sumana bhava
Pra no yachchha visham pate dhanada asi nastvam

20.3

प्र णो॑ यच्छत्वर्य॒मा प्र भगः॒ प्र बृह॒स्पतिः॑ ।
प्र दे॒वीः प्रोत सू॒नृता॑ र॒यिं दे॒वी द॑धातु मे ॥३॥

Pra no yachchhatvaryama pra bhagah pra brihaspatih
Pra devih prota sunrita rayim devi dadhatu me

20.4

सोमं॒ राजा॑न॒मव॑से॒ऽग्निं गी॒र्भिर्ह॑वामहे ।
आ॒दि॒त्यं विष्णुं॒ सूर्यं॑ ब्र॒ह्माणं॑ च॒ बृह॒स्पति॑म् ॥४॥

Somam rajanamavasegnim girbhirhavamahe
Adityam vishnum suryam brahmanam cha brihaspatim

20.5

त्वं नो॑ अग्ने अ॒ग्निभि॒र्ब्रह्म॑ य॒ज्ञं च॑ वर्धय ।
त्वं नो॑ देव॒ दात॑वे र॒यिं दाना॑य चोदय ॥५॥

Tvam no agne agnibhirbrahma yagyam cha vardhaya
Tvam no deva datave rayim danaya chodaya

20.6

इ॒न्द्र॒वा॒यू उ॒भावि॒ह सु॒हवे॒ह ह॑वामहे ।
यथा॑ नः॒ सर्व॒ इज्जनः॒ संग॑त्यां सु॒मना॒ अस॒द् दान॑कामश्च नो॒ भुव॑त् ॥६॥

Indravayu ubhaviha suhaveha havamahe
Yatha nah sarva ijjanah sangatyam sumana asad danakamashcha no bhuvat

20.7

अ॒र्य॒मणं॒ बृह॒स्पति॒मिन्द्रं॒ दाना॑य चोदय ।
वातं॒ विष्णुं॒ सर॑स्वतीं सवि॒तारं॑ च वा॒जिन॑म् ॥७॥

Aryamanam brihaspatimindram danaya chodaya
Vatam vishnum sarasvatim savitaram cha vajinam

20.8

वाज॑स्य॒ नु प्र॑स॒वे सं ब॑भूविमे॒मा च॒ विश्वा॒ भुव॑नान्य॒न्तः ।
उ॒तादि॑त्सन्तं दापयतु प्रजा॒नन् र॒यिं च॑ नः॒ सर्व॑वीरं॒ नि य॑छ ॥८॥

Vajasya nu prasave sam babhuvimema cha vishva bhuvananyantah
Utaditsantam dapayatu prajanan rayim cha nah sarvaviram ni yachha

20.9

दु॒ह्रां मे॒ पञ्च॑ प्र॒दिशो॑ दु॒ह्रामु॒र्वीर्य॑थाब॒लम्।
प्रापे॑यं सर्वा॒ आकू॑ती॒र्मन॑सा॒ हृद॑येन च ॥९॥

Duhram me pancha pradisho duhramurviryathabalam
Prapeyam sarva akutirmanasa hridayena cha

20.10

गो॒सनिं॒ वाच॑मुदेयं॒ वर्च॑सा मा॒भ्युदि॑हि ।
आ रु॑न्धां स॒र्वतो॑ वा॒युस्त्वष्टा॒ पोषं॑ दधातु मे ॥१०॥

Gosanim vachamudeyam varchasa mabhyudihi
A rundham sarvato vayustvashta posham dadhatu me