Sukta 21

21.1

Shantih, 1-10 vasishthah, agnih, trishtup, 1 puronushtup, 2, 3, 8 bhurik 5 jagati, 6 uparishtadvirad brihati, 7 virad garbha, 9 nichridanushtup, 10 anushtup

ये अ॒ग्नयो॑ अ॒प्स्व॑१न्तर्ये वृ॒त्रे ये पुरु॑षे॒ ये अश्म॑सु ।
य आ॑वि॒वेशोष॑धी॒र्यो वन॒स्पतीं॒स्तेभ्यो॑ अ॒ग्निभ्यो॑ हु॒तम॑स्त्वे॒तत् ॥१॥

Ye agnayo apsva1ntarye vritre ye purushe ye ashmasu
Ya aviveshoshadhiryo vanaspatinstebhyo agnibhyo hutamastvetat

21.2

यः सोमे॑ अ॒न्तर्यो गोष्व॒न्तर्य आवि॑ष्टो॒ वयः॑सु॒ यो मृ॒गेषु॑ ।
य आ॑वि॒वेश॑ द्वि॒पदो॒ यश्चतु॑ष्पद॒स्तेभ्यो॑ अ॒ग्निभ्यो॑ हु॒तम॑स्त्वे॒तत् ॥२॥

Yah some antaryo goshvantarya avishto vayahsu yo mrigeshu
Ya avivesha dvipado yashchatushpadastebhyo agnibhyo hutamastvetat

21.3

य इन्द्रे॑ण स॒रथं॒ याति॑ दे॒वो वै॑श्वान॒र उ॒त वि॑श्वदा॒व्यः ।
यं जोह॑वीमि॒ पृत॑नासु सास॒हिं तेभ्यो॑ अ॒ग्निभ्यो॑ हु॒तम॑स्त्वे॒तत् ॥३॥

Ya indrena saratham yati devo vaishvanara uta vishvadavyah
Yam johavimi pritanasu sasahim tebhyo agnibhyo hutamastvetat

21.4

यो दे॒वो वि॒श्वाद् यमु॒ काम॑मा॒हुर्यं दा॒तारं॑ प्रतिगृ॒ह्णन्त॑मा॒हुः ।
यो धीरः॑ श॒क्रः प॑रि॒भूरदा॑भ्य॒स्तेभ्यो॑ अ॒ग्निभ्यो॑ हु॒तम॑स्त्वे॒तत् ॥४॥

Yo devo vishvad yamu kamamahuryam dataram pratigrihnantamahuh
Yo dhirah shakrah paribhuradabhyastebhyo agnibhyo hutamastvetat

21.5

यं त्वा॒ होता॑रं॒ मन॑सा॒भि सं॑वि॒दुस्त्रयो॑दश भौव॒नाः पञ्च॑ मान॒वाः ।
व॒र्चो॒धसे॑ य॒शसे॑ सू॒नृता॑वते॒ तेभ्यो॑ अ॒ग्निभ्यो॑ हु॒तम॑स्त्वे॒तत् ॥५॥

Yam tva hotaram manasabhi sanvidustrayodasha bhauvanah pancha manavah
Varchodhase yashase sunritavate tebhyo agnibhyo hutamastvetat

21.6

उ॒क्षान्ना॑य व॒शान्ना॑य॒ सोम॑पृष्ठाय वे॒धसे॑ ।
वै॒श्वा॒न॒रज्ये॑ष्ठेभ्य॒स्तेभ्यो॑ अ॒ग्निभ्यो॑ हु॒तम॑स्त्वे॒तत् ॥६॥

Ukshannaya vashannaya somaprishthaya vedhase
Vaishvanarajyeshthebhyastebhyo agnibhyo hutamastvetat

21.7

दिवं॑ पृथि॒वीमन्व॒न्तरि॑क्षं॒ ये वि॒द्युत॑मनुसं॒चर॑न्ति ।
ये दि॒क्ष्व॑१न्तर्ये वाते॑ अ॒न्तस्तेभ्यो॑ अ॒ग्निभ्यो॑ हु॒तम॑स्त्वे॒तत् ॥७॥

Divam prithivimanvantariksham ye vidyutamanusancharanti
Ye dikshva1ntarye vate antastebhyo agnibhyo hutamastvetat

21.8

हिर॑ण्यपाणिं सवि॒तार॒मिन्द्रं॒ बृह॒स्पतिं॒ वरु॑णं मि॒त्रम॒ग्निम्।
विश्वा॑न् दे॒वानङ्गि॑रसो हवामह इ॒मं क्रव्यादं॑ शमयन्त्व॒ग्निम् ॥८॥

Hiranyapanim savitaramindram brihaspatim varunam mitramagnim
Vishvan devanangiraso havamaha imam kravyadam shamayantvagnim

21.9

शा॒न्तो अ॒ग्निः क्र॒व्याच्छा॒न्तः पु॑रुष॒रेष॑णः ।
अथो॒ यो वि॑श्वदा॒व्य॑१स्तं क्र॒व्याद॑मशीशमम् ॥९॥

Shanto agnih kravyachchhantah purushareshanah
Atho yo vishvadavya1stam kravyadamashishamam

21.10

ये पर्व॑ताः॒ सोम॑पृष्ठा॒ आप॑ उत्तान॒शीव॑रीः ।
वातः॑ प॒र्जन्य॒ आद॒ग्निस्ते क्र॒व्याद॑मशीशमन् ॥१०॥

Ye parvatah somaprishtha apa uttanashivarih
Vatah parjanya adagniste kravyadamashishaman