Sukta 22

22.1

Varchah praptih, 1-6 vasishthah, varchah, brihaspatih, vishve devah, anushtup, 1 virat trishtup, 3 panchapada paranushtup viradatijagati, 4 tryavasana shat pada jagati

ह॒स्ति॒व॒र्च॒सं प्र॑थतां बृ॒हद् यशो॒ अदि॑त्या॒ यत् त॒न्वः संब॒भूव॑ ।
तत् सर्वे॒ सम॑दु॒र्मह्य॑मे॒तद् विश्वे॑ दे॒वा अदि॑तिः स॒जोषाः॑ ॥१॥

Hastivarchasam prathatam brihad yasho aditya yat tanvah sambabhuva
Tat sarve samadurmahyametad vishve deva aditih sajoshah

22.2

मि॒त्रश्च॒ वरु॑ण॒श्चेन्द्रो॑ रु॒द्रश्च॑ चेततु । दे॒वासो॑ वि॒श्वधा॑यस॒स्ते मा॑ञ्जन्तु॒ वर्च॑सा ॥२॥

Mitrashcha varunashchendro rudrashcha chetatu, devaso vishvadhayasaste manjantu varchasa

22.3

येन॑ ह॒स्ती वर्च॑सा संब॒भूव॒ येन॒ राजा॑ मनु॒ष्येऽष्व॒प्स्व॑१न्तः ।
येन॑ दे॒वा दे॒वता॒मग्र आय॒न् तेन॒ माम॒द्य वर्च॒साग्ने॑ वर्च॒स्विनं॑ कृणु ॥३॥

Yena hasti varchasa sambabhuva yena raja manushyeshvapsva1ntah
Yena deva devatamagra ayan tena mamadya varchasagne varchasvinam krinu

22.4

यत् ते॒ वर्चो॑ जातवेदो बृ॒हद् भ॑व॒त्याहु॑तेः ।
याव॒त् सूर्य॑स्य॒ वर्च॑ आसु॒रस्य॑ च ह॒स्तिनः॑ ।
ताव॑न्मे अ॒श्विना॒ वर्च॒ आ ध॑त्तां॒ पुष्क॑रस्रजा ॥४॥

Yat te varcho jatavedo brihad bhavatyahuteh
Yavat suryasya varcha asurasya cha hastinah
Tavanme ashvina varcha a dhattam pushkarasraja

22.5

याव॒च्चत॑स्रः प्र॒दिश॒श्चक्षु॒र्याव॑त् समश्नु॒ते।
ताव॑त् स॒मैत्वि॑न्द्रि॒यं मयि॒ तद्ध॑स्तिवर्च॒सम् ॥५॥

Yavachchatasrah pradishashchakshuryavat samashnute
Tavat samaitvindriyam mayi taddhastivarchasam

22.6

हस्ती मृ॒गाणां॑ सु॒षदा॑मति॒ष्ठावा॑न् ब॒भूव॒ हि।
तस्य॒ भगे॑न॒ वर्च॑सा॒भि षि॑ञ्चामि॒ माम॒हम् ॥६॥

Hasti mriganam sushadamatishthavan babhuva hi
Tasya bhagena varchasabhi shinchami mamaham