Sukta 23

23.1

Vira-prasutih, 1-6 brahma, chandrama, yonih, dyavaprithivi, anushtup, 5 uparishtad bhurigbrihati, 6 skandhogrivi brihati

येन॑ वे॒हद् ब॒भूवि॑थ ना॒शया॑म॒सि तत् त्वत्।
इ॒दं तद॒न्यत्र॒ त्वदप॑ दू॒रे नि द॑ध्मसि ॥१॥

Yena vehad babhuvitha nashayamasi tat tvat
Idam tadanyatra tvadapa dure ni dadhmasi

आ ते॒ योनिं॒ गर्भ॑ एतु॒ पुमा॒न् बाण॑ इवेषु॒धिम्।
आ वी॒रोऽत्र॑ जायतां पु॒त्रस्ते॒ दश॑मास्यः ॥२॥

A te yonim garbha etu puman bana iveshudhim
A virotra jayatam putraste dashamasyah

पुमां॑सं पु॒त्रं ज॑नय॒ तं पुमा॒ननु॑ जायताम्।
भवा॑सि पु॒त्राणां॑ मा॒ता जा॒तानां॑ ज॒नया॑श्च॒ यान् ॥३॥

Pumansam putram janaya tam pumananu jayatam
Bhavasi putranam mata jatanam janayashcha yan

यानि॑ भ॒द्राणि॒ बीजा॑न्यृष॒भा ज॒नय॑न्ति च ।
तैस्त्वं पु॒त्रं वि॑न्दस्व॒ सा प्र॒सूर्धेनु॑का भव ॥४॥

Yani bhadrani bijanyrishabha janayanti cha
Taistvam putram vindasva sa prasurdhenuka bhava

कृ॒णोमि॑ ते प्राजाप॒त्यमा योनिं॒ गर्भ॑ एतु ते ।
वि॒न्दस्व॒ त्वं पु॒त्रं ना॑रि॒ यस्तुभ्यं॒ शमस॒च्छमु॒ तस्मै॒ त्वं भव॑ ॥५॥

Krinomi te prajapatyama yonim garbha etu te
Vindasva tvam putram nari yastubhyam shamasachchhamu tasmai tvam bhava

यासां॒ द्यौः पि॒ता पृ॑थि॒वी मा॒ता स॑मु॒द्रो मूलं॑ वी॒रुधां॑ ब॒भूव॑ ।
तास्त्वा॑ पुत्र॒विद्या॑य॒ दैवीः॒ प्राव॒न्त्वोष॑धयः ॥६॥

Yasam dyauh pita prithivi mata samudro mulam virudham babhuva
Tastva putravidyaya daivih pravantvoshadhayah