Sukta 24

24.1

Samridghi-praptih, 1-7 bhriguh, vanaspatih. prajapatih, anushtup, 2 nichritpathyapanktih

पय॑स्वती॒रोष॑धयः॒ पय॑स्वन्माम॒कं वचः॑ ।
अथो॒ पय॑स्वतीना॒मा भ॑रे॒ऽहं स॑हस्र॒शः ॥१॥

Payasvatiroshadhayah payasvanmamakam vachah
Atho payasvatinama bhareham sahasrashah

वेदा॒हं पय॑स्वन्तं च॒का॑र धा॒न्यं ऽ ब॒हु।
सं॒भृत्वा॒ नाम॒ यो दे॒वस्तं व॒यं ह॑वामहे॒ योयो॒ अय॑ज्वनो गृ॒हे ॥२॥

Vedaham payasvantam chakara dhanyam bahu
Sambhritva nama yo devastam vayam havamahe yoyo ayajvano grihe

इ॒मा याः पञ्च॑ प्र॒दिशो॑ मान॒वीः पञ्च॑ कृ॒ष्टयः॑ ।
वृ॒ष्टे शापं॑ न॒दीरि॑वे॒ह स्फा॒तिं समा॑वहान् ॥३॥

Ima yah pancha pradisho manavih pancha krishtayah
Vrishte shapam nadiriveha sphatim samavahan

उदुत्सं॑ श॒तधा॑रं स॒हस्र॑धार॒मक्षि॑तम्।
ए॒वास्माके॒दं धा॒न्यं ऽ स॒हस्र॑धार॒मक्षि॑तम् ॥४॥

Udutsam shatadharam sahasradharamakshitam
Evasmakedam dhanyam sahasradharamakshitam

शत॑हस्त स॒माह॑र॒ सह॑स्रहस्त॒ सं कि॑र ।
कृ॒तस्य॑ का॒र्यऽस्य चे॒ह स्फा॒तिं स॒माव॑ह ॥५॥

Shatahasta samahara sahasrahasta sam kira
Kritasya karyasya cheha sphatim samavaha

ति॒स्रो मात्रा॑ गन्ध॒र्वाणां॒ चत॑स्रो गृ॒हप॑त्न्याः ।
तासां॒ या स्फा॑ति॒मत्त॑मा॒ तया॑ त्वा॒भि मृ॑शामसि ॥६॥

Tisro matra gandharvanam chatasro grihapatnyah
Tasam ya sphatimattama taya tvabhi mrishamasi

उ॒पो॒हश्च॑ समू॒हश्च॑ क्ष॒त्तारौ॑ ते प्रजापते ।
तावि॒हा व॑हतां स्फा॒तिं ब॒हुं भू॒मान॒मक्षि॑तम् ॥७॥

Upohashcha samuhashcha kshattarau te prajapate
Taviha vahatam sphatim bahum bhumanamakshitam