সূক্ত 19

19.1

অজরং ক্ষত্রম্। ১-৮ বসিষ্ঠঃ। বিশ্বে দেবাঃ, চন্দ্রমাঃ, ইন্দ্রঃ। অনুষ্টুপ্, ১ পথ্যাবৃহতী, ৩ ভুরিগ্বৃহতী, ৫ ত্রিষ্টুপ্, ৬ ত্র্যবসানা ষট্পদা ত্রিষ্টুপ্ককুম্মতীগর্ভাতিজগতী, ৭ বিরাডাস্তারপঙ্ক্তিঃ, ৮ পথ্যাপঙ্ক্তিঃ।

সংশিতং ম ইদং ব্রহ্ম সংশিতং বীর্য১ বলম্।
সংশিতং ক্ষত্রমজরমস্তু জিষ্ণুর্যেষামস্মি পুরোহিতঃ ॥১॥

19.2

সমহমেষাং রাষ্ট্রং স্যামি সমোজো বীর্য১ বলম্।
বৃশ্চামি শত্রূণাং বাহূননেন হবিষাহম্ ॥২॥

19.3

নীচৈঃ পদ্যন্তামধরে ভবন্তু যে নঃ সূরিং মঘবানং পৃতন্যান্।
ক্ষিণামি ব্রহ্মণামিত্রানুন্নয়ামি স্বানহম্ ॥৩॥

19.4

তীক্ষ্ণীয়াংসঃ পরশোরগ্নেস্তীক্ষ্ণতরা উত।
ইন্দ্রস্য বজ্রাৎ তীক্ষ্ণীয়াংসো যেষামস্মি পুরোহিতঃ ॥৪॥

19.5

এষামহমায়ুধা সং স্যাম্যেষাং রাষ্ট্রং সুবীরং বর্ধয়ামি ।
এষাং ক্ষত্রমজরমস্তু জিষ্ণ্বে৩ষাং চিত্তং বিশ্বেঽবন্তু দেবাঃ ॥৫॥

19.6

উদ্ধর্ষন্তাং মঘবন্ বাজিনান্যুদ্ বীরাণাং জয়তামেতু ঘোষঃ ।
পৃথগ্ ঘোষা উলুলয়ঃ কেতুমন্ত উদীরতাম্।
দেবা ইন্দ্রজ্যেষ্ঠা মরুতো যন্তু সেনয়া ॥৬॥

19.7

প্রেতা জয়তা নর উগ্রা বঃ সন্তু বাহবঃ ।
তীক্ষ্ণেষবোঽবলধন্বনো হতোগ্রায়ুধা অবলানুগ্রবাহবঃ ॥৭॥

19.8

অবসৃষ্টা পরা পত শরব্যে ব্রহ্মসংশিতে ।
জয়ামিত্রান্ প্র পদ্যস্ব জহ্যেঽষাং বরংবরং মামীষাং মোচি কশ্চন ॥৮॥