সূক্ত 70

70.1

বীলু চিদারুজত্নুভির্গুহা চিদিন্দ্র বহ্নিভিঃ । অবিন্দ উস্রিয়া অনু ॥১॥

দেবয়ন্তো যথা মতিমচ্ছা বিদদ্ বসুং গিরঃ । মহামনূষত শ্রুতম্ ॥২॥

ইন্দ্রেণ সং হি দৃক্ষসে সংজগ্মানো অবিভ্যুষা । মন্দূ সমানবর্চসা ॥৩॥

অনবদ্যৈরভিদ্যুভির্মখঃ সহস্বদর্চতি । গণৈরিন্দ্রস্য কাম্যৈঃ ॥৪॥

অতঃ পরিজ্মন্না গহি দিবো বা রোচনাদধি । সমস্মিন্নৃঞ্জতে গিরঃ ॥৫॥

ইতো বা সাতিমীমহে দিবো বা পার্থিবাদধি । ইন্দ্রং মহো বা রজসঃ ॥৬॥

ইন্দ্রমিদ্ গাথিনো বৃহদিন্দ্রমর্কেভিরর্কিণঃ । ইন্দ্রং বাণীরনূষত ॥৭॥

ইন্দ্র ইদ্ধর্যোঃ সচা সংমিশ্ল আ বচোয়ুজা । ইন্দ্রো বজ্রী হিরণ্যয়ঃ ॥৮॥

ইন্দ্রো দীর্ঘায় চক্ষস আ সূর্যং রোহয়দ্ দিবি। বি গোভিরিন্দ্রমৈরয়ৎ ॥৯॥

ইন্দ্র বাজেষু নোঽব সহস্রপ্রধনেষু চ । উগ্র উগ্রাভিরূতিভিঃ ॥১০॥

ইন্দ্রং বয়ং মহাধন ইন্দ্রমর্ভে হবামহে । যুজং বৃত্রেষু বজ্রিণম্ ॥১১॥

স নো বৃষন্নমুং চরুং সত্রাদাবন্নপা বৃধি । অস্মভ্যমপ্রতিষ্কুতঃ ॥১২॥

তুঞ্জেতুঞ্জে য উত্তরে স্তোমা ইন্দ্রস্য বজ্রিণঃ । ন বিন্ধে অস্য সুষ্টুতিম্ ॥১৩॥

বৃষা যূথেব বংসগঃ কৃষ্টীরিয়র্ত্যোজসা । ঈশানো অপ্রতিষ্কুতঃ ॥১৪॥

য একশ্চর্ষণীনাং বসূনামিরজ্যতি । ইন্দ্রঃ পঞ্চ ক্ষিতীনাম্ ॥১৫॥

ইন্দ্রং বো বিশ্বতস্পরি হবামহে জনেভ্যঃ । অস্মাকমস্তু কেবলঃ ॥১৬॥

এন্দ্র সানসিং রয়িং সজিত্বানং সদাসহম্। বর্ষিষ্ঠমূতয়ে ভর ॥১৭॥

নি যেন মুষ্টিহত্যয়া নি বৃত্রা রুণধামহৈ । ত্বোতাসো ন্যর্বতা ॥১৮॥

ইন্দ্র ত্বোতাস আ বয়ং বজ্রং ঘনা দদীমহি । জয়েম সং যুধি স্পৃধঃ ॥১৯॥

বয়ং শূরেভিরস্তৃভিরিন্দ্র ত্বয়া যুজা বয়ম্। সাসহ্যাম পৃতন্যতঃ ॥২০॥