UtshovSukta 70
70.1
वी॒लु चि॑दारुज॒त्नुभि॒र्गुहा॑ चिदिन्द्र॒ वह्नि॑भिः । अवि॑न्द उ॒स्रिया॒ अनु॑ ॥१॥
Vilu chidarujatnubhirguha chidindra vahnibhih, avinda usriya anu
70.2
दे॒व॒यन्तो॒ यथा॑ म॒तिमच्छा॑ वि॒दद् व॑सुं॒ गिरः॑ । म॒हाम॑नूषत श्रु॒तम् ॥२॥
Devayanto yatha matimachchha vidad vasum girah, mahamanushata shrutam
70.3
इन्द्रे॑ण॒ सं हि दृक्ष॑से संजग्मा॒नो अबि॑भ्युषा । म॒न्दू स॑मा॒नव॑र्चसा ॥३॥
Indrena sam hi drikshase sanjagmano abibhyusha, mandu samanavarchasa
70.4
अ॒न॒व॒द्यैर॒भिद्यु॑भिर्म॒खः सह॑स्वदर्चति । ग॒णैरिन्द्र॑स्य॒ काम्यैः॑ ॥४॥
Anavadyairabhidyubhirmakhah sahasvadarchati, ganairindrasya kamyaih
70.5
अतः॑ परिज्म॒न्ना ग॑हि दि॒वो वा॑ रोच॒नादधि॑ । सम॑स्मिन्नृञ्जते॒ गिरः॑ ॥५॥
Atah parijmanna gahi divo va rochanadadhi, samasminnrinjate girah
70.6
इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑ । इन्द्रं॑ म॒हो वा॒ रज॑सः ॥६॥
Ito va satimimahe divo va parthivadadhi, indram maho va rajasah
70.7
इन्द्र॒मिद् गा॒थिनो॑ बृ॒हदिन्द्र॑म॒र्केभि॑र॒र्किणः॑ । इन्द्रं॒ वाणी॑रनूषत ॥७॥
Indramid gathino brihadindramarkebhirarkinah, indram vaniranushata
70.8
इन्द्र॒ इद्धर्योः॒ सचा॒ संमि॑श्ल॒ आ व॑चो॒युजा॑ । इन्द्रो॑ व॒ज्री हि॑र॒ण्ययः॑ ॥८॥
Indra iddharyoh sacha sammishla a vachoyuja, indro vajri hiranyayah
70.9
इन्द्रो॑ दी॒र्घाय॒ चक्ष॑स॒ आ सूर्यं॑ रोहयद् दि॒वि। वि गोभि॒रिन्द्र॑मैरयत् ॥९॥
Indro dirghaya chakshasa a suryam rohayad divi, vi gobhirindramairayat
70.10
इन्द्र॒ वाजे॑षु नोऽव स॒हस्र॑प्रधनेषु च । उ॒ग्र उ॒ग्राभि॑रू॒तिभिः॑ ॥१०॥
Indra vajeshu nova sahasrapradhaneshu cha, ugra ugrabhirutibhih
70.11
इन्द्रं॑ व॒यं म॑हाध॒न इन्द्र॒मर्भे॑ हवामहे । युजं॑ वृ॒त्रेषु॑ व॒ज्रिण॑म् ॥११॥
Indram vayam mahadhana indramarbhe havamahe, yujam vritreshu vajrinam
70.12
स नो॑ वृषन्न॒मुं च॒रुं सत्रा॑दाव॒न्नपा॑ वृधि । अ॒स्मभ्य॒मप्र॑तिष्कुतः ॥१२॥
Sa no vrishannamum charum satradavannapa vridhi, asmabhyamapratishkutah
70.13
तु॒ञ्जेतु॑ञ्जे॒ य उत्त॑रे॒ स्तोमा॒ इन्द्र॑स्य व॒ज्रिणः॑ । न वि॑न्धे अस्य सुष्टु॒तिम् ॥१३॥
Tunjetunje ya uttare stoma indrasya vajrinah, na vindhe asya sushtutim
70.14
वृषा॑ यू॒थेव॒ वंस॑गः कृ॒ष्टीरि॑य॒र्त्योज॑सा । ईशा॑नो॒ अप्र॑तिष्कुतः ॥१४॥
Vrisha yutheva vansagah krishtiriyartyojasa, ishano apratishkutah
70.15
य एक॑श्चर्षणी॒नां वसू॑नामिर॒ज्यति॑ । इन्द्रः॒ पञ्च॑ क्षिती॒नाम् ॥१५॥
Ya ekashcharshaninam vasunamirajyati, indrah pancha kshitinam
70.16
इन्द्रं॑ वो वि॒श्वत॒स्परि॒ हवा॑महे॒ जने॑भ्यः । अ॒स्माक॑मस्तु॒ केव॑लः ॥१६॥
Indram vo vishvataspari havamahe janebhyah, asmakamastu kevalah
70.17
एन्द्र॑ सान॒सिं र॒यिं स॒जित्वा॑नं सदा॒सह॑म्। वर्षि॑ष्ठमू॒तये॑ भर ॥१७॥
Endra sanasim rayim sajitvanam sadasaham, varshishthamutaye bhara
70.18
नि येन॑ मुष्टिह॒त्यया॒ नि वृ॒त्रा रु॒णधा॑महै । त्वोता॑सो॒ न्यर्व॑ता ॥१८॥
Ni yena mushtihatyaya ni vritra runadhamahai, tvotaso nyarvata
70.19
इन्द्र॒ त्वोता॑स॒ आ व॒यं वज्रं॑ घ॒ना द॑दीमहि । जये॑म॒ सं यु॒धि स्पृधः॑ ॥१९॥
Indra tvotasa a vayam vajram ghana dadimahi, jayema sam yudhi spridhah
70.20
व॒यं शूरे॑भि॒रस्तृ॑भि॒रिन्द्र॒ त्वया॑ यु॒जा व॒यम्। सा॒स॒ह्याम॑ पृतन्य॒तः ॥२०॥
Vayam shurebhirastribhirindra tvaya yuja vayam, sasahyama pritanyatah