UtshovSukta 71
71.1
म॒हां इन्द्रः॑ प॒रश्च॒ नु म॑हि॒त्वम॑स्तु व॒ज्रिणे । द्यौर्न प्र॑थि॒ना शवः॑ ॥१॥
Maham indrah parashcha nu mahitvamastu vajrine, dyaurna prathina shavah
71.2
स॒मो॒हे वा॒ य आश॑त॒ नर॑स्तो॒कस्य॒ सनि॑तौ । विप्रा॑सो वा धिया॒यवः॑ ॥२॥
Samohe va ya ashata narastokasya sanitau, vipraso va dhiyayavah
71.3
यः कु॒क्षिः सो॑म॒पात॑मः समु॒द्र इ॑व॒ पिन्व॑ते । उ॒र्वीरापो॒ न का॒कुदः॑ ॥३॥
Yah kukshih somapatamah samudra iva pinvate, urvirapo na kakudah
71.4
ए॒वा ह्य॑स्य सू॒नृता॑ विर॒प्शी गोम॑ती म॒ही। प॒क्वा शाखा॒ न दा॒शुषे॑ ॥४॥
Eva hyasya sunrita virapshi gomati mahi, pakva shakha na dashushe
71.5
ए॒वा हि ते॒ विभू॑तय ऊ॒तय॑ इन्द्र॒ माव॑ते । स॒द्यश्चि॒त् सन्ति॑ दा॒शुषे॑ ॥५॥
Eva hi te vibhutaya utaya indra mavate, sadyashchit santi dashushe
71.6
ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ । इन्द्रा॑य॒ सोम॑पीतये ॥६॥
Eva hyasya kamya stoma uktham cha shansya, indraya somapitaye
71.7
इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः । म॒हां अ॑भि॒ष्टिरोज॑सा ॥७॥
Indrehi matsyandhaso vishvebhih somaparvabhih, maham abhishtirojasa
71.8
एमे॑नं सृजता सु॒ते म॒न्दिमिन्द्रा॑य म॒न्दिने॑ । चक्रिं॒ विश्वा॑नि॒ चक्र॑ये ॥८॥
Emenam srijata sute mandimindraya mandine, chakrim vishvani chakraye
71.9
मत्स्वा॑ सुशिप्र म॒न्दिभि॒ स्तोमे॑भिर्विश्वचर्षणे । सचै॒षु सव॑ने॒ष्वा ॥९॥
Matsva sushipra mandibhi stomebhirvishvacharshane, sachaishu savaneshva
71.10
असृ॑ग्रमिन्द्र ते॒ गिरः॒ प्रति॒त्वामुद॑हासत । अजो॑षा वृष॒भं पति॑म् ॥१०॥
Asrigramindra te girah pratitvamudahasata, ajosha vrishabham patim
71.11
सं चो॑दय चि॒त्रम॒र्वाग् राध॑ इन्द्र॒ वरे॑ण्यम्। अस॒दित् ते॑ वि॒भु प्र॒भु ॥११॥
Sam chodaya chitramarvag radha indra varenyam, asadit te vibhu prabhu
71.12
अ॒स्मान्त्सु तत्र॑ चोद॒येन्द्र॑ रा॒ये रभ॑स्वतः । तुवि॑द्युम्न॒ यश॑स्वतः ॥१२॥
Asmantsu tatra chodayendra raye rabhasvatah, tuvidyumna yashasvatah
71.13
सं गोम॑दिन्द्र॒ वाज॑वद॒स्मे पृ॒थु श्रवो॑ बृ॒हत्। वि॒श्वायु॑र्धे॒ह्यक्षि॑तम् ॥१३॥
Sam gomadindra vajavadasme prithu shravo brihat, vishvayurdhehyakshitam
71.14
अ॒स्मे धे॑हि॒ श्रवो॑ बृ॒हद् द्यु॒म्नं स॑हस्र॒सात॑मम्। इन्द्र॒ ता र॒थिनी॒रिषः॑ ॥१४॥
Asme dhehi shravo brihad dyumnam sahasrasatamam, indra ta rathinirishah
71.15
वसो॒रिन्द्रं॒ वसु॑पतिं गी॒र्भिर्गृ॒णन्त॑ ऋ॒ग्मिय॑म्। होम॒ गन्ता॑रमू॒तये॑ ॥१५॥
Vasorindram vasupatim girbhirgrinanta rigmiyam, homa gantaramutaye
71.16
सु॒तेसु॑ते॒ न्योऽकसे बृ॒हद् बृ॑ह॒त एद॒रिः । इन्द्रा॑य शू॒षम॑र्चति ॥१६॥
Sutesute nyokase brihad brihata edarih, indraya shushamarchati