সূক্ত 71

71.1

মহাং ইন্দ্রঃ পরশ্চ নু মহিত্বমস্তু বজ্রিণে । দ্যৌর্ন প্রথিনা শবঃ ॥১॥

সমোহে বা য আশত নরস্তোকস্য সনিতৌ । বিপ্রাসো বা ধিয়ায়বঃ ॥২॥

যঃ কুক্ষিঃ সোমপাতমঃ সমুদ্র ইব পিন্বতে । উর্বীরাপো ন কাকুদঃ ॥৩॥

এবা হ্যস্য সূনৃতা বিরপ্শী গোমতী মহী। পক্বা শাখা ন দাশুষে ॥৪॥

এবা হি তে বিভূতয় ঊতয় ইন্দ্র মাবতে । সদ্যশ্চিৎ সন্তি দাশুষে ॥৫॥

এবা হ্যস্য কাম্যা স্তোম উক্থং চ শংস্যা । ইন্দ্রায় সোমপীতয়ে ॥৬॥

ইন্দ্রেহি মত্স্যন্ধসো বিশ্বেভিঃ সোমপর্বভিঃ । মহাং অভিষ্টিরোজসা ॥৭॥

এমেনং সৃজতা সুতে মন্দিমিন্দ্রায় মন্দিনে । চক্রিং বিশ্বানি চক্রয়ে ॥৮॥

মত্স্বা সুশিপ্র মন্দিভি স্তোমেভির্বিশ্বচর্ষণে । সচৈষু সবনেষ্বা ॥৯॥

অসৃগ্রমিন্দ্র তে গিরঃ প্রতিত্বামুদহাসত । অজোষা বৃষভং পতিম্ ॥১০॥

সং চোদয় চিত্রমর্বাগ্ রাধ ইন্দ্র বরেণ্যম্। অসদিৎ তে বিভু প্রভু ॥১১॥

অস্মান্ত্সু তত্র চোদয়েন্দ্র রায়ে রভস্বতঃ । তুবিদ্যুম্ন যশস্বতঃ ॥১২॥

সং গোমদিন্দ্র বাজবদস্মে পৃথু শ্রবো বৃহৎ। বিশ্বায়ুর্ধেহ্যক্ষিতম্ ॥১৩॥

অস্মে ধেহি শ্রবো বৃহদ্ দ্যুম্নং সহস্রসাতমম্। ইন্দ্র তা রথিনীরিষঃ ॥১৪॥

বসোরিন্দ্রং বসুপতিং গীর্ভির্গৃণন্ত ঋগ্মিয়ম্। হোম গন্তারমূতয়ে ॥১৫॥

সুতেসুতে ন্যোঽকসে বৃহদ্ বৃহত এদরিঃ । ইন্দ্রায় শূষমর্চতি ॥১৬॥