সূক্ত 127

127.1

॥ অথ কুন্তাপসূক্তানি ॥ খিলানি ।

ইদং জনা উপ শ্রুত নরাশংস স্তবিষ্যতে ।
ষষ্টিং সহস্রা নবতিং চ কৌরম আ রুশমেষু দদ্মহে ॥১॥

127.2

উষ্ট্রা যস্য প্রবাহণো বধূমন্তো দ্বির্দশ ।
বর্ষ্মা রথস্য নি জিহীডতে দিব ঈষমাণা উপস্পৃশঃ ॥২॥

127.3

এষ ইষায় মামহে শতং নিষ্কান্ দশ স্রজঃ ।
ত্রীণি শতান্যর্বতাং সহস্রা দশ গোনাম্ ॥৩॥

127.4

বচ্যস্ব রেভ বচ্যস্ব বৃক্ষে ন পক্বে শকুনঃ ।
নষ্টে জিহ্বা চর্চরীতি ক্ষুরো ন ভুরিজোরিব ॥৪॥

127.5

প্র রেভাসো মনীষা বৃষা গাব ইবেরতে ।
অমোতপুত্রকা এষামমোত গা ইবাসতে ॥৫॥

127.6

প্র রেভ ধীং ভরস্ব গোবিদং বসুবিদম্।
দেবত্রেমাং বাচং স্রীণীহীষুর্নাবীরস্তারম্ ॥৬॥

127.7

রাজ্ঞো বিশ্বজনীনস্য যো দেবোঽমর্ত্যাং অতি ।
বৈশ্বানরস্য সুষ্টুতিমা সুনোতা পরিক্ষিতঃ ॥৭॥

127.8

পরিচ্ছিন্নঃ ক্ষেমমকরোৎ তম আসনমাচরন্।
কুলায়ন্ কৃণ্বন্ কৌরব্যঃ পতির্বদতি জায়য়া ॥৮॥

127.9

কতরৎ ত আ হরাণি দধি মন্থাং পরি শ্রুতম্।
জায়াঃ পতিং বি পৃচ্ছতি রাষ্ট্রে রাজ্ঞঃ পরিক্ষিতঃ ॥৯॥

127.10

অভীবস্বঃ প্র জিহীতে যবঃ পক্বঃ পথো বিলম্।
জনঃ স ভদ্রমেধতি রাষ্ট্রে রাজ্ঞঃ পরিক্ষিতঃ ॥১০॥

127.11

ইন্দ্রঃ কারুমবূবুধদুত্তিষ্ঠ বি চরা জনম্।
মমেদুগ্রস্য চর্কৃধি সর্ব ইৎ তে পৃণাদরিঃ ॥১১॥

127.12

ইহ গাবঃ প্রজায়ধ্বমিহাশ্বা ইহ পূরুষাঃ ।
ইহো সহস্রদক্ষিণোঽপি পূষা নি ষীদতি ॥১২॥

127.13

নেমা ইন্দ্র গাবো রিষন্ মো আসাং গোপ রীরিষৎ।
মাসামমিত্রয়ুর্জন ইন্দ্র মা স্তেন ঈশত ॥১৩॥

127.14

উপ নো ন রমসি সূক্তেন বচসা বয়ং ভদ্রেণ বচসা বয়ম্।
বনাদধিধ্বনো গিরো ন রিষ্যেম কদা চন ॥১৪॥