সূক্ত 49

49.1

রাত্রিঃ। ১-১০ গোপথঃ, ভরদ্বাজশ্চ। রাত্রিঃ। অনুষ্টুপ্, ১-৫, ৮ ত্রিষ্টুপ্, ৬ আস্তারপঙ্ক্তিঃ, ৭ পথ্যাপঙ্ক্তিঃ, ১০ ত্র্যবসানা

ইষিরা যোষা যুবতির্দমূনা রাত্রী দেবস্য সবিতুর্ভগস্য ।
অশ্বক্ষভা সুহবা সংভৃতশ্রীরা পপ্রৌ দ্যাবাপৃথিবী মহিত্বা ॥১॥

49.2

অতি বিশ্বান্যরুহদ্ গম্ভীরো বর্ষিষ্ঠমরুহন্ত শ্রবিষ্ঠাঃ ।
উশতী রাত্র্যনু সা ভদ্রাভি তিষ্ঠতে মিত্র ইব স্বধাভিঃ ॥২॥

49.3

বর্যে বন্দে সুভগে সুজাত আজগন্ রাত্রি সুমনা ইহ স্যাম্।
অস্মাংস্ত্রায়স্ব নর্যাণি জাতা অথো যানি গব্যানি পুষ্ঠ্যা ॥৩॥

49.4

সিংহস্য রাত্র্যুশতী পীংষস্য ব্যাঘ্রস্য দ্বীপিনো বর্চ আ দদে ।
অশ্বস্য ব্রধ্নং পুরুষস্য মায়ুং পুরু রূপাণি কৃণুষে বিভাতী ॥৪॥

49.5

শিবাং রাত্রিমনুসূর্যং চ হিমস্য মাতা সুহবা নো অস্তু ।
অস্য স্তোমস্য সুভগে নি বোধ যেন ত্বা বন্দে বিশ্বাসু দিক্ষু ॥৫॥

49.6

স্তোমস্য নো বিভাবরি রাত্রি রাজেব জোষসে ।
আসাম সর্ববীরা ভবাম সর্ববেদসো ব্যুচ্ছন্তীরনূষসঃ ॥৬॥

49.7

শম্যা হ নাম দধিষে মম দিপ্সন্তি যে ধনা ।
রাত্রীহি তানসুতপা যস্তেনো ন বিদ্যতে যৎ পুনর্ন বিদ্যতে ॥৭॥

49.8

ভদ্রাসি রাত্রি চমসো ন বিষ্টো বিষ্বং গোরূপং যুবতির্বিভর্ষি ।
চক্ষুষ্মতী মে উশতী বপূংষি প্রতি ত্বং দিব্যা ন ক্ষামমুক্থাঃ ॥৮॥

49.9

যো অদ্য স্তেন আয়ত্যঘায়ুর্মর্ত্যো রিপুঃ ।
রাত্রী তস্য প্রতীত্য প্র গ্রীবাঃ প্র শিরো হনৎ ॥৯॥

49.10

প্র পাদৌ ন যথায়তি প্র হস্তৌ ন যথাশিষৎ।
যো মলিম্লুরুপায়তি স সংপিষ্টো অপায়তি ।
অপায়তি স্বপায়তি শুষ্কে স্থাণাবপায়তি ॥১০॥