Sukta 49

49.1

Ratrih, 1-10 gopathah, bharadvajashcha, ratrih, anushtup, 1-5, 8 trishtup, 6 astarapanktih, 7 pathyapanktih, 10 tryavasana

इ॒षि॒रा योषा॑ युव॒तिर्दमू॑ना॒ रात्री॑ दे॒वस्य॑ सवि॒तुर्भग॑स्य ।
अ॒श्व॒क्ष॒भा सु॒हवा॒ संभृ॑तश्री॒रा प॑प्रौ॒ द्यावा॑पृथि॒वी म॑हि॒त्वा ॥१॥

Ishira yosha yuvatirdamuna ratri devasya saviturbhagasya
Ashvakshabha suhava sambhritashrira paprau dyavaprithivi mahitva

49.2

अति॒ विश्वा॑न्यरुहद् गम्भी॒रो वर्षि॑ष्ठमरुहन्त॒ श्रवि॑ष्ठाः ।
उ॒श॒ती रात्र्यनु॒ सा भ॒द्राभि ति॑ष्ठते मि॒त्र इ॑व स्व॒धाभिः॑ ॥२॥

Ati vishvanyaruhad gambhiro varshishthamaruhanta shravishthah
Ushati ratryanu sa bhadrabhi tishthate mitra iva svadhabhih

49.3

वर्ये॒ वन्दे॒ सुभ॑गे॒ सुजा॑त॒ आज॑ग॒न् रात्रि॑ सु॒मना॑ इ॒ह स्या॑म्।
अ॒स्मांस्त्रा॑यस्व॒ नर्या॑णि जा॒ता अथो॒ यानि॒ गव्या॑नि पु॒ष्ठ्या ॥३॥

Varye vande subhage sujata ajagan ratri sumana iha syam
Asmanstrayasva naryani jata atho yani gavyani pushthya

49.4

सिं॒हस्य॒ रात्र्यु॑श॒ती पीं॒षस्य॑ व्या॒घ्रस्य॑ द्वी॒पिनो॒ वर्च॒ आ द॑दे ।
अश्व॑स्य ब्र॒ध्नं पुरु॑षस्य मा॒युं पु॒रु रू॒पाणि॑ कृणुषे विभा॒ती ॥४॥

Sinhasya ratryushati pinshasya vyaghrasya dvipino varcha a dade
Ashvasya bradhnam purushasya mayum puru rupani krinushe vibhati

49.5

शि॒वां रात्रि॑मनु॒सूर्यं॑ च हि॒मस्य॑ मा॒ता सु॒हवा॑ नो अस्तु ।
अ॒स्य स्तोम॑स्य सुभगे॒ नि बो॑ध॒ येन॑ त्वा॒ वन्दे॒ विश्वा॑सु दि॒क्षु ॥५॥

Shivam ratrimanusuryam cha himasya mata suhava no astu
Asya stomasya subhage ni bodha yena tva vande vishvasu dikshu

49.6

स्तोम॑स्य नो विभावरि॒ रात्रि॒ राजे॑व जोषसे ।
आसा॑म॒ सर्व॑वीरा॒ भवा॑म॒ सर्व॑वेदसो व्यु॒च्छन्ती॒रनू॒षसः॑ ॥६॥

Stomasya no vibhavari ratri rajeva joshase
Asama sarvavira bhavama sarvavedaso vyuchchhantiranushasah

49.7

शम्या॑ ह॒ नाम॑ दधि॒षे मम॒ दिप्स॑न्ति॒ ये धना॑ ।
रात्री॒हि तान॑सुत॒पा यस्ते॒नो न वि॒द्यते॒ यत् पुन॒र्न वि॒द्यते॑ ॥७॥

Shamya ha nama dadhishe mama dipsanti ye dhana
Ratrihi tanasutapa yasteno na vidyate yat punarna vidyate

49.8

भ॒द्रासि॑ रात्रि चम॒सो न वि॒ष्टो विष्वं॒ गोरू॑पं युव॒तिर्बि॑भर्षि ।
चक्षु॑ष्मती मे उश॒ती वपूंषि॒ प्रति॒ त्वं दि॒व्या न क्षाम॑मुक्थाः ॥८॥

Bhadrasi ratri chamaso na vishto vishvam gorupam yuvatirbibharshi
Chakshushmati me ushati vapunshi prati tvam divya na kshamamukthah

49.9

यो अ॒द्य स्ते॒न आय॑त्यघा॒युर्मर्त्यो॑ रि॒पुः ।
रात्री॒ तस्य॑ प्र॒तीत्य॒ प्र ग्री॒वाः प्र शिरो॑ हनत् ॥९॥

Yo adya stena ayatyaghayurmartyo ripuh
Ratri tasya pratitya pra grivah pra shiro hanat

49.10

प्र पादौ॒ न यथाय॑ति॒ प्र हस्तौ॒ न यथाशि॑षत्।
यो म॑लि॒म्लुरु॒पाय॑ति॒ स संपि॑ष्टो॒ अपा॑यति ।
अपा॑यति॒ स्वपा॑यति॒ शुष्के॑ स्था॒णावपा॑यति ॥१०॥

Pra padau na yathayati pra hastau na yathashishat
Yo malimlurupayati sa sampishto apayati
Apayati svapayati shushke sthanavapayati