Sukta 50

50.1

Ratrih, 1-7 gopathah, ratrih, anushtup

अध॑ रात्रि तृ॒ष्टधू॑ममशी॒र्षाण॒महिं॑ कृणु ।
अ॒क्षौ वृक॑स्य॒ निर्ज॑ह्या॒स्तेन॒ तं द्रु॑प॒दे ज॑हि ॥१॥

Adha ratri trishtadhumamashirshanamahim krinu
Akshau vrikasya nirjahyastena tam drupade jahi

50.2

ये ते॑ रात्र्यन॒ड्वाह॒स्तीक्ष्ण॑शृङ्गाः स्वा॒शवः॑ ।
तेभि॑र्नो अ॒द्य पा॑र॒याति॑ दु॒र्गाणि॑ वि॒श्वहा॑ ॥२॥

Ye te ratryanadvahastikshnashringah svashavah
Tebhirno adya parayati durgani vishvaha

50.3

रात्रिं॑रात्रि॒मरि॑ष्यन्त॒स्तरे॑म त॒न्वा व॒यम्।
ग॒म्भी॒रमप्ल॑वा इव॒ न त॑रेयु॒ररा॑तयः ॥३॥

Ratrinratrimarishyantastarema tanva vayam
Gambhiramaplava iva na tareyuraratayah

50.4

यथा॑ शा॒म्याकः॑ प्र॒पत॑न्नप॒वान् नानु॑वि॒द्यते॑ ।
ए॒वा रा॑त्रि॒ प्र पा॑तय॒ यो अ॒स्मां अ॑भ्यघा॒यति ॥४॥

Yatha shamyakah prapatannapavan nanuvidyate
Eva ratri pra pataya yo asmam abhyaghayati

50.5

अप॑ स्ते॒नं वासो॑ गोअ॒जमु॒त तस्क॑रम्।
अथो॒ यो अर्व॑तः॒ शिरो॑ऽभि॒धाय॒ निनी॑षति ॥५॥

Apa stenam vaso goajamuta taskaram
Atho yo arvatah shirobhidhaya ninishati

50.6

यद॒द्या रा॑त्रि सुभगे वि॒भज॒न्त्ययो॒ वसु॑ ।
यदे॒तद॒स्मान् भो॑जय॒ यथेद॒न्यानु॒पाय॑सि ॥६॥

Yadadya ratri subhage vibhajantyayo vasu
Yadetadasman bhojaya yathedanyanupayasi

50.7

उ॒षसे॑ नः॒ परि॑ देहि॒ सर्वा॒न् रात्र्य॑ना॒गसः॑ ।
उ॒षा नो॒ अह्ने॒ आ भ॑जा॒दह॒स्तुभ्यं॑ विभावरि ॥७॥

Ushase nah pari dehi sarvan ratryanagasah
Usha no ahne a bhajadahastubhyam vibhavari