সূক্ত 2

2.1

পিতৃমেধঃ। ১-৬০ অথর্বা। যমঃ, মন্ত্রোক্তাঃ, ৪, ৩৪ অগ্নিঃ, ৫ জাতবেদাঃ, ২৯ পিতরঃ। ত্রিষ্টুপ্, ১-৩, ৬, ১৪- ১৮, ২০, ২২-২৩, ২৫, ৩০, ৩৪, ৩৬, ৪৬, ৪৮, ৫০-৫২, ৫৬ অনুষ্টুপ্, ৪, ৭, ৯, ১৩ জগতী, ৫ , ২৬, ৪৯, ৫৭ ভুরিক্, ১৯ ত্রিপদাঽর্ষী গায়ত্রী, ২৪ ত্রিপদা সমবিষমাঽর্ষী গায়ত্রী, ৩৭ বিরাড্ জগতী, ৩৮-৪৪ আর্ষী গায়ত্রী, (৪০, ৪২-৪৪ ভুরিক্) ৪৫ ককুম্মতী অনুষ্টুপ্।

যমায় সোমঃ পবতে যমায় ক্রিয়তে হবিঃ ।
যমং হ যজ্ঞো গচ্ছত্যগ্নিদূতো অরংকৃতঃ ॥১॥

2.2

যমায় মধুমত্তমং জুহোতা প্র চ তিষ্ঠত ।
ইদং নম ঋষিভ্যঃ পূর্বজেভ্যঃ পূর্বেভ্যঃ পথিকৃদ্ভ্যঃ ॥২॥

2.3

যমায় ঘৃতবৎ পয়ো রাজ্ঞে হবির্জুহোতন ।
স নো জীবেষ্বা যমেদ্ দীর্ঘমায়ুঃ প্র জীবসে ॥৩॥

2.4

মৈনমগ্নে বি দহো মাভি শূশুচো মাস্য ত্বচং চিক্ষিপো মা শরীরম্।
শৃতং যদা করসি জাতবেদোঽথেমেনং প্র হিণুতাৎ পিতৄঁরুপ ॥৪॥

2.5

যদা শৃতং কৃণবো জাতবেদোঽথেমমেনং পরি দত্তাৎ পিতৃভ্যঃ ।
যদো গচ্ছাত্যসুনীতিমেতামথ দেবানাং বশনীর্ভবাতি ॥৫॥

2.6

ত্রিকদ্রুকেভিঃ পবতে ষডুর্বীরেকমিদ্ বৃহৎ।
ত্রিষ্টুব্ গায়ত্রী ছন্দাংসি সর্বা তা যম আর্পিতা ॥৬॥

2.7

সূর্যং চক্ষুষা গচ্ছ বাতমাত্মনা দিবং চ গচ্ছ পৃথিবীং চ ধর্মভিঃ ।
অপো বা গচ্ছ যদি তত্র তে হিতমোষধীষু প্রতি তিষ্ঠা শরীরৈঃ ॥৭॥

2.8

অজো ভাগস্তপসস্তং তপস্ব তং তে শোচিস্তপতু তং তে অর্চিঃ ।
যাস্তে শিবাস্তন্বোঽ জাতবেদস্তাভির্বহৈনং সুকৃতামু লোকম্ ॥৮॥

2.9

যাস্তে শোচয়ো রংহয়ো জাতবেদো যাভিরাপৃণাসি দিবমন্তরিক্ষম্।
অজং যন্তমনু তাঃ সমৃণ্বতামথেতরাভিঃ শিবতমাভিঃ শৃতং কৃধি ॥৯॥

2.10

অব সৃজ পুনরগ্নে পিতৃভ্যো যস্ত আহুতশ্চরতি স্বধাবান্।
আয়ুর্বসান উপ যাতু শেষঃ সং গচ্ছতাং তন্বা সুবর্চাঃ ॥১০॥

2.11

অতি দ্রব শ্বানৌ সারমেয়ৌ চতুরক্ষৌ শবলৌ সাধুনা পথা।
অধা পিতৄন্ত্সুবিদত্রাং অপীহি যমেন যে সধমাদং মদন্তি ॥১১॥

2.12

যৌ তে শ্বানৌ যম রক্ষিতারৌ চতুরক্ষৌ পথিষদী নৃচক্ষসা । তাভ্যাং রাজন্ পরি ধেহ্যেনং স্বস্ত্যঽস্মা অনমীবং চ ধেহি ॥১২॥

2.13

উরূণসাবসুতৃপাবুদুম্বলৌ যমস্য দূতৌ চরতো জনাং অনু ।
তাবস্মভ্যং দৃশয়ে সূর্যায় পুনর্দাতামসুমদ্যেহ ভদ্রম্ ॥১৩॥

2.14

সোম একেভ্যঃ পবতে ঘৃতমেক উপাসতে ।
যেভ্যো মধু প্রধাবতি তাংশ্চিদেবাপি গচ্ছতাৎ ॥১৪॥

2.15

যে চিৎ পূর্ব ঋতসাতা ঋতজাতা ঋতাবৃধঃ ।
ঋষীন্ তপস্বতো যম তপোজাং অপি গচ্ছতাৎ ॥১৫॥

2.16

তপসা যে অনাধৃষ্যাস্তপসা যে স্বঽর্যয়ুঃ ।
তপো যে চক্রিরে মহস্তাংশ্চিদেবাপি গচ্ছতাৎ ॥১৬॥

2.17

যে যুধ্যন্তে প্রধনেষু শূরাসো যে তনূত্যজঃ ।
যে বা সহস্রদক্ষিণাস্তাংশ্চিদেবাপি গচ্ছতাৎ ॥১৭॥

2.18

সহস্রণীথাঃ কবয়ো যে গোপায়ন্তি সূর্যম্।
ঋষীন্ তপস্বতো যম তপোজাং অপি গচ্ছতাৎ ॥১৮॥

2.19

স্যোনাস্মৈ ভব পৃথিব্যনৃক্ষরা নিবেশনী ।
যচ্ছাস্মৈ শর্ম সপ্রথাঃ ॥১৯॥

2.20

অসংবাধে পৃথিব্যা উরৌ লোকে নি ধীয়স্ব ।
স্বধা যাশ্চকৃষে জীবন্ তাস্তে সন্তু মধুশ্চুতঃ ॥২০॥

2.21

হ্বয়ামি তে মনসা মন ইহেমান্ গৃহাঁ উপ জুজুষাণ এহি ।
সং গচ্ছস্ব পিতৃভিঃ সং যমেন স্যোনাস্ত্বা বাতা উপ বান্তু শগ্মাঃ ॥২১॥

2.22

উৎ ত্বা বহন্তু মরুত উদবাহা উদপ্রুতঃ ।
অজেন কৃণ্বন্তঃ শীতং বর্ষেণোক্ষন্তু বালিতি ॥২২॥

2.23

উদহ্বমায়ুরায়ুষে ক্রত্বে দক্ষায় জীবসে ।
স্বান্ গচ্ছতু তে মনো অধা পিতৄংরুপ দ্রব ॥২৩॥

2.24

মা তে মনো মাসোর্মাঙ্গানাং মা রসস্য তে ।
মা তে হাস্ত তন্বঃ১ কিং চনেহ ॥২৪॥

2.25

মা ত্বা বৃক্ষঃ সং বাধিষ্ট মা দেবী পৃথিবী মহী।
লোকং পিতৃষু বিত্ত্বৈধস্ব যমরাজসু ॥২৫॥

2.26

যৎ তে অঙ্গমতিহিতং পরাচৈরপানঃ প্রাণো য উ বা তে পরেতঃ ।
তৎ তে সংগত্য পিতরঃ সনীডা ঘাসাদ্ ঘাসং পুনরা বেশয়ন্তু ॥২৬॥

2.27

অপেমং জীবা অরুধন্ গৃহেভ্যস্তং নির্বহত পরি গ্রামাদিতঃ ।
মৃত্যুর্যমস্যাসীদ্ দূতঃ প্রচেতা অসূন্ পিতৃভ্যো গময়াং চকার ॥২৭॥

2.28

যে দস্যবঃ পিতৃষু প্রবিষ্টা জ্ঞাতিমুখা অহুতাদশ্চরন্তি ।
পরাপুরো নিপুরো যে ভরন্ত্যগ্নিষ্টানস্মাৎ প্র ধমাতি যজ্ঞাৎ ॥২৮॥

2.29

সং বিশন্ত্বিহ পিতরঃ স্বা নঃ স্যোনং কৃণ্বন্তঃ প্রতিরন্ত আয়ুঃ ।
তেভ্যঃ শকেম হবিষা নক্ষমাণা জ্যোগ্ জীবন্তঃ শরদঃ পুরূচীঃ ॥২৯॥

2.30

যাং তে ধেনুং নিপৃণামি যমু তে ক্ষীর ওদনম্।
তেনা জনস্যাসো ভর্তা যোঽত্রাসদজীবনঃ ॥৩০॥

2.31

অশ্বাবতীং প্র তর যা সুশেবার্ক্ষাকং বা প্রতরং নবীয়ঃ ।
যস্ত্বা জঘান বধ্যঃ সো অস্তু মা সো অন্যদ্ বিদত ভাগধেয়ম্ ॥৩১॥

2.32

যমঃ পরোঽবরো বিবস্বান্ ততঃ পরং নাতি পশ্যামি কিং চন।
যমে অধ্বরো অধি মে নিবিষ্টো ভুবো বিবস্বানন্বাততান ॥৩২॥

2.33

অপাগূহন্নমৃতাং মর্ত্যেভ্যঃ কৃত্বা সবর্ণামদধুর্বিবস্বতে ।
উতাশ্বিনাবভরদ্ যৎ তদাসীদজহাদু দ্বা মিথুনা সরণ্যূঃ ॥৩৩॥

2.34

যে নিখাতা যে পরোপ্তা যে দগ্ধা যে চোদ্ধিতাঃ ।
সর্বাংস্তানগ্ন আ বহ পিতৄন্ হবিষে অত্তবে ॥৩৪॥

2.35

যে অগ্নিদগ্ধা যে অনগ্নিদগ্ধা মধ্যে দিবঃ স্বধয়া মাদয়ন্তে ।
ত্বং তান্ বেত্থ যদি তে জাতবেদঃ স্বধয়া যজ্ঞং স্বধিতিং জুষন্তাম্ ॥৩৫॥

2.36

শং তপ মাতি তপো অগ্নে মা তন্বং১ তপঃ ।
বণেষু শুষ্মো অস্তু তে পৃথিব্যামস্তু যদ্ধরঃ ॥৩৬॥

2.37

দদাম্যস্মা অবসানমেতদ্ য এষ আগন্ মম চেদভূদিহ।
যমশ্চিকিত্বান্ প্রত্যেতদাহ মমৈষ রায় উপ তিষ্ঠতামিহ ॥৩৭॥

2.38

ইমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৩৮॥

2.39

প্রেমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৩৯॥

2.40

অপেমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৪০॥

2.41

বী৩মাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৪১॥

2.42

নিরিমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৪২॥

2.43

উদিমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৪৩॥

2.44

সমিমাং মাত্রাং মিমীমহে যথাপরং ন মাসাতৈ ।
শতে শরত্সু নো পুরা ॥৪৪॥

2.45

অমাসি মাত্রাং স্বঽরগামায়ুষ্মান্ ভূয়াসম্।
যথাপরং ন মাসাতৈ শতে শরত্সু নো পুরা ॥৪৫॥

2.46

প্রাণো অপানো ব্যান আয়ুশ্চক্ষুর্দৃশয়ে সূর্যায় ।
অপরিপরেণ পথা যমরাজ্ঞঃ পিতৄন্ গচ্ছ ॥৪৬॥

2.47

যে অগ্রবঃ শশমানাঃ পরেয়ুর্হিত্বা দ্বেষাংস্যনপত্যবন্তঃ ।
তে দ্যামুদিত্যাবিদন্ত লোকং নাকস্য পৃষ্ঠে অধি দীধ্যানাঃ ॥৪৭॥

2.48

উদন্বতী দ্যৌরবমা পীলুমতীতি মধ্যমা।
তৃতীয়া হ প্রদ্যৌরিতি যস্যাং পিতর আসতে ॥৪৮॥

2.49

যে ন পিতুঃ পিতরো যে পিতামহা য আবিবিশুরুর্ব১ন্তরিক্ষম্।
য আক্ষিয়ন্তি পৃথিবীমুত দ্যাং তেভ্যঃ পিতৃভ্যো নমসা বিধেম ॥৪৯॥

2.50

ইদমিদ্ বা উ নাপরং দিবি পশ্যসি সূর্যম্।
মাতা পুত্রং যথা সিচাভ্যেঽনং ভূম ঊর্ণুহি ॥৫০॥

2.51

ইদমিদ্ বা উ নাপরং জরস্যন্যদিতোঽপরম্।
জায়া পতিমিব বাসসাভ্যেঽনং ভূম ঊর্ণুহি ॥৫১॥

2.52

অভি ত্বোর্ণোমি পৃথিব্যা মাতুর্বস্ত্রেণ ভদ্রয়া ।
জীবেষু ভদ্রং তন্ময়ি স্বধা পিতৃষু সা ত্বয়ি ॥৫২॥

2.53

অগ্নীষোমা পথিকৃতা স্যোনং দেবেভ্যো রত্নং দধথুর্বি লোকম্।
উপ প্রেষ্যন্তং পূষণং যো বহাত্যঞ্জোয়ানৈঃ পথিভিস্তত্র গচ্ছতম্ ॥৫৩॥

2.54

পূষা ত্বেতশ্চ্যাবয়তু প্র বিদ্বাননষ্টপশুর্ভুবনস্য গোপাঃ ।
স ত্বৈতেভ্যঃ পরি দদৎ পিতৃভ্যোঽগ্নির্দেবেভ্যঃ সুবিদত্রিয়েভ্যঃ ॥৫৪॥

2.55

আয়ুর্বিশ্বায়ুঃ পরি পাতু ত্বা পূষা ত্বা পাতু প্রপথে পুরস্তাৎ।
যত্রাসতে সুকৃতো যত্র ত ঈয়ুস্তত্র ত্বা দেবঃ সবিতা দধাতু ॥৫৫॥

2.56

ইমৌ যুনজ্মি তে বহ্নী অসুনীতায় বোঢবে ।
তাভ্যাং যমস্য সাদনং সমিতীশ্চাব গচ্ছতাৎ ॥৫৬॥

2.57

এতৎ ত্বা বাসঃ প্রথমং ন্বাগন্নপৈতদূহ যদিহাবিভঃ পুরা।
ইষ্টাপূর্তমনুসংক্রাম বিদ্বান্ যত্র তে দত্তং বহুধা বিবন্ধুষু ॥৫৭॥

2.58

অগ্নের্বর্ম পরি গোভির্ব্যয়স্ব সং প্রোর্ণুষ্ব মেদসা পীবসা চ ।
নেৎ ত্বা ধৃষ্ণুর্হরসা জর্হৃষাণো দধৃগ্ বিধক্ষন্ পরীঙ্খয়াতৈ ॥৫৮॥

2.59

দণ্ডং হস্তাদাদদানো গতাসোঃ সহ শ্রোত্রেণ বর্চসা বলেন ।
অত্রৈব ত্বমিহ বয়ং সুবীরা বিশ্বা মৃধো অভিমাতীর্জয়েম ॥৫৯॥

2.60

ধনুর্হস্তাদাদদানো মৃতস্য সহ ক্ষত্রেণ বর্চসা বলেন ।
সমাগৃভায় বসু ভূরি পুষ্টমর্বাঙ্ত্বমেহ্যুপ জীবলোকম্ ॥৬০॥