সূক্ত 1

1.1

পিতৃমেধঃ। ১-৬১ অথর্বা। যমঃ।, মন্ত্রোক্তাঃ, ৪০ রুদ্রঃ, ৪১-৪৩ সরস্বতী, ৪৪-৪৬, ৫১-৫২ পিতরঃ। ত্রিষ্টুপ্, ৮, ১৫ আর্ষী পঙ্ক্তিঃ, ১৪, ৪৯-৫০ ভুরিক্, ১৮-২০, ২১-২৩ জগতী, ৩৭-৩৮ পরোষ্ণিক্, ৫৬-৫৭, ৬১ অনুষ্টুপ্, ৫৯ পুরোবৃহতী।

ও চিৎ সখায়ং সখ্যা ববৃত্যাং তিরঃ পুরু চিদর্ণবং জগন্বান্।
পিতুর্নপাতমা দধীত বেধা অধি ক্ষমি প্রতরং দীধ্যানঃ ॥১॥

1.2

ন তে সখা সখ্যং বষ্ট্যেতৎ সলক্ষ্মা যদ্ বিষুরূপা ভবাতি ।
মহস্পুত্রাসো অসুরস্য বীরা দিবো ধর্তার উর্বিয়া পরি খ্যন্ ॥২॥

1.3

উশন্তি ঘা তে অমৃতাস এতদেকস্য চিৎ ত্যজসং মর্ত্যস্য ।
নি তে মনো মনসি ধায্যস্মে জন্যুঃ পতিস্তন্ব১মা বিবিশ্যাঃ ॥৩॥

1.4

ন যৎ পুরা চকৃমা কদ্ধ নূনমৃতং বদন্তো অনৃতং রপেম ।
গন্ধর্বো অপ্স্বপ্যা চ যোষা সা নৌ নাভিঃ পরমং জামি তন্নৌ ॥৪॥

1.5

গর্ভে নু নৌ জনিতা দম্পতী কর্দেবস্ত্বষ্টা সবিতা বিশ্বরূপঃ ।
নকিরস্য প্র মিনন্তি ব্রতানি বেদ নাবস্য পৃথিবী উত দ্যৌঃ ॥৫॥

1.6

কো অদ্য যুঙ্ক্তে ধুরি গা ঋতস্য শিমীবতো ভামিনো দুর্হৃণায়ূন্।
আসন্নিষূন্ হৃত্স্বসো ময়োভূন্ য এষাং ভৃত্যামৃণধৎ স জীবাৎ ॥৬॥

1.7

কো অস্য বেদ প্রথমস্যাহ্নঃ ক ঈং দদর্শ ক ইহ প্র বোচৎ।
বৃহন্মিত্রস্য বরুণস্য ধাম কদু ব্রব আহনো বীচ্যা নৄন্ ॥৭॥

1.8

যমস্য মা যম্যং কাম আগন্ত্সমানে যোনৌ সহশেয্যায় ।
জায়েব পত্যে তন্বং রিরিচ্যাং বি চিদ্ বৃহেব রথ্যেব চক্রা ॥৮॥

1.9

ন তিষ্ঠন্তি ন নি মিষন্ত্যেতে দেবানাং স্পশ ইহ যে চরন্তি ।
অন্যেন মদাহনো যাহি তূয়ং তেন বি বৃহ রথ্যেব চক্রা ॥৯॥

1.10

রাত্রীভিরস্মা অহভির্দশস্যেৎ সূর্যস্য চক্ষুর্মুহুরুন্মিমীয়াৎ।
দিবা পৃথিব্যা মিথুনা সবন্ধূ যমীর্যমস্য বিবৃহাদজামি ॥১০॥

1.11

আ ঘা তা গচ্ছানুত্তরা যুগানি যত্র জাময়ঃ কৃণবন্নজামি ।
উপ বর্বৃহি বৃষভায় বাহুমন্যমিচ্ছস্ব সুভগে পতিং মৎ ॥১১॥

1.12

কিং ভ্রাতাসদ্ যদনাথং ভবাতি কিমু স্বসা যন্নিরৃতির্নিগচ্ছাৎ।
কামমূতা বহ্বে৩তদ্ রপামি তন্বাঽমে তন্বং১ সং পিপৃগ্ধি ॥১২॥

1.13

ন তে নাথং যম্যত্রাহমস্মি ন তে তনূং তন্বা৩ সং পপৃচ্যাম্।
অন্যেন মৎ প্রমুদঃ কল্পয়স্ব ন তে ভ্রাতা সুভগে বষ্ট্যেতৎ ॥১৩॥

1.14

ন বা উ তে তনূং তন্বা৩ সং পপৃচ্যাং পাপমাহুর্যঃ স্বসারং নিগচ্ছাৎ।
অসংয়দেতন্মনসো হৃদো মে ভ্রাতা স্বসুঃ শয়নে যচ্ছয়ীয় ॥১৪॥

1.15

বতো বতাসি যম নৈব তে মনো হৃদয়ং চাবিদামা।
অন্যা কিল ত্বাং কক্ষ্যেঽব যুক্তং পরি ষ্বজাতৈ লিবুজেব বৃক্ষম্ ॥১৫॥

1.16

অন্যমূ ষু যম্যন্য উ ত্বাং পরি ষ্বজাতৈ লিবুজেব বৃক্ষম্।
তস্য বা ত্বং মন ইচ্ছা স বা তবাধা কৃণুষ্ব সবিদং সুভদ্রাম্ ॥১৬॥

1.17

ত্রীণি চ্ছন্দাংসি কবয়ো বি যেতিরে পুরুরূপং দর্শতং বিশ্বচক্ষণম্।
আপো বাতা ওষধয়স্তান্যেকস্মিন্ ভুবন আর্পিতানি ॥১৭॥

1.18

বৃষা বৃষ্ণে দুদুহে দোহসা দিবঃ পয়াংসি যহ্বো অদিতেরদাভ্যঃ ।
বিশ্বং স বেদ বরুণো যথা ধিয়া স যজ্ঞিয়ো যজতি যজ্ঞিয়াং ঋতূন্ ॥১৮॥

1.19

রপদ্ গন্ধর্বীরপ্যা চ যোষণা নদস্য নাদে পরি পাতু নো মনঃ ।
ইষ্টস্য মধ্যে অদিতির্নি ধাতু নো ভ্রাতা নো জ্যেষ্ঠঃ প্রথমো বি বোচতি ॥১৯॥

1.20

সো চিন্নু ভদ্রা ক্ষুমতী উশস্বত্যুষা উবাস মনবে স্বঽর্বতী ।
যদীমুশন্তমুশতামনু ক্রতুমগ্নিং হোতারং বিদথায় জীজনন্ ॥২০॥

1.21

অধ ত্যং দ্রপ্সং বিভ্বং বিচক্ষণং বিরাভরদিষিরঃ শ্যেনো অধ্বরে।
যদী বিশো বৃণতে দস্মমার্যা অগ্নিং হোতারমধ ধীরজায়ত ॥২১॥

1.22

সদাসি রণ্বো যবসেব পুষ্যতে হোত্রাভিরগ্নে মনুষঃ স্বধ্বরঃ ।
বিপ্রস্য বা যচ্ছশমান উক্থ্যো৩ বাজং সসবাং উপয়াসি ভূরিভিঃ ॥২২॥

1.23

উদীরয় পিতরা জার আ ভগমিয়ক্ষতি হর্যতো হৃত্ত ইষ্যতি ।
বিবক্তি বহ্নিঃ স্বপস্যতে মখস্তবিষ্যতে অসুরো বেপতে মতী ॥২৩॥

1.24

যস্তে অগ্নে সুমতিং মর্তো অখ্যৎ সহসঃ সূনো অতি স প্র শৃণ্বে ।
ইষং দধানো বহমানো অশ্বৈরা স দ্যুমাং অমবান্ ভূষতি দ্যূন্ ॥২৪॥

1.25

শ্রুধী নো অগ্নে সদনে সধস্থে যুক্ষ্বা রথমমৃতস্য দ্রবিত্নুম্।
আ নো বহ রোদসী দেবপুত্রে মাকির্দেবানামপ ভূরিহ স্যাঃ ॥২৫॥

1.26

যদগ্ন এষা সমিতির্ভবাতি দেবী দেবেষু যজতা যজত্র ।
রত্না চ যদ্ বিভজাসি স্বধাবো ভাগং নো অত্র বসুমন্তং বীতাৎ ॥২৬॥

1.27

অন্বগ্নিরুষসামগ্রমখ্যদন্বহানি প্রথমো জাতবেদাঃ ।
অনু সূর্য উষসো অনু রশ্মীননু দ্যাবাপৃথিবী আ বিবেশ ॥২৭॥

1.28

প্রত্যগ্নিরুষসামগ্রমখ্যৎ প্রত্যহানি প্রথমো জাতবেদাঃ ।
প্রতি সূর্যস্য পুরুধা চ রশ্মীন্ প্রতি দ্যাবাপৃথিবী আ ততান ॥২৮॥

1.29

দ্যাবা হ ক্ষামা প্রথমে ঋতেনাভিশ্রাবে ভবতঃ সত্যবাচা ।
দেবো যন্মর্তান্ যজথায় কৃণ্বন্ত্সীদদ্ধোতা প্রত্যঙ্ স্বমসুং যন্ ॥২৯॥

1.30

দেবো দেবান্ পরিভূরৃতেন বহা নো হব্যং প্রথমশ্চিকিত্বান্।
ধূমকেতুঃ সমিধা ভাঋজীকো মন্দ্রো হোতা নিত্যো বাচা যজীয়ান্ ॥৩০॥

1.31

অর্চামি বাং বর্ধায়াপো ঘৃতস্নূ দ্যাবাভূমী শৃণুতং রোদসী মে ।
অহা যদ্ দেবা অসুনীতিমায়ন্ মধ্বা নো অত্র পিতরা শিশীতাম্ ॥৩১॥

1.32

স্বাবৃগ্ দেবস্যামৃতং যদী গোরতো জাতাসো ধারয়ন্ত উর্বী।
বিশ্বে দেবা অনু তৎ তে যজুর্গুর্দুহে যদেনী দিব্যং ঘৃতং বাঃ ॥৩২॥

1.33

কিং স্বিন্নো রাজা জগৃহে কদস্যাতি ব্রতং চকৃমা কো বি বেদ ।
মিত্রস্চিদ্ধি ষ্মা জুহুরাণো দেবাংছ্লোকো ন যাতামপি বাজো অস্তি ॥৩৩॥

1.34

দুর্মন্ত্বত্রামৃতস্য নাম সলক্ষ্মা যদ্ বিষুরূপা ভবাতি ।
যমস্য যো মনবতে সুমন্ত্বগ্নে তমৃষ্ব পাহ্যপ্রয়ুচ্ছন্ ॥৩৪॥

1.35

যস্মিন্ দেবা বিদথে মাদয়ন্তে বিবস্বতঃ সদনে ধারয়ন্তে ।
সূর্যে জ্যোতিরদধুর্মাস্য১ক্তূন্ পরি দ্যোতনিং চরতো অজস্রা ॥৩৫॥

1.36

যস্মিন্ দেবা মন্মনি সংচরন্ত্যপীচ্যে৩ ন বয়মস্য বিদ্ম ।
মিত্রো নো অত্রাদিতিরনাগান্ত্সবিতা দেবো বরুণায় বোচৎ ॥৩৬॥

1.37

সখায় আ শিষামহে ব্রহ্মেন্দ্রায় বজ্রিণে ।
স্তুষ ঊ ষু নৃতমায় ধৃষ্ণবে ॥৩৭॥

1.38

শবসা হ্যসি শ্রুতো বৃত্রহত্যেন বৃত্রহা।
মঘৈর্মঘোনো অতি শূর দাশসি ॥৩৮॥

1.39

স্তেগো ন ক্ষামত্যেষি পৃথিবীং মহী নো বাতা ইহ বান্তু ভূমৌ ।
মিত্রো নো অত্র বরুণো যুজমানো অগ্নির্বনে ন ব্যসৃষ্ট শোকম্ ॥৩৯॥

1.40

স্তুহি শ্রুতং গর্তসদং জনানাং রাজানং ভীমমুপহত্নুমুগ্রম্।
মৃডা জরিত্রে রুদ্র স্তবানো অন্যমস্মৎ তে নি বপন্তু সেন্যম্ ॥৪০॥

1.41

সরস্বতীং দেবয়ন্তো হবন্তে সরস্বতীমধ্বরে তায়মানে ।
সরস্বতীং সুকৃতো হবন্তে সরস্বতী দাশুষে বার্যং দাৎ ॥৪১॥

1.42

সরস্বতীং পিতরো হবন্তে দক্ষিণা যজ্ঞমভিনক্ষমাণাঃ ।
আসদ্যাস্মিন্ বর্হিষি মাদয়ধ্বমনমীবা ইষ আ ধেহ্যস্মে ॥৪২॥

1.43

সরস্বতি যা সরথং যয়াথোক্থৈঃ স্বধাভির্দেবি পিতৃভির্মদন্তী ।
সহস্রার্ঘমিডো অত্র ভাগং রায়স্পোষং যজমানায় ধেহি ॥৪৩॥

1.44

উদীরতামবর উৎ পরাস উন্মধ্যমাঃ পিতরঃ সোম্যাসঃ ।
অসুং য ঈয়ুরবৃকা ঋতজ্ঞাস্তে নোঽবন্তু পিতরো হবেষু ॥৪৪॥

1.45

আহং পিতৃন্ত্সুবিদত্রাং অবিত্সি নপাতং চ বিক্রমণং চ বিষ্ণোঃ ।
বর্হিষদো যে স্বধয়া সুতস্য ভজন্ত পিত্বস্ত ইহাগমিষ্ঠাঃ ॥৪৫॥

1.46

ইদং পিতৃভ্যো নমো অস্ত্বদ্য যে পূর্বাসো যে অপরাস ঈয়ুঃ ।
যে পার্থিবে রজস্যা নিষক্তা যে বা নূনং সুবৃজনাসু দিক্ষু ॥৪৬॥

1.47

মাতলী কব্যৈর্যমো অঙ্গিরোভির্বৃহস্পতির্ঋক্বভির্বাবৃধানঃ ।
যাংশ্চ দেবা বাবৃধুর্যে চ দেবাংস্তে নোঽবন্তু পিতরো হবেষু ॥৪৭॥

1.48

স্বাদুষ্কিলায়ং মধুমাং উতায়ং তীব্রঃ কিলায়ং রসবাং উতায়ম্।
উতোন্ব১স্য পপিবাংসমিন্দ্রং ন কশ্চন সহত আহবেষু ॥৪৮॥

1.49

পরেয়িবাংসং প্রবতো মহীরিতি বহুভ্যঃ পন্থামনুপস্পশানম্।
বৈবস্বতং সংগমনং জনানাং যমং রাজানং হবিষা সপর্যত ॥৪৯॥

1.50

যমো নো গাতুং প্রথমো বিবেদ নৈষা গব্যূতিরপভর্তবা উ ।
যত্রা নঃ পূর্বে পিতরঃ পরেতা এনা জজ্ঞানাঃ পথ্যা৩ অনু স্বাঃ ॥৫০॥

1.51

বর্হিষদঃ পিতর ঊত্য১র্বাগিমা বো হব্যা চকৃমা জুষধ্বম্।
ত আ গতাবসা শংতমেনাধা নঃ শং যোররপো দধাত ॥৫১॥

1.52

আচ্যা জানু দক্ষিণতো নিষদ্যেদং নো হবিরভি গৃণন্তু বিশ্বে ।
মা হিংসিষ্ট পিতরঃ কেন চিন্নো যদ্ ব আগঃ পুরুষতা করাম ॥৫২॥

1.53

ত্বষ্টা দুহিত্রে বহতুং কৃণোতি তেনেদং বিশ্বং ভুবনং সমেতি ।
যমস্য মাতা পর্যুহ্যমানা মহো জায়া বিবস্বতো ননাশ ॥৫৩॥

1.54

প্রেহি প্রেহি পথিভিঃ পূর্যাণৈর্যেনা তে পূর্বে পিতরঃ পরেতাঃ ।
উভা রাজানৌ স্বধয়া মদন্তৌ যমং পশ্যাসি বরুণং চ দেবম্ ॥৫৪॥

1.55

অপেত বীঽত বি চ সর্পতাতোঽস্মা এতং পিতরো লোকমক্রন্।
অহোভিরদ্ভিরক্তুভির্ব্যঽক্তং যমো দদাত্যবসানমস্মৈ ॥৫৫॥

1.56

উশন্তস্ত্বেধীমহ্যুশন্তঃ সমিধীমহি ।
উশন্নুশত আ বহ পিতৄন্ হবিষে অত্তবে ॥৫৬॥

1.57

দ্যুমন্তস্ত্বেধীমহি দ্যুমন্তঃ সমিধীমহি ।
দ্যুমান্ দ্যুমত আ বহ পিতৄন্ হবিষে অত্তবে ॥৫৭॥

1.58

অঙ্গিরসো নঃ পিতরো নবগ্বা অথর্বাণো ভৃগবঃ সোম্যাসঃ ।
তেষাং বয়ং সুমতৌ যজ্ঞিয়ানামপি ভদ্রে সৌমনসে স্যাম ॥৫৮॥

1.59

অঙ্গিরোভির্যজ্ঞিয়ৈরা গহীহ যম বৈরূপৈরিহ মাদয়স্ব ।
বিবস্বন্তং হুবে যঃ পিতা তেঽস্মিন্ বর্হিষ্যা নিষদ্য ॥৫৯॥

1.60

ইমং যম প্রস্তরমা হি রোহাঙ্গিরোভিঃ পিতৃভিঃ সংবিদানঃ ।
আ ত্বা মন্ত্রাঃ কবিশস্তা বহন্ত্বেনা রাজন্ হবিষো মাদয়স্ব ॥৬০॥

1.61

ইত এত উদারুহন্ দিবস্পৃষ্ঠান্বারুহন্।
প্র ভূর্জয়ো যথা পথা দ্যামঙ্গিরসো যয়ুঃ ॥৬১॥