Sukta 1

1.1

Pitrimedhah, 1-61 atharva, yamah, , mantroktah, 40 rudrah, 41-43 sarasvati, 44-46, 51-52 pitarah, trishtup, 8, 15 arshi panktih, 14, 49-50 bhurik, 18-20, 21-23 jagati, 37-38 paroshnik, 56-57, 61 anushtup, 59 purobrihati

ओ चि॒त् सखा॑यं स॒ख्या व॑वृत्यां ति॒रः पु॒रु चि॑दर्ण॒वं ज॑ग॒न्वान्।
पि॒तुर्नपा॑त॒मा द॑धीत वे॒धा अधि॒ क्षमि॑ प्रत॒रं दीध्या॑नः ॥१॥

O chit sakhayam sakhya vavrityam tirah puru chidarnavam jaganvan
Piturnapatama dadhita vedha adhi kshami prataram didhyanah

1.2

न ते॒ सखा॑ स॒ख्यं व॑ष्ट्ये॒तत् सल॑क्ष्मा॒ यद् विषु॑रूपा॒ भवा॑ति ।
म॒हस्पु॒त्रासो॒ असु॑रस्य वी॒रा दि॒वो ध॒र्तार॑ उर्वि॒या परि॑ ख्यन् ॥२॥

Na te sakha sakhyam vashtyetat salakshma yad vishurupa bhavati
Mahasputraso asurasya vira divo dhartara urviya pari khyan

1.3

उ॒शन्ति॑ घा॒ ते अ॒मृता॑स ए॒तदेक॑स्य चित् त्य॒जसं॒ मर्त्य॑स्य ।
नि ते॒ मनो॒ मन॑सि धाय्य॒स्मे जन्युः॒ पति॑स्त॒न्व॑१मा वि॑विश्याः ॥३॥

Ushanti gha te amritasa etadekasya chit tyajasam martyasya
Ni te mano manasi dhayyasme janyuh patistanva1ma vivishyah

1.4

न यत् पु॒रा च॑कृ॒मा कद्ध॑ नू॒नमृ॒तं वद॑न्तो॒ अनृ॑तं रपेम ।
ग॒न्ध॒र्वो अ॒प्स्वप्या॑ च॒ योषा॒ सा नौ॒ नाभिः॑ पर॒मं जा॒मि तन्नौ॑ ॥४॥

Na yat pura chakrima kaddha nunamritam vadanto anritam rapema
Gandharvo apsvapya cha yosha sa nau nabhih paramam jami tannau

1.5

गर्भे॒ नु नौ॑ जनि॒ता दम्प॑ती कर्दे॒वस्त्वष्टा॑ सवि॒ता वि॒श्वरू॑पः ।
नकि॑रस्य॒ प्र मि॑नन्ति व्र॒तानि॒ वेद॑ नाव॒स्य पृ॑थि॒वी उ॒त द्यौः ॥५॥

Garbhe nu nau janita dampati kardevastvashta savita vishvarupah
Nakirasya pra minanti vratani veda navasya prithivi uta dyauh

1.6

को अ॒द्य यु॑ङ्क्ते धु॒रि गा ऋ॒तस्य॒ शिमी॑वतो भा॒मिनो॑ दुर्हृणा॒यून्।
आ॒सन्नि॑षून् हृ॒त्स्वसो॑ मयो॒भून् य ए॑षां भृ॒त्यामृ॒णध॒त् स जी॑वात् ॥६॥

Ko adya yunkte dhuri ga ritasya shimivato bhamino durhrinayun
Asannishun hritsvaso mayobhun ya esham bhrityamrinadhat sa jivat

1.7

को अ॒स्य वे॑द प्रथ॒मस्याह्नः॒ क ईं॑ ददर्श॒ क इ॒ह प्र वो॑चत्।
बृ॒हन्मि॒त्रस्य॒ वरु॑णस्य॒ धाम॒ कदु॑ ब्रव आहनो॒ वीच्या॒ नॄन् ॥७॥

Ko asya veda prathamasyahnah ka im dadarsha ka iha pra vochat
Brihanmitrasya varunasya dhama kadu brava ahano vichya nrin

1.8

य॒मस्य॑ मा य॒म्यं॑ काम॒ आग॑न्त्समा॒ने योनौ॑ सह॒शेय्या॑य ।
जा॒येव॒ पत्ये॑ त॒न्वं रिरिच्यां॒ वि चि॑द् वृहेव॒ रथ्ये॑व च॒क्रा ॥८॥

Yamasya ma yamyam kama agantsamane yonau sahasheyyaya
Jayeva patye tanvam ririchyam vi chid vriheva rathyeva chakra

1.9

न ति॑ष्ठन्ति॒ न नि मि॑षन्त्ये॒ते दे॒वानां॒ स्पश॑ इ॒ह ये चर॑न्ति ।
अ॒न्येन॒ मदा॑हनो याहि॒ तूयं॒ तेन॒ वि वृ॑ह॒ रथ्ये॑व च॒क्रा ॥९॥

Na tishthanti na ni mishantyete devanam spasha iha ye charanti
Anyena madahano yahi tuyam tena vi vriha rathyeva chakra

1.10

रात्री॑भिरस्मा॒ अह॑भिर्दशस्ये॒त् सूर्य॑स्य॒ चक्षु॒र्मुहु॒रुन्मि॑मीयात्।
दि॒वा पृ॑थि॒व्या मि॑थु॒ना सब॑न्धू य॒मीर्य॒मस्य॑ विवृहा॒दजा॑मि ॥१०॥

Ratribhirasma ahabhirdashasyet suryasya chakshurmuhurunmimiyat
Diva prithivya mithuna sabandhu yamiryamasya vivrihadajami

1.11

आ घा॒ ता ग॑च्छा॒नुत्त॑रा यु॒गानि॒ यत्र॑ जा॒मयः॑ कृ॒णव॒न्नजा॑मि ।
उप॑ बर्बृहि वृष॒भाय॑ बा॒हुम॒न्यमि॑च्छस्व सुभगे॒ पतिं॒ मत् ॥११॥

A gha ta gachchhanuttara yugani yatra jamayah krinavannajami
Upa barbrihi vrishabhaya bahumanyamichchhasva subhage patim mat

1.12

किं भ्राता॑स॒द् यद॑ना॒थं भवा॑ति॒ किमु॒ स्वसा॒ यन्निरृ॑तिर्नि॒गच्छा॑त्।
काम॑मूता ब॒ह्वे॒३तद् र॑पामि त॒न्वा॒ऽमे त॒न्वं॑१ सं पि॑पृग्धि ॥१२॥

Kim bhratasad yadanatham bhavati kimu svasa yannirritirnigachchhat
Kamamuta bahve3tad rapami tanvame tanvan1 sam piprigdhi

1.13

न ते॑ ना॒थं य॒म्यत्रा॒हम॑स्मि॒ न ते॑ त॒नूं त॒न्वा॒३ सं प॑पृच्याम्।
अ॒न्येन॒ मत् प्र॒मुदः॑ कल्पयस्व॒ न ते॒ भ्राता॑ सुभगे वष्ट्ये॒तत् ॥१३॥

Na te natham yamyatrahamasmi na te tanum tanva3 sam paprichyam
Anyena mat pramudah kalpayasva na te bhrata subhage vashtyetat

1.14

न वा उ॑ ते त॒नूं त॒न्वा॒३ सं प॑पृच्यां पा॒पमा॑हु॒र्यः स्वसा॑रं नि॒गच्छा॑त्।
असं॑यदे॒तन्मन॑सो हृ॒दो मे॒ भ्राता॒ स्वसुः॒ शय॑ने॒ यच्छ॑यीय ॥१४॥

Na va u te tanum tanva3 sam paprichyam papamahuryah svasaram nigachchhat
Asanyadetanmanaso hrido me bhrata svasuh shayane yachchhayiya

1.15

ब॒तो ब॑तासि यम॒ नैव ते॒ मनो॒ हृद॑यं चाविदामा।
अ॒न्या किल॒ त्वां क॒क्ष्येऽव यु॒क्तं परि॑ ष्वजातै॒ लिबु॑जेव वृ॒क्षम् ॥१५॥

Bato batasi yama naiva te mano hridayam chavidama
Anya kila tvam kakshyeva yuktam pari shvajatai libujeva vriksham

1.16

अ॒न्यमू॒ षु य॑म्य॒न्य उ॒ त्वां परि॑ ष्वजातै लिबु॑जेव वृ॒क्षम्।
तस्य॑ वा॒ त्वं मन॑ इ॒च्छा स वा॒ तवाधा॑ कृणुष्व स॒विदं॒ सुभ॑द्राम् ॥१६॥

Anyamu shu yamyanya u tvam pari shvajatai libujeva vriksham
Tasya va tvam mana ichchha sa va tavadha krinushva savidam subhadram

1.17

त्रीणि॒ च्छन्दां॑सि क॒वयो॒ वि ये॑तिरे पुरु॒रूपं॑ दर्श॒तं वि॒श्वच॑क्षणम्।
आपो॑ वाता॒ ओष॑धय॒स्तान्येक॑स्मि॒न् भुव॑न॒ आर्पि॑तानि ॥१७॥

Trini chchhandansi kavayo vi yetire pururupam darshatam vishvachakshanam
Apo vata oshadhayastanyekasmin bhuvana arpitani

1.18

वृषा॒ वृष्णे॑ दुदुहे॒ दोह॑सा दि॒वः पयां॑सि य॒ह्वो अदि॑ते॒रदा॑भ्यः ।
विश्वं॒ स वे॑द॒ वरु॑णो॒ यथा॑ धि॒या स य॒ज्ञियो॑ यजति य॒ज्ञियां॑ ऋ॒तून् ॥१८॥

Vrisha vrishne duduhe dohasa divah payansi yahvo aditeradabhyah
Vishvam sa veda varuno yatha dhiya sa yagyiyo yajati yagyiyam ritun

1.19

रप॑द् गन्ध॒र्वीरप्या॑ च॒ योष॑णा न॒दस्य॑ ना॒दे परि॑ पातु नो॒ मनः॑ ।
इ॒ष्टस्य॒ मध्ये॒ अदि॑ति॒र्नि धा॑तु नो॒ भ्राता॑ नो ज्ये॒ष्ठः प्र॑थ॒मो वि वो॑चति ॥१९॥

Rapad gandharvirapya cha yoshana nadasya nade pari patu no manah
Ishtasya madhye aditirni dhatu no bhrata no jyeshthah prathamo vi vochati

1.20

सो चि॒न्नु भ॒द्रा क्षु॒मती॒ उश॑स्वत्यु॒षा उ॑वास॒ मन॑वे॒ स्वऽर्वती ।
यदी॑मु॒शन्त॑मुश॒तामनु॒ क्रतु॑म॒ग्निं होता॑रं वि॒दथा॑य॒ जीज॑नन् ॥२०॥

So chinnu bhadra kshumati ushasvatyusha uvasa manave svarvati
Yadimushantamushatamanu kratumagnim hotaram vidathaya jijanan

1.21

अध॒ त्यं द्र॒प्सं वि॒भ्वं विचक्ष॒णं विराभ॑रदिषि॒रः श्ये॒नो अ॑ध्व॒रे।
यदी॒ विशो॑ वृ॒णते॑ द॒स्ममार्या॑ अ॒ग्निं होता॑र॒मध॒ धीर॑जायत ॥२१॥

Adha tyam drapsam vibhvam vichakshanam virabharadishirah shyeno adhvare
Yadi visho vrinate dasmamarya agnim hotaramadha dhirajayata

1.22

सदा॑सि र॒ण्वो यव॑सेव॒ पुष्य॑ते॒ होत्रा॑भिरग्ने॒ मनु॑षः स्वध्व॒रः ।
विप्र॑स्य वा॒ यच्छ॑शमा॒न उ॒क्थ्यो॒३ वाजं॑ सस॒वां उ॑प॒यासि॒ भूरि॑भिः ॥२२॥

Sadasi ranvo yavaseva pushyate hotrabhiragne manushah svadhvarah
Viprasya va yachchhashamana ukthyo3 vajam sasavam upayasi bhuribhih

1.23

उदी॑रय पि॒तरा॑ जा॒र आ भग॒मिय॑क्षति हर्य॒तो हृ॒त्त इ॑ष्यति ।
विव॑क्ति॒ वह्निः॑ स्वप॒स्यते॑ म॒खस्त॑वि॒ष्यते॒ असु॑रो॒ वेप॑ते म॒ती ॥२३॥

Udiraya pitara jara a bhagamiyakshati haryato hritta ishyati
Vivakti vahnih svapasyate makhastavishyate asuro vepate mati

1.24

यस्ते॑ अग्ने सुम॒तिं मर्तो॒ अख्य॒त् सह॑सः सूनो॒ अति॒ स प्र शृ॑ण्वे ।
इषं॒ दधा॑नो॒ वह॑मानो॒ अश्वै॒रा स द्यु॒मां अम॑वान् भूषति॒ द्यून् ॥२४॥

Yaste agne sumatim marto akhyat sahasah suno ati sa pra shrinve
Isham dadhano vahamano ashvaira sa dyumam amavan bhushati dyun

1.25

श्रु॒धी नो॑ अग्ने॒ सद॑ने स॒धस्थे॑ यु॒क्ष्वा रथ॑म॒मृत॑स्य द्रवि॒त्नुम्।
आ नो॑ वह॒ रोद॑सी दे॒वपु॑त्रे॒ माकि॑र्दे॒वाना॒मप॑ भूरि॒ह स्याः॑ ॥२५॥

Shrudhi no agne sadane sadhasthe yukshva rathamamritasya dravitnum
A no vaha rodasi devaputre makirdevanamapa bhuriha syah

1.26

यद॑ग्न ए॒षा समि॑ति॒र्भवा॑ति दे॒वी दे॒वेषु॑ यज॒ता य॑जत्र ।
रत्ना॑ च॒ यद् वि॒भजा॑सि स्वधावो भा॒गं नो॒ अत्र॒ वसु॑मन्तं वीतात् ॥२६॥

Yadagna esha samitirbhavati devi deveshu yajata yajatra
Ratna cha yad vibhajasi svadhavo bhagam no atra vasumantam vitat

1.27

अन्व॒ग्निरु॒षसा॒मग्र॑मख्य॒दन्वहा॑नि प्रथ॒मो जा॒तवे॑दाः ।
अनु॒ सूर्य॑ उ॒षसो॒ अनु॑ र॒श्मीननु॒ द्यावा॑पृथि॒वी आ वि॑वेश ॥२७॥

Anvagnirushasamagramakhyadanvahani prathamo jatavedah
Anu surya ushaso anu rashminanu dyavaprithivi a vivesha

1.28

प्रत्य॒ग्निरु॒षसा॒मग्र॑मख्य॒त् प्रत्यहा॑नि प्रथ॒मो जा॒तवे॑दाः ।
प्रति॒ सूर्य॑स्य पुरु॒धा च॑ र॒श्मीन् प्रति॒ द्यावा॑पृथि॒वी आ त॑तान ॥२८॥

Pratyagnirushasamagramakhyat pratyahani prathamo jatavedah
Prati suryasya purudha cha rashmin prati dyavaprithivi a tatana

1.29

द्यावा॑ ह॒ क्षामा॑ प्रथ॒मे ऋ॒तेना॑भिश्रा॒वे भ॑वतः सत्य॒वाचा॑ ।
दे॒वो यन्मर्ता॑न् य॒जथा॑य कृ॒ण्वन्त्सीद॒द्धोता॑ प्र॒त्यङ् स्वमसुं॒ यन् ॥२९॥

Dyava ha kshama prathame ritenabhishrave bhavatah satyavacha
Devo yanmartan yajathaya krinvantsidaddhota pratyang svamasum yan

1.30

दे॒वो दे॒वान् प॑रि॒भूरृ॒तेन॒ वहा॑ नो ह॒व्यं प्र॑थ॒मश्चि॑कि॒त्वान्।
धू॒मके॑तुः स॒मिधा॒ भाऋ॑जीको म॒न्द्रो होता॒ नित्यो॑ वा॒चा यजी॑यान् ॥३०॥

Devo devan paribhurritena vaha no havyam prathamashchikitvan
Dhumaketuh samidha bharijiko mandro hota nityo vacha yajiyan

1.31

अर्चा॑मि वां॒ वर्धा॒यापो॑ घृतस्नू॒ द्यावा॑भूमी शृणु॒तं रो॑दसी मे ।
अहा॒ यद् दे॒वा असु॑नीति॒माय॒न् मध्वा॑ नो॒ अत्र॑ पि॒तरा॑ शिशीताम् ॥३१॥

Archami vam vardhayapo ghritasnu dyavabhumi shrinutam rodasi me
Aha yad deva asunitimayan madhva no atra pitara shishitam

1.32

स्वावृ॑ग् दे॒वस्या॒मृतं॒ यदी॒ गोरतो॑ जा॒तासो॑ धारयन्त उ॒र्वी।
विश्वे॑ दे॒वा अनु॒ तत् ते यजु॑र्गुर्दु॒हे यदेनी॑ दि॒व्यं घृ॒तं॑ वाः ॥३२॥

Svavrig devasyamritam yadi gorato jataso dharayanta urvi
Vishve deva anu tat te yajurgurduhe yadeni divyam ghritam vah

1.33

किं स्वि॑न्नो॒ राजा॑ जगृहे॒ कद॒स्याति॑ व्र॒तं च॑कृमा॒ को वि वे॑द ।
मि॒त्रस्चि॒द्धि ष्मा॑ जुहुरा॒णो दे॒वांछ्लोको॒ न या॒तामपि॒ वाजो॒ अस्ति॑ ॥३३॥

Kim svinno raja jagrihe kadasyati vratam chakrima ko vi veda
Mitraschiddhi shma juhurano devanchhloko na yatamapi vajo asti

1.34

दु॒र्मन्त्वत्रा॒मृत॑स्य॒ नाम॒ सल॑क्ष्मा॒ यद् विषु॑रूपा॒ भवा॑ति ।
य॒मस्य॒ यो म॒नव॑ते सु॒मन्त्वग्ने॒ तमृ॑ष्व पा॒ह्यप्र॑युच्छन् ॥३४॥

Durmantvatramritasya nama salakshma yad vishurupa bhavati
Yamasya yo manavate sumantvagne tamrishva pahyaprayuchchhan

1.35

यस्मि॑न् दे॒वा वि॒दथे॑ मा॒दय॑न्ते वि॒वस्व॑तः सद॑ने धा॒रय॑न्ते ।
सूर्ये॒ ज्योति॒रद॑धुर्मा॒स्य॑१क्तून् परि॑ द्योत॒निं च॑रतो॒ अज॑स्रा ॥३५॥

Yasmin deva vidathe madayante vivasvatah sadane dharayante
Surye jyotiradadhurmasya1ktun pari dyotanim charato ajasra

1.36

यस्मि॑न् दे॒वा मन्म॑नि सं॒चर॑न्त्यपी॒च्ये॒३ न व॒यम॑स्य विद्म ।
मि॒त्रो नो॒ अत्रादि॑ति॒रना॑गान्त्सवि॒ता दे॒वो वरु॑णाय वोचत् ॥३६॥

Yasmin deva manmani sancharantyapichye3 na vayamasya vidma
Mitro no atraditiranagantsavita devo varunaya vochat

1.37

सखा॑य॒ आ शि॑षामहे॒ ब्रह्मेन्द्रा॑य व॒ज्रिणे॑ ।
स्तु॒ष ऊ॒ षु नृत॑माय धृ॒ष्णवे॑ ॥३७॥

Sakhaya a shishamahe brahmendraya vajrine
Stusha u shu nritamaya dhrishnave

1.38

शव॑सा॒ ह्यसि॑ श्रु॒तो वृ॑त्र॒हत्ये॑न वृत्र॒हा।
म॒घैर्म॒घोनो॒ अति॑ शूर दाशसि ॥३८॥

Shavasa hyasi shruto vritrahatyena vritraha
Maghairmaghono ati shura dashasi

1.39

स्ते॒गो न क्षामत्ये॑षि पृथि॒वीं म॒ही नो॒ वाता॑ इ॒ह वा॑न्तु॒ भूमौ॑ ।
मि॒त्रो नो॒ अत्र॒ वरु॑णो यु॒जमा॑नो अ॒ग्निर्वने॒ न व्यसृ॑ष्ट॒ शोक॑म् ॥३९॥

Stego na kshamatyeshi prithivim mahi no vata iha vantu bhumau
Mitro no atra varuno yujamano agnirvane na vyasrishta shokam

1.40

स्तु॒हि श्रु॒तं ग॑र्त॒सदं॒ जना॑नां॒ राजा॑नं भी॒ममु॑पह॒त्नुमु॒ग्रम्।
मृ॒डा ज॑रि॒त्रे रु॑द्र॒ स्तवा॑नो अ॒न्यम॒स्मत् ते नि व॑पन्तु॒ सेन्य॑म् ॥४०॥

Stuhi shrutam gartasadam jananam rajanam bhimamupahatnumugram
Mrida jaritre rudra stavano anyamasmat te ni vapantu senyam

1.41

सर॑स्वतीं देव॒यन्तो॑ हवन्ते॒ सर॑स्वतीमध्व॒रे ता॒यमा॑ने ।
सर॑स्वतीं सु॒कृतो॑ हवन्ते॒ सर॑स्वती दा॒शुषे॒ वार्यं॑ दात् ॥४१॥

Sarasvatim devayanto havante sarasvatimadhvare tayamane
Sarasvatim sukrito havante sarasvati dashushe varyam dat

1.42

सर॑स्वतीं पि॒तरो॑ हवन्ते दक्षि॒णा य॒ज्ञम॑भि॒नक्ष॑माणाः ।
आ॒सद्या॒स्मिन् ब॒र्हिषि॑ मादयध्वमनमी॒वा इष॒ आ धे॑ह्य॒स्मे ॥४२॥

Sarasvatim pitaro havante dakshina yagyamabhinakshamanah
Asadyasmin barhishi madayadhvamanamiva isha a dhehyasme

1.43

सर॑स्वति॒ या स॒रथं॑ य॒याथो॒क्थैः स्व॒धाभि॑र्देवि पि॒तृभि॒र्मद॑न्ती ।
स॒ह॒स्रा॒र्घमि॒डो अत्र॑ भा॒गं रा॒यस्पोषं॒ यज॑मानाय धेहि ॥४३॥

Sarasvati ya saratham yayathokthaih svadhabhirdevi pitribhirmadanti
Sahasrarghamido atra bhagam rayasposham yajamanaya dhehi

1.44

उदी॑रता॒मव॑र॒ उत् परा॑स॒ उन्म॑ध्य॒माः पि॒तरः॑ सो॒म्यासः॑ ।
असुं॒ य ई॒युर॑वृ॒का ऋ॑त॒ज्ञास्ते नो॑ऽवन्तु पि॒तरो॒ हवे॑षु ॥४४॥

Udiratamavara ut parasa unmadhyamah pitarah somyasah
Asum ya iyuravrika ritagyaste novantu pitaro haveshu

1.45

आहं पि॒तृन्त्सु॑वि॒दत्रां॑ अवित्सि॒ नपा॑तं च वि॒क्रम॑णं च॒ विष्णोः॑ ।
ब॒र्हि॒षदो॒ ये स्व॒धया॑ सु॒तस्य॒ भज॑न्त पि॒त्वस्त इ॒हाग॑मिष्ठाः ॥४५॥

Aham pitrintsuvidatram avitsi napatam cha vikramanam cha vishnoh
Barhishado ye svadhaya sutasya bhajanta pitvasta ihagamishthah

1.46

इ॒दं पि॒तृभ्यो॒ नमो॑ अस्त्व॒द्य ये पूर्वा॑सो॒ ये अप॑रास ई॒युः ।
ये पार्थि॑वे॒ रज॒स्या निष॑क्ता॒ ये वा॑ नू॒नं सु॑वृ॒जना॑सु दि॒क्षु ॥४६॥

Idam pitribhyo namo astvadya ye purvaso ye aparasa iyuh
Ye parthive rajasya nishakta ye va nunam suvrijanasu dikshu

1.47

मात॑ली क॒व्यैर्य॒मो अङ्गि॑रोभि॒र्बृह॒स्पति॒र्ऋक्व॑भिर्वावृधा॒नः ।
यांश्च॑ दे॒वा वा॑वृ॒धुर्ये च॑ दे॒वांस्ते नो॑ऽवन्तु पि॒तरो॒ हवे॑षु ॥४७॥

Matali kavyairyamo angirobhirbrihaspatirrikvabhirvavridhanah
Yanshcha deva vavridhurye cha devanste novantu pitaro haveshu

1.48

स्वा॒दुष्किला॒यं मधु॑मां उ॒तायं ती॒व्रः किला॒यं रस॑वां उ॒तायम्।
उ॒तोन्व॑१स्य प॑पि॒वांस॒मिन्द्रं॒ न कश्च॒न स॑हत आह॒वेषु॑ ॥४८॥

Svadushkilayam madhumam utayam tivrah kilayam rasavam utayam
Utonva1sya papivansamindram na kashchana sahata ahaveshu

1.49

प॒रे॒यि॒वांसं॑ प्र॒वतो॑ म॒हीरिति॑ ब॒हुभ्यः॒ पन्था॑मनुपस्पशा॒नम्।
वै॒व॒स्वतं सं॒गम॑नं॒ जना॑नां य॒मं राजा॑नं ह॒विषा॑ सपर्यत ॥४९॥

Pareyivansam pravato mahiriti bahubhyah panthamanupaspashanam
Vaivasvatam sangamanam jananam yamam rajanam havisha saparyata

1.50

य॒मो नो॑ गा॒तुं प्र॑थ॒मो वि॑वेद॒ नैषा गव्यू॑ति॒रप॑भर्त॒वा उ॑ ।
यत्रा॑ नः॒ पूर्वे॑ पि॒तरः॒ परे॑ता ए॒ना ज॑ज्ञा॒नाः प॒थ्या॒३ अनु॒ स्वाः ॥५०॥

Yamo no gatum prathamo viveda naisha gavyutirapabhartava u
Yatra nah purve pitarah pareta ena jagyanah pathya3 anu svah

1.51

बर्हि॑षदः पितर ऊ॒त्य॑१र्वागि॒मा वो॑ ह॒व्या च॑कृमा जु॒षध्व॑म्।
त आ ग॒ताव॑सा॒ शंत॑मे॒नाधा॑ नः॒ शं योर॑र॒पो द॑धात ॥५१॥

Barhishadah pitara utya1rvagima vo havya chakrima jushadhvam
Ta a gatavasa shantamenadha nah sham yorarapo dadhata

1.52

आच्या॒ जानु॑ दक्षिण॒तो नि॒षद्ये॒दं नो॑ ह॒विर॒भि गृ॑णन्तु॒ विश्वे॑ ।
मा हिं॑सिष्ट पितरः॒ केन॑ चिन्नो॒ यद् व आगः॑ पुरु॒षता॒ करा॑म ॥५२॥

Achya janu dakshinato nishadyedam no havirabhi grinantu vishve
Ma hinsishta pitarah kena chinno yad va agah purushata karama

1.53

त्वष्टा॑ दुहि॒त्रे व॑ह॒तुं कृ॑णोति॒ तेने॒दं विश्वं॒ भुव॑नं॒ समे॑ति ।
य॒मस्य॑ मा॒ता प॑र्यु॒ह्यमा॑ना म॒हो जा॒या विव॑स्वतो ननाश ॥५३॥

Tvashta duhitre vahatum krinoti tenedam vishvam bhuvanam sameti
Yamasya mata paryuhyamana maho jaya vivasvato nanasha

1.54

प्रेहि॒ प्रेहि॑ प॒थिभिः॑ पू॒र्याणै॒र्येना॑ ते॒ पूर्वे॑ पि॒तरः॒ परे॑ताः ।
उ॒भा राजा॑नौ स्व॒धया॒ मद॑न्तौ य॒मं प॑श्यासि॒ वरु॑णं च दे॒वम् ॥५४॥

Prehi prehi pathibhih puryanairyena te purve pitarah paretah
Ubha rajanau svadhaya madantau yamam pashyasi varunam cha devam

1.55

अपे॑त॒ वीऽत॒ वि च॑ सर्प॒तातो॑ऽस्मा ए॒तं पि॒तरो॑ लो॒कम॑क्रन्।
अहो॑भिर॒द्भिर॒क्तुभि॒र्व्यऽक्तं य॒मो द॑दात्यव॒सान॑मस्मै ॥५५॥

Apeta vita vi cha sarpatatosma etam pitaro lokamakran
Ahobhiradbhiraktubhirvyaktam yamo dadatyavasanamasmai

1.56

उ॒शन्त॑स्त्वेधीमह्यु॒शन्तः॒ समि॑धीमहि ।
उ॒शन्नु॑श॒त आ व॑ह पि॒तॄन् ह॒विषे॒ अत्त॑वे ॥५६॥

Ushantastvedhimahyushantah samidhimahi
Ushannushata a vaha pitrin havishe attave

1.57

द्यु॒मन्त॑स्त्वेधीमहि द्यु॒मन्तः॒ समि॑धीमहि ।
द्यु॒मान् द्यु॑म॒त आ व॑ह पि॒तॄन् ह॒विषे॒ अत्त॑वे ॥५७॥

Dyumantastvedhimahi dyumantah samidhimahi
Dyuman dyumata a vaha pitrin havishe attave

1.58

अङ्गि॑रसो नः पि॒तरो॒ नव॑ग्वा॒ अथ॑र्वाणो॒ भृग॑वः सो॒म्यासः॑ ।
तेषां॑ व॒यं सु॑म॒तौ य॒ज्ञिया॑ना॒मपि॑ भ॒द्रे सौ॑मन॒से स्या॑म ॥५८॥

Angiraso nah pitaro navagva atharvano bhrigavah somyasah
Tesham vayam sumatau yagyiyanamapi bhadre saumanase syama

1.59

अङ्गि॑रोभिर्य॒ज्ञियै॒रा ग॑ही॒ह यम॑ वैरू॒पैरि॒ह मा॑दयस्व ।
विव॑स्वन्तं हुवे॒ यः पि॒ता ते॒ऽस्मिन् ब॒र्हिष्या नि॒षद्य॑ ॥५९॥

Angirobhiryagyiyaira gahiha yama vairupairiha madayasva
Vivasvantam huve yah pita tesmin barhishya nishadya

1.60

इ॒मं य॑म प्रस्त॒रमा हि रोहाङ्गि॑रोभिः पि॒तृभिः॑ संविदा॒नः ।
आ त्वा॒ मन्त्राः॑ कविश॒स्ता व॑हन्त्वे॒ना रा॑जन् ह॒विषो॑ मादयस्व ॥६०॥

Imam yama prastarama hi rohangirobhih pitribhih sanvidanah
A tva mantrah kavishasta vahantvena rajan havisho madayasva

1.61

इ॒त ए॒त उदारु॑हन् दि॒वस्पृ॒ष्ठान्वारु॑हन्।
प्र भू॒र्जयो॒ यथा॑ प॒था द्यामङ्गि॑रसो य॒युः ॥६१॥

Ita eta udaruhan divasprishthanvaruhan
Pra bhurjayo yatha patha dyamangiraso yayuh