Sukta 2

2.1

Pitrimedhah, 1-60 atharva, yamah, mantroktah, 4, 34 agnih, 5 jatavedah, 29 pitarah, trishtup, 1-3, 6, 14- 18, 20, 22-23, 25, 30, 34, 36, 46, 48, 50-52, 56 anushtup, 4, 7, 9, 13 jagati, 5, 26, 49, 57 bhurik, 19 tripadarshi gayatri, 24 tripada samavishamarshi gayatri, 37 virad jagati, 38-44 arshi gayatri, (40, 42-44 bhurik) 45 kakummati anushtup

य॒माय॒ सोमः॑ पवते य॒माय॑ क्रियते ह॒विः ।
य॒मं ह॑ य॒ज्ञो ग॑च्छत्य॒ग्निदू॑तो॒ अरं॑कृतः ॥१॥

Yamaya somah pavate yamaya kriyate havih
Yamam ha yagyo gachchhatyagniduto arankritah

2.2

य॒माय॒ मधु॑मत्तमं जु॒होता॒ प्र च॑ तिष्ठत ।
इ॒दं नम॒ ऋषि॑भ्यः पूर्व॒जेभ्यः॒ पूर्वे॑भ्यः पथि॒कृद्भ्यः॑ ॥२॥

Yamaya madhumattamam juhota pra cha tishthata
Idam nama rishibhyah purvajebhyah purvebhyah pathikridbhyah

2.3

य॒माय॑ घृ॒तव॒त् पयो॒ राज्ञे॑ ह॒विर्जु॑होतन ।
स नो॑ जी॒वेष्वा य॑मेद् दी॒र्घमायुः॒ प्र जी॒वसे॑ ॥३॥

Yamaya ghritavat payo ragye havirjuhotana
Sa no jiveshva yamed dirghamayuh pra jivase

2.4

मैन॑मग्ने॒ वि द॑हो॒ माभि शू॑शुचो॒ मास्य॒ त्वचं॑ चिक्षिपो॒ मा शरी॑रम्।
शृ॒तं य॒दा कर॑सि जातवे॒दोऽथे॑मेनं॒ प्र हि॑णुतात् पि॒तॄँरुप॑ ॥४॥

Mainamagne vi daho mabhi shushucho masya tvacham chikshipo ma shariram
Shritam yada karasi jatavedothemenam pra hinutat pitrinrupa

2.5

य॒दा शृ॒तं कृ॒णवो॑ जातवे॒दोऽथे॒ममे॑नं॒ परि॑ दत्तात् पि॒तृभ्यः॑ ।
य॒दो गच्छा॒त्यसु॑नीतिमे॒तामथ॑ दे॒वानां॑ वश॒नीर्भ॑वाति ॥५॥

Yada shritam krinavo jatavedothemamenam pari dattat pitribhyah
Yado gachchhatyasunitimetamatha devanam vashanirbhavati

2.6

त्रिक॑द्रुकेभिः पवते॒ षडु॒र्वीरेक॒मिद् बृ॒हत्।
त्रि॒ष्टुब् गा॑य॒त्री छन्दां॑सि॒ सर्वा॒ ता य॒म आर्पि॑ता ॥६॥

Trikadrukebhih pavate shadurvirekamid brihat
Trishtub gayatri chhandansi sarva ta yama arpita

2.7

सूर्यं॒ चक्षु॑षा गच्छ॒ वात॑मा॒त्मना॒ दिवं॑ च॒ गच्छ॑ पृथि॒वीं च॒ धर्म॑भिः ।
अ॒पो वा॑ गच्छ॒ यदि॒ तत्र॑ ते हि॒तमोष॑धीषु॒ प्रति॑ तिष्ठा॒ शरी॑रैः ॥७॥

Suryam chakshusha gachchha vatamatmana divam cha gachchha prithivim cha dharmabhih
Apo va gachchha yadi tatra te hitamoshadhishu prati tishtha shariraih

2.8

अ॒जो भा॒गस्तप॑स॒स्तं त॑पस्व॒ तं ते॑ शो॒चिस्त॑पतु॒ तं ते॑ अ॒र्चिः ।
यास्ते॑ शि॒वास्त॒न्वोऽ जातवेद॒स्ताभि॑र्वहैनं सु॒कृता॑मु लो॒कम् ॥८॥

Ajo bhagastapasastam tapasva tam te shochistapatu tam te archih
Yaste shivastanvo jatavedastabhirvahainam sukritamu lokam

2.9

यास्ते॑ शो॒चयो॒ रंह॑यो जातवेदो॒ याभि॑रापृ॒णासि॒ दिव॑म॒न्तरि॑क्षम्।
अ॒जं यन्त॒मनु॒ ताः समृ॑ण्वता॒मथेत॑राभिः शि॒वत॑माभिः शृ॒तं कृ॑धि ॥९॥

Yaste shochayo ranhayo jatavedo yabhiraprinasi divamantariksham
Ajam yantamanu tah samrinvatamathetarabhih shivatamabhih shritam kridhi

2.10

अव॑ सृज॒ पुन॑रग्ने पि॒तृभ्यो॒ यस्त॒ आहु॑त॒श्चर॑ति स्व॒धावा॑न्।
आयु॒र्वसा॑न॒ उप॑ यातु॒ शेषः॒ सं ग॑च्छतां त॒न्वा सु॒वर्चाः॑ ॥१०॥

Ava srija punaragne pitribhyo yasta ahutashcharati svadhavan
Ayurvasana upa yatu sheshah sam gachchhatam tanva suvarchah

2.11

अति॑ द्रव॒ श्वानौ॑ सारमे॒यौ च॑तुर॒क्षौ श॒बलौ॑ सा॒धुना॑ प॒था।
अधा॑ पि॒तॄन्त्सु॑वि॒दत्रां॒ अपी॑हि य॒मेन॒ ये स॑ध॒मादं॒ मद॑न्ति ॥११॥

Ati drava shvanau sarameyau chaturakshau shabalau sadhuna patha
Adha pitrintsuvidatram apihi yamena ye sadhamadam madanti

2.12

यौ ते॒ श्वानौ॑ यम रक्षि॒तारौ॑ चतुर॒क्षौ प॑थि॒षदी॑ नृ॒चक्ष॑सा । ताभ्यां॑ राज॒न् परि॑ धेह्येनं स्व॒स्त्यऽस्मा अनमी॒वं च॑ धेहि ॥१२॥

Yau te shvanau yama rakshitarau chaturakshau pathishadi nrichakshasa, tabhyam rajan pari dhehyenam svastyasma anamivam cha dhehi

2.13

उ॒रू॒ण॒साव॑सु॒तृपा॑वुदुम्ब॒लौ य॒मस्य॑ दू॒तौ च॑रतो॒ जनां॒ अनु॑ ।
ताव॒स्मभ्यं॑ दृ॒शये॒ सूर्या॑य॒ पुन॑र्दाता॒मसु॑म॒द्येह भ॒द्रम् ॥१३॥

Urunasavasutripavudumbalau yamasya dutau charato janam anu
Tavasmabhyam drishaye suryaya punardatamasumadyeha bhadram

2.14

सोम॒ एके॑भ्यः पवते घृ॒तमेक॒ उपा॑सते ।
येभ्यो॒ मधु॑ प्र॒धाव॑ति॒ तां॑श्चिदे॒वापि॑ गच्छतात् ॥१४॥

Soma ekebhyah pavate ghritameka upasate
Yebhyo madhu pradhavati tanshchidevapi gachchhatat

2.15

ये चि॒त् पूर्व॑ ऋ॒तसा॑ता ऋ॒तजा॑ता ऋता॒वृधः॑ ।
ऋषी॒न् तप॑स्वतो यम तपो॒जां अपि॑ गच्छतात् ॥१५॥

Ye chit purva ritasata ritajata ritavridhah
Rishin tapasvato yama tapojam api gachchhatat

2.16

तप॑सा॒ ये अ॑नाधृ॒ष्यास्तप॑सा॒ ये स्वऽर्य॒युः ।
तपो॒ ये च॑क्रि॒रे मह॒स्तांश्चि॑दे॒वापि॑ गच्छतात् ॥१६॥

Tapasa ye anadhrishyastapasa ye svaryayuh
Tapo ye chakrire mahastanshchidevapi gachchhatat

2.17

ये युध्य॑न्ते प्र॒धने॑षु॒ शूरा॑सो॒ ये त॑नू॒त्यजः॑ ।
ये वा॑ स॒हस्र॑दक्षिणा॒स्तांश्चिदे॒वापि॑ गच्छतात् ॥१७॥

Ye yudhyante pradhaneshu shuraso ye tanutyajah
Ye va sahasradakshinastanshchidevapi gachchhatat

2.18

स॒हस्र॑णीथाः क॒वयो॒ ये गो॑पा॒यन्ति॒ सूर्य॑म्।
ऋषी॒न् तप॑स्वतो यम तपो॒जां अपि॑ गच्छतात् ॥१८॥

Sahasranithah kavayo ye gopayanti suryam
Rishin tapasvato yama tapojam api gachchhatat

2.19

स्यो॒नास्मै॑ भव पृथिव्यनृक्ष॒रा नि॒वेश॑नी ।
यच्छा॑स्मै॒ शर्म॑ स॒प्रथाः॑ ॥१९॥

Syonasmai bhava prithivyanrikshara niveshani
Yachchhasmai sharma saprathah

2.20

अ॒सं॒बा॒धे पृ॑थि॒व्या उ॒रौ लो॒के नि धी॑यस्व ।
स्व॒धा याश्च॑कृ॒षे जीव॒न् तास्ते॑ सन्तु मधु॒श्चुतः॑ ॥२०॥

Asambadhe prithivya urau loke ni dhiyasva
Svadha yashchakrishe jivan taste santu madhushchutah

2.21

ह्वया॑मि ते॒ मन॑सा॒ मन॑ इ॒हेमान् गृ॒हाँ उप॑ जुजुषा॒ण एहि॑ ।
सं ग॑च्छस्व पि॒तृभिः॒ सं य॒मेन॑ स्यो॒नास्त्वा॒ वाता॒ उप॑ वान्तु श॒ग्माः ॥२१॥

Hvayami te manasa mana iheman griham upa jujushana ehi
Sam gachchhasva pitribhih sam yamena syonastva vata upa vantu shagmah

2.22

उत् त्वा॑ वहन्तु म॒रुत॑ उदवा॒हा उ॑द॒प्रुतः॑ ।
अ॒जेन॑ कृ॒ण्वन्तः॑ शी॒तं व॒र्षेणो॑क्षन्तु॒ बालिति॑ ॥२२॥

Ut tva vahantu maruta udavaha udaprutah
Ajena krinvantah shitam varshenokshantu baliti

2.23

उद॑ह्व॒मायु॒रायु॑षे॒ क्रत्वे॒ दक्षा॑य जी॒वसे॑ ।
स्वान् ग॑च्छतु ते॒ मनो॒ अधा॑ पि॒तॄंरुप॑ द्रव ॥२३॥

Udahvamayurayushe kratve dakshaya jivase
Svan gachchhatu te mano adha pitrinrupa drava

2.24

मा ते॒ मनो॒ मासो॒र्माङ्गा॑नां॒ मा रस॑स्य ते ।
मा ते॑ हास्त त॒न्वः॑१ किं च॒नेह ॥२४॥

Ma te mano masormanganam ma rasasya te
Ma te hasta tanvah1 kim chaneha

2.25

मा त्वा॑ वृ॒क्षः सं बा॑धिष्ट॒ मा दे॒वी पृ॑थि॒वी म॒ही।
लो॒कं पि॒तृषु॑ वि॒त्त्वैध॑स्व य॒मरा॑जसु ॥२५॥

Ma tva vrikshah sam badhishta ma devi prithivi mahi
Lokam pitrishu vittvaidhasva yamarajasu

2.26

यत् ते॒ अङ्ग॒मति॑हितं परा॒चैर॑पा॒नः प्रा॒णो य उ॑ वा ते॒ परे॑तः ।
तत् ते सं॒गत्य॑ पि॒तरः॒ सनी॑डा घा॒साद् घा॒सं पुन॒रा वे॑शयन्तु ॥२६॥

Yat te angamatihitam parachairapanah prano ya u va te paretah
Tat te sangatya pitarah sanida ghasad ghasam punara veshayantu

2.27

अपे॒मं जी॒वा अ॑रुधन् गृ॒हेभ्य॒स्तं निर्व॑हत॒ परि॒ ग्रामा॑दि॒तः ।
मृ॒त्युर्य॒मस्या॑सीद् दू॒तः प्रचे॑ता॒ असू॑न् पि॒तृभ्यो॑ गम॒यां च॑कार ॥२७॥

Apemam jiva arudhan grihebhyastam nirvahata pari gramaditah
Mrityuryamasyasid dutah pracheta asun pitribhyo gamayam chakara

2.28

ये दस्य॑वः पि॒तृषु॑ प्रवि॑ष्टा ज्ञातिमु॒खा अ॑हु॒ताद॒श्चर॑न्ति ।
प॒रा॒पुरो॑ नि॒पुरो॒ ये भर॑न्त्य॒ग्निष्टान॒स्मात् प्र ध॑माति य॒ज्ञात् ॥२८॥

Ye dasyavah pitrishu pravishta gyatimukha ahutadashcharanti
Parapuro nipuro ye bharantyagnishtanasmat pra dhamati yagyat

2.29

सं वि॑शन्त्वि॒ह पि॒तरः॒ स्वा नः॑ स्यो॒नं कृ॒ण्वन्तः॑ प्रति॒रन्त॒ आयुः॑ ।
तेभ्यः॑ शकेम ह॒विषा॒ नक्ष॑माणा॒ ज्योग् जीव॑न्तः श॒रदः॑ पुरू॒चीः ॥२९॥

Sam vishantviha pitarah sva nah syonam krinvantah pratiranta ayuh
Tebhyah shakema havisha nakshamana jyog jivantah sharadah puruchih

2.30

यां ते॑ धे॒नुं नि॑पृ॒णामि॒ यमु॑ ते क्षी॒र ओ॑द॒नम्।
तेना॒ जन॑स्यासो भ॒र्ता योऽत्रास॒दजी॑वनः ॥३०॥

Yam te dhenum niprinami yamu te kshira odanam
Tena janasyaso bharta yotrasadajivanah

2.31

अश्वा॑वतीं॒ प्र त॑र॒ या सु॒शेवा॒र्क्षाकं॑ वा प्रत॒रं नवी॑यः ।
यस्त्वा॑ ज॒घान॒ वध्यः॒ सो अ॑स्तु॒ मा सो अ॒न्यद् वि॑दत भाग॒धेय॑म् ॥३१॥

Ashvavatim pra tara ya sushevarkshakam va prataram naviyah
Yastva jaghana vadhyah so astu ma so anyad vidata bhagadheyam

2.32

य॒मः परोऽव॑रो॒ विव॑स्वा॒न् ततः॒ परं॒ नाति॑ पश्यामि॒ किं च॒न।
य॒मे अ॑ध्व॒रो अधि॑ मे॒ निवि॑ष्टो॒ भुवो॒ विव॑स्वान॒न्वात॑तान ॥३२॥

Yamah parovaro vivasvan tatah param nati pashyami kim chana
Yame adhvaro adhi me nivishto bhuvo vivasvananvatatana

2.33

अपा॑गूहन्न॒मृतां॒ मर्त्ये॑भ्यः कृ॒त्वा सव॑र्णामदधु॒र्विव॑स्वते ।
उ॒ताश्विना॑वभर॒द् यत् तदासी॒दज॑हादु॒ द्वा मि॑थु॒ना स॑र॒ण्यूः ॥३३॥

Apaguhannamritam martyebhyah kritva savarnamadadhurvivasvate
Utashvinavabharad yat tadasidajahadu dva mithuna saranyuh

2.34

ये निखा॑ता॒ ये परो॑प्ता॒ ये द॒ग्धा ये चोद्धि॑ताः ।
सर्वां॒स्तान॑ग्न॒ आ व॑ह पि॒तॄन् ह॒विषे॒ अत्त॑वे ॥३४॥

Ye nikhata ye paropta ye dagdha ye choddhitah
Sarvanstanagna a vaha pitrin havishe attave

2.35

ये अ॑ग्निद॒ग्धा ये अन॑ग्निदग्धा॒ मध्ये॑ दि॒वः स्व॒धया॑ मा॒दय॑न्ते ।
त्वं तान् वे॑त्थ॒ यदि॒ ते जा॑तवेदः स्व॒धया॑ य॒ज्ञं स्वधि॑तिं जुषन्ताम् ॥३५॥

Ye agnidagdha ye anagnidagdha madhye divah svadhaya madayante
Tvam tan vettha yadi te jatavedah svadhaya yagyam svadhitim jushantam

2.36

शं त॑प॒ माति॑ तपो॒ अग्ने॒ मा त॒न्वं॑१ तपः॑ ।
वणे॑षु॒ शुष्मो॑ अस्तु ते पृथि॒व्याम॑स्तु॒ यद्धरः॑ ॥३६॥

Sham tapa mati tapo agne ma tanvan1 tapah
Vaneshu shushmo astu te prithivyamastu yaddharah

2.37

ददा॑म्यस्मा अव॒सान॑मे॒तद् य ए॒ष आग॒न् मम॒ चेदभू॑दि॒ह।
य॒मश्चि॑कि॒त्वान् प्रत्ये॒तदा॑ह॒ ममै॒ष रा॒य उप॑ तिष्ठतामि॒ह ॥३७॥

Dadamyasma avasanametad ya esha agan mama chedabhudiha
Yamashchikitvan pratyetadaha mamaisha raya upa tishthatamiha

2.38

इ॒मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥३८॥

Imam matram mimimahe yathaparam na masatai
Shate sharatsu no pura

2.39

प्रेमां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥३९॥

Premam matram mimimahe yathaparam na masatai
Shate sharatsu no pura

2.40

अपे॒मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥४०॥

Apemam matram mimimahe yathaparam na masatai
Shate sharatsu no pura

2.41

वी॒३मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥४१॥

Vi3mam matram mimimahe yathaparam na masatai
Shate sharatsu no pura

2.42

निरि॒मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥४२॥

Nirimam matram mimimahe yathaparam na masatai
Shate sharatsu no pura

2.43

उदि॒मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥४३॥

Udimam matram mimimahe yathaparam na masatai
Shate sharatsu no pura

2.44

समि॒मां मात्रां॑ मिमीमहे॒ यथाप॑रं॒ न मासा॑तै ।
श॒ते श॒रत्सु॒ नो पु॒रा ॥४४॥

Samimam matram mimimahe yathaparam na masatai
Shate sharatsu no pura

2.45

अमा॑सि॒ मात्रां॒ स्वऽरगा॒मायु॑ष्मान् भूयासम्।
यथाप॑रं॒ न मासा॑तै श॒ते श॒रत्सु॒ नो पु॒रा ॥४५॥

Amasi matram svaragamayushman bhuyasam
Yathaparam na masatai shate sharatsu no pura

2.46

प्रा॒णो अ॑पा॒नो व्या॒न आयु॒श्चक्षु॑र्दृ॒शये॒ सूर्या॑य ।
अप॑रिपरेण प॒था य॒मरा॑ज्ञः पि॒तॄन् ग॑च्छ ॥४६॥

Prano apano vyana ayushchakshurdrishaye suryaya
Apariparena patha yamaragyah pitrin gachchha

2.47

ये अग्र॑वः शशमा॒नाः प॑रे॒युर्हि॒त्वा द्वेषां॒स्यन॑पत्यवन्तः ।
ते द्यामु॒दित्या॑विदन्त लो॒कं नाक॑स्य पृ॒ष्ठे अधि॒ दीध्या॑नाः ॥४७॥

Ye agravah shashamanah pareyurhitva dveshansyanapatyavantah
Te dyamudityavidanta lokam nakasya prishthe adhi didhyanah

2.48

उ॒द॒न्वती॒ द्यौर॑व॒मा पी॒लुम॒तीति॑ मध्य॒मा।
तृ॒तीया॑ ह प्र॒द्यौरिति॒ य॑स्यां पि॒तर॒ आस॑ते ॥४८॥

Udanvati dyauravama pilumatiti madhyama
Tritiya ha pradyauriti yasyam pitara asate

2.49

ये न॑ पि॒तुः पि॒तरो॑ ये पि॑ताम॒हा य आ॑विवि॒शुरु॒र्व॑१न्तरि॑क्षम्।
य आ॑क्षि॒यन्ति॑ पृथि॒वीमु॒त द्यां तेभ्यः॑ पि॒तृभ्यो॒ नम॑सा विधेम ॥४९॥

Ye na pituh pitaro ye pitamaha ya avivishururva1ntariksham
Ya akshiyanti prithivimuta dyam tebhyah pitribhyo namasa vidhema

2.50

इ॒दमिद् वा उ॒ नाप॑रं दि॒वि प॑श्यसि॒ सूर्य॑म्।
मा॒ता पु॒त्रं यथा॑ सि॒चाभ्येऽनं भूम ऊर्णुहि ॥५०॥

Idamid va u naparam divi pashyasi suryam
Mata putram yatha sichabhyenam bhuma urnuhi

2.51

इ॒दमिद् वा उ॒ नाप॑रं ज॒रस्य॒न्यदि॒तोऽप॑रम्।
जा॒या पति॑मिव॒ वास॑सा॒भ्येऽनं भूम ऊर्णुहि ॥५१॥

Idamid va u naparam jarasyanyaditoparam
Jaya patimiva vasasabhyenam bhuma urnuhi

2.52

अ॒भि त्वो॑र्णोमि पृथि॒व्या मा॒तुर्वस्त्रे॑ण भ॒द्रया॑ ।
जी॒वेषु॑ भ॒द्रं तन्मयि॑ स्व॒धा पि॒तृषु॒ सा त्वयि॑ ॥५२॥

Abhi tvornomi prithivya maturvastrena bhadraya
Jiveshu bhadram tanmayi svadha pitrishu sa tvayi

2.53

अग्नी॑षोमा॒ पथि॑कृता स्यो॒नं दे॒वेभ्यो॒ रत्नं॑ दधथु॒र्वि लो॒कम्।
उप॒ प्रेष्य॑न्तं पू॒षणं॒ यो वहा॑त्यञ्जो॒यानैः॑ प॒थिभि॒स्तत्र॑ गच्छतम् ॥५३॥

Agnishoma pathikrita syonam devebhyo ratnam dadhathurvi lokam
Upa preshyantam pushanam yo vahatyanjoyanaih pathibhistatra gachchhatam

2.54

पू॒षा त्वे॒तश्च्या॑वयतु॒ प्र वि॒द्वानन॑ष्टपशु॒र्भुव॑नस्य गो॒पाः ।
स त्वै॒तेभ्यः॒ परि॑ ददत् पि॒तृभ्यो॒ऽग्निर्दे॒वेभ्यः॑ सुविद॒त्रिये॑भ्यः ॥५४॥

Pusha tvetashchyavayatu pra vidvananashtapashurbhuvanasya gopah
Sa tvaitebhyah pari dadat pitribhyognirdevebhyah suvidatriyebhyah

2.55

आयु॑र्वि॒श्वायुः॒ परि॑ पातु त्वा पू॒षा त्वा॑ पातु॒ प्रप॑थे पु॒रस्ता॑त्।
यत्रास॑ते सु॒कृतो॒ यत्र॒ त ई॒युस्तत्र॑ त्वा दे॒वः स॑वि॒ता द॑धातु ॥५५॥

Ayurvishvayuh pari patu tva pusha tva patu prapathe purastat
Yatrasate sukrito yatra ta iyustatra tva devah savita dadhatu

2.56

इ॒मौ यु॑नज्मि ते॒ वह्नी॒ असु॑नीताय॒ वोढ॑वे ।
ताभ्यां॑ य॒मस्य॒ साद॑नं॒ समि॑ती॒श्चाव॑ गच्छतात् ॥५६॥

Imau yunajmi te vahni asunitaya vodhave
Tabhyam yamasya sadanam samitishchava gachchhatat

2.57

ए॒तत् त्वा॒ वासः॑ प्रथ॒मं न्वाग॒न्नपै॒तदू॑ह यदि॒हाबि॑भः पु॒रा।
इ॒ष्टा॒पू॒र्तम॑नु॒संक्रा॑म वि॒द्वान् यत्र॑ ते द॒त्तं ब॑हु॒धा विब॑न्धुषु ॥५७॥

Etat tva vasah prathamam nvagannapaitaduha yadihabibhah pura
Ishtapurtamanusankrama vidvan yatra te dattam bahudha vibandhushu

2.58

अ॒ग्नेर्वर्म॒ परि॒ गोभि॑र्व्ययस्व॒ सं प्रोर्णु॑ष्व॒ मेद॑सा॒ पीव॑सा च ।
नेत् त्वा॑ धृ॒ष्णुर्हर॑सा॒ जर्हृ॑षाणो द॒धृग् वि॑ध॒क्षन् प॑री॒ङ्खया॑तै ॥५८॥

Agnervarma pari gobhirvyayasva sam prornushva medasa pivasa cha
Net tva dhrishnurharasa jarhrishano dadhrig vidhakshan parinkhayatai

2.59

द॒ण्डं हस्ता॑दा॒ददा॑नो ग॒तासोः॑ स॒ह श्रोत्रे॑ण॒ वर्च॑सा॒ बले॑न ।
अत्रै॒व त्वमि॒ह व॒यं सु॒वीरा॒ विश्वा॒ मृधो॑ अ॒भिमा॑तीर्जयेम ॥५९॥

Dandam hastadadadano gatasoh saha shrotrena varchasa balena
Atraiva tvamiha vayam suvira vishva mridho abhimatirjayema

2.60

धनु॒र्हस्ता॑दा॒ददा॑नो मृ॒तस्य॑ स॒ह क्ष॒त्रेण॒ वर्च॑सा॒ बले॑न ।
स॒मागृ॑भाय॒ वसु॒ भूरि॑ पु॒ष्टम॒र्वाङ्त्वमेह्युप॑ जीवलो॒कम् ॥६०॥

Dhanurhastadadadano mritasya saha kshatrena varchasa balena
Samagribhaya vasu bhuri pushtamarvantvamehyupa jivalokam