Sukta 3

3.1

Pitrimedhah, 1-73 atharva, yamah, 44, 46 mantroktah, 5-6 agnih, 50 bhumih, 54 induh, 56 apah, trishtup, 4, 8, 11, 23 satah pankti, 5 tripada nichridgayatri, 6, 56, 68, 70, 72 anushtup (56 arshi), 18 25-29, 44, 46 jagati, (18 bhurik, 29 virat) 30 panchapada atijagati, 31 virat shakvari, 32-35, 47, 49, 52 bhurik, 36 ekavasana asuri anushtup, 37 akavasana asuri gayatri, 39 para trishtup panktih, 50 prastarapanktih, 54 puronushtup, 58 virat, 60 tryavasana shat-pada jagati, 64 bhurik pathyapanktih, 67 pathyabri

इ॒यं नारी॑ पतिलो॒कं वृ॑णा॒ना नि प॑द्यत॒ उप॑ त्वा मर्त्य॒ प्रेत॑म्।
धर्मं॑ पुरा॒णम॑नुपा॒लय॑न्ती॒ तस्यै॑ प्र॒जां द्रवि॑णं चे॒ह धे॑हि ॥१॥

Iyam nari patilokam vrinana ni padyata upa tva martya pretam
Dharmam puranamanupalayanti tasyai prajam dravinam cheha dhehi

3.2

उदी॑र्ष्व नार्य॒भि जी॑वलो॒कं ग॒तासु॑मे॒तमुप॑ शेष॒ एहि॑ ।
ह॒स्त॒ग्रा॒भस्य॑ दधि॒षोस्तवे॒दं पत्यु॑र्जनि॒त्वम॒भि सं ब॑भूथ ॥२॥

Udirshva naryabhi jivalokam gatasumetamupa shesha ehi
Hastagrabhasya dadhishostavedam patyurjanitvamabhi sam babhutha

3.3

अप॑श्यं युव॒तिं नी॒यमा॑नां जी॒वां मृ॒तेभ्यः॑ परिणी॒यमा॑नाम्।
अ॒न्धेन॒ यत् तम॑सा॒ प्रावृ॒तासी॑त् प्रा॒क्तो अपा॑चीमनयं॒ तदे॑नाम् ॥३॥

Apashyam yuvatim niyamanam jivam mritebhyah pariniyamanam
Andhena yat tamasa pravritasit prakto apachimanayam tadenam

3.4

प्र॒जा॒न॒त्यऽघ्न्ये जीवलो॒कं दे॒वानां॒ पन्था॑मनुसं॒चर॑न्ती ।
अ॒यं ते॒ गोप॑ति॒स्तं जु॑षस्व स्व॒र्गं लो॒कमधि॑ रोहयैनम् ॥४॥

Prajanatyaghnye jivalokam devanam panthamanusancharanti
Ayam te gopatistam jushasva svargam lokamadhi rohayainam

3.5

उप॒ द्यामुप॑ वेत॒समव॑त्तरो न॒दीना॑म्।
अग्ने॑ पि॒त्तम॒पाम॑सि ॥५॥

Upa dyamupa vetasamavattaro nadinam
Agne pittamapamasi

3.6

यं त्वम॑ग्ने स॒मद॑ह॒स्तमु॒ निर्वा॑पया॒ पुनः॑ ।
क्याम्बू॒रत्र॑ रोहतु शाण्डदू॒र्वा व्य॒ऽल्कशा ॥६॥

Yam tvamagne samadahastamu nirvapaya punah
Kyamburatra rohatu shandadurva vyalkasha

3.7

इ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
सं॒वेश॑ने त॒न्वा॒३ चारु॑रेधि प्रि॒यो दे॒वानां॑ पर॒मे स॒धस्थे॑ ॥७॥

Idam ta ekam para u ta ekam tritiyena jyotisha sam vishasva
Sanveshane tanva3 charuredhi priyo devanam parame sadhasthe

3.8

उत् ति॑ष्ठ॒ प्रेहि॒ प्र द्र॒वौकः॑ कृणुष्व सलि॒ले स॒धस्थे॑ ।
तत्र॒ त्वं पि॒तृभिः॑ संविदा॒नः सं सोमे॑न॒ मद॑स्व॒ सं स्व॒धाभिः॑ ॥८॥

Ut tishtha prehi pra dravaukah krinushva salile sadhasthe
Tatra tvam pitribhih sanvidanah sam somena madasva sam svadhabhih

3.9

प्र च्य॑वस्व त॒न्वं॑१ सं भ॑रस्व॒ मा ते॒ गात्रा॒ वि हा॑यि॒ मो शरी॑रम्।
मनो॒ निवि॑ष्टमनु॒संवि॑शस्व॒ यत्र॒ भूमे॑र्जु॒षसे॒ तत्र॑ गच्छ ॥९॥

Pra chyavasva tanvan1 sam bharasva ma te gatra vi hayi mo shariram
Mano nivishtamanusanvishasva yatra bhumerjushase tatra gachchha

3.10

वर्च॑सा॒ मां पि॒तरः॑ सो॒म्यासो॒ अञ्ज॑न्तु दे॒वा मधु॑ना घृ॒तेन॑ ।
चक्षु॑षे मा प्रत॒रं ता॒रय॑न्तो ज॒रसे॑ मा ज॒रद॑ष्टिं वर्धन्तु ॥१०॥

Varchasa mam pitarah somyaso anjantu deva madhuna ghritena
Chakshushe ma prataram tarayanto jarase ma jaradashtim vardhantu

3.11

वर्च॑सा॒ मां सम॑नक्त्व॒ग्निर्मे॒धां मे॒ विष्णु॒र्न्यऽनक्त्वा॒सन्।
र॒यिं मे॒ विश्वे॒ नि य॑च्छन्तु दे॒वाः स्यो॒ना मापः॒ पव॑नैः पुनन्तु ॥११॥

Varchasa mam samanaktvagnirmedham me vishnurnyanaktvasan
Rayim me vishve ni yachchhantu devah syona mapah pavanaih punantu

3.12

मि॒त्रावरु॑णा॒ परि॒ माम॑धातामादि॒त्या मा॒ स्वर॑वो वर्धयन्तु ।
वर्चो॑ म इन्द्रो॑ न्यनक्तु॒ हस्त॑योर्ज॒रद॑ष्टिं मा सवि॒ता कृ॑णोतु ॥१२॥

Mitravaruna pari mamadhatamaditya ma svaravo vardhayantu
Varcho ma indro nyanaktu hastayorjaradashtim ma savita krinotu

3.13

यो म॒मार॑ प्रथ॒मो मर्त्या॑नां॒ यः प्रे॒याय॑ प्रथ॒मो लो॒कमे॒तम्।
वै॒व॒स्व॒तं सं॒गम॑नं॒ जना॑नां य॒मं राजा॑नं ह॒विषा॑ सपर्यत ॥१३॥

Yo mamara prathamo martyanam yah preyaya prathamo lokametam
Vaivasvatam sangamanam jananam yamam rajanam havisha saparyata

3.14

परा॑ यात पितर॒ आ च॑ याता॒यं वो॑ य॒ज्ञो मधु॑ना॒ सम॑क्तः ।
द॒त्तो अ॒स्मभ्यं॒ द्रवि॑णे॒ह भ॒द्रं र॒यिं च॑ नः॒ सर्व॑वीरं दधात ॥१४॥

Para yata pitara a cha yatayam vo yagyo madhuna samaktah
Datto asmabhyam dravineha bhadram rayim cha nah sarvaviram dadhata

3.15

कण्वः॑ क॒क्षीवा॑न् पुरुमी॒ढो अ॒गस्त्यः॑ श्या॒वाश्वः॒ सोभ॑र्यर्च॒नानाः॑ ।
वि॒श्वामि॑त्रो॒ऽयं ज॒मद॑ग्नि॒रत्रि॒रव॑न्तु नः क॒श्यपो॑ वा॒मदे॑वः ॥१५॥

Kanvah kakshivan purumidho agastyah shyavashvah sobharyarchananah
Vishvamitroyam jamadagniratriravantu nah kashyapo vamadevah

3.16

विश्वा॑मित्र॒ जम॑दग्ने॒ वसि॑ष्ठ॒ भर॑द्वाज॒ गोत॑म॒ वाम॑देव ।
श॒र्दिर्नो॒ अत्रि॑रग्रभी॒न्नमो॑भिः॒ सुसं॑शासः॒ पित॑रो मृ॒डता॑ नः ॥१६॥

Vishvamitra jamadagne vasishtha bharadvaja gotama vamadeva
Shardirno atriragrabhinnamobhih susanshasah pitaro mridata nah

3.17

क॒स्ये मृ॒जाना॒ अति॑ यन्ति रि॒प्रमायु॒र्दधा॑नाः प्रत॒रं नवी॑यः ।
आ॒प्याय॑मानाः प्र॒जया॑ धने॒नाध॑ स्याम सुर॒भयो॑ गृ॒हेषु॑ ॥१७॥

Kasye mrijana ati yanti ripramayurdadhanah prataram naviyah
Apyayamanah prajaya dhanenadha syama surabhayo griheshu

3.18

अ॒ञ्जते॒ व्यऽञ्जते॒ सम॑ञ्जते॒ क्रतुं॑ रिहन्ति॒ मधु॑ना॒भ्यऽञ्जते ।
सिन्धो॑रुच्छ्वा॒से प॒तय॑न्तमु॒क्षणं॑ हिरण्यपा॒वाः प॒शुमा॑सु गृह्णते ॥१८॥

Anjate vyanjate samanjate kratum rihanti madhunabhyanjate
Sindhoruchchhvase patayantamukshanam hiranyapavah pashumasu grihnate

3.19

यद् वो॑ मु॒द्रं पि॑तरः सो॒म्यं च॒ तेनो॑ सचध्वं॒ स्वय॑शसो॒ हि भू॒त।
ते अ॑र्वाणः कवय॒ आ शृ॑णोत सुविद॒त्रा वि॒दथे॑ हू॒यमा॑नाः ॥१९॥

Yad vo mudram pitarah somyam cha teno sachadhvam svayashaso hi bhuta
Te arvanah kavaya a shrinota suvidatra vidathe huyamanah

3.20

ये अत्र॑यो॒ अङ्गि॑रसो॒ नव॑ग्वा इ॒ष्टाव॑न्तो राति॒षाचो॒ दधा॑नाः ।
दक्षि॑णावन्तः सु॒कृतो॒ य उ॒ स्थासद्या॒स्मिन् ब॒र्हिषि॑ मादयध्वम् ॥२०॥

Ye atrayo angiraso navagva ishtavanto ratishacho dadhanah
Dakshinavantah sukrito ya u sthasadyasmin barhishi madayadhvam

3.21

अधा॒ यथा॑ नः पि॒तरः॒ परा॑सः प्र॒त्नासो॑ अग्न ऋ॒तमा॑शशा॒नाः ।
शुचीद॑य॒न् दीध्य॑त उक्थ॒शासः॒ क्षामा॑ भि॒न्दन्तो॑ अरु॒णीरप॑ व्रन् ॥२१॥

Adha yatha nah pitarah parasah pratnaso agna ritamashashanah
Shuchidayan didhyata ukthashasah kshama bhindanto arunirapa vran

3.22

सु॒कर्मा॑नः सु॒रुचो॑ देव॒यन्तो॒ अयो॒ न दे॒वा जनि॑मा॒ धम॑न्तः ।
शु॒चन्तो॑ अ॒ग्निं वा॑वृ॒धन्त॒ इन्द्र॑मु॒र्वीं गव्यां॑ परि॒षदं॑ नो अक्रन् ॥२२॥

Sukarmanah surucho devayanto ayo na deva janima dhamantah
Shuchanto agnim vavridhanta indramurvim gavyam parishadam no akran

3.23

आ यू॒थेव॑ क्षु॒मति॑ प॒श्वो अ॑ख्यद् दे॒वानां॒ जनि॒मान्त्यु॒ग्रः ।
मर्ता॑सश्चिदु॒र्वशी॑रकृप्रन् वृ॒धे चि॑द॒र्य उप॑रस्या॒योः ॥२३॥

A yutheva kshumati pashvo akhyad devanam janimantyugrah
Martasashchidurvashirakripran vridhe chidarya uparasyayoh

3.24

अक॑र्म ते॒ स्वप॑सो अभूम ऋ॒तम॑वस्रन्नु॒षसो॑ विभा॒तीः ।
विश्वं॒ तद् भ॒द्रं यदव॑न्ति दे॒वा बृ॒हद् व॑देम वि॒दथे॑ सु॒वीराः॑ ॥२४॥

Akarma te svapaso abhuma ritamavasrannushaso vibhatih
Vishvam tad bhadram yadavanti deva brihad vadema vidathe suvirah

3.25

इन्द्रो॑ मा म॒रुत्वा॒न् प्राच्या॑ दि॒शः पा॑तु बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥२५॥

Indro ma marutvan prachya dishah patu bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.26

धा॒ता मा॒ निरृ॑त्या॒ दक्षि॑णाया दि॒शः पा॑तु बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥२६॥

Dhata ma nirritya dakshinaya dishah patu bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.27

अदि॑तिर्मादि॒त्यैः प्र॒तीच्या॑ दि॒शः पा॑तु बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥२७॥

Aditirmadityaih pratichya dishah patu bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.28

सोमो॑ मा॒ विश्वै॑र्दे॒वैरुदी॑च्या दि॒शः पा॑तु बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥२८॥

Somo ma vishvairdevairudichya dishah patu bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.29

ध॒र्ता ह॑ त्वा ध॒रुणो॑ धारयाता ऊ॒र्ध्वं भा॒नुं स॑वि॒ता द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥२९॥

Dharta ha tva dharuno dharayata urdhvam bhanum savita dyamivopari
Lokakritah pathikrito yajamahe ye devanam hutabhaga iha stha

3.30

प्राच्यां॑ त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३०॥

Prachyam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.31

दक्षि॑णायां त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३१॥

Dakshinayam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.32

प्र॒तीच्यां॑ त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३२॥

Pratichyam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.33

उदी॑च्यां त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३३॥

Udichyam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.34

ध्रु॒वायां॑ त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३४॥

Dhruvayam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.35

ऊ॒र्ध्वायां॑ त्वा दि॒शि पु॒रा सं॒वृतः॑ स्व॒धाया॒मा द॑धामि बाहु॒च्युता॑ पृथि॒वी द्यामि॑वो॒परि॑ ।
लो॒क॒कृतः॑ पथि॒कृतो॑ यजामहे॒ ये दे॒वानां॑ हु॒तभा॑गा इ॒ह स्थ ॥३५॥

Urdhvayam tva dishi pura sanvritah svadhayama dadhami bahuchyuta prithivi dyamivopari
Lokakritah pathikrito yajamahe ye devanam hutabhaga iha stha

3.36

ध॒र्तासि॑ ध॒रुणो॑ऽसि॒ वंस॑गोऽसि ॥३६॥

Dhartasi dharunosi vansagosi

3.37

उ॒द॒पूर॑सि मधु॒पूर॑सि वात॒पूर॑सि ॥३७॥

Udapurasi madhupurasi vatapurasi

3.38

इ॒तश्च॑ मा॒मुत॑श्चावतां य॒मे इ॑व॒ यत॑माने॒ यदै॒तम्।
प्र वां॑ भर॒न् मानु॑षा देव॒यन्तो॒ आ सी॑दतां॒ स्वमु॑ लो॒कं विदा॑ने ॥३८॥

Itashcha mamutashchavatam yame iva yatamane yadaitam
Pra vam bharan manusha devayanto a sidatam svamu lokam vidane

3.39

स्वास॑स्थे भवत॒मिन्द॑वे नो यु॒जे वां॒ ब्रह्म॑ पू॒र्व्यं नमो॑भिः ।
वि श्लोक॑ एति प॒थ्येऽव सू॒रिः शृ॒ण्वन्तु॒ विश्वे॑ अ॒मृता॑स ए॒तत् ॥३९॥

Svasasthe bhavatamindave no yuje vam brahma purvyam namobhih
Vi shloka eti pathyeva surih shrinvantu vishve amritasa etat

3.40

त्रीणि॑ प॒दानि॑ रु॒पो अन्व॑रोह॒च्चतु॑ष्पदी॒मन्वैतद् व्र॒तेन॑ ।
अ॒क्षरे॑ण॒ प्रति॑ मिमीते अ॒र्कमृ॒तस्य॒ नाभा॑व॒भि सं पु॑नाति ॥४०॥

Trini padani rupo anvarohachchatushpadimanvaitad vratena
Aksharena prati mimite arkamritasya nabhavabhi sam punati

3.41

दे॒वेभ्यः॒ कम॑वृणीत मृ॒त्युं प्र॒जायै॒ किम॒मृतं॒ नावृ॑णीत ।
बृह॒स्पति॑र्य॒ज्ञम॑तनुत॒ ऋषिः॑ प्रि॒यां य॒मस्त॒न्व॑१मा रि॑रेच ॥४१॥

Devebhyah kamavrinita mrityum prajayai kimamritam navrinita
Brihaspatiryagyamatanuta rishih priyam yamastanva1ma rirecha

3.42

त्वम॑ग्न ईडि॒तो जा॑तवे॒दोऽवा॑ड्ढ॒व्यानि॑ सुर॒भीणि॑ कृ॒त्वा।
प्रादाः॑ पि॒तृभ्यः॑ स्व॒धया॒ ते अ॑क्षन्न॒द्धि त्वं दे॑व॒ प्रय॑ता ह॒वींषि॑ ॥४२॥

Tvamagna idito jatavedovaddhavyani surabhini kritva
Pradah pitribhyah svadhaya te akshannaddhi tvam deva prayata havinshi

3.43

आसी॑नासो अरु॒णीना॑मु॒पस्थे॑ र॒यिं ध॑त्त दा॒शुषे॒ मर्त्या॑य ।
पु॒त्रेभ्यः॑ पितर॒स्तस्य॒ वस्वः॒ प्र य॑च्छत॒ त इ॒होर्जं॑ दधात ॥४३॥

Asinaso aruninamupasthe rayim dhatta dashushe martyaya
Putrebhyah pitarastasya vasvah pra yachchhata ta ihorjam dadhata

3.44

अग्नि॑ष्वात्ताः पितर॒ एह ग॑च्छत॒ सदः॑सदः सदत सुप्रणीतयः ।
अ॒त्तो ह॒वींषि॒ प्रय॑तानि ब॒र्हिषि॑ र॒यिं च॑ नः॒ सर्व॑वीरं दधात ॥४४॥

Agnishvattah pitara eha gachchhata sadahsadah sadata supranitayah
Atto havinshi prayatani barhishi rayim cha nah sarvaviram dadhata

3.45

उप॑हूता नः पि॒तरः॑ सो॒म्यासो॑ बर्हि॒ष्येऽषु नि॒धिषु॑ प्रि॒येषु॑ ।
त आ ग॑मन्तु॒ त इ॒ह श्रु॑व॒न्त्वधि॑ ब्रुवन्तु॒ तेऽवन्त्व॒स्मान् ॥४५॥

Upahuta nah pitarah somyaso barhishyeshu nidhishu priyeshu
Ta a gamantu ta iha shruvantvadhi bruvantu tevantvasman

3.46

ये नः॑ पि॒तुः पि॒तरो॒ ये पि॑ताम॒हा अ॑नूजहि॒रे सो॑मपी॒थं वसि॑ष्ठाः ।
तेभि॑र्य॒मः सं॑ररा॒णो ह॒वींष्यु॒शन्नु॒शद्भिः॑ प्रतिका॒मम॑त्तु ॥४६॥

Ye nah pituh pitaro ye pitamaha anujahire somapitham vasishthah
Tebhiryamah sanrarano havinshyushannushadbhih pratikamamattu

3.47

ये ता॑तृ॒षुर्दे॑व॒त्रा जेह॑माना होत्रा॒विदः॒ स्तोम॑तष्टासो अ॒र्कैः ।
आग्ने॑ याहि स॒हस्रं॑ देवव॒न्दैः स॒त्यैः क॒विभि॒र्ऋषि॑भिर्घर्म॒सद्भिः॑ ॥४७॥

Ye tatrishurdevatra jehamana hotravidah stomatashtaso arkaih
Agne yahi sahasram devavandaih satyaih kavibhirrishibhirgharmasadbhih

3.48

ये स॒त्यासो॑ हवि॒रदो॑ हवि॒ष्पा इन्द्रे॑ण दे॒वैः स॒रथं॑ तु॒रेण॑ ।
आग्ने॑ याहि सुवि॒दत्रे॑भिर॒र्वाङ् परैः॒ पूर्वै॒र्ऋषि॑भिर्घर्म॒सद्भिः॑ ॥४८॥

Ye satyaso havirado havishpa indrena devaih saratham turena
Agne yahi suvidatrebhirarvang paraih purvairrishibhirgharmasadbhih

3.49

उप॑ सर्प मा॒तरं॒ भूमि॑मे॒तामु॑रु॒व्यच॑सं पृथि॒वीं सु॒शेवा॑म्।
ऊर्ण॑म्रदाः पृथि॒वी दक्षि॑णावत ए॒षा त्वा॑ पातु॒ प्रप॑थे पु॒रस्ता॑त् ॥४९॥

Upa sarpa mataram bhumimetamuruvyachasam prithivim sushevam
Urnamradah prithivi dakshinavata esha tva patu prapathe purastat

3.50

उच्छ्व॑ञ्चस्व पृथिवि॒ मा नि बा॑धथाः सूपाय॒नास्मै॑ भव सूपसर्प॒णा।
मा॒ता पु॒त्रं यथा॑ सि॒चाभ्येऽनं भूम ऊर्णुहि ॥५०॥

Uchchhvanchasva prithivi ma ni badhathah supayanasmai bhava supasarpana
Mata putram yatha sichabhyenam bhuma urnuhi

3.51

उ॒च्छ्वञ्च॑माना पृथि॒वी सु ति॑ष्ठतु स॒हस्रं॒ मित॒ उप॒ हि श्रय॑न्ताम्।
ते गृ॒हासो॑ घृत॒श्चुतः॑ स्यो॒ना वि॒श्वाहा॑स्मै शर॒णाः स॒न्त्वत्र॑ ॥५१॥

Uchchhvanchamana prithivi su tishthatu sahasram mita upa hi shrayantam
Te grihaso ghritashchutah syona vishvahasmai sharanah santvatra

3.52

उत् ते॑ स्तभ्नामि पृथि॒वीं त्वत् परी॒मं लो॒गं नि॒दध॒न्मो अ॒हं रि॑षम्।
ए॒तां स्थूणां॑ पि॒तरो॑ धारयन्ति ते॒ तत्र॑ य॒मः साद॑ना ते कृणोतु ॥५२॥

Ut te stabhnami prithivim tvat parimam logam nidadhanmo aham risham
Etam sthunam pitaro dharayanti te tatra yamah sadana te krinotu

3.53

इ॒मम॑ग्ने चम॒सं मा वि जि॑ह्वरः॑ प्रि॒यो दे॒वाना॑मु॒त सो॒म्याना॑म्।
अ॒यं यश्च॑म॒सो दे॑व॒पान॒स्तस्मि॑न् दे॒वा अ॒मृता॑ मादयन्ताम् ॥५३॥

Imamagne chamasam ma vi jihvarah priyo devanamuta somyanam
Ayam yashchamaso devapanastasmin deva amrita madayantam

3.54

अथ॑र्वा पू॒र्णं च॑म॒सं यमिन्द्रा॒याबि॑भर्वा॒जिनी॑वते ।
तस्मि॒न् कृणोति सुकृ॒तस्य॑ भ॒क्षं तस्मि॒निन्दुः॑ पवते विश्व॒दानी॑म् ॥५४॥

Atharva purnam chamasam yamindrayabibharvajinivate
Tasmin krinoti sukritasya bhaksham tasmininduh pavate vishvadanim

3.55

यत् ते॑ कृ॒ष्णः श॑कु॒न आ॑तु॒तोद॑ पिपी॒लः स॒र्प उ॒त वा॒ श्वाप॑दः ।
अ॒ग्निष्टद् वि॒श्वाद॑ग॒दं कृ॑णोतु॒ सोम॑श्च॒ यो ब्रा॑ह्म॒णां आ॑वि॒वेश॑ ॥५५॥

Yat te krishnah shakuna atutoda pipilah sarpa uta va shvapadah
Agnishtad vishvadagadam krinotu somashcha yo brahmanam avivesha

3.56

पय॑स्वती॒रोष॑धयः॒ पय॑स्वन्माम॒कं पयः॑ ।
अ॒पां पय॑सो॒ यत् पय॒स्तेन॑ मा स॒ह शु॑म्भतु ॥५६॥

Payasvatiroshadhayah payasvanmamakam payah
Apam payaso yat payastena ma saha shumbhatu

3.57

इ॒मा नारी॑रविध॒वाः सु॒पत्नी॒राञ्ज॑नेन स॒र्पिषा॒ सं स्पृ॑शन्ताम्।
अ॒न॒श्रवो॑ अनमी॒वाः सु॒रत्ना॒ आ रो॑हन्तु॒ जन॑यो॒ योनि॒मग्रे॑ ॥५७॥

Ima nariravidhavah supatniranjanena sarpisha sam sprishantam
Anashravo anamivah suratna a rohantu janayo yonimagre

3.58

सं ग॑च्छस्व पि॒तृभिः॒ सं य॒मेने॑ष्टापू॒र्तेन॑ पर॒मे व्योऽमन्।
हि॒त्वाव॒द्यं पुन॒रस्त॒मेहि॒ सं ग॑च्छतां त॒न्वाऽ सु॒वर्चाः॑ ॥५८॥

Sam gachchhasva pitribhih sam yameneshtapurtena parame vyoman
Hitvavadyam punarastamehi sam gachchhatam tanva suvarchah

3.59

ये नः॑ पि॒तुः पि॒तरो॒ ये पि॑ताम॒हा य आ॑विवि॒शुरु॒र्व॑१न्तरि॑क्षम्।
तेभ्यः॑ स्व॒राडसु॑नीतिर्नो अ॒द्य व॑थाव॒शं त॒न्वः कल्पयाति ॥५९॥

Ye nah pituh pitaro ye pitamaha ya avivishururva1ntariksham
Tebhyah svaradasunitirno adya vathavasham tanvah kalpayati

3.60

शं ते॑ नीहा॒रो भ॑वतु॒ शं ते॑ प्रु॒ष्वाव॑ शीयताम्।
शीति॑के॒ शीति॑कावति॒ ह्लादि॑के॒ ह्लादि॑कावति ।
म॒ण्डू॒क्य॑१प्सु शं भु॑व इ॒मं स्व॑१ग्निं श॑मय ॥६०॥

Sham te niharo bhavatu sham te prushvava shiyatam
Shitike shitikavati hladike hladikavati
Mandukya1psu sham bhuva imam sva1gnim shamaya

3.61

वि॒वस्वा॑न्नो॒ अभ॑यं कृणोतु॒ यः सु॒त्रामा॑ जी॒रदा॑नुः सु॒दानुः॑ ।
इ॒हेमे वी॒रा ब॒हवो॑ भवन्तु॒ गोम॒दश्व॑व॒न्मय्य॑स्तु पु॒ष्टम् ॥६१॥

Vivasvanno abhayam krinotu yah sutrama jiradanuh sudanuh
Iheme vira bahavo bhavantu gomadashvavanmayyastu pushtam

3.62

वि॒वस्वा॑न् नो अमृत॒त्वे द॑धातु॒ परै॑तु मृ॒त्युर॒मृतं॑ न॒ ऐतु॑ ।
इ॒मान् र॑क्षतु॒ पुरु॑षा॒ना ज॑रि॒म्णो मो ष्वेऽषा॒मस॑वो य॒मं गुः॑ ॥६२॥

Vivasvan no amritatve dadhatu paraitu mrityuramritam na aitu
Iman rakshatu purushana jarimno mo shveshamasavo yamam guh

3.63

यो द॒ध्रे अ॒न्तरि॑क्षे॒ न म॒ह्ना पि॑तॄ॒णां क॒विः प्रम॑तिर्मती॒नाम्।
तम॑र्चत वि॒श्वमि॑त्रा ह॒विर्भिः॒ स नो॑ य॒मः प्र॑त॒रं जी॒वसे॑ धात् ॥६३॥

Yo dadhre antarikshe na mahna pitrinam kavih pramatirmatinam
Tamarchata vishvamitra havirbhih sa no yamah prataram jivase dhat

3.64

आ रो॑हत॒ दिव॑मुत्त॒मामृष॑यो॒ मा बि॑भीतन ।
सोम॑पाः॒ सोम॑पायिन इ॒दं वः॑ क्रियते ह॒विरग॑न्म॒ ज्वोति॑रुत्त॒मम् ॥६४॥

A rohata divamuttamamrishayo ma bibhitana
Somapah somapayina idam vah kriyate haviraganma jvotiruttamam

3.65

प्र के॒तुना॑ बृह॒ता भा॑त्य॒ग्निरा रोद॑सी वृष॒भो रो॑रवीति ।
दि॒वश्चि॒दन्ता॑दुप॒मामुदा॑नड॒पामु॒पस्थे॑ महि॒षो व॑वर्ध ॥६५॥

Pra ketuna brihata bhatyagnira rodasi vrishabho roraviti
Divashchidantadupamamudanadapamupasthe mahisho vavardha

3.66

नाके॑ सुप॒र्णमुप॒ यत् पत॑न्तं हृ॒दा वेन॑न्तो अ॒भ्यच॑क्षत त्वा ।
हिर॑ण्यपक्षं॒ वरु॑णस्य दू॒तं य॒मस्य॒ यो नौ॑ शकु॒नं भु॑र॒ण्युम् ॥६६॥

Nake suparnamupa yat patantam hrida venanto abhyachakshata tva
Hiranyapaksham varunasya dutam yamasya yo nau shakunam bhuranyum

3.67

इन्द्र॒ क्रतुं॑ न॒ आ भ॑र पि॒ता पु॒त्रेभ्यो॒ यथा॑ ।
शिक्षा॑ णो अ॒स्मिन् पु॑रुहूत॒ याम॑नि जी॒वा ज्योति॑रशीमहि ॥६७॥

Indra kratum na a bhara pita putrebhyo yatha
Shiksha no asmin puruhuta yamani jiva jyotirashimahi

3.68

अ॒पू॒पापि॑हितान् कु॒म्भान् यांस्ते॑ दे॒वा अधा॑रयन्।
ते ते॑ सन्तु स्व॒धाव॑न्तो॒ मधु॑मन्तो घृत॒श्चुतः॑ ॥६८॥

Apupapihitan kumbhan yanste deva adharayan
Te te santu svadhavanto madhumanto ghritashchutah

3.69

यास्ते॑ धा॒ना अ॑नुकि॒रामि॑ ति॒लमि॑श्रा स्व॒धाव॑तीः ।
तास्ते॑ सन्तु वि॒भ्वीः प्र॒भ्वीस्तास्ते॑ य॒मो राजानु॑ मन्यताम् ॥६९॥

Yaste dhana anukirami tilamishra svadhavatih
Taste santu vibhvih prabhvistaste yamo rajanu manyatam

3.70

पुन॑र्देहि वनस्पते॒ य ए॒ष निहि॑त॒स्त्वयि॑ ।
यथा॑ य॒मस्य॒ साद॑न॒ आसा॑तै वि॒दथा॒ वद॑न् ॥७०॥

Punardehi vanaspate ya esha nihitastvayi
Yatha yamasya sadana asatai vidatha vadan

3.71

आ र॑भस्व जातवेद॒स्तेज॑स्व॒द्धरो॑ अस्तु ते ।
शरी॑रमस्य॒ सं द॒हाथै॑नं धेहि सु॒कृता॑मु लो॒के ॥७१॥

A rabhasva jatavedastejasvaddharo astu te
Shariramasya sam dahathainam dhehi sukritamu loke

3.72

ये ते॒ पूर्वे॒ परा॑गता॒ अप॑रे पि॒तर॑श्च॒ ये।
तेभ्यो॑ घृ॒तस्य॑ कु॒ल्यैऽतु श॒तधा॑रा व्युन्द॒ती ॥७२॥

Ye te purve paragata apare pitarashcha ye
Tebhyo ghritasya kulyaitu shatadhara vyundati

3.73

ए॒तदा रो॑ह॒ वय॑ उन्मृजा॒नः स्वा इ॒ह बृ॒हदु॑ दीदयन्ते ।
अ॒भि प्रेहि॑ मध्य॒तो माप॑ हास्थाः पितॄ॒नां लो॒कं प्र॑थ॒मो यो अत्र॑ ॥७३॥

Etada roha vaya unmrijanah sva iha brihadu didayante
Abhi prehi madhyato mapa hasthah pitrinam lokam prathamo yo atra