সূক্ত 4

4.1

বশা গৌঃ। ১-৫৩ কশ্যপঃ। বশা। অনুষ্টুপ্, ৭ ভুরিক্, ২০ বিরাট্, ৩১ উষ্ণিগ্বৃহতীগর্ভা, ৪২ বৃহতীগর্ভা।

দদামীত্যেব ব্রূয়াদনু চৈনামভুত্সত ।
বশাং ব্রহ্মভ্যো যাচদ্ভ্যস্তৎ প্রজাবদপত্যবৎ ॥১॥

4.2

প্রজয়া স বি ক্রীণীতে পশুভিশ্চোপ দস্যতি ।
য আর্ষেয়েভ্যো যাচদ্ভ্যো দেবানাং গাং ন দিত্সতি ॥২॥

4.3

কূটয়াস্য সং শীর্যন্তে শ্লোণয়া কাটমর্দতি ।
বণ্ডয়া দহ্যন্তে গৃহাঃ কাণয়া দীয়তে স্বম্ ॥৩॥

4.4

বিলোহিতো অধিষ্ঠানাচ্ছক্নো বিন্দতি গোপতিম্।
তথা বশায়াঃ সংবিদ্যং দুরদভ্না হ্যু১চ্যসে ॥৪॥

4.5

পদোরস্যা অধিষ্ঠানাদ্ বিক্লিন্দুর্নাম বিন্দতি ।
অনামনাৎ সং শীর্যন্তে যা মুখেনোপজিঘ্রতি ॥৫॥

4.6

যো অস্যাঃ কর্ণাবাস্কুনোত্যা স দেবেষু বৃশ্চতে ।
লক্ষ্ম কুর্ব ইতি মন্যতে কনীয়ঃ কৃণুতে স্বম্ ॥৬॥

4.7

যদস্যাঃ কস্মৈ চিদ্ ভোগায় বালান্ কশ্চিৎ প্রকৃন্ততি ।
ততঃ কিশোরা ম্রিয়ন্তে বত্সাংশ্চ ঘাতুকো বৃকঃ ॥৭॥

4.8

যদস্যা গোপতৌ সত্যা লোম ধ্বাঙ্ক্ষো অজীহিডৎ।
ততঃ কুমারা ম্রিয়ন্তে যক্ষ্মো বিন্দত্যনামনাৎ ॥৮॥

4.9

যদস্যাঃ পল্পূলনং শকৃদ্ দাসী সমস্যতি ।
ততোঽপরূপং জায়তে তস্মাদব্যেষ্যদেনসঃ ॥৯॥

4.10

জায়মানাভি জায়তে দেবান্ত্সব্রাহ্মণান্ বশা।
তস্মাদ্ ব্রহ্মভ্যো দেয়ৈষা তদাহুঃ স্বস্য গোপনম্ ॥১০॥

4.11

য এনাং বনিমায়ন্তি তেষাং দেবকৃতা বশা।
ব্রহ্মজ্যেয়ং তদব্রুবন্ য এনাং নিপ্রিয়ায়তে ॥১১॥

4.12

য আর্ষেয়েভ্যো যাচদ্ভ্যো দেবানাং গাং ন দিত্সতি ।
আ স দেবেষু বৃশ্চতে ব্রাহ্মণানাং চ মন্যবে ॥১২॥

4.13

যো অস্য স্যাদ্ বশাভোগো অন্যামিচ্ছেত তর্হি সঃ ।
হিংস্তে অদত্তা পুরুষং যাচিতাং চ ন দিত্সতি ॥১৩॥

4.14

যথা শেবধির্নিহিতো ব্রাহ্মণানাং তথা বশা।
তামেতদচ্ছায়ন্তি যস্মিন্ কস্মিংশ্চ জায়তে ॥১৪॥

4.15

স্বমেতদচ্ছায়ন্তি যদ্ বশাং ব্রাহ্মণা অভি।
যথৈনানন্যস্মিন্ জিনীয়াদেবাস্যা নিরোধনম্ ॥১৫॥

4.16

চরেদেবা ত্রৈহায়ণা দবিজ্ঞাতগদা সতী।
বশাং চ বিদ্যান্নারদ ব্রাহ্মণাস্তর্হ্যেষ্যাঃ ॥১৬॥

4.17

য এনামবশামাহ দেবানাং নিহিতং নিধিম্।
উভৌ তস্মৈ ভবাশর্বৌ পরিক্রম্যেষুমস্যতঃ ॥১৭॥

4.18

যো অস্যা ঊধো ন বেদাথো অস্যা স্তনানুত।
উভয়েনৈবাস্মৈ দুহে দাতুং চে দশকদ্ বশাম্ ॥১৮॥

4.19

দুরদভ্নৈনমা শয়ে যাচিতাং চ ন দিত্সতি ।
নাস্মৈ কামাঃ সমৃধ্যন্তে যামদত্ত্বা চিকীর্ষতি ॥১৯॥

4.20

দেবা বশাময়াচন্ মুখং কৃত্বা ব্রাহ্মণম্।
তেষাং সর্বেষামদদদ্ধেডং ন্যেঽতি মানুষঃ ॥২০॥

4.21

হেডং পশূনাং ন্যেঽতি ব্রাহ্মণেভ্যোঽদদদ্ বশাম্।
দেবানাং নিহিতং ভাগং মর্ত্যশ্চেন্নিপ্রিয়ায়তে ॥২১॥

4.22

যদন্যে শতং যাচেয়ুর্ব্রাহ্মণা গোপতিং বশাম্।
অথৈনাং দেবা অব্রুবন্নেবং হ বিদুষো বশা ॥২২॥

4.23

য এবং বিদুষেঽদত্ত্বাথান্যেভ্যো দদদ্ বশাম্।
দুর্গা তস্মা অধিষ্ঠানে পৃথিবী সহদেবতা ॥২৩॥

4.24

দেবা বশাময়াচন্ যস্মিন্নগ্রে অজায়ত ।
তামেতাং বিদ্যান্নারদঃ সহ দেবৈরুদাজত ॥২৪॥

4.25

অনপত্যমল্পপশুং বশা কৃণোতি পূরুষম্।
ব্রাহ্মণৈশ্চ যাচিতামথৈনাং নিপ্রিয়ায়তে ॥২৫॥

4.26

অগ্নীষোমাভ্যাং কামায় মিত্রায় বরুণায় চ ।
তেভ্যো যাচন্তি ব্রাহ্মণাস্তেষ্বা বৃশ্চতেঽদদৎ ॥২৬॥

4.27

যাবদস্যা গোপতির্নোপশৃণুয়াদৃচঃ স্বয়ম্।
চরেদস্য তাবদ্ গোষু নাস্য শ্রুত্বা গৃহে বসেৎ ॥২৭॥

4.28

যো অস্যা ঋচ উপশ্রুত্যাথ গোষ্বচীচরৎ।
আয়ুশ্চ তস্য ভূতিং চ দেবা বৃশ্চন্তি হীডিতাঃ ॥২৮॥

4.29

বশা চরন্তী বহুধা দেবানাং নিহিতো নিধিঃ ।
আবিষ্কৃণুষ্ব রূপাণি যদা স্থাম জিঘাংসতি ॥২৯॥

4.30

আবিরাত্মানং কৃণুতে যদা স্থাম জিঘাংসতি ।
অথো হ ব্রহ্মভ্যো বশা যাঞ্চ্যায় কৃণুতে মনঃ ॥৩০॥

4.31

মনসা সং কল্পয়তি তদ্ দেবাং অপি গচ্ছতি ।
ততো হ ব্রহ্মাণো বশামুপপ্রয়ন্তি যাচিতুম্ ॥৩১॥

4.32

স্বধাকারেণ পিতৃভ্যো যজ্ঞেন দেবতাভ্যঃ ।
দানেন রাজন্যোঽ বশায়া মাতুর্হেডং ন গচ্ছতি ॥৩২॥

4.33

বশা মাতা রাজন্যঽস্য তথা সংভূতমগ্রশঃ ।
তস্যা আহুরনর্পণং যদ্ ব্রহ্মভ্যঃ প্রদীয়তে ॥৩৩॥

4.34

যথাজ্যং প্রগৃহীতমালুম্পেৎ স্রুচো অগ্নয়ে ।
এবা হ ব্রহ্মভ্যো বশা মগ্নয় আ বৃশ্চতেঽদদৎ ॥৩৪॥

4.35

পুরোডাশবত্সা সুদুঘা লোকেঽস্মা উপ তিষ্ঠতি ।
সাস্মৈ সর্বান্ কামান্ বশা প্রদদুষে দুহে ॥৩৫॥

4.36

সর্বান্ কামান্ যমরাজ্যে বশা প্রদদুষে দুহে ।
অথাহুর্নারকং লোকং নিরুন্ধানস্য যাচিতাম্ ॥৩৬॥

4.37

প্রবীয়মানা চরতি ক্রুদ্ধা গোপতয়ে বশা।
বেহতং মা মন্যমানো মৃত্যোঃ পাশেষু বধ্যতাম্ ॥৩৭॥

4.38

যো বেহতং মন্যমানোঽমা চ পচতে বশাম্।
অপ্যস্য পুত্রান্ পৌত্রাংশ্চ যাচয়তে বৃহস্পতিঃ ॥৩৮॥

4.39

মহদেষাব তপতি চরন্তী গোষু গৌরপি ।
অথো হ গোপতয়ে বশাদদুষে বিষং দুহে ॥৩৯॥

4.40

প্রিয়ং পশূনাং ভবতি যদ্ ব্রহ্মভ্যঃ প্রদীয়তে ।
অথো বশায়াস্তৎ প্রিয়ং যদ্ দেবত্রা হবিঃ স্যাৎ ॥৪০॥

4.41

যা বশা উদকল্পয়ন্ দেবা যজ্ঞাদুদেত্য ।
তাসাং বিলিপ্ত্যং ভীমামুদাকুরুত নারদঃ ॥৪১॥

4.42

তাং দেবা অমীমাংসন্ত বশেয়া৩মবশেতি ।
তামব্রবীন্নারদ এষা বশানাং বশতমেতি ॥৪২॥

4.43

কতি নু বশা নারদ যাস্ত্বং বেত্থ মনুষ্যজাঃ ।
তাস্ত্বা পৃচ্ছামি বিদ্বাংসং কস্যা নাশ্নীয়াদব্রাহ্মণঃ ॥৪৩॥

4.44

বিলিপ্ত্যা বৃহস্পতে যা চ সূতবশা বশা।
তস্যা নাশ্নীয়াদব্রাহ্মণো যা আশংসেত ভূত্যাম্ ॥৪৪॥

4.45

নমস্তে অস্তু নারদানুষ্ঠু বিদুষে বশা।
কতমাসাং ভীমতমা যামদত্ত্বা পরাভবেৎ ॥৪৫॥

4.46

বিলিপ্তী যা বৃহস্পতেঽথো সূতবশা বশা।
তস্যা নাশ্নীয়াদব্রাহ্মণো য আশংসেত ভূত্যাম্ ॥৪৬॥

4.47

ত্রীণি বৈ বশাজাতানি বিলিপ্তী সূতবশা বশা।
তাঃ প্র যচ্ছেদ্ ব্রহ্মভ্যঃ সোঽনাব্রস্কঃ প্রজাপতৌ ॥৪৭॥

4.48

এতদ্ বো ব্রাহ্মণা হবিরিতি মন্বীত যাচিতঃ ।
বশাং চেদেনং যাচেয়ুর্যা ভীমাদদুষো গৃহে ॥৪৮॥

4.49

দেবা বশাং পর্যবদন্ ন নোঽদাদিতি হীডিতাঃ ।
এতাভিরৃগ্ভির্ভেদং তস্মাদ্ বৈ স পরাভবৎ ॥৪৯॥

4.50

উতৈনাং ভেদো নাদদাদ্ বশামিন্দ্রেণ যাচিতঃ ।
তস্মাৎ তং দেবা আগসোঽবৃশ্চন্নহমুত্তরে ॥৫০॥

4.51

যে বশায়া অদানায় বদন্তি পরিরাপিণঃ ।
ইন্দ্রস্য মন্যবে জাল্মা আ বৃশ্চন্তে অচিত্ত্যা ॥৫১॥

4.52

যে গোপতিং পরাণীয়াথাহুর্মা দদা ইতি ।
রুদ্রস্যাস্তাং তে হেতিং পরি যন্ত্যচিত্ত্যা ॥৫২॥

4.53

যদি হুতং যদ্যহুতামমা চ পচতে বশাম্।
দেবান্ত্সব্রাহ্মণানৃত্বা জিহ্মো লোকান্নিরৃচ্ছতি ॥৫৩॥