সূক্ত 3

3.1

স্বর্গৈদনঃ। ১-৬০ যমঃ। স্বর্গঃ, ওদনঃ, অগ্নিঃ। ত্রিষ্টুপ্, ১, ৪২-৪৩, ৪৭ ভুরিক্, ৮, ১২, ২১-২২, ২৪ জগতী, ১৩, ১৭ স্বরাডার্ষী পঙ্ক্তিঃ, ৩৪ বিরাড্ গর্ভা, ৩৯ অনুষ্টুব্গর্ভা, ৪৪ পরা বৃহতী, ৫৫-৬০ ত্র্যবসানা সপ্তপদা শঙ্কুমত্যতিজাগতশাক্বরাতিশাক্বরধা-র্ত্যগর্ভাতিধৃতিঃ (৫৫, ৫৭-৬০ কৃতিঃ),।

পুমান্ পুংসোঽধি তিষ্ঠ চর্মেহি তত্র হ্বয়স্ব যতমা প্রিয়া তে ।
যাবন্তাবগ্রে প্রথমং সমেয়থুস্তদ্ বাং বয়ো যমরাজ্যে সমানম্ ॥১॥

3.2

তাবদ্ বাং চক্ষুস্ততি বীর্যাঽণি তাবৎ তেজস্ততিধা বাজিনানি ।
অগ্নিঃ শরীরং সচতে যদৈধোঽধা পক্বান্মিথুনা সং ভবাথঃ ॥২॥

3.3

সমস্মিংল্লোকে সমু দেবয়ানে সং স্মা সমেতং যমরাজ্যেষু ।
পূতৌ পবিত্রৈরুপ তদ্ধ্বয়েথাং যদ্যদ্ রেতো অধি বাং সংবভূব ॥৩॥

3.4

আপস্পুত্রাসো অভি সং বিশধ্বমিমং জীবং জীবধন্যাঃ সমেত্য ।
তাসাং ভজধ্বমমৃতং যমাহুর্যমোদনং পচতি বাং জনিত্রী ॥৪॥

3.5

যং বাং পিতা পচতি যং চ মাতা রিপ্রান্নির্মুক্ত্যৈ শমলাচ্চ বাচঃ ।
স ওদনঃ শতধারঃ স্বর্গ উভে ব্যাঽপ নভসী মহিত্বা ॥৫॥

3.6

উভে নভসী উভয়াংশ্চ লোকান্ যে যজ্বনামভিজিতাঃ স্বর্গাঃ ।
তেষাং জ্যোতিষ্মান্ মধুমান্ যো অগ্রে তস্মিন্ পুত্রৈর্জরসি সং শ্রয়েথাম্ ॥৬॥

3.7

প্রাচীংপ্রাচীং প্রদিশমা রভেথামেতং লোকং শ্রদ্দধানাঃ সচন্তে ।
যদ্ বাং পক্বং পরিবিষ্টমগ্নৌ তস্য গুপ্তয়ে দংপতী সং শ্রয়েথাম্ ॥৭॥

3.8

দক্ষিণাং দিশমভি নক্ষমাণৌ পর্যাবর্তেথামভি পাত্রমেতৎ।
তস্মিন্ বাং যমঃ পিতৃভিঃ সংবিদানঃ পক্বায় শর্ম বহুলং নি যচ্ছাৎ ॥৮॥

3.9

প্রতীচী দিশামিয়মিদ্ বরং যস্যাং সোমো অধিপা মৃডিতা চ ।
তস্যাং শ্রয়েথাং সুকৃতঃ সচেথামধা পক্বান্মিথুনা সং ভবাথঃ ॥৯॥

3.10

উত্তরং রাষ্ট্রং প্রজয়োত্তরাবদ্ দিশামুদীচী কৃণবন্নো অগ্রম্।
পাঙ্ক্তং ছন্দঃপুরুষো বভূব বিশ্বৈর্বিশ্বাঙ্গৈঃ সহ সং ভবেম ॥১০॥

3.11

ধ্রুবেয়ং বিরাণ্নমো অস্ত্বস্যৈ শিবা পুত্রেভ্য উত মহ্যমস্তু ।
সা নো দেব্যদিতে বিশ্ববার ইর্য ইব গোপা অভি রক্ষ পক্বম্ ॥১১॥

3.12

পিতেব পুত্রানভি সং স্বজস্ব নঃ শিবা নো বাতা ইব বান্তু ভূমৌ ।
যমোদনং পচতো দেবতে ইহ তং নস্তপ উত সত্যং চ বেত্তু ॥১২॥

3.13

যদ্যৎ কৃষ্ণঃ শকুন এহ গত্বা ত্সরন্ বিষক্তং বিল আসসাদ ।
যদ্ বা দাস্যা৩র্দ্রহস্তা সমঙ্ক্ত উলূখলং মুসলং শুম্ভতাপঃ ॥১৩॥

3.14

অয়ং গ্রাবা পৃথুবুধ্নো বয়োধাঃ পূতঃ পবিত্রৈরপ হন্তু রক্ষঃ ।
আ রোহ চর্ম মহি শর্ম যচ্ছ মা দংপতী পৌত্রমঘং নি গাতাম্ ॥১৪॥

3.15

বনস্পতিঃ সহ দেবৈর্ন আগন্ রক্ষঃ পিশাচাঁ অপবাধমানঃ ।
স উচ্ছ্রয়াতৈ প্র বদাতি বাচং তেন লোকাঁ অভি সর্বান্ জয়েম ॥১৫॥

3.16

সপ্ত মেধান্ পশবঃ পর্যগৃহ্ণন্ য এষাং জ্যোতিষ্মাং উত যশ্চকর্শ ।
ত্রয়স্ত্রিংশদ্ দেবতাস্তান্ত্সচন্তে স নঃ স্বর্গমভি নেষ লোকম্ ॥১৬॥

3.17

স্বর্গং লোকমভি নো নয়াসি সং জায়য়া সহ পুত্রৈঃ স্যাম ।
গৃহ্ণামি হস্তমনু মৈত্বত্র মা নস্তারীন্নিরৃতির্মো অরাতিঃ ॥১৭॥

3.18

গ্রাহিং পাপ্মানমতি তাং অয়াম তমো ব্যঽস্য প্র বদাসি বল্গু।
বানস্পত্য উদ্যতো মা জিহিংসীর্মা তণ্ডুলং বি শরীর্দেবয়ন্তম্ ॥১৮॥

3.19

বিশ্বব্যচা ঘৃতপৃষ্ঠো ভবিষ্যন্ত্সয়োনির্লোকমুপ যাহ্যেতম্।
বর্ষবৃদ্ধমুপ যচ্ছ শূর্পং তুষং পলাবানপ তদ্ বিনক্তু ॥১৯॥

3.20

ত্রয়ো লোকাঃ সংমিতা ব্রাহ্মণেন দ্যৌরেবাসৌ পৃথিব্য১ন্তরিক্ষম্।
অংশূন্ গৃভীত্বান্বারভেথামা প্যায়ন্তাং পুনরা যন্তু শূর্পম্ ॥২০॥

3.21

পৃথগ্ রূপাণি বহুধা পশূনামেকরূপো ভবসি সং সমৃদ্ধ্যা ।
এতাং ত্বচং লোহিনীং তাং নুদস্ব গ্রাবা শুম্ভাতি মলগ ইব বস্ত্রা ॥২১॥

3.22

পৃথিবীং ত্বা পৃথিব্যামা বেশয়ামি তনূঃ সমানী বিকৃতা ত এষা।
যদ্যদ্ দ্যুত্তং লিখিতমর্পণেন তেন মা সুস্রোর্ব্রহ্মণাপি তদ্ বপামি ॥২২॥

3.23

জনিত্রীব প্রতি হর্যাসি সূনুং সং ত্বা দধামি পৃথিবীং পৃথিব্যা।
উখা কুম্ভী বেদ্যাং মা ব্যথিষ্ঠা যজ্ঞায়ুধৈরাজ্যেনাতিষক্তা ॥২৩॥

3.24

অগ্নিঃ পচন্ রক্ষতু ত্বা পুরস্তাদিন্দ্রো রক্ষতু দক্ষিণতো মরুত্বান্।
বরুণস্ত্বা দৃংহাদ্ধরুণে প্রতীচ্যা উত্তরাৎ ত্বা সোমঃ সং দদাতৈ ॥২৪॥

3.25

পূতাঃ পবিত্রৈঃ পবন্তে অভ্রাদ্ দিবং চ যন্তি পৃথিবীং চ লোকান্।
তা জীবলা জীবধন্যাঃ প্রতিষ্ঠাঃ পাত্র আসিক্তাঃ পর্যগ্নিরিন্ধাম্ ॥২৫॥

3.26

আ যন্তি দিবঃ পৃথিবীং সচন্তে ভূম্যাঃ সচন্তে অধ্যন্তরিক্ষম্।
শুদ্ধাঃ সতীস্তা উ শুম্ভন্ত এব তা নঃ স্বর্গমভি লোকং নয়ন্তু ॥২৬॥

3.27

উতেব প্রভ্বীরুত সংমিতাস উত শুক্রাঃ শুচয়শ্চামৃতাসঃ ।
তা ওদনং দংপতিভ্যাং প্রশিষ্টা আপঃ শিক্ষন্তীঃ পচতা সুনাথাঃ ॥২৭॥

3.28

সংখ্যাতা স্তোকাঃ পৃথিবীং সচন্তে প্রাণাপানৈঃ সংমিতা ওষধীভিঃ ।
অসংখ্যাতা ওপ্যমানাঃ সুবর্ণাঃ সর্বং ব্যাঽপুঃ শুচয়ঃ শুচিত্বম্ ॥২৮॥

3.29

উদ্যোধন্ত্যভি বল্গন্তি তপ্তাঃ ফেনমস্যন্তি বহুলাংশ্চ বিন্দূন্।
যোষেব দৃষ্ট্বা পতিমৃত্বিয়ায়ৈতৈস্তণ্ডুলৈর্ভবতা সমাপঃ ॥২৯॥

3.30

উত্থাপয় সীদতো বুধ্ন এনানদ্ভিরাত্মানমভি সং স্পৃশন্তাম্।
অমাসি পাত্রৈরুদকং যদেতন্মিতাস্তণ্ডুলাঃ প্রদিশো যদীমাঃ ॥৩০॥

3.31

প্র যচ্ছ পর্শুং ত্বরয়া হরৌসমহিংসন্ত ওষধীর্দান্তু পর্বন্।
যাসাং সোমঃ পরি রাজ্যং বভূবামন্যুতা নো বীরুধো ভবন্তু ॥৩১॥

3.32

নবং বর্হিরোদনায় স্তৃণীত প্রিয়ং হৃদশ্চক্ষুষো বল্গ্বঽস্তু ।
তস্মিন্ দেবাঃ সহ দৈবীর্বিশন্ত্বিমং প্রাশ্নন্ত্বৃতুভির্নিষদ্য ॥৩২॥

3.33

বনস্পতে স্তীর্ণমা সীদ বর্হিরগ্নিষ্টোভৈঃ সংমিতো দেবতাভিঃ ।
ত্বষ্ট্রেব রূপং সুকৃতং স্বধিত্যৈনা এহাঃ পরি পাত্রে দদৃশ্রাম্ ॥৩৩॥

3.34

ষষ্ট্যাং শরত্সু নিধিপা অভীচ্ছাৎ স্বঃঽ পক্বেনাভ্যশ্নবাতৈ ।
উপৈনং জীবান্ পিতরশ্চ পুত্রা এতং স্বর্গং গময়ান্তমগ্নেঃ ॥৩৪॥

3.35

ধর্তা ধ্রিয়স্ব ধরুণে পৃথিব্যা অচ্যুতং ত্বা দেবতাশ্চ্যাবয়ন্তু ।
তং ত্বা দংপতী জীবন্তৌ জীবপুত্রাবুদ্ বাসয়াতঃ পর্যগ্নিধানাৎ ॥৩৫॥

3.36

সর্বান্ত্সমাগা অভিজিত্য লোকান্ যাবন্তঃ কামাঃ সমতীতৃপস্তান্।
বি গাহেথামায়বনং চ দর্বিরেকস্মিন্ পাত্রে অধ্যুদ্ধরৈনম্ ॥৩৬॥

3.37

উপ স্তৃণীহি প্রথয় পুরস্তাদ্ ঘৃতেন পাত্রমভি ঘারয়ৈতৎ।
বাশ্রেবোস্রা তরুণং স্তনস্যুমিমং দেবাসো অভিহিঙ্কৃণোত ॥৩৭॥

3.38

উপাস্তরীরকরো লোকমেতমুরুঃ প্রথতামসমঃ স্বর্গঃ ।
তস্মিংছ্রয়াতৈ মহিষঃ সুপর্ণো দেবা এনং দেবতাভ্যঃ প্রচ্যছান্ ॥৩৮॥

3.39

যদ্যজ্জায়া পচতি ত্বৎ পরঃপরঃ পতির্বা জায়ে ত্বৎ তিরঃ ।
সং তৎ সৃজেথাং সহ বাং তদস্তু সংপাদয়ন্তৌ সহ লোমেকম্ ॥৩৯॥

3.40

যাবন্তো অস্যাঃ পৃথিবীং সচন্তে অস্মৎ পুত্রাঃ পরি যে সংবভূবুঃ ।
সর্বাংস্তাং উপ পাত্রে হ্বয়েথাং নাভিং জানানাঃ শিশবঃ সমায়ান্ ॥৪০॥

3.41

বসোর্যা ধারা মধুনা প্রপীনা ঘৃতেন মিশ্রা অমৃতস্য নাভয়ঃ ।
সর্বাস্তা অব রুন্ধে স্বর্গঃ ষষ্ট্যাং শরত্সু নিধিপা অভীচ্ছাৎ ॥৪১॥

3.42

নিধিং নিধিপা অভ্যেঽনমিচ্ছাদনীশ্বরা অভিতঃ সন্তু যে৩ন্যে।
অস্মাভির্দত্তো নিহিতঃ স্বর্গস্ত্রিভিঃ কাণ্ডৈস্ত্রীন্ত্স্বর্গানরুক্ষৎ ॥৪২॥

3.43

অগ্নী রক্ষস্তপতু যদ্ বিদেবং ক্রব্যাদ্ পিশাচ ইহ মা প্র পাস্ত ।
নুদাম এনমপ রুধ্মো অস্মদাদিত্যা এনমঙ্গিরসঃ সচন্তাম্ ॥৪৩॥

3.44

আদিত্যেভ্যো অঙ্গিরোভ্যো মধ্বিদং ঘৃতেন মিশ্রং প্রতি বেদয়ামি ।
শুদ্ধহস্তৌ ব্রাহ্মণস্যানিহত্যৈতং স্বর্গং সুকৃতাবপীতম্ ॥৪৪॥

3.45

ইদং প্রাপমুত্তমং কাণ্ডমস্য যস্মাল্লোকাৎ পরমেষ্ঠী সমাপ ।
আ সিঞ্চ সর্পির্ঘৃতবৎ সমঙ্গ্ধ্যেষ ভাগো অঙ্গিরসো নো অত্র ॥৪৫॥

3.46

সত্যায় চ তপসে দেবতাভ্যো নিধিং শেবধিং পরি দদ্ম এতম্।
মা নো দ্যূতেঽব গান্মা সমিত্যাং মা স্মান্যস্মা উৎ সৃজতা পুরা মৎ ॥৪৬॥

3.47

অহং পচাম্যহং দদামি মমেদু কর্মন্করুণেঽধি জায়া।
কৌমারো লোকো অজনিষ্ট পুত্রো৩ন্বারভেথাং বয় উত্তরাবৎ ॥৪৭॥

3.48

ন কিল্বিষমত্র নাধারো অস্তি ন যন্মিত্রৈঃ সমমমান এতি ।
অনূনং পাত্রং নিহিতং ন এতৎ পক্তারং পক্বঃ পুনরা বিশাতি ॥৪৮॥

3.49

প্রিয়ং প্রিয়াণাং কৃণবাম তমস্তে যন্তু যতমে দ্বিষন্তি ।
ধেনুরনড্বান্ বয়োবয় আয়দেব পৌরুষেয়মপ মৃত্যুং নুদন্তু ॥৪৯॥

3.50

সমগ্নয়ো বিদুরন্যো অন্যং য ওষধীঃ সচতে যশ্চ সিন্ধূন্।
যাবন্তো দেবা দিব্যা৩তপন্তি হিরণ্যং জ্যোতিঃ পচতো বভূব ॥৫০॥

3.51

এষা ত্বচাং পুরুষে সং বভূবানগ্নাঃ সর্বে পশবো যে অন্যে।
ক্ষত্রেণাত্মানং পরি ধাপয়াথোঽমোতং বাসো মুখমোদনস্য ॥৫১॥

3.52

যদক্ষেষু বদা যৎ সমিত্যাং যদ্ বা বদা অনৃতং বিত্তকাম্যা।
সমানং তন্তুমভি সংবসানৌ তস্মিন্ত্সর্বং শমলং সাদয়াথঃ ॥৫২॥

3.53

বর্ষং বনুষ্বাপি গচ্ছ দেবাংস্ত্বচো ধূমং পর্যুৎ পাতয়াসি ।
বিশ্বব্যচা ঘৃতপৃষ্ঠো ভবিষ্যন্ত্সয়োনির্লোকমুপ যাহ্যেতম্ ॥৫৩॥

3.54

তন্বং স্বর্গো বহুধা বি চক্রে যথা বিদ আত্মন্নন্যবর্ণাম্।
অপাজৈৎ কৃষ্ণাং রুশতীং পুনানো যা লোহিনী তাং তে অগ্নৌ জুহোমি ॥৫৪॥

3.55

প্রাচ্যৈ ত্বা দিশে৩গ্নয়েঽধিপতয়েঽসিতায় রক্ষিত্র আদিত্যায়েষুমতে ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৫৫॥

3.56

দক্ষিণায়ৈ ত্বা দিশ ইন্দ্রায়াধিপতয়ে তিরশ্চিরাজয়ে রক্ষিত্রে যমায়েষুমতে ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৫৬॥

3.57

প্রতীচ্যৈ ত্বা দিশে বরুণায়াধিপতয়ে পৃদাকবে রক্ষিত্রেঽন্নায়েষুমতে ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৫৭॥

3.58

উদীচ্যৈ ত্বা দিশে সোমায়াধিপতয়ে স্বজায় রক্ষিত্রেঽশন্যা ইষুমত্যৈ ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৫৮॥

3.59

ধ্রুবায়ৈ ত্বা দিশে বিষ্ণবেঽধিপতয়ে কল্মাষগ্রীবায় রক্ষিত্র ওষধীভ্য ইষুমতীভ্যঃ ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৫৯॥

3.60

ঊর্ধ্বায়ৈ ত্বা দিশে বৃহস্পতয়েঽধিপতয়ে শ্বিত্রায় রক্ষিত্রে বর্ষায়েষুমতে ।
এতং পরি দদ্মস্তং নো গোপায়তাস্মাকমৈতোঃ ।
দিষ্টং নো অত্র জরসে নি নেষজ্জরা মৃত্যবে পরি ণো দদাত্বথ পক্বেন সহ সং ভবেম ॥৬০॥