Sukta 3

3.1

Svargaidanah, 1-60 yamah, svargah, odanah, agnih, trishtup, 1, 42-43, 47 bhurik, 8, 12, 21-22, 24 jagati, 13, 17 svaradarshi panktih, 34 virad garbha, 39 anushtubgarbha, 44 para brihati, 55-60 tryavasana saptapada shankumatyatijagatashakvaratishakvaradha-rtyagarbhatidhritih (55, 57-60 kritih),

पुमा॑न् पुं॒सोऽधि॑ तिष्ठ॒ चर्मे॑हि॒ तत्र॑ ह्वयस्व यत॒मा प्रि॒या ते ।
याव॑न्ता॒वग्रे॑ प्रथ॒मं स॑मे॒यथु॒स्तद् वां॒ वयो॑ यम॒राज्ये॑ समा॒नम् ॥१॥

Puman punsodhi tishtha charmehi tatra hvayasva yatama priya te
Yavantavagre prathamam sameyathustad vam vayo yamarajye samanam

3.2

ताव॑द् वां॒ चक्षु॒स्तति॑ वी॒र्याऽणि॒ ताव॒त् तेज॑स्तति॒धा वाजि॑नानि ।
अ॒ग्निः शरी॑रं सचते य॒दैधोऽधा॑ प॒क्वान्मि॑थुना॒ सं भ॑वाथः ॥२॥

Tavad vam chakshustati viryani tavat tejastatidha vajinani
Agnih shariram sachate yadaidhodha pakvanmithuna sam bhavathah

3.3

सम॑स्मिंल्लो॒के समु॑ देव॒याने॒ सं स्मा॑ स॒मेतं॑ यम॒राज्ये॑षु ।
पू॒तौ प॒वित्रै॒रुप॒ तद्ध्व॑येथां॒ यद्य॒द् रेतो॒ अधि॑ वां संब॒भूव॑ ॥३॥

Samasminlloke samu devayane sam sma sametam yamarajyeshu
Putau pavitrairupa taddhvayetham yadyad reto adhi vam sambabhuva

3.4

आप॑स्पुत्रासो अ॒भि सं वि॑शध्वमि॒मं जी॒वं जी॑वधन्याः स॒मेत्य॑ ।
तासां॑ भजध्वम॒मृतं॒ यमा॒हुर्यमो॑द॒नं पच॑ति वां॒ जनि॑त्री ॥४॥

Apasputraso abhi sam vishadhvamimam jivam jivadhanyah sametya
Tasam bhajadhvamamritam yamahuryamodanam pachati vam janitri

3.5

यं वां॑ पि॒ता पच॑ति॒ यं च॑ मा॒ता रि॒प्रान्निर्मु॑क्त्यै॒ शम॑लाच्च वा॒चः ।
स ओ॑द॒नः श॒तधा॑रः स्व॒र्ग उ॒भे व्याऽप नभ॑सी महि॒त्वा ॥५॥

Yam vam pita pachati yam cha mata riprannirmuktyai shamalachcha vachah
Sa odanah shatadharah svarga ubhe vyapa nabhasi mahitva

3.6

उ॒भे नभ॑सी उ॒भयां॑श्च लो॒कान् ये यज्व॑नाम॒भिजि॑ताः स्व॒र्गाः ।
तेषां॒ ज्योति॑ष्मा॒न् मधु॑मा॒न् यो अग्रे॒ तस्मि॑न् पु॒त्रैर्ज॒रसि॒ सं श्र॑येथाम् ॥६॥

Ubhe nabhasi ubhayanshcha lokan ye yajvanamabhijitah svargah
Tesham jyotishman madhuman yo agre tasmin putrairjarasi sam shrayetham

3.7

प्राचीं॑प्राचीं प्र॒दिश॒मा र॑भेथामे॒तं लो॒कं श्र॒द्दधा॑नाः सचन्ते ।
यद् वां॑ प॒क्वं परि॑विष्टम॒ग्नौ तस्य॒ गुप्त॑ये दंपती॒ सं श्र॑येथाम् ॥७॥

Prachimprachim pradishama rabhethametam lokam shraddadhanah sachante
Yad vam pakvam parivishtamagnau tasya guptaye dampati sam shrayetham

3.8

दक्षि॑णां॒ दिश॑म॒भि नक्ष॑माणौ प॒र्याव॑र्तेथाम॒भि पात्र॑मे॒तत्।
तस्मि॑न् वां य॒मः पि॒तृभिः॑ संविदा॒नः प॒क्वाय॒ शर्म॑ बहु॒लं नि य॑च्छात् ॥८॥

Dakshinam dishamabhi nakshamanau paryavartethamabhi patrametat
Tasmin vam yamah pitribhih sanvidanah pakvaya sharma bahulam ni yachchhat

3.9

प्र॒तीची॑ दि॒शामि॒यमिद् वरं॒ यस्यां॒ सोमो॑ अधि॒पा मृ॑डि॒ता च॑ ।
तस्यां॑ श्रयेथां सु॒कृतः॑ सचेथा॒मधा॑ प॒क्वान्मि॑थुना॒ सं भ॑वाथः ॥९॥

Pratichi dishamiyamid varam yasyam somo adhipa mridita cha
Tasyam shrayetham sukritah sachethamadha pakvanmithuna sam bhavathah

3.10

उत्त॑रं रा॒ष्ट्रं प्र॒जयो॑त्त॒राव॑द् दि॒शामुदी॑ची कृणवन्नो॒ अग्र॑म्।
पाङ्क्तं॒ छन्दः॒पुरु॑षो बभूव॒ विश्वै॑र्विश्वा॒ङ्गैः स॒ह सं भ॑वेम ॥१०॥

Uttaram rashtram prajayottaravad dishamudichi krinavanno agram
Panktam chhandahpurusho babhuva vishvairvishvangaih saha sam bhavema

3.11

ध्रु॒वेयं वि॒राण्नमो॑ अस्त्व॒स्यै शि॒वा पु॒त्रेभ्य॑ उ॒त मह्य॑मस्तु ।
सा नो॑ देव्यदिते विश्ववार॒ इर्य॑ इव गो॒पा अ॒भि र॑क्ष प॒क्वम् ॥११॥

Dhruveyam virannamo astvasyai shiva putrebhya uta mahyamastu
Sa no devyadite vishvavara irya iva gopa abhi raksha pakvam

3.12

पि॒तेव॑ पु॒त्रान॒भि सं स्व॑जस्व नः शि॒वा नो॒ वाता॑ इ॒व वा॑न्तु॒ भूमौ॑ ।
यमो॑द॒नं पच॑तो दे॒वते॑ इ॒ह तं न॒स्तप॑ उ॒त स॒त्यं च॑ वेत्तु ॥१२॥

Piteva putranabhi sam svajasva nah shiva no vata iva vantu bhumau
Yamodanam pachato devate iha tam nastapa uta satyam cha vettu

3.13

यद्य॑त् कृ॒ष्णः श॑कु॒न एह ग॒त्वा त्सर॒न् विष॑क्तं॒ बिल॑ आस॒साद॑ ।
यद् वा॑ दा॒स्या॒३र्द्रह॑स्ता सम॒ङ्क्त उ॒लूख॑लं॒ मुस॑लं शुम्भतापः ॥१३॥

Yadyat krishnah shakuna eha gatva tsaran vishaktam bila asasada
Yad va dasya3rdrahasta samankta ulukhalam musalam shumbhatapah

3.14

अ॒यं ग्रावा॑ पृ॒थुबु॑ध्नो वयो॒धाः पू॒तः प॒वित्रै॒रप॑ हन्तु॒ रक्षः॑ ।
आ रो॑ह॒ चर्म॒ महि॒ शर्म॑ यच्छ॒ मा दंप॑ती॒ पौत्र॑म॒घं नि गा॑ताम् ॥१४॥

Ayam grava prithubudhno vayodhah putah pavitrairapa hantu rakshah
A roha charma mahi sharma yachchha ma dampati pautramagham ni gatam

3.15

वन॒स्पतिः॑ स॒ह दे॒वैर्न॒ आग॒न् रक्षः॑ पिशा॒चाँ अ॑प॒बाध॑मानः ।
स उच्छ्र॑यातै॒ प्र व॑दाति॒ वाचं॒ तेन॑ लो॒काँ अ॒भि सर्वा॑न् जयेम ॥१५॥

Vanaspatih saha devairna agan rakshah pishacham apabadhamanah
Sa uchchhrayatai pra vadati vacham tena lokam abhi sarvan jayema

3.16

स॒प्त मेधा॑न् प॒शवः॑ पर्य॑गृह्ण॒न् य ए॑षां॒ ज्योति॑ष्मां उ॒त यश्च॒कर्श॑ ।
त्रय॑स्त्रिंशद् दे॒वता॒स्तान्त्स॑चन्ते॒ स नः॑ स्व॒र्गम॒भि ने॑ष लो॒कम् ॥१६॥

Sapta medhan pashavah paryagrihnan ya esham jyotishmam uta yashchakarsha
Trayastrinshad devatastantsachante sa nah svargamabhi nesha lokam

3.17

स्व॒र्गं लो॒कम॒भि नो॑ नयासि॒ सं जा॒यया॑ स॒ह पु॒त्रैः स्या॑म ।
गृ॒ह्णामि॒ हस्त॒मनु॒ मैत्वत्र॒ मा न॑स्तारी॒न्निरृ॑ति॒र्मो अरा॑तिः ॥१७॥

Svargam lokamabhi no nayasi sam jayaya saha putraih syama
Grihnami hastamanu maitvatra ma nastarinnirritirmo aratih

3.18

ग्राहिं॑ पा॒प्मान॒मति॒ तां अ॑याम॒ तमो॒ व्यऽस्य॒ प्र व॑दासि व॒ल्गु।
वा॒न॒स्प॒त्य उद्य॑तो॒ मा जि॑हिंसी॒र्मा त॑ण्डु॒लं वि श॑रीर्देव॒यन्त॑म् ॥१८॥

Grahim papmanamati tam ayama tamo vyasya pra vadasi valgu
Vanaspatya udyato ma jihinsirma tandulam vi sharirdevayantam

3.19

वि॒श्वव्य॑चा घृ॒तपृ॑ष्ठो भवि॒ष्यन्त्सयो॑निर्लो॒कमुप॑ याह्ये॒तम्।
व॒र्षवृ॑द्ध॒मुप॑ यच्छ॒ शूर्पं॒ तुषं॑ प॒लावा॒नप॒ तद् वि॑नक्तु ॥१९॥

Vishvavyacha ghritaprishtho bhavishyantsayonirlokamupa yahyetam
Varshavriddhamupa yachchha shurpam tusham palavanapa tad vinaktu

3.20

त्रयो॑ लो॒काः संमि॑ता॒ ब्राह्म॑णेन॒ द्यौरे॒वासौ पृ॑थि॒व्य॑१न्तरि॑क्षम्।
अं॒शून् गृ॑भी॒त्वान्वार॑भेथा॒मा प्या॑यन्तां॒ पुन॒रा य॑न्तु॒ शूर्प॑म् ॥२०॥

Trayo lokah sammita brahmanena dyaurevasau prithivya1ntariksham
Anshun gribhitvanvarabhethama pyayantam punara yantu shurpam

3.21

पृथ॑ग् रू॒पाणि॑ बहु॒धा प॑शू॒नामेक॑रूपो भवसि॒ सं समृ॑द्ध्या ।
ए॒तां त्वचं॒ लोहि॑नीं॒ तां नु॑दस्व॒ ग्रावा॑ शुम्भाति मल॒ग इ॑व॒ वस्त्रा॑ ॥२१॥

Prithag rupani bahudha pashunamekarupo bhavasi sam samriddhya
Etam tvacham lohinim tam nudasva grava shumbhati malaga iva vastra

3.22

पृ॒थि॒वीं त्वा॑ पृथि॒व्यामा वे॑शयामि त॒नूः स॑मा॒नी विकृ॑ता त ए॒षा।
यद्य॑द् द्यु॒त्तं लि॑खि॒तमर्प॑णेन॒ तेन॒ मा सु॑स्रो॒र्ब्रह्म॒णापि॒ तद् व॑पामि ॥२२॥

Prithivim tva prithivyama veshayami tanuh samani vikrita ta esha
Yadyad dyuttam likhitamarpanena tena ma susrorbrahmanapi tad vapami

3.23

जनि॑त्रीव॒ प्रति॑ हर्यासि सू॒नुं सं त्वा॑ दधामि पृथि॒वीं पृ॑थि॒व्या।
उ॒खा कु॒म्भी वेद्यां॒ मा व्य॑थिष्ठा यज्ञायु॒धैराज्ये॒नाति॑षक्ता ॥२३॥

Janitriva prati haryasi sunum sam tva dadhami prithivim prithivya
Ukha kumbhi vedyam ma vyathishtha yagyayudhairajyenatishakta

3.24

अ॒ग्निः पच॑न् रक्षतु त्वा पु॒रस्ता॒दिन्द्रो॑ रक्षतु दक्षिण॒तो म॒रुत्वा॑न्।
वरु॑णस्त्वा दृंहाद्ध॒रुणे॑ प्र॒तीच्या॑ उत्त॒रात् त्वा॒ सोमः॒ सं द॑दातै ॥२४॥

Agnih pachan rakshatu tva purastadindro rakshatu dakshinato marutvan
Varunastva drinhaddharune pratichya uttarat tva somah sam dadatai

3.25

पू॒ताः प॒वित्रैः॑ पवन्ते अ॒भ्राद् दिवं॑ च॒ यन्ति॑ पृथि॒वीं च॑ लो॒कान्।
ता जी॑व॒ला जी॒वध॑न्याः प्रति॒ष्ठाः पात्र॒ आसि॑क्ताः॒ पर्य॒ग्निरि॑न्धाम् ॥२५॥

Putah pavitraih pavante abhrad divam cha yanti prithivim cha lokan
Ta jivala jivadhanyah pratishthah patra asiktah paryagnirindham

3.26

आ य॑न्ति दि॒वः पृ॑थि॒वीं स॑चन्ते॒ भूम्याः॑ सचन्ते॒ अध्य॒न्तरि॑क्षम्।
शु॒द्धाः स॒तीस्ता उ॒ शुम्भ॑न्त ए॒व ता नः॑ स्व॒र्गम॒भि लो॒कं न॑यन्तु ॥२६॥

A yanti divah prithivim sachante bhumyah sachante adhyantariksham
Shuddhah satista u shumbhanta eva ta nah svargamabhi lokam nayantu

3.27

उ॒तेव॑ प्र॒भ्वीरु॒त संमि॑तास उ॒त शु॒क्राः शु॒च॑यश्चा॒मृता॑सः ।
ता ओ॑द॒नं दंप॑तिभ्यां॒ प्रशि॑ष्टा आपः॒ शिक्ष॑न्तीः पचता सुनाथाः ॥२७॥

Uteva prabhviruta sammitasa uta shukrah shuchayashchamritasah
Ta odanam dampatibhyam prashishta apah shikshantih pachata sunathah

3.28

संख्या॑ता स्तो॒काः पृ॑थि॒वीं स॑चन्ते प्राणापा॒नैः संमि॑ता॒ ओष॑धीभिः ।
असं॑ख्याता ओ॒प्यमा॑नाः सु॒वर्णाः॒ सर्वं॒ व्याऽपुः॒ शुच॑यः शुचि॒त्वम् ॥२८॥

Sankhyata stokah prithivim sachante pranapanaih sammita oshadhibhih
Asankhyata opyamanah suvarnah sarvam vyapuh shuchayah shuchitvam

3.29

उद्यो॑धन्त्य॒भि व॑ल्गन्ति त॒प्ताः फेन॑मस्यन्ति बहु॒लांश्च॑ बि॒न्दून्।
योषे॑व दृ॒ष्ट्वा पति॒मृत्वि॑यायै॒तैस्त॑ण्डु॒लैर्भ॑वता॒ समा॑पः ॥२९॥

Udyodhantyabhi valganti taptah phenamasyanti bahulanshcha bindun
Yosheva drishtva patimritviyayaitaistandulairbhavata samapah

3.30

उत्था॑पय॒ सीद॑तो बु॒ध्न ए॑नान॒द्भिरा॒त्मान॑म॒भि सं स्पृ॑शन्ताम्।
अमा॑सि॒ पात्रै॑रुद॒कं यदे॒तन्मि॒तास्त॑ण्डु॒लाः प्र॒दिशो॒ यदी॒माः ॥३०॥

Utthapaya sidato budhna enanadbhiratmanamabhi sam sprishantam
Amasi patrairudakam yadetanmitastandulah pradisho yadimah

3.31

प्र य॑च्छ॒ पर्शुं॑ त्व॒रया ह॑रौ॒समहिं॑सन्त॒ ओष॑धीर्दान्तु॒ पर्व॑न्।
यासां॒ सोमः॒ परि॑ रा॒ज्यं ब॒भूवाम॑न्युता नो वी॒रुधो॑ भवन्तु ॥३१॥

Pra yachchha parshum tvaraya harausamahinsanta oshadhirdantu parvan
Yasam somah pari rajyam babhuvamanyuta no virudho bhavantu

3.32

नवं॑ ब॒र्हिरो॑द॒नाय॑ स्तृणीत प्रि॒यं हृ॒दश्चक्षु॑षो व॒ल्ग्वऽस्तु ।
तस्मि॑न् दे॒वाः स॒ह दै॒वीर्वि॑शन्त्वि॒मं प्राश्न॑न्त्वृ॒तुभि॑र्नि॒षद्य॑ ॥३२॥

Navam barhirodanaya strinita priyam hridashchakshusho valgvastu
Tasmin devah saha daivirvishantvimam prashnantvritubhirnishadya

3.33

वन॑स्पते स्ती॒र्णमा सी॑द ब॒र्हिर॑ग्निष्टो॒भैः संमि॑तो दे॒वता॑भिः ।
त्वष्ट्रे॑व रू॒पं सुकृ॑तं॒ स्वधि॑त्यै॒ना ए॒हाः परि॒ पात्रे॑ ददृश्राम् ॥३३॥

Vanaspate stirnama sida barhiragnishtobhaih sammito devatabhih
Tvashtreva rupam sukritam svadhityaina ehah pari patre dadrishram

3.34

ष॒ष्ट्यां श॒रत्सु॑ निधि॒पा अ॒भीच्छा॒त् स्वःऽ प॒क्वेना॒भ्यश्नवातै ।
उपै॑नं जीवान् पि॒तर॑श्च पु॒त्रा ए॒तं स्व॒र्गं ग॑म॒यान्त॑म॒ग्नेः ॥३४॥

Shashtyam sharatsu nidhipa abhichchhat svah pakvenabhyashnavatai
Upainam jivan pitarashcha putra etam svargam gamayantamagneh

3.35

ध॒र्ता ध्रि॑यस्व ध॒रुणे॑ पृथि॒व्या अच्यु॑तं त्वा दे॒वता॑श्च्यावयन्तु ।
तं त्वा॒ दंप॑ती॒ जीव॑न्तौ जी॒वपु॑त्रा॒वुद् वा॑सयातः॒ पर्य॑ग्नि॒धाना॑त् ॥३५॥

Dharta dhriyasva dharune prithivya achyutam tva devatashchyavayantu
Tam tva dampati jivantau jivaputravud vasayatah paryagnidhanat

3.36

सर्वा॑न्त्स॒मागा॑ अभि॒जित्य॑ लो॒कान् याव॑न्तः॒ कामाः॒ सम॑तीतृप॒स्तान्।
वि गा॑हेथामा॒यव॑नं च॒ दर्वि॒रेक॑स्मि॒न् पात्रे॒ अध्युद्ध॑रैनम् ॥३६॥

Sarvantsamaga abhijitya lokan yavantah kamah samatitripastan
Vi gahethamayavanam cha darvirekasmin patre adhyuddharainam

3.37

उप॑ स्तृणीहि प्र॒थय॑ पु॒रस्ता॑द् घृ॒तेन॒ पात्र॑म॒भि घा॑रयै॒तत्।
वा॒श्रेवो॒स्रा तरु॑णं स्तन॒स्युमि॒मं दे॑वासो अभि॒हिङ्कृ॑णोत ॥३७॥

Upa strinihi prathaya purastad ghritena patramabhi gharayaitat
Vashrevosra tarunam stanasyumimam devaso abhihinkrinota

3.38

उपा॑स्तरी॒रक॑रो लो॒कमे॒तमु॒रुः प्र॑थता॒मस॑मः स्व॒र्गः ।
तस्मिं॑छ्रयातै महि॒षः सु॑प॒र्णो दे॒वा ए॑नं दे॒वता॑भ्यः॒ प्र॑च्यछान् ॥३८॥

Upastarirakaro lokametamuruh prathatamasamah svargah
Tasminchhrayatai mahishah suparno deva enam devatabhyah prachyachhan

3.39

यद्य॑ज्जा॒या पच॑ति॒ त्वत् प॒रःप॑रः॒ पति॑र्वा जाये॒ त्वत् ति॒रः ।
सं तत् सृ॑जेथां स॒ह वां॒ तद॑स्तु संपा॒दय॑न्तौ स॒ह लो॒मेक॑म् ॥३९॥

Yadyajjaya pachati tvat parahparah patirva jaye tvat tirah
Sam tat srijetham saha vam tadastu sampadayantau saha lomekam

3.40

याव॑न्तो अ॒स्याः पृ॑थि॒वीं सच॑न्ते अ॒स्मत् पु॒त्राः परि॒ ये सं॑बभू॒वुः ।
सर्वां॒स्तां उप॒ पात्रे॑ ह्वयेथां॒ नाभिं॑ जाना॒नाः शिश॑वः स॒माया॑न् ॥४०॥

Yavanto asyah prithivim sachante asmat putrah pari ye sambabhuvuh
Sarvanstam upa patre hvayetham nabhim jananah shishavah samayan

3.41

वसो॒र्या धारा॒ मधु॑ना॒ प्रपी॑ना घृ॒तेन॑ मि॒श्रा अ॒मृत॑स्य॒ नाभ॑यः ।
सर्वा॒स्ता अव॑ रुन्धे स्व॒र्गः ष॒ष्ट्यां श॒रत्सु॑ निधि॒पा अ॒भीच्छात् ॥४१॥

Vasorya dhara madhuna prapina ghritena mishra amritasya nabhayah
Sarvasta ava rundhe svargah shashtyam sharatsu nidhipa abhichchhat

3.42

नि॒धिं नि॑धि॒पा अ॒भ्येऽनमिच्छा॒दनी॑श्वरा अ॒भितः॑ सन्तु॒ ये॒३न्ये।
अ॒स्माभि॑र्द॒त्तो निहि॑तः स्व॒र्गस्त्रि॒भिः काण्डै॒स्त्रीन्त्स्व॒र्गान॑रुक्षत् ॥४२॥

Nidhim nidhipa abhyenamichchhadanishvara abhitah santu ye3nye
Asmabhirdatto nihitah svargastribhih kandaistrintsvarganarukshat

3.43

अ॒ग्नी रक्ष॑स्तपतु॒ यद् विदे॑वं क्र॒व्याद् पि॑शा॒च इ॒ह मा प्र पा॑स्त ।
नु॒दाम॑ एन॒मप॑ रुध्मो अ॒स्मदा॑दि॒त्या ए॑न॒मङ्गि॑रसः सचन्ताम् ॥४३॥

Agni rakshastapatu yad videvam kravyad pishacha iha ma pra pasta
Nudama enamapa rudhmo asmadaditya enamangirasah sachantam

3.44

आ॒दि॒त्येभ्यो॒ अङ्गि॑रोभ्यो॒ मध्वि॒दं घृ॒तेन॑ मि॒श्रं प्रति॑ वेदयामि ।
शु॒द्धह॑स्तौ ब्राह्म॒णस्यानि॑हत्यै॒तं स्व॒र्गं सु॑कृता॒वपी॑तम् ॥४४॥

Adityebhyo angirobhyo madhvidam ghritena mishram prati vedayami
Shuddhahastau brahmanasyanihatyaitam svargam sukritavapitam

3.45

इ॒दं प्राप॑मुत्त॒मं काण्ड॑मस्य॒ यस्मा॑ल्लो॒कात् प॑रमे॒ष्ठी स॒माप॑ ।
आ सि॑ञ्च स॒र्पिर्घृ॒तव॒त् सम॑ङ्ग्ध्ये॒ष भा॒गो अङ्गि॑रसो नो॒ अत्र॑ ॥४५॥

Idam prapamuttamam kandamasya yasmallokat parameshthi samapa
A sincha sarpirghritavat samangdhyesha bhago angiraso no atra

3.46

स॒त्याय॑ च॒ तप॑से दे॒वता॑भ्यो नि॒धिं शे॑व॒धिं परि॑ दद्म ए॒तम्।
मा नो॑ द्यू॒तेऽव गा॒न्मा समि॑त्यां॒ मा स्मा॒न्यस्मा॒ उत् सृ॑जता पु॒रा मत् ॥४६॥

Satyaya cha tapase devatabhyo nidhim shevadhim pari dadma etam
Ma no dyuteva ganma samityam ma smanyasma ut srijata pura mat

3.47

अ॒हं प॑चाम्य॒हं द॑दामि॒ ममेदु॒ कर्म॑न्क॒रुणेऽधि॑ जा॒या।
कौमा॑रो लो॒को अ॑जनिष्ट पु॒त्रो॒३न्वार॑भेथां॒ वय॑ उत्त॒राव॑त् ॥४७॥

Aham pachamyaham dadami mamedu karmankarunedhi jaya
Kaumaro loko ajanishta putro3nvarabhetham vaya uttaravat

3.48

न किल्बि॑ष॒मत्र॒ नाधा॒रो अस्ति॒ न यन्मि॒त्रैः स॒मम॑मान॒ एति॑ ।
अनू॑नं॒ पात्रं॒ निहि॑तं न ए॒तत् प॒क्तारं॑ प॒क्वः पुन॒रा वि॑शाति ॥४८॥

Na kilbishamatra nadharo asti na yanmitraih samamamana eti
Anunam patram nihitam na etat paktaram pakvah punara vishati

3.49

प्रि॒यं प्रि॒याणां॑ कृणवाम॒ तम॒स्ते य॑न्तु यत॒मे द्वि॒षन्ति॑ ।
धे॒नुर॑न॒ड्वान् वयो॑वय आ॒यदे॒व पौरु॑षेय॒मप॑ मृ॒त्युं नु॑दन्तु ॥४९॥

Priyam priyanam krinavama tamaste yantu yatame dvishanti
Dhenuranadvan vayovaya ayadeva paurusheyamapa mrityum nudantu

3.50

सम॒ग्नयो॑ विदुर॒न्यो अ॒न्यं य ओष॑धीः॒ सच॑ते॒ यश्च॒ सिन्धू॑न्।
याव॑न्तो दे॒वा दि॒व्या॒३तप॑न्ति॒ हिर॑ण्यं॒ ज्योतिः॒ पच॑तो बभूव ॥५०॥

Samagnayo viduranyo anyam ya oshadhih sachate yashcha sindhun
Yavanto deva divya3tapanti hiranyam jyotih pachato babhuva

3.51

ए॒षा त्व॒चां पुरु॑षे॒ सं ब॑भू॒वान॑ग्नाः॒ सर्वे॑ प॒शवो॒ ये अ॒न्ये।
क्ष॒त्रेणा॒त्मानं॒ परि॑ धापयाथोऽमो॒तं वासो॒ मुख॑मोद॒नस्य॑ ॥५१॥

Esha tvacham purushe sam babhuvanagnah sarve pashavo ye anye
Kshatrenatmanam pari dhapayathomotam vaso mukhamodanasya

3.52

यद॒क्षेषु॒ वदा॒ यत् समि॑त्यां॒ यद् वा॒ वदा॒ अनृ॑तं वित्तका॒म्या।
स॒मा॒नं तन्तु॑म॒भि सं॒वसा॑नौ॒ तस्मि॒न्त्सर्वं॒ शम॑लं सादयाथः ॥५२॥

Yadaksheshu vada yat samityam yad va vada anritam vittakamya
Samanam tantumabhi sanvasanau tasmintsarvam shamalam sadayathah

3.53

व॒र्षं व॑नु॒ष्वापि॑ गच्छ दे॒वांस्त्व॒चो धू॒मं पर्युत् पा॑तयासि ।
वि॒श्वव्य॑चा घृ॒तपृ॑ष्ठो भवि॒ष्यन्त्सयो॑निर्लो॒कमुप॑ याह्ये॒तम् ॥५३॥

Varsham vanushvapi gachchha devanstvacho dhumam paryut patayasi
Vishvavyacha ghritaprishtho bhavishyantsayonirlokamupa yahyetam

3.54

त॒न्वं स्व॒र्गो ब॑हु॒धा वि च॑क्रे॒ यथा॑ वि॒द आ॒त्मन्न॒न्यव॑र्णाम्।
अपा॑जैत् कृ॒ष्णां रुश॑तीं पुना॒नो या लोहि॑नी॒ तां ते॑ अ॒ग्नौ जु॑होमि ॥५४॥

Tanvam svargo bahudha vi chakre yatha vida atmannanyavarnam
Apajait krishnam rushatim punano ya lohini tam te agnau juhomi

3.55

प्राच्यै॑ त्वा दि॒शे॒३ग्नयेऽधि॑पतयेऽसि॒ताय॑ रक्षि॒त्र आ॑दि॒त्यायेषु॑मते ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ॑ प॒क्वेन॑ स॒ह सं भ॑वेम ॥५५॥

Prachyai tva dishe3gnayedhipatayesitaya rakshitra adityayeshumate
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema

3.56

दक्षि॑णायै त्वा दि॒श इन्द्रा॒याधि॑पतये॒ तिर॑श्चिराजये रक्षि॒त्रे य॒मायेषु॑मते ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ प॒क्वेन॑ स॒ह सं भ॑वेम ॥५६॥

Dakshinayai tva disha indrayadhipataye tirashchirajaye rakshitre yamayeshumate
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema

3.57

प्र॒तीच्यै॑ त्वा दि॒शे वरु॑णा॒याधि॑पतये॒ पृदा॑कवे रक्षि॒त्रेऽन्ना॒येषु॑मते ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ॑ प॒क्वेन॑ स॒ह सं भ॑वेम ॥५७॥

Pratichyai tva dishe varunayadhipataye pridakave rakshitrennayeshumate
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema

3.58

उदी॑च्यै त्वा दि॒शे सोमा॒याधि॑पतये स्व॒जाय॑ रक्षि॒त्रेऽशन्या इषु॑मत्यै ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ॑ प॒क्वेन॑ स॒ह सं भ॑वेम ॥५८॥

Udichyai tva dishe somayadhipataye svajaya rakshitreshanya ishumatyai
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema

3.59

ध्रु॒वायै॑ त्वा दि॒शे विष्ण॒वेऽधि॑पतये क॒ल्माष॑ग्रीवाय रक्षि॒त्र ओष॑धीभ्य॒ इषु॑मतीभ्यः ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ॑ प॒क्वेन॑ स॒ह सं भ॑वेम ॥५९॥

Dhruvayai tva dishe vishnavedhipataye kalmashagrivaya rakshitra oshadhibhya ishumatibhyah
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema

3.60

ऊ॒र्ध्वायै॑ त्वा दि॒शे बृह॒स्पत॒येऽधि॑पतये श्वि॒त्राय॑ रक्षि॒त्रे व॒र्षायेषु॑मते ।
ए॒तं परि॑ दद्म॒स्तं नो॑ गोपाय॒तास्माक॒मैतोः॑ ।
दि॒ष्टं नो॒ अत्र॑ ज॒रसे॒ नि ने॑षज्ज॒रा मृ॒त्यवे॒ परि॑ णो ददा॒त्वथ प॒क्वेन॑ स॒ह सं भ॑वेम ॥६०॥

Urdhvayai tva dishe brihaspatayedhipataye shvitraya rakshitre varshayeshumate
Etam pari dadmastam no gopayatasmakamaitoh
Dishtam no atra jarase ni neshajjara mrityave pari no dadatvatha pakvena saha sam bhavema