সূক্ত 2

2.1

১-৫৫ ভৃগুঃ। অগ্নিঃ, মন্ত্রোক্তাঃ, ২১-৩৩ মৃত্যুঃ। ত্রিষ্টুপ্, ২, ৫, ১২-২০, ৩৪-৩৬, ৩৮-৪১- ৪৩, ৫১, ৫৪ অনুষ্টুপ্ (১৬ ককুম্মতী পরাবৃহতী, ১৮ নিচৃৎ ৪০ পুরস্তাৎ ককুম্মতী), ৩ আস্তারপঙ্ক্তিঃ, ৬ ভুরিগার্ষী পঙ্ক্তিঃ, ৭, ৪৫ জগতী, ৮, ৪৮-৪৯ ভুরিক্, ৯ অনুষ্টুব্গর্ভা বিপরীতপাদলক্ষ্মা পঙ্ক্তিঃ, ৩৭ পুরস্তাদ্বৃহতী, ৪২ ত্রিপদা একাবসানা ভুরিগার্চী গায়ত্রী, ৪৪ একাবসানা দ্বিপদাঽর্চী বৃহতী, ৪৬ একাবসানা দ্বিপদা সাম্নী ত্রিষ্টুপ্, ৪৭ পঞ্চপদা বার্হতবৈরাজগর্ভা জগতী, ৫০ উপরিষ্টাদ্বিরাড্ বৃহতী ৫২ পুরস্তাদ্বিরাড্ বৃহতী, ৫৫ ব

নডমা রোহ ন তে অত্র লোক ইদং সীসং ভাগধেয়ং ত এহি ।
যো গোষু যক্ষ্মঃ পুরুষেষু যক্ষ্মস্তেন ত্বং সাকমধরাঙ্ পরেহি ॥১॥

2.2

অঘশংসদুঃশংসাভ্যাং করেণানুকরেণ চ ।
যক্ষ্মং চ সর্বং তেনেতো মৃত্যুং চ নিরজামসি ॥২॥

2.3

নিরিতো মৃত্যুং নিরৃতিং নিররাতিমজামসি ।
যো নো দ্বেষ্টি তমদ্ধ্যগ্নে অক্রব্যাদ্ যমু দ্বিষ্মস্তমু তে প্র সুবামসি ॥৩॥

2.4

যদ্যগ্নিঃ ক্রব্যাদ্ যদি বা ব্যাঘ্র ইমং গোষ্ঠং প্রবিবেশান্যোকাঃ ।
তং মাষাজ্যং কৃত্বা প্র হিণোমি দূরং স গচ্ছত্বপ্সুষদোঽপ্যগ্নীন্ ॥৪॥

2.5

যৎ ত্বা ক্রুদ্ধাঃ প্রচক্রুর্মন্যুনা পুরুষে মৃতে।
সুকল্পমগ্নে তৎ ত্বয়া পুনস্ত্বোদ্ দীপয়ামসি ॥৫॥

2.6

পুনস্ত্বাদিত্যা রুদ্রা বসবঃ পুনর্ব্রহ্মা বসুনীতিরগ্নে ।
পুনস্ত্বা ব্রহ্মণস্পতিরাধাদ্ দীর্ঘায়ুত্বায় শতশারদায় ॥৬॥

2.7

যো অগ্নিঃ ক্রব্যাৎ প্রবিবেশ নো গৃহমিমং পশ্যন্নিতরং জাতবেদসম্।
তং হরামি পিতৃয়জ্ঞায় দূরং স ঘর্মমিন্ধাং পরমে সধস্থে ॥৭॥

2.8

ক্রব্যাদমগ্নিং প্র হিণোমি দূরং যমরাজ্ঞো গচ্ছতু রিপ্রবাহঃ ।
ইহায়মিতরো জাতবেদা দেবো দেবেভ্যো হব্যং বহতু প্রজানন্ ॥৮॥

2.9

ক্রব্যাদমগ্নিমিষিতো হরামি জনান্ দৃংহন্তং বজ্রেণ মৃত্যুম্।
নি তং শাস্মি গার্হপত্যেন বিদ্বান্ পিতৃণাং লোকেঽপি ভাগো অস্তু ॥৯॥

2.10

ক্রব্যাদমগ্নিং শশমানমুক্থ্যং১ হিণোমি পথিভিঃ পিতৃয়াণৈঃ ।
মা দেবয়ানৈঃ পুনরা গা অত্রৈবৈধি পিতৃষু জাগৃহি ত্বম্ ॥১০॥

2.11

সমিন্ধতে সংকসুকং স্বস্তয়ে শুদ্ধা ভবন্তঃ শুচয়ঃ পাবকাঃ ।
জহাতি রিপ্রমত্যেন এতি সমিদ্ধো অগ্নিঃ সুপুনা পুনাতি ॥১১॥

2.12

দেবো অগ্নিঃ সংকসুকো দিবস্পৃষ্ঠান্যারুহৎ।
মুচ্যমানো নিরেণসোঽমোগস্মাং অশস্ত্যাঃ ॥১২॥

2.13

অস্মিন্ বয়ং সংকসুকে অগ্নৌ রিপ্রাণি মৃজ্মহে ।
অভূম যজ্ঞিয়াঃ শুদ্ধাঃ প্র ণ আয়ূংষি তারিষৎ ॥১৩॥

2.14

সংকসুকো বিকসুকো নিরৃথো যশ্চ নিস্বরঃ ।
তে তে যক্ষ্মং সবেদসো দূরাদ্ দূরমনীনশন্ ॥১৪॥

2.15

যো নো অশ্বেষু বীরেষু যো নো গোষ্বজাবিষু ।
ক্রব্যাদং নির্ণুদামসি যো অগ্নির্জনয়োপনঃ ॥১৫॥

2.16

অন্যেভ্যস্ত্বা পুরুষেভ্যো গোভ্যো অশ্বেভ্যস্ত্বা ।
নিঃ ক্রব্যাদং নুদামসি যো অগ্নির্জীবিতয়োপনঃ ॥১৬॥

2.17

যস্মিন্ দেবা অমৃজত যস্মিন্ মনুষ্যাঽ উত।
তস্মিন্ ঘৃতস্তাবো মৃষ্ট্বা ত্বমগ্নে দিবং রুহ ॥১৭॥

2.18

সমিদ্ধো অগ্ন আহুত স নো মাভ্যপক্রমীঃ ।
অত্রৈব দীদিহি দ্যবি জ্যোক্ চ সূর্যং দৃশে ॥১৮॥

2.19

সীসে মৃড্ঢ্বং নডে মৃড্ঢ্বমগ্নৌ সংকসুকে চ যৎ।
অথো অব্যাং রামায়াং শীর্ষক্তিমুপবর্হণে ॥১৯॥

2.20

সীসে মলং সাদয়িত্বা শীর্ষক্তিমুপবর্হণে ।
অব্যামসিক্ন্যাং মৃষ্ট্বা শুদ্ধা ভবত যজ্ঞিয়াঃ ॥২০॥

2.21

পরং মৃত্যো অনু পরেহি পন্থাং যস্ত এষ ইতরো দেবয়ানাৎ।
চক্ষুষ্মতে শৃণ্বতে তে ব্রবীমীহেমে বীরা বহবো ভবন্তু ॥২১॥

2.22

ইমে জীবা বি মৃতৈরাববৃত্রন্নভূদ্ ভদ্রা দেবহুতির্নো অদ্য।
প্রাঞ্চো অগাম নৃতয়ে হসায় সুবীরাসো বিদথমা বদেম ॥২২॥

2.23

ইমং জীবেভ্যঃ পরিধিং দধামি মৈষাং নু গাদপরো অর্থমেতম্।
শতং জীবন্তঃ শরদঃ পুরূচীস্তিরো মৃত্যুং দধতাং পর্বতেন ॥২৩॥

2.24

আ রোহতায়ুর্জরসং বৃণানা অনুপূর্বং যতমানা যতি স্থ।
তান্ বস্ত্বষ্টা সুজনিমা সজোষাঃ সর্বমায়ুর্নয়তু জীবনায় ॥২৪॥

2.25

যথাহান্যনুপূর্বং ভবন্তি যথর্তব ঋতুভির্যন্তি সাকম্।
যথা ন পূর্বমপরো জহাত্যেবা ধাতরায়ূংষি কল্পয়ৈষাম্ ॥২৫॥

2.26

অশ্মন্বতী রীয়তে সং রভধ্বং বীরয়ধ্বং প্র তরতা সখায়ঃ ।
অত্রা জহীত যে অসন্ দুরেবা অনমীবানুত্তরেমাভি বাজান্ ॥২৬॥

2.27

উৎ তিষ্ঠতা প্র তরতা সখায়োঽশ্মন্বতী নদী স্যন্দত ইয়ম্।
অত্রা জহীত যে অসন্নশিবাঃ শিবান্ত্স্যোনানুত্তরেমাভি বাজান্ ॥২৭॥

2.28

বৈশ্বদেবীং বর্চস আ রভধ্বং শুদ্ধা ভবন্তঃ শুচয়ঃ পাবকাঃ ।
অতিক্রামন্তো দুরিতা পদানি শতং হিমাঃ সর্ববীরা মদেম ॥২৮॥

2.29

উদীচীনৈঃ পথিভির্বায়ুমদ্ভিরতিক্রামন্তোঽবরান্ পরেভিঃ ।
ত্রিঃ সপ্ত কৃত্ব ঋষয়ঃ পরেতা মৃত্যুং প্রত্যৌহন্ পদয়োপনেন ॥২৯॥

2.30

মৃত্যোঃ পদং যোপয়ন্ত এত দ্রাঘীয় আয়ুঃ প্রতরং দধানাঃ ।
আসীনা মৃত্যুং নুদতা সধস্থেঽথ জীবাসো বিদথমা বদেম ॥৩০॥

2.31

ইমা নারীরবিধবাঃ সুপত্নীরাঞ্জনেন সর্পিষা সং স্পৃশন্তাম্।
অনশ্রবো অনমীবাঃ সুরত্না আ রোহন্তু জনয়ো যোনিমগ্রে ॥৩১॥

2.32

ব্যাকরোমি হবিষাহমেতৌ তৌ ব্রহ্মণা ব্য১হং কল্পয়ামি ।
স্বধাং পিতৃভ্যো অজরাং কৃণোমি দীর্ঘেণায়ুষা সমিমান্ত্সৃজামি ॥৩২॥

2.33

যো নো অগ্নিঃ পিতরো হৃত্স্ব১ন্তরাবিবেশামৃতো মর্ত্যেষু ।
ময্যহং তং পরি গৃহ্ণামি দেবং মা সো অস্মান্ দ্বিক্ষত মা বয়ং তম্ ॥৩৩॥

2.34

অপাবৃত্য গার্হপত্যাৎ ক্রব্যাদা প্রেত দক্ষিণা।
প্রিয়ং পিতৃভ্য আত্মনে ব্রহ্মভ্যঃ কৃণুতা প্রিয়ম্ ॥৩৪॥

2.35

দ্বিভাগধনমাদায় প্র ক্ষিণাত্যবর্ত্যা ।
অগ্নিঃ পুত্রস্য জ্যেষ্ঠস্য যঃ ক্রব্যাদনিরাহিতঃ ॥৩৫॥

2.36

যৎ কৃষতে যদ্ বনুতে যচ্চ বস্নেন বিন্দতে ।
সর্বং মর্ত্যস্য তন্নাস্তি ক্রব্যাচ্চেদনিরাহিতঃ ॥৩৬॥

2.37

অয়জ্ঞিয়ো হতবর্চা ভবতি নৈনেন হবিরত্তবে ।
ছিনত্তি কৃষ্যা গোর্ধনাদ্ যং ক্রব্যাদনুবর্ততে ॥৩৭॥

2.38

মুহুর্গৃধ্যৈঃ প্র বদত্যার্তিং মর্ত্যো নীত্য ।
ক্রব্যাদ্ যানগ্নিরন্তিকাদনুবিদ্বান্ বিতাবতি ॥৩৮॥

2.39

গ্রাহ্যা গৃহাঃ সং সৃজ্যন্তে স্ত্রিয়া যন্ম্রিয়তে পতিঃ ।
ব্রহ্মৈব বিদ্বানেষ্যো৩ যঃ ক্রব্যাদং নিরাদধৎ ॥৩৯॥

2.40

যদ্ রিপ্রং শমলং চকৃম যচ্চ দুষ্কৃতম্।
আপো মা তস্মাচ্ছুম্ভন্ত্বগ্নেঃ সংকসুকাচ্চ যৎ ॥৪০॥

2.41

তা অধরাদুদীচীরাববৃত্রন্ প্রজানতীঃ পথিভির্দেবয়ানৈঃ ।
পর্বতস্য বৃষভস্যাধি পৃষ্ঠে নবাশ্চরন্তি সরিতঃ পুরাণীঃ ॥৪১॥

2.42

অগ্নে অক্রব্যান্নিঃ ক্রব্যাদং নুদা দেবয়জনং বহ ॥৪২॥

2.43

ইমং ক্রব্যাদা বিবেশায়ং ক্রব্যাদমন্বগাৎ।
ব্যাগ্রৌ কৃত্বা নানানং তং হরামি শিবাপরম্ ॥৪৩॥

2.44

অন্তর্ধির্দেবানাং পরিধির্মনুষ্যাঽণামগ্নির্গার্হপত্য উভয়ানন্তরা শ্রিতঃ ॥৪৪॥

2.45

জীবানামায়ুঃ প্র তির ত্বমগ্নে পিতৄণাং লোকমপি গচ্ছন্তু যে মৃতাঃ ।
সুগার্হপত্যো বিতপন্নরাতিমুষামুষাং শ্রেয়সীং ধেহ্যস্মৈ ॥৪৫॥

2.46

সর্বানগ্নে সহমানঃ সপত্নানৈষামূর্জং রয়িমস্মাসু ধেহি ॥৪৬॥

2.47

ইমমিন্দ্রং বহ্নিং পপ্রিমন্বারভধ্বং স বো নির্বক্ষদ্ দুরিতাদবদ্যাৎ।
তেনাপ হত শরুমাপতন্তং তেন রুদ্রস্য পরি পাতাস্তাম্ ॥৪৭॥

2.48

অনড্বাহং প্লবমন্বারভধ্বং স বো নির্বক্ষদ্ দুরিতাদবদ্যাৎ।
আ রোহত সবিতুর্নাবমেতাং ষড্ভিরুর্বীভিরমতিং তরেম ॥৪৮॥

2.49

অহোরাত্রে অন্বেষি বিভ্রৎ ক্ষেম্যস্তিষ্ঠন্ প্রতরণঃ সুবীরঃ ।
অনাতুরান্ত্সুমনসস্তল্প বিভ্রজ্জ্যোগেব নঃ পুরুষগন্ধিরেধি ॥৪৯॥

2.50

তে দেবেভ্য আ বৃশ্চন্তে পাপং জীবন্তি সর্বদা।
ক্রব্যাদ্ যানগ্নিরন্তিকাদশ্ব ইবানুবপতে নডম্ ॥৫০॥

2.51

যেঽশ্রদ্ধা ধনকাম্যা ক্রব্যাদা সমাসতে ।
তে বা অন্যেষাং কুম্ভীং পর্যাদধতি সর্বদা ॥৫১॥

2.52

প্রেব পিপতিষতি মনসা মুহুরা বর্ততে পুনঃ ।
ক্রব্যাদ্ যানগ্নিরন্তিকাদনুবিদ্বান্ বিতাবতি ॥৫২॥

2.53

অবিঃ কৃষ্ণা ভাগধেয়ং পশূনাং সীসং ক্রব্যাদপি চন্দ্রং ত আহুঃ ।
মাষাঃ পিষ্টা ভাগধেয়ং তে হব্যমরণ্যান্যা গহ্বরং সচস্ব ॥৫৩॥

2.54

ইষীকাং জরতীমিষ্ট্বা তিল্পিঞ্জং দণ্ডনং নডম্।
তমিন্দ্র ইধ্মং কৃত্বা যমস্যাগ্নিং নিরাদধৌ ॥৫৪॥

2.55

প্রত্যঞ্চমর্কং প্রত্যর্পয়িত্বা প্রবিদ্বান্ পন্থাং বি হ্যাঽবিবেশ ।
পরামীষামসূন্ দিদেশ দীর্ঘেণায়ুষা সমিমান্ত্সৃজামি ॥৫৫॥