সূক্ত 1

1.1

ভূমিসূক্তম্। ১-৬৩ অথর্বা। ভূমিঃ।ত্রিষ্টুপ্, ২ ভুরিক্, ৪-৬, ১০,৩৮ ত্র্যবসানা ষট্-পদা জগতী, ৭ প্রস্তারপঙ্ক্তিঃ, ৮, ১১ ত্র্যবo ষট্o বিরাডষ্টিঃ, ৯ পরানুষ্টুপ্, ১২-১৩, ১৫ পঞ্চপদা শক্বরী (১২-১৩ ত্র্যবo), ১৪ মহাবৃহতী, ১৬, ২১ একাবo সাম্নী ত্রিষ্টুপ্, ১৮ ত্র্যবo ষট্o ত্রিষ্টুবনুষ্টুব্গর্ভাতিশক্বরী, ১৯, ২০ পুরোবৃহতী (২০ বিরাট্) ২২ ত্র্যবo ষট্o বিরাডতিজগতী, ২৩ পঞ্চপদা বিরাডতিজগতী, ২৪ পঞ্চo অনুষ্টুব্গর্ভা জগতী, ২৫ ত্র্যবo সপ্তo উষ্ণিগনুষ্টুব্গর্ভা শক্বরী, ২৬-২৮, ৩৩, ৩৫, ৩৯-৪১, ৫০,৫৩-৫৪, ৫৬, ৫৯, ৬৩ অনুষ্টুপ্

সত্যং বৃহদৃতমুগ্রং দীক্ষা তপো ব্রহ্ম যজ্ঞঃ পৃথিবীং ধারয়ন্তি ।
সা নো ভূতস্য ভব্যস্য পত্ন্যুরুং লোকং পৃথিবী নঃ কৃণোতু ॥১॥

1.2

অসংবাধং বধ্যতো মানবানাং যস্যা উদ্বতঃ প্রবতঃ সমং বহু।
নানাবীর্যা ওষধীর্যা বিভর্তি পৃথিবী নঃ প্রথতাং রাধ্যতাং নঃ ॥২॥

1.3

যস্যাং সমুদ্র উত সিন্ধুরাপো যস্যামন্নং কৃষ্টয়ঃ সংবভূবুঃ ।
যস্যামিদং জিন্বতি প্রাণদেজৎ সা নো ভূমিঃ পূর্বপেয়ে দধাতু ॥৩॥

1.4

যস্যাশ্চতস্রঃ প্রদিশঃ পৃথিব্যা যস্যামন্নং কৃষ্টয়ঃ সংবভূবুঃ ।
যা বিভর্তি বহুধা প্রাণদেজৎ সা নো ভূমির্গোষ্বপ্যন্নে দধাতু ॥৪॥

1.5

যস্যাং পূর্বে পূর্বজনা বিচক্রিরে যস্যাং দেবা অসুরানভ্যবর্তয়ন্।
গবামশ্বানাং বয়সশ্চ বিষ্ঠা ভগং বর্চঃ পৃথিবী নো দধাতু ॥৫॥

1.6

বিশ্বংভরা বসুধানী প্রতিষ্ঠা হিরণ্যবক্ষা জগতো নিবেশনী ।
বৈশ্বানরং বিভ্রতী ভূমিরগ্নিমিন্দ্রঋষভা দ্রবিণে নো দধাতু ॥৬॥

1.7

যাং রক্ষন্ত্যস্বপ্না বিশ্বদানীং দেবা ভূমিং পৃথিবীমপ্রমাদম্।
সা নো মধু প্রিয়ং দুহামথো উক্ষতু বর্চসা ॥৭॥

1.8

যার্ণবেঽধি সলিলমগ্র আসীদ্ যাং মায়াভিরন্বচরন্ মনীষিণঃ ।
যস্যা হৃদয়ং পরমে ব্যোঽমন্ত্সত্যেনাবৃতমমতং পৃথিব্যাঃ।
সা নো ভূমিস্ত্বিষিং বলং রাষ্ট্রে দধাতূত্তমে ॥৮॥

1.9

যস্যামাপঃ পরিচরাঃ সমানীরহোরাত্রে অপ্রমাদং ক্ষরন্তি ।
সা নো ভূমির্ভূরিধারা পয়ো দুহামথো উক্ষতু বর্চসা ॥৯॥

1.10

যামশ্বিনাবমিমাতাং বিষ্ণুর্যস্যাং বিচক্রমে।
ইন্দ্রো যাং চক্র আত্মনেঽনমিত্রাং শচীপতিঃ ।
সা নো ভূমির্বি সৃজতাং মাতা পুত্রায় মে পয়ঃ ॥১০॥

1.11

গিরয়স্তে পর্বতা হিমবন্তোঽরণ্যং তে পৃথিবি স্যোনমস্তু ।
বভ্রুং কৃষ্ণাং রোহিণীং বিশ্বরূপাং ধ্রুবাং ভূমিং পৃথিবীমিন্দ্রগুপ্তাম্।
অজীতোঽহতো অক্ষতোঽধ্যষ্ঠাং পৃথিবীমহম্ ॥১১॥

1.12

যৎ তে মধ্যং পৃথিবি যচ্চ নভ্যং যাস্ত ঊর্জস্তন্বঃ সংবভূবুঃ ।
তা সু নো ধেহ্যভি নঃ পবস্ব মাতা ভূমিঃ পুত্রো অহং পৃথিব্যাঃ।
পর্জন্যঃ পিতা স উ নঃ পিপর্তু ॥১২॥

1.13

যস্যাং বেদিং পরিগৃহ্ণন্তি ভূম্যাং যস্যাং যজ্ঞং তন্বতে বিশ্বকর্মাণঃ ।
যস্যাং মীয়ন্তে স্বরবঃ পৃথিব্যামূর্ধ্বাঃ শুক্রা আহুত্যাঃ পুরস্তাৎ।
সা নো ভূমির্বর্ধয়দ্ বর্ধমানা ॥১৩॥

1.14

যো নো দ্বেষৎ পৃথিবি যঃ পৃতন্যাদ্ যোঽভিদাসান্মনসা যো বধেন ।
তং নো ভূমে রন্ধয় পূর্বকৃত্বরি ॥১৪॥

1.15

ত্বজ্জাতাস্ত্বয়ি চরন্তি মর্ত্যাস্ত্বং বিভর্ষি দ্বিপদস্ত্বং চতুষ্পদঃ ।
তবেমে পৃথিবি পঞ্চ মানবা যেভ্যো জ্যোতিরমৃতং মর্ত্যেভ্য উদ্যন্ত্সূর্যো রশ্মিভিরাতনোতি ॥১৫॥

1.16

তা নঃ প্রজাঃ সং দুহ্রতাং সমগ্রা বাচো মধু পৃথিবি ধেহি মহ্যম্ ॥১৬॥

1.17

বিশ্বস্বং মাতরমোষধীনাং ধ্রুবাং ভূমিং পৃথিবীং ধর্মণা ধৃতাম্।
শিবাং স্যোনামনু চরেম বিশ্বহা ॥১৭॥

1.18

মহৎ সধস্থং মহতী বভূবিথ মহান্ বেগ এজথুর্বেপথুষ্টে ।
মহাংস্ত্বেন্দ্রো রক্ষত্যপ্রমাদম্।
সা নো ভূমে প্র রোচয় হিরণ্যস্যেব সংদৃশি মা নো দ্বিক্ষত কশ্চন ॥১৮॥

1.19

অগ্নির্ভূম্যামোষধীষ্বগ্নিমাপো বিভ্রত্যগ্নিরশ্মসু ।
অগ্নিরন্তঃ পুরুষেষু গোষ্বশ্বেষ্বগ্নয়ঃ ॥১৯॥

1.20

অগ্নির্দিব আ তপত্যগ্নের্দেবস্যোর্ব১ন্তরিক্ষম্।
অগ্নিং মর্তাস ইন্ধতে হব্যবাহং ঘৃতপ্রিয়ম্ ॥২০॥

1.21

অগ্নিবাসাঃ পৃথিব্যঽসিতজ্ঞূস্ত্বিষীমন্তং সংশিতং মা কৃণোতু ॥২১॥

1.22

ভূম্যাং দেবেভ্যো দদতি যজ্ঞং হব্যমরংকৃতম্।
ভূম্যাং মনুষ্যাঽ জীবন্তি স্বধয়ান্নেন মর্ত্যাঃ ।
সা নো ভূমিঃ প্রাণমায়ুর্দধাতু জরদষ্টিং মা পৃথিবী কৃণোতু ॥২২॥

1.23

যস্তে গন্ধঃ পৃথিবি সংবভূব যং বিভ্রত্যোষধয়ো যমাপঃ ।
যং গন্ধর্বা অপ্সরসশ্চ ভেজিরে তেন মা সুরভিং কৃণু মা নো দ্বিক্ষত কশ্চন ॥২৩॥

1.24

যস্তে গন্ধঃ পুষ্করমাবিবেশ যং সংজভ্রুঃ সূর্যায়া বিবাহে।
অমর্ত্যাঃ পৃথিবি গন্ধমগ্রে তেন মা সুরভিং কৃণু মা নো দ্বিক্ষত কশ্চন ॥২৪॥

1.25

যস্তে গন্ধঃ পুরুষেষু স্ত্রীষু পুংসু ভগো রুচিঃ ।
যো অশ্বেষু বীরেষু যো মৃগেষূত হস্তিষু ।
কন্যাঽয়াং বর্চো যদ্ ভূমে তেনাস্মাং অপি সং সৃজ মা নো দ্বিক্ষত কশ্চন ॥২৫॥

1.26

শিলা ভূমিরশ্মা পাংসুঃ সা ভূমিঃ সংধৃতা ধৃতা।
তস্যৈ হিরণ্যবক্ষসে পৃথিব্যা অকরং নমঃ ॥২৬॥

1.27

যস্যাং বৃক্ষা বানস্পত্যা ধ্রুবাস্তিষ্ঠন্তি বিশ্বহা ।
পৃথিবীং বিশ্বধায়সং ধৃতামচ্ছাবদামসি ॥২৭॥

1.28

উদীরাণা উতাসীনাস্তিষ্ঠন্তঃ প্রক্রামন্তঃ ।
পদ্ভ্যাং দক্ষিণসব্যাভ্যাং মা ব্যথিষ্মহি ভূম্যাম্ ॥২৮॥

1.29

বিমৃগ্বরীং পৃথিবীমা বদামি ক্ষমাং ভূমিং ব্রহ্মণা বাবৃধানাম্।
ঊর্জং পুষ্টং বিভ্রতীমন্নভাগং ঘৃতং ত্বাভি নি ষীদেম ভূমে ॥২৯॥

1.30

শুদ্ধা ন আপস্তন্বেঽ ক্ষরন্তু যো নঃ সেদুরপ্রিয়ে তং নি দধ্মঃ ।
পবিত্রেণ পৃথিবি মোৎ পুনামি ॥৩০॥

1.31

যাস্তে প্রাচীঃ প্রদিশো যা উদীচীর্যাস্তে ভূমে অধরাদ্ যাশ্চ পশ্চাৎ।
স্যোনাস্তা মহ্যং চরতে ভবন্তু মা নি পপ্তং ভুবনে শিশ্রিয়াণঃ ॥৩১॥

1.32

মা নঃ পশ্চান্মা পুরস্তান্নুদিষ্ঠা মোত্তরাদধরাদুত।
স্বস্তি ভূমে নো ভব মা বিদন্ পরিপন্থিনো বরীয়ো যাবয়া বধম্ ॥৩২॥

1.33

যাবৎ তেঽভি বিপশ্যামি ভূমে সূর্যেণ মেদিনা ।
তাবন্মে চক্ষুর্মা মেষ্টোত্তরামুত্তরাং সমাম্ ॥৩৩॥

1.34

যচ্ছয়ানঃ পর্যাবর্তে দক্ষিণং সব্যমভি ভূমে পার্শ্বম্ ।
উত্তানাস্ত্বা প্রতীচীং যৎ পৃষ্টীভিরধিশেমহে ।
মা হিংসীস্তত্র নো ভূমে সর্বস্য প্রতিশীবরি ॥৩৪॥

1.35

যৎ তে ভূমে বিখনামি ক্ষিপ্রং তদপি রোহতু ।
মা তে মর্ম বিমৃগ্বরি মা তে হৃদয়মর্পিপম্ ॥৩৫॥

1.36

গ্রীষ্মস্তে ভূমে বর্ষাণি শরদ্ধেমন্তঃ শিশিরো বসন্তঃ ।
ঋতবস্তে বিহিতা হায়নীরহোরাত্রে পৃথিবি নো দুহাতাম্ ॥৩৬॥

1.37

যাপ সর্পং বিজমানা বিমৃগ্বরী যস্যামাসন্নগ্নয়ো যে অপ্স্বন্তঃ ।
পরা দস্যূন্ দদতী দেবপীয়ূনিন্দ্রং বৃণানা পৃথিবী ন বৃত্রম্।
শক্রায় দধ্রে বৃষভায় বৃষ্ণে ॥৩৭॥

1.38

যস্যাং সদোহবির্ধানে যূপো যস্যাং নিমীয়তে ।
ব্রহ্মাণো যস্যামর্চন্ত্যৃগ্ভিঃ সাম্না যজুর্বিদঃ।
যুজ্যন্তে যস্যামৃত্বিজঃ সোমমিন্দ্রায় পাতবে ॥৩৮॥

1.39

যস্যাং পূর্বে ভূতকৃত ঋষয়ো গা উদানৃচুঃ ।
সপ্ত সত্রেণ বেধসো যজ্ঞেন তপসা সহ ॥৩৯॥

1.40

সা নো ভূমিরা দিশতু যদ্ধনং কাময়ামহে ।
ভগো অনুপ্রয়ুঙ্ক্তামিন্দ্র এতু পুরোগবঃ ॥৪০॥

1.41

যস্যাং গায়ন্তি নৃত্যন্তি ভূম্যাং মর্ত্যা ব্যৈঽলবাঃ ।
যুধ্যন্তে যস্যামাক্রন্দো যস্যাং বদতি দুন্দুভিঃ ।
সা নো ভূমিঃ প্র ণুদতাং সপত্নানসপত্নং মা পৃথিবী কৃণোতু ॥৪১॥

1.42

যস্যামন্নং ব্রীহিয়বৌ যস্যা ইমাঃ পঞ্চ কৃষ্টয়ঃ ।
ভূম্যৈ পর্জন্যপত্ন্যৈ নমোঽস্তু বর্ষমেদসে ॥৪২॥

1.43

যস্যাঃ পুরো দেবকৃতাঃ ক্ষেত্রে যস্যা বিকুর্বতে ।
প্রজাপতিঃ পৃথিবীং বিশ্বগর্ভামাশামাশাং রণ্যাং নঃ কৃণোতু ॥৪৩॥

1.44

নিধিং বিভ্রতী বহুধা গুহা বসু মণিং হিরণ্যং পৃথিবী দদাতু মে ।
বসূনি নো বসুদা রাসমানা দেবী দধাতু সুমনস্যমানা ॥৪৪॥

1.45

জনং বিভ্রতী বহুধা বিবাচসং নানাধর্মাণং পৃথিবী যথৌকসম্।
সহস্রং ধারা দ্রবিণস্য মে দুহাং ধ্রুবেব ধেনুরনপস্ফুরন্তী ॥৪৫॥

1.46

যস্তে সর্পো বৃশ্চিকস্তৃষ্টদংশ্মা হেমন্তজব্ধো ভৃমলো গুহা শয়ে ।
ক্রিমির্জিন্বৎ পৃথিবি যদ্যদেজতি প্রাবৃষি তন্নঃ সর্পন্মোপ সৃপদ্ যচ্ছিবং তেন নো মৃড ॥৪৬॥

1.47

যে তে পন্থানো বহবো জনায়না রথস্য বর্ত্মানসশ্চ যাতবে ।
যৈঃ সংচরন্ত্যুভয়ে ভদ্রপাপাস্তং পন্থানং জয়েমানমিত্রমতস্করং যচ্ছিবং তেন নো মৃড ॥৪৭॥

1.48

মল্বং বিভ্রতী গুরুভৃদ্ ভদ্রপাপস্য নিধনং তিতিক্ষুঃ ।
বরাহেণ পৃথিবী সংবিদানা সূকরায় বি জিহীতে মৃগায় ॥৪৮॥

1.49

যে ত আরণ্যাঃ পশবো মৃগা বনে হিতাঃ সিংহা ব্যাঘ্রাঃ পুরুষাদশ্চরন্তি ।
উলং বৃকং পৃথিবি দুচ্ছুনামিত ঋক্ষীকাং রক্ষো অপ বাধয়াস্মৎ ॥৪৯॥

1.50

যে গন্ধর্বা অপ্সরসো যে চারায়াঃ কিমীদিনঃ ।
পিশাচান্ত্সর্বা রক্ষাংসি তানস্মদ্ ভূমে যাবয় ॥৫০॥

1.51

যাং দ্বিপাদঃ পক্ষিণঃ সংপতন্তি হংসাঃ সুপর্ণাঃ শকুনা বয়াংসি ।
যস্যাং বাতো মাতরিশ্বেয়তে রজাংসি কৃণ্বংশ্চ্যাবয়ংশ্চ বৃক্ষান্।
বাতস্য প্রবামুপবামনু বাত্যর্চিঃ ॥৫১॥

1.52

যস্যাং কৃষ্ণমরুণং চ সংহিতে অহোরাত্রে বিহিতে ভূম্যামধি ।
বর্ষেণ ভূমিঃ পৃথিবী বৃতাবৃতা সা নো দধাতু ভদ্রয়া প্রিয়ে ধামনিধামনি ॥৫২॥

1.53

দ্যৌশ্চ ম ইদং পৃথিবী চান্তরিক্ষং চ মে ব্যচঃ ।
অগ্নিঃ সূর্য আপো মেধাং বিশ্বে দেবাশ্চ সং দদুঃ ॥৫৩॥

1.54

অহমস্মি সহমান উত্তরো নাম ভূম্যাম্।
অভীষাডস্মি বিশ্বাষাডাশামাশাং বিষাসহিঃ ॥৫৪॥

1.55

অদো যদ্ দেবি প্রথমানা পুরস্তাদ্ দেবৈরুক্তা ব্যসর্পো মহিত্বম্।
আ ত্বা সুভূতমবিশৎ তদানীমকল্পয়থাঃ প্রদিশশ্চতস্রঃ ॥৫৫॥

1.56

যে গ্রামা যদরণ্যং যাঃ সভা অধি ভূম্যাম্।
যে সংগ্রামাঃ সমিতয়স্তেষু চারু বদেম তে ॥৫৬॥

1.57

অশ্ব ইব রজো দুধুবে বি তান্ জনান্ য আক্ষিয়ন্ পৃথিবীং যাদজায়ত ।
মন্দ্রাগ্রেত্বরী ভুবনস্য গোপা বনস্পতীনাং গৃভিরোষধীনাম্ ॥৫৭॥

1.58

যদ্ বদামি মধুমৎ তদ্ বদামি যদীক্ষে তদ্ বনন্তি মা ।
ত্বিষীমানস্মি জূতিমানবান্যান্ হন্মি দোধতঃ ॥৫৮॥

1.59

শন্তিবা সুরভিঃ স্যোনা কীলালোধ্নী পয়স্বতী ।
ভূমিরধি ব্রবীতু মে পৃথিবী পয়সা সহ ॥৫৯॥

1.60

যামন্বৈচ্ছদ্ধবিষা বিশ্বকর্মান্তরর্ণবে রজসি প্রবিষ্টাম্।
ভুজিষ্যং১ পাত্রং নিহিতং গুহা যদাবির্ভোগে অভবন্মাতৃমদ্ভ্যঃ ॥৬০॥

1.61

ত্বমস্যাবপনী জনানামদিতিঃ কামদুঘা পপ্রথানা।
যৎ ত ঊনং তৎ ত আ পূরয়াতি প্রজাপতিঃ প্রথমজা ঋতস্য ॥৬১॥

1.62

উপস্থাস্তে অনমীবা অয়ক্ষ্মা অস্মভ্যং সন্তু পৃথিবি প্রসূতাঃ ।
দীর্ঘং ন আয়ুঃ প্রতিবুধ্যমানা বয়ং তুভ্যং বলিহৃতঃ স্যাম ॥৬২॥

1.63

ভূমে মাতর্নি ধেহি মা ভদ্রয়া সুপ্রতিষ্ঠিতম্।
সংবিদানা দিবা কবে শ্রিয়াং মা ধেহি ভূত্যাম্ ॥৬৩॥