Sukta 1

1.1

Bhumisuktam, 1-63 atharva, bhumih, trishtup, 2 bhurik, 4-6, 10, 38 tryavasana shat-pada jagati, 7 prastarapanktih, 8, 11 tryavao shato viradashtih, 9 paranushtup, 12-13, 15 panchapada shakvari (12-13 tryavao), 14 mahabrihati, 16, 21 ekavao samni trishtup, 18 tryavao shato trishtubanushtubgarbhatishakvari, 19, 20 purobrihati (20 virat) 22 tryavao shato viradatijagati, 23 panchapada viradatijagati, 24 panchao anushtubgarbha jagati, 25 tryavao saptao ushniganushtubgarbha shakvari, 26-28, 33, 35, 39-41, 50, 53-54, 56, 59, 63 anushtup

स॒त्यं बृ॒हदृ॒तमु॒ग्रं दी॒क्षा तपो॒ ब्रह्म॑ य॒ज्ञः पृ॑थि॒वीं धा॑रयन्ति ।
सा नो॑ भू॒तस्य॒ भव्य॑स्य॒ पत्न्यु॒रुं लो॒कं पृ॑थि॒वी नः॑ कृणोतु ॥१॥

Satyam brihadritamugram diksha tapo brahma yagyah prithivim dharayanti
Sa no bhutasya bhavyasya patnyurum lokam prithivi nah krinotu

1.2

अ॒सं॒बा॒धं ब॑ध्य॒तो मा॑न॒वानां॒ यस्या॑ उ॒द्वतः॑ प्र॒वतः॑ स॒मं ब॒हु।
नाना॑वीर्या॒ ओष॑धी॒र्या बिभ॑र्ति पृथि॒वी नः॑ प्रथतां॒ राध्य॑तां नः ॥२॥

Asambadham badhyato manavanam yasya udvatah pravatah samam bahu
Nanavirya oshadhirya bibharti prithivi nah prathatam radhyatam nah

1.3

यस्यां॑ समु॒द्र उ॒त सिन्धु॒रापो॒ यस्या॒मन्नं॑ कृ॒ष्टयः॑ संबभू॒वुः ।
यस्या॑मि॒दं जिन्व॑ति प्रा॒णदेज॒त् सा नो॒ भूमिः॑ पूर्व॒पेये॑ दधातु ॥३॥

Yasyam samudra uta sindhurapo yasyamannam krishtayah sambabhuvuh
Yasyamidam jinvati pranadejat sa no bhumih purvapeye dadhatu

1.4

यस्या॒श्चत॑स्रः प्र॒दिशः॑ पृथि॒व्या यस्या॒मन्नं कृ॒ष्टयः॑ संबभू॒वुः ।
या बिभ॑र्ति बहु॒धा प्रा॒णदेज॒त् सा नो॒ भूमि॒र्गोष्वप्यन्ने॑ दधातु ॥४॥

Yasyashchatasrah pradishah prithivya yasyamannam krishtayah sambabhuvuh
Ya bibharti bahudha pranadejat sa no bhumirgoshvapyanne dadhatu

1.5

यस्यां॒ पूर्वे॑ पूर्वज॒ना वि॑चक्रि॒रे यस्यां॑ दे॒वा असु॑रान॒भ्यव॑र्तयन्।
गवा॒मश्वा॑नां॒ वय॑सश्च वि॒ष्ठा भगं॒ वर्चः॑ पृथि॒वी नो॑ दधातु ॥५॥

Yasyam purve purvajana vichakrire yasyam deva asuranabhyavartayan
Gavamashvanam vayasashcha vishtha bhagam varchah prithivi no dadhatu

1.6

वि॒श्वं॒भ॒रा व॑सु॒धानी॑ प्रति॒ष्ठा हिर॑ण्यवक्षा॒ जग॑तो नि॒वेश॑नी ।
वै॒श्वा॒न॒रं बिभ्र॑ती॒ भूमि॑र॒ग्निमिन्द्र॑ऋषभा॒ द्रवि॑णे नो दधातु ॥६॥

Vishvambhara vasudhani pratishtha hiranyavaksha jagato niveshani
Vaishvanaram bibhrati bhumiragnimindrarishabha dravine no dadhatu

1.7

यां रक्ष॑न्त्यस्व॒प्ना वि॑श्व॒दानीं॑ दे॒वा भूमिं॑ पृथि॒वीमप्र॑मादम्।
सा नो॒ मधु॑ प्रि॒यं दु॑हा॒मथो॑ उक्षतु॒ वर्च॑सा ॥७॥

Yam rakshantyasvapna vishvadanim deva bhumim prithivimapramadam
Sa no madhu priyam duhamatho ukshatu varchasa

1.8

यार्ण॒वेऽधि॑ सलि॒लमग्र॒ आसी॒द् यां मा॒याभि॑र॒न्वच॑रन् मनी॒षिणः॑ ।
यस्या॒ हृद॑यं पर॒मे व्योऽमन्त्स॒त्येनावृ॑तम॒मतं॑ पृथि॒व्याः।
सा नो॒ भूमि॒स्त्विषिं॒ बलं॑ रा॒ष्ट्रे द॑धातूत्त॒मे ॥८॥

Yarnavedhi salilamagra asid yam mayabhiranvacharan manishinah
Yasya hridayam parame vyomantsatyenavritamamatam prithivyah
Sa no bhumistvishim balam rashtre dadhatuttame

1.9

यस्या॒मापः॑ परिच॒राः स॑मा॒नीर॑होरा॒त्रे अप्र॑मादं॒ क्षर॑न्ति ।
सा नो॒ भूमि॒र्भूरि॑धारा॒ पयो॑ दुहा॒मथो॑ उक्षतु॒ वर्च॑सा ॥९॥

Yasyamapah paricharah samanirahoratre apramadam ksharanti
Sa no bhumirbhuridhara payo duhamatho ukshatu varchasa

1.10

याम॒श्विना॒वमि॑मातां॒ विष्णु॒र्यस्यां॑ विचक्र॒मे।
इन्द्रो॒ यां च॒क्र आ॒त्मने॑ऽनमि॒त्रां शची॒पतिः॑ ।
सा नो॒ भूमि॒र्वि सृ॑जतां मा॒ता पु॒त्राय॑ मे॒ पयः॑ ॥१०॥

Yamashvinavamimatam vishnuryasyam vichakrame
Indro yam chakra atmanenamitram shachipatih
Sa no bhumirvi srijatam mata putraya me payah

1.11

गि॒रय॑स्ते॒ पर्व॑ता हि॒मव॒न्तोऽर॑ण्यं ते पृथिवि स्यो॒नम॑स्तु ।
ब॒भ्रुं कृ॒ष्णां रोहि॑णीं वि॒श्वरू॑पां ध्रु॒वां भूमिं॑ पृथि॒वीमिन्द्र॑गुप्ताम्।
अजी॒तोऽह॑तो॒ अक्ष॒तोऽध्य॑ष्ठां पृथि॒वीम॒हम् ॥११॥

Girayaste parvata himavantoranyam te prithivi syonamastu
Babhrum krishnam rohinim vishvarupam dhruvam bhumim prithivimindraguptam
Ajitohato akshatodhyashtham prithivimaham

1.12

यत् ते॒ मध्यं॑ पृथिवि॒ यच्च॒ नभ्यं॒ यास्त॒ ऊर्ज॑स्त॒न्वः संबभू॒वुः ।
ता सु॑ नो धेह्य॒भि नः॑ पवस्व मा॒ता भूमिः॑ पु॒त्रो अ॒हं पृ॑थि॒व्याः।
प॒र्जन्यः॑ पि॒ता स उ॑ नः पिपर्तु ॥१२॥

Yat te madhyam prithivi yachcha nabhyam yasta urjastanvah sambabhuvuh
Ta su no dhehyabhi nah pavasva mata bhumih putro aham prithivyah
Parjanyah pita sa u nah pipartu

1.13

यस्यां॒ वेदिं॑ परिगृ॒ह्णन्ति॒ भूम्यां॒ यस्यां॑ य॒ज्ञं त॒न्वते॑ वि॒श्वक॑र्माणः ।
यस्यां॑ मी॒यन्ते॒ स्वर॑वः पृथि॒व्यामू॒र्ध्वाः शु॒क्रा आहु॑त्याः पु॒रस्ता॑त्।
सा नो॒ भूमि॑र्वर्धय॒द् वर्ध॑माना ॥१३॥

Yasyam vedim parigrihnanti bhumyam yasyam yagyam tanvate vishvakarmanah
Yasyam miyante svaravah prithivyamurdhvah shukra ahutyah purastat
Sa no bhumirvardhayad vardhamana

1.14

यो नो॒ द्वेष॑त् पृथिवि॒ यः पृ॑त॒न्याद् योऽभि॒दासा॒न्मन॑सा॒ यो व॒धेन॑ ।
तं नो॑ भूमे रन्धय पूर्वकृत्वरि ॥१४॥

Yo no dveshat prithivi yah pritanyad yobhidasanmanasa yo vadhena
Tam no bhume randhaya purvakritvari

1.15

त्वज्जा॒तास्त्वयि॑ चरन्ति॒ मर्त्या॒स्त्वं बि॑भर्षि द्वि॒पद॒स्त्वं चतु॑ष्पदः ।
तवे॒मे पृ॑थिवि॒ पञ्च॑ मान॒वा येभ्यो॒ ज्योति॑र॒मृतं॒ मर्त्ये॑भ्य उ॒द्यन्त्सूर्यो॑ र॒श्मिभि॑रात॒नोति॑ ॥१५॥

Tvajjatastvayi charanti martyastvam bibharshi dvipadastvam chatushpadah
Taveme prithivi pancha manava yebhyo jyotiramritam martyebhya udyantsuryo rashmibhiratanoti

1.16

ता नः॑ प्र॒जाः सं दु॑ह्रतां सम॒ग्रा वा॒चो मधु॑ पृथिवि धेहि॒ मह्य॑म् ॥१६॥

Ta nah prajah sam duhratam samagra vacho madhu prithivi dhehi mahyam

1.17

वि॒श्व॒स्वं मा॒तर॒मोष॑धीनां ध्रु॒वां भूमिं॑ पृथि॒वीं धर्म॑णा धृ॒ताम्।
शि॒वां स्यो॒नामनु॑ चरेम वि॒श्वहा॑ ॥१७॥

Vishvasvam mataramoshadhinam dhruvam bhumim prithivim dharmana dhritam
Shivam syonamanu charema vishvaha

1.18

महत् स॒धस्थं॑ मह॒ती ब॑भूविथ म॒हान् वेग॑ ए॒जथु॑र्वे॒पथु॑ष्टे ।
म॒हांस्त्वेन्द्रो॑ रक्ष॒त्यप्र॑मादम्।
सा नो॑ भूमे॒ प्र रो॑चय॒ हिर॑ण्यस्येव सं॒दृशि॒ मा नो॑ द्विक्षत॒ कश्च॒न ॥१८॥

Mahat sadhastham mahati babhuvitha mahan vega ejathurvepathushte
Mahanstvendro rakshatyapramadam
Sa no bhume pra rochaya hiranyasyeva sandrishi ma no dvikshata kashchana

1.19

अ॒ग्निर्भूम्या॒मोष॑धीष्व॒ग्निमापो॑ बिभ्रत्य॒ग्निरश्म॑सु ।
अ॒ग्निर॒न्तः पुरु॑षेषु॒ गोष्वश्वे॑ष्व॒ग्नयः॑ ॥१९॥

Agnirbhumyamoshadhishvagnimapo bibhratyagnirashmasu
Agnirantah purusheshu goshvashveshvagnayah

1.20

अ॒ग्निर्दि॒व आ त॑पत्य॒ग्नेर्दे॒वस्यो॒र्व॑१न्तरि॑क्षम्।
अ॒ग्निं मर्ता॑स इन्धते हव्य॒वाहं॑ घृत॒प्रिय॑म् ॥२०॥

Agnirdiva a tapatyagnerdevasyorva1ntariksham
Agnim martasa indhate havyavaham ghritapriyam

1.21

अ॒ग्निवा॑साः पृथि॒व्यऽसित॒ज्ञूस्त्विषी॑मन्तं॒ संशि॑तं मा कृणोतु ॥२१॥

Agnivasah prithivyasitagyustvishimantam sanshitam ma krinotu

1.22

भूम्यां॑ दे॒वेभ्यो॑ ददति य॒ज्ञं ह॒व्यमरं॑कृतम्।
भूम्यां॑ मनु॒ष्याऽ जीवन्ति स्व॒धयान्ने॑न॒ मर्त्याः॑ ।
सा नो॒ भूमिः॑ प्रा॒णमायु॑र्दधातु ज॒रद॑ष्टिं मा पृथि॒वी कृ॑णोतु ॥२२॥

Bhumyam devebhyo dadati yagyam havyamarankritam
Bhumyam manushya jivanti svadhayannena martyah
Sa no bhumih pranamayurdadhatu jaradashtim ma prithivi krinotu

1.23

यस्ते॑ ग॒न्धः पृ॑थिवि संब॒भूव॒ यं बिभ्र॒त्योष॑धयो॒ यमापः॑ ।
यं ग॑न्ध॒र्वा अ॑प्स॒रस॑श्च भेजि॒रे तेन॑ मा सुर॒भिं कृ॑णु॒ मा नो॑ द्विक्षत॒ कश्च॒न ॥२३॥

Yaste gandhah prithivi sambabhuva yam bibhratyoshadhayo yamapah
Yam gandharva apsarasashcha bhejire tena ma surabhim krinu ma no dvikshata kashchana

1.24

यस्ते॑ ग॒न्धः पुष्क॑रमावि॒वेश॒ यं सं॑ज॒भ्रुः सू॒र्याया॑ विवा॒हे।
अम॑र्त्याः पृथिवि ग॒न्धमग्रे॒ तेन॑ मा सुर॒भिं कृ॑णु॒ मा नो॑ द्विक्षत॒ कश्च॒न ॥२४॥

Yaste gandhah pushkaramavivesha yam sanjabhruh suryaya vivahe
Amartyah prithivi gandhamagre tena ma surabhim krinu ma no dvikshata kashchana

1.25

यस्ते॑ ग॒न्धः पुरु॑षेषु स्त्री॒षु पुं॒सु भगो॒ रुचिः॑ ।
यो अश्वे॑षु वी॒रेषु॒ यो मृ॒गेषू॒त ह॒स्तिषु॑ ।
क॒न्याऽयां॒ वर्चो॒ यद् भू॑मे॒ तेना॒स्मां अपि॒ सं सृ॑ज॒ मा नो॑ द्विक्षत॒ कश्च॒न ॥२५॥

Yaste gandhah purusheshu strishu punsu bhago ruchih
Yo ashveshu vireshu yo mrigeshuta hastishu
Kanyayam varcho yad bhume tenasmam api sam srija ma no dvikshata kashchana

1.26

शि॒ला भूमि॒रश्मा॑ पां॒सुः सा भूमिः॒ संधृ॑ता धृ॒ता।
तस्यै॒ हिर॑ण्यवक्षसे पृथि॒व्या अ॑करं॒ नमः॑ ॥२६॥

Shila bhumirashma pansuh sa bhumih sandhrita dhrita
Tasyai hiranyavakshase prithivya akaram namah

1.27

यस्यां॑ वृ॒क्षा वा॑नस्प॒त्या ध्रु॒वास्तिष्ठ॑न्ति वि॒श्वहा॑ ।
पृ॒थि॒वीं वि॒श्वधा॑यसं धृ॒ताम॒च्छाव॑दामसि ॥२७॥

Yasyam vriksha vanaspatya dhruvastishthanti vishvaha
Prithivim vishvadhayasam dhritamachchhavadamasi

1.28

उ॒दीरा॑णा उ॒तासी॑ना॒स्तिष्ठ॑न्तः प्र॒क्राम॑न्तः ।
प॒द्भ्यां द॑क्षिणस॒व्याभ्यां॒ मा व्य॑थिष्महि॒ भूम्या॑म् ॥२८॥

Udirana utasinastishthantah prakramantah
Padbhyam dakshinasavyabhyam ma vyathishmahi bhumyam

1.29

वि॒मृग्व॑रीं पृथि॒वीमा व॑दामि क्ष॒मां भूमिं॒ ब्रह्म॑णा वावृधा॒नाम्।
ऊर्जं॑ पु॒ष्टं बिभ्र॑तीमन्नभा॒गं घृ॒तं त्वा॒भि नि षी॑देम भूमे ॥२९॥

Vimrigvarim prithivima vadami kshamam bhumim brahmana vavridhanam
Urjam pushtam bibhratimannabhagam ghritam tvabhi ni shidema bhume

1.30

शु॒द्धा न॒ आप॑स्त॒न्वेऽ क्षरन्तु॒ यो नः॒ सेदु॒रप्रि॑ये॒ तं नि द॑ध्मः ।
प॒वित्रे॑ण पृथिवि॒ मोत् पु॑नामि ॥३०॥

Shuddha na apastanve ksharantu yo nah sedurapriye tam ni dadhmah
Pavitrena prithivi mot punami

1.31

यास्ते॒ प्राचीः॑ प्र॒दिशो॒ या उदी॑ची॒र्यास्ते॑ भूमे अध॒राद् याश्च॑ प॒श्चात्।
स्यो॒नास्ता मह्यं॒ चर॑ते भवन्तु॒ मा नि प॑प्तं॒ भुव॑ने शिश्रिया॒णः ॥३१॥

Yaste prachih pradisho ya udichiryaste bhume adharad yashcha pashchat
Syonasta mahyam charate bhavantu ma ni paptam bhuvane shishriyanah

1.32

मा नः॑ प॒श्चान्मा पु॒रस्ता॑न्नुदिष्ठा॒ मोत्त॒राद॑ध॒रादु॒त।
स्व॒स्ति भू॑मे नो भव॒ मा वि॑दन् परिप॒न्थिनो॒ वरी॑यो यावया व॒धम् ॥३२॥

Ma nah pashchanma purastannudishtha mottaradadharaduta
Svasti bhume no bhava ma vidan paripanthino variyo yavaya vadham

1.33

याव॑त् तेऽभि वि॒पश्या॑मि॒ भूमे॒ सूर्ये॑ण मे॒दिना॑ ।
ताव॑न्मे॒ चक्षु॒र्मा मे॒ष्टोत्त॑रामुत्तरां॒ समा॑म् ॥३३॥

Yavat tebhi vipashyami bhume suryena medina
Tavanme chakshurma meshtottaramuttaram samam

1.34

यच्छया॑नः प॒र्याव॑र्ते॒ दक्षि॑णं स॒व्यम॒भि भू॑मे पा॒र्श्वम् ।
उ॒त्ता॒नास्त्वा॑ प्र॒तीचीं॒ यत् पृ॒ष्टीभि॑रधि॒शेम॑हे ।
मा हिं॑सी॒स्तत्र॑ नो भूमे॒ सर्व॑स्य प्रतिशीवरि ॥३४॥

Yachchhayanah paryavarte dakshinam savyamabhi bhume parshvam
Uttanastva pratichim yat prishtibhiradhishemahe
Ma hinsistatra no bhume sarvasya pratishivari

1.35

यत् ते भूमे वि॒खना॑मि क्षि॒प्रं तदपि॑ रोहतु ।
मा ते॒ मर्म॑ विमृग्वरि॒ मा ते॒ हृद॑यमर्पिपम् ॥३५॥

Yat te bhume vikhanami kshipram tadapi rohatu
Ma te marma vimrigvari ma te hridayamarpipam

1.36

ग्री॒ष्मस्ते॑ भूमे व॒र्षाणि॑ श॒रद्धे॑म॒न्तः शिशि॑रो वस॒न्तः ।
ऋ॒तव॑स्ते॒ विहि॑ता हाय॒नीर॑होरा॒त्रे पृ॑थिवि नो दुहाताम् ॥३६॥

Grishmaste bhume varshani sharaddhemantah shishiro vasantah
Ritavaste vihita hayanirahoratre prithivi no duhatam

1.37

याप॑ स॒र्पं वि॒जमा॑ना वि॒मृग्व॑री॒ यस्या॒मास॑न्न॒ग्नयो॒ ये अ॒प्स्व॑न्तः ।
परा॒ दस्यू॒न् दद॑ती देवपी॒यूनिन्द्रं॑ वृणा॒ना पृ॑थि॒वी न वृ॒त्रम्।
श॒क्राय॑ दध्रे वृष॒भाय॒ वृष्णे॑ ॥३७॥

Yapa sarpam vijamana vimrigvari yasyamasannagnayo ye apsvantah
Para dasyun dadati devapiyunindram vrinana prithivi na vritram
Shakraya dadhre vrishabhaya vrishne

1.38

यस्यां॑ सदोहविर्धा॒ने यूपो॒ यस्यां॑ निमी॒यते॑ ।
ब्र॒ह्माणो॒ यस्या॒मर्च॑न्त्यृ॒ग्भिः साम्ना॑ यजु॒र्विदः॑।
यु॒ज्यन्ते॒ यस्या॑मृ॒त्विजः॒ सोम॒मिन्द्रा॑य॒ पात॑वे ॥३८॥

Yasyam sadohavirdhane yupo yasyam nimiyate
Brahmano yasyamarchantyrigbhih samna yajurvidah
Yujyante yasyamritvijah somamindraya patave

1.39

यस्यां॒ पूर्वे॑ भूत॒कृत॒ ऋष॑यो॒ गा उ॑दानृ॒चुः ।
स॒प्त स॒त्रेण॑ वे॒धसो॑ य॒ज्ञेन॒ तप॑सा स॒ह ॥३९॥

Yasyam purve bhutakrita rishayo ga udanrichuh
Sapta satrena vedhaso yagyena tapasa saha

1.40

सा नो॒ भूमि॒रा दि॑शतु॒ यद्धनं॑ का॒मया॑महे ।
भगो॑ अनु॒प्रयु॑ङ्क्ता॒मिन्द्र॑ एतु पुरोग॒वः ॥४०॥

Sa no bhumira dishatu yaddhanam kamayamahe
Bhago anuprayunktamindra etu purogavah

1.41

यस्यां॒ गाय॑न्ति॒ नृत्य॑न्ति॒ भूम्यां॒ मर्त्या॒ व्यैऽलबाः ।
यु॒ध्यन्ते॒ यस्या॑माक्र॒न्दो यस्यां॒ वद॑ति दुन्दु॒भिः ।
सा नो॒ भूमिः॒ प्र णु॑दतां स॒पत्ना॑नसप॒त्नं मा॑ पृथि॒वी कृ॑णोतु ॥४१॥

Yasyam gayanti nrityanti bhumyam martya vyailabah
Yudhyante yasyamakrando yasyam vadati dundubhih
Sa no bhumih pra nudatam sapatnanasapatnam ma prithivi krinotu

1.42

यस्या॒मन्नं॑ व्रीहिय॒वौ यस्या॑ इ॒माः पञ्च॑ कृ॒ष्टयः॑ ।
भूम्यै॑ प॒र्जन्य॑पत्न्यै॒ नमो॑ऽस्तु व॒र्षमे॑दसे ॥४२॥

Yasyamannam vrihiyavau yasya imah pancha krishtayah
Bhumyai parjanyapatnyai namostu varshamedase

1.43

यस्याः॒ पुरो॑ दे॒वकृ॑ताः॒ क्षेत्रे॒ यस्या॑ विकु॒र्वते॑ ।
प्र॒जाप॑तिः पृथि॒वीं वि॒श्वग॑र्भा॒माशा॑माशां॒ रण्यां॑ नः कृणोतु ॥४३॥

Yasyah puro devakritah kshetre yasya vikurvate
Prajapatih prithivim vishvagarbhamashamasham ranyam nah krinotu

1.44

नि॒धिं बिभ्र॑ती बहु॒धा गुहा॒ वसु॑ म॒णिं हिर॑ण्यं पृथि॒वी द॑दातु मे ।
वसू॑नि नो वसु॒दा रास॑माना दे॒वी द॑धातु सुमन॒स्यमा॑ना ॥४४॥

Nidhim bibhrati bahudha guha vasu manim hiranyam prithivi dadatu me
Vasuni no vasuda rasamana devi dadhatu sumanasyamana

1.45

जनं॒ बिभ्र॑ती बहु॒धा विवा॑चसं॒ नाना॑धर्माणं पृथि॒वी य॑थौक॒सम्।
स॒हस्रं॒ धारा॒ द्रवि॑णस्य मे दुहां ध्रु॒वेव॑ धे॒नुरन॑पस्फुरन्ती ॥४५॥

Janam bibhrati bahudha vivachasam nanadharmanam prithivi yathaukasam
Sahasram dhara dravinasya me duham dhruveva dhenuranapasphuranti

1.46

यस्ते॑ स॒र्पो वृश्चि॑कस्तृ॒ष्टदं॑श्मा हेम॒न्तज॑ब्धो भृम॒लो गुहा॒ शये॑ ।
क्रिमि॒र्जिन्वत् पृथिवि॒ यद्य॒देज॑ति प्रा॒वृषि॑ तन्नः॒ सर्प॒न्मोप॑ सृप॒द् यच्छि॒वं तेन॑ नो मृड ॥४६॥

Yaste sarpo vrishchikastrishtadanshma hemantajabdho bhrimalo guha shaye
Krimirjinvat prithivi yadyadejati pravrishi tannah sarpanmopa sripad yachchhivam tena no mrida

1.47

ये ते॒ पन्था॑नो ब॒हवो॑ ज॒नाय॑ना॒ रथ॑स्य॒ वर्त्मान॑सश्च॒ यात॑वे ।
यैः सं॒चर॑न्त्यु॒भये॑ भद्रपा॒पास्तं पन्था॑नं जयेमानमि॒त्रम॑तस्क॒रं यच्छि॒वं तेन॑ नो मृड ॥४७॥

Ye te panthano bahavo janayana rathasya vartmanasashcha yatave
Yaih sancharantyubhaye bhadrapapastam panthanam jayemanamitramataskaram yachchhivam tena no mrida

1.48

म॒ल्वं बिभ्र॑ती गुरु॒भृद् भ॑द्रपा॒पस्य॑ नि॒धनं॑ तिति॒क्षुः ।
व॒रा॒हेण॑ पृथि॒वी सं॑विदा॒ना सू॑क॒राय॒ वि जि॑हीते मृ॒गाय॑ ॥४८॥

Malvam bibhrati gurubhrid bhadrapapasya nidhanam titikshuh
Varahena prithivi sanvidana sukaraya vi jihite mrigaya

1.49

ये त आ॑र॒ण्याः प॒शवो॑ मृ॒गा वने॑ हि॒ताः सिं॒हा व्या॒घ्राः पु॑रु॒षाद॒श्चर॑न्ति ।
उ॒लं वृकं॑ पृथिवि दुच्छुना॑मि॒त ऋ॒क्षीकां॒ रक्षो॒ अप॑ बाधया॒स्मत् ॥४९॥

Ye ta aranyah pashavo mriga vane hitah sinha vyaghrah purushadashcharanti
Ulam vrikam prithivi duchchhunamita rikshikam raksho apa badhayasmat

1.50

ये ग॑न्ध॒र्वा अ॑प्स॒रसो॒ ये चा॒रायाः॑ किमी॒दिनः॑ ।
पि॒शा॒चान्त्सर्वा॒ रक्षां॑सि॒ तान॒स्मद् भू॑मे यावय ॥५०॥

Ye gandharva apsaraso ye charayah kimidinah
Pishachantsarva rakshansi tanasmad bhume yavaya

1.51

यां द्वि॒पादः॑ प॒क्षिणः॑ सं॒पत॑न्ति हं॒साः सु॑प॒र्णाः श॑कु॒ना वयां॑सि ।
यस्यां॒ वातो॑ मात॒रिश्वेय॑ते॒ रजां॑सि कृ॒ण्वंश्च्या॒वयं॑श्च वृ॒क्षान्।
वात॑स्य प्र॒वामु॑प॒वामनु॑ वात्य॒र्चिः ॥५१॥

Yam dvipadah pakshinah sampatanti hansah suparnah shakuna vayansi
Yasyam vato matarishveyate rajansi krinvanshchyavayanshcha vrikshan
Vatasya pravamupavamanu vatyarchih

1.52

यस्यां॑ कृ॒ष्णम॑रु॒णं च॒ संहि॑ते अहोरा॒त्रे विहि॑ते॒ भूम्या॒मधि॑ ।
व॒र्षेण॒ भूमिः॑ पृथि॒वी वृ॒तावृ॑ता॒ सा नो॑ दधातु भ॒द्रया॑ प्रि॒ये धाम॑निधामनि ॥५२॥

Yasyam krishnamarunam cha sanhite ahoratre vihite bhumyamadhi
Varshena bhumih prithivi vritavrita sa no dadhatu bhadraya priye dhamanidhamani

1.53

द्यौश्च॑ म इ॒दं पृ॑थि॒वी चा॒न्तरि॑क्षं च मे॒ व्यचः॑ ।
अ॒ग्निः सूर्य॒ आपो॑ मे॒धां विश्वे॑ दे॒वाश्च॒ सं द॑दुः ॥५३॥

Dyaushcha ma idam prithivi chantariksham cha me vyachah
Agnih surya apo medham vishve devashcha sam daduh

1.54

अ॒हम॑स्मि॒ सह॑मान॒ उत्त॑रो॒ नाम॒ भूम्या॑म्।
अ॒भी॒षाड॑स्मि विश्वा॒षाडाशा॑माशां विषास॒हिः ॥५४॥

Ahamasmi sahamana uttaro nama bhumyam
Abhishadasmi vishvashadashamasham vishasahih

1.55

अ॒दो यद् दे॑वि॒ प्रथ॑माना पु॒रस्ता॑द् दे॒वैरु॒क्ता व्यस॑र्पो महि॒त्वम्।
आ त्वा॑ सुभू॒तम॑विशत् त॒दानी॒मक॑ल्पयथाः प्र॒दिश॒श्चत॑स्रः ॥५५॥

Ado yad devi prathamana purastad devairukta vyasarpo mahitvam
A tva subhutamavishat tadanimakalpayathah pradishashchatasrah

1.56

ये ग्रामा॒ यदर॑ण्यं॒ याः स॒भा अधि॒ भूम्या॑म्।
ये सं॑ग्रा॒माः समि॑तय॒स्तेषु॒ चारु॑ वदेम ते ॥५६॥

Ye grama yadaranyam yah sabha adhi bhumyam
Ye sangramah samitayasteshu charu vadema te

1.57

अश्व॑ इव॒ रजो॑ दुधुवे॒ वि तान् जना॒न् य आक्षि॑यन् पृथि॒वीं यादजा॑यत ।
म॒न्द्राग्रेत्व॑री॒ भुव॑नस्य गो॒पा वन॒स्पती॑नां॒ गृभि॒रोष॑धीनाम् ॥५७॥

Ashva iva rajo dudhuve vi tan janan ya akshiyan prithivim yadajayata
Mandragretvari bhuvanasya gopa vanaspatinam gribhiroshadhinam

1.58

यद् वदा॑मि॒ मधु॑म॒त् तद् व॑दामि॒ यदीक्षे॒ तद् व॑नन्ति मा ।
त्विषी॑मानस्मि जूति॒मानवा॒न्यान् ह॑न्मि॒ दोध॑तः ॥५८॥

Yad vadami madhumat tad vadami yadikshe tad vananti ma
Tvishimanasmi jutimanavanyan hanmi dodhatah

1.59

श॒न्ति॒वा सु॑र॒भिः स्यो॒ना की॒लालो॑ध्नी॒ पय॑स्वती ।
भूमि॒रधि॑ ब्रवीतु मे पृथि॒वी पय॑सा स॒ह ॥५९॥

Shantiva surabhih syona kilalodhni payasvati
Bhumiradhi bravitu me prithivi payasa saha

1.60

याम॒न्वैच्छद्ध॒विषा॑ वि॒श्वक॑र्मा॒न्तर॑र्ण॒वे रज॑सि॒ प्रवि॑ष्टाम्।
भु॒जि॒ष्यं॑१ पात्रं॒ निहि॑तं॒ गुहा॒ यदा॒विर्भोगे॑ अभवन्मातृ॒मद्भ्यः॑ ॥६०॥

Yamanvaichchhaddhavisha vishvakarmantararnave rajasi pravishtam
Bhujishyan1 patram nihitam guha yadavirbhoge abhavanmatrimadbhyah

1.61

त्वम॑स्या॒वप॑नी॒ जना॑ना॒मदि॑तिः काम॒दुघा॑ पप्रथा॒ना।
यत् त॑ ऊ॒नं तत् त॒ आ पू॑रयाति प्र॒जाप॑तिः प्रथम॒जा ऋ॒तस्य॑ ॥६१॥

Tvamasyavapani jananamaditih kamadugha paprathana
Yat ta unam tat ta a purayati prajapatih prathamaja ritasya

1.62

उ॒प॒स्थास्ते॑ अनमी॒वा अ॑य॒क्ष्मा अ॒स्मभ्यं॑ सन्तु पृथिवि॒ प्रसू॑ताः ।
दी॒र्घं न॒ आयुः॑ प्रति॒बुध्य॑माना व॒यं तुभ्यं॑ बलि॒हृतः॑ स्याम ॥६२॥

Upasthaste anamiva ayakshma asmabhyam santu prithivi prasutah
Dirgham na ayuh pratibudhyamana vayam tubhyam balihritah syama

1.63

भूमे॑ मात॒र्नि धे॑हि मा भ॒द्रया॒ सुप्र॑तिष्ठितम्।
सं॒वि॒दा॒ना दि॒वा क॑वे श्रि॒यां मा॑ धेहि॒ भूत्या॑म् ॥६३॥

Bhume matarni dhehi ma bhadraya supratishthitam
Sanvidana diva kave shriyam ma dhehi bhutyam