সূক্ত 6

6.1

পাপমোচনম্। ১-২৩ শন্তাতিঃ। চন্দ্রমাঃ, মন্ত্রোক্তাঃ। অনুষ্টুপ্, ২৩ বৃহতীগর্ভা।

অগ্নিং ব্রূমো বনস্পতীনোষধীরুত বীরুধঃ ।
ইন্দ্রং বৃহস্পতিং সূর্যং তে নো মুঞ্চন্ত্বংহসঃ ॥১॥

ব্রূমো রাজানং বরুণং মিত্রং বিষ্ণুমথো ভগম্।
অংশং বিবস্বন্তং ব্রূমস্তে নো মুঞ্চন্ত্বংহসঃ ॥২॥

ব্রূমো দেবং সবিতারং ধাতারমুত পূষণম্।
ত্বষ্টারমগ্রিয়ং ব্রূমস্তে নো মুঞ্চন্ত্বংহসঃ ॥৩॥

গন্ধর্বাপ্সরসো ব্রূমো অশ্বিনা ব্রহ্মণস্পতিম্।
অর্যমা নাম যো দেবস্তে নো মুঞ্চন্ত্বংহসঃ ॥৪॥

অহোরাত্রে ইদং ব্রূমঃ সূর্যাচন্দ্রমসাবুভা।
বিশ্বানাদিত্যান্ ব্রূমস্তে নো মুঞ্চন্ত্বংহসঃ ॥৫॥

বাতং ব্রূমঃ পর্জন্যমন্তরিক্ষমথো দিশঃ ।
আশাশ্চ সর্বা ব্রূমস্তে নো মুঞ্চন্ত্বংহসঃ ॥৬॥

মুঞ্চন্তু মা শপথ্যাঽদহোরাত্রে অথো উষাঃ ।
সোমো মা দেবো মুঞ্চতু যমাহুশ্চন্দ্রমা ইতি ॥৭॥

পার্থিবা দিব্যঃ পশব আরণ্যা উত যে মৃগাঃ ।
শকুন্তান্ পক্ষিণো ব্রূমস্তে নো মুঞ্চন্ত্বংহসঃ ॥৮॥

ভবাশর্বাবিদং ব্রূমো রুদ্রং পশুপতিশ্চ যঃ ।
ইষূর্যা এষাং সংবিদ্ম তা নঃ সন্তু সদা শিবাঃ ॥৯॥

দিবং ব্রূমো নক্ষত্রাণি ভূমিং যক্ষাণি পর্বতান্।
সমুদ্রা নদ্যোঽ বেশন্তাস্তে নো মুঞ্চন্ত্বংহসঃ ॥১০॥

সপ্তর্ষীন্ বা ইদং ব্রূমোঽপো দেবীঃ প্রজাপতিম্।
পিতৄন্ যমশ্রেষ্ঠান্ ব্রূমস্তে নো মুঞ্চন্ত্বংহসঃ ॥১১॥

যে দেবা দিবিষদো অন্তরিক্ষসদশ্চ যে।
পৃথিব্যাং শক্রা যে শ্রিতাস্তে নো মুঞ্চন্ত্বংহসঃ ॥১২॥

আদিত্যা রুদ্রা বসবো দিবি দেবা অথর্বাণঃ।
অঙ্গিরসো মনীষিণস্তে নো মুঞ্চন্ত্বংহসঃ ॥১৩॥

যজ্ঞং ব্রূমো যজমানমৃচঃ সামানি ভেষজা।
যজূংষি হোত্রা ব্রূমস্তে নো মুঞ্চন্ত্বংহসঃ ॥১৪॥

পঞ্চ রাজ্যানি বীরুধাং সোমশ্রেষ্ঠানি ব্রূমঃ ।
দর্ভো ভঙ্গো যবঃ সহস্তে নো মুঞ্চন্ত্বংহসঃ ॥১৫॥

অরায়ান্ ব্রূমো রক্ষাংসি সর্পান্ পুণ্যজনান্ পিতৃন্।
মৃত্যূনেকশতং ব্রূমস্তে নো মুঞ্চন্ত্বংহসঃ ॥১৬॥

ঋতূন্ ব্রূম ঋতুপতীনার্তবানুত হায়নান্।
সমাঃ সংবত্সরান্ মাসাংস্তে নো মুঞ্চন্ত্বংহসঃ ॥১৭॥

এত দেবা দক্ষিণতঃ পশ্চাৎ প্রাঞ্চ উদেত ।
পুরস্তাদুত্তরাচ্ছক্রা বিশ্বে দেবাঃ সমেত্য তে নো মুঞ্চন্ত্বংহসঃ ॥১৮॥

বিশ্বান্ দেবানিদং ব্রূমঃ সত্যসংধানৃতাবৃধঃ ।
বিশ্বাভিঃ পত্নীভিঃ সহ তে নো মুঞ্চন্ত্বংহসঃ ॥১৯॥

সর্বান্ দেবানিদং ব্রূমঃ সত্যসংধানৃতাবৃধঃ ।
সর্বাভিঃ পত্নীভিঃ সহ তে নো মুঞ্চন্ত্বংহসঃ ॥২০॥

ভূতং ব্রূমো ভূতপতিং ভূতানামুত যো বশী।
ভূতানি সর্বা সংগত্য তে নো মুঞ্চন্ত্বংহসঃ ॥২১॥

যা দেবীঃ পঞ্চ প্রদিশো যে দেবা দ্বাদশর্তবঃ ।
সংবত্সরস্য যে দংষ্ট্রাস্তে নঃ সন্তু সদা শিবাঃ ॥২২॥

যন্মাতলী রথক্রীতমমৃতং বেদ ভেষজম্।
তদিন্দ্রো অপ্সু প্রাবেশয়ৎ তদাপো দত্ত ভেষজম্ ॥২৩॥