Sukta 6

6.1

Papamochanam, 1-23 shantatih, chandramah, mantroktah, anushtup, 23 brihatigarbha

अ॒ग्निं ब्रू॑मो॒ वन॒स्पती॒नोष॑धीरु॒त वी॒रुधः॑ ।
इन्द्रं॒ बृह॒स्पतिं॒ सूर्यं॒ ते नो॑ मुञ्च॒न्त्वंह॑सः ॥१॥

Agnim brumo vanaspatinoshadhiruta virudhah
Indram brihaspatim suryam te no munchantvanhasah

6.2

ब्रू॒मो राजा॑नं॒ वरु॑णं मि॒त्रं विष्णु॒मथो॒ भग॑म्।
अंशं॒ विव॑स्वन्तं ब्रूम॒स्ते नो॑ मुञ्च॒न्त्वंह॑सः ॥२॥

Brumo rajanam varunam mitram vishnumatho bhagam
Ansham vivasvantam brumaste no munchantvanhasah

6.3

ब्रू॒मो दे॒वं स॑वि॒तारं॑ धा॒तार॑मु॒त पू॒षण॑म्।
त्वष्टा॑रमग्रि॒यं ब्रू॑म॒स्ते नो॑ मुञ्च॒न्त्वंह॑सः ॥३॥

Brumo devam savitaram dhataramuta pushanam
Tvashtaramagriyam brumaste no munchantvanhasah

6.4

ग॒न्ध॒र्वा॒प्स॒रसो॑ ब्रूमो अ॒श्विना॒ ब्रह्म॑ण॒स्पति॑म्।
अ॒र्य॒मा नाम॒ यो दे॒वस्ते नो॑ मुञ्च॒न्त्वंह॑सः ॥४॥

Gandharvapsaraso brumo ashvina brahmanaspatim
Aryama nama yo devaste no munchantvanhasah

6.5

अ॒हो॒रा॒त्रे इ॒दं ब्रू॑मः सूर्याचन्द्र॒मसा॑वु॒भा।
विश्वा॑नादि॒त्यान् ब्रू॑म॒स्ते नो॑ मुञ्च॒न्त्वंह॑सः ॥५॥

Ahoratre idam brumah suryachandramasavubha
Vishvanadityan brumaste no munchantvanhasah

6.6

वातं॑ ब्रूमः प॒र्जन्य॑म॒न्तरि॑क्ष॒मथो॒ दिशः॑ ।
आशा॑श्च॒ सर्वा॑ ब्रूम॒स्ते नो॑ मुञ्च॒न्त्वंह॑सः ॥६॥

Vatam brumah parjanyamantarikshamatho dishah
Ashashcha sarva brumaste no munchantvanhasah

6.7

मु॒ञ्चन्तु॑ मा शप॒थ्याऽदहोरा॒त्रे अथो॑ उ॒षाः ।
सोमो॑ मा दे॒वो मु॑ञ्चतु॒ यमा॒हुश्च॒न्द्रमा॒ इति॑ ॥७॥

Munchantu ma shapathyadahoratre atho ushah
Somo ma devo munchatu yamahushchandrama iti

6.8

पार्थि॑वा दि॒व्यः प॒शव॑ आर॒ण्या उ॒त ये मृ॒गाः ।
श॒कुन्ता॑न् प॒क्षिणो॑ ब्रूम॒स्ते नो॑ मुञ्च॒न्त्वंह॑सः ॥८॥

Parthiva divyah pashava aranya uta ye mrigah
Shakuntan pakshino brumaste no munchantvanhasah

6.9

भ॒वा॒श॒र्वावि॒दं ब्रू॑मो रु॒द्रं प॑शु॒पति॑श्च॒ यः ।
इषू॒र्या ए॑षां संवि॒द्म ता नः॑ सन्तु॒ सदा॑ शि॒वाः ॥९॥

Bhavasharvavidam brumo rudram pashupatishcha yah
Ishurya esham sanvidma ta nah santu sada shivah

6.10

दिवं॑ ब्रूमो॒ नक्ष॑त्राणि॒ भूमिं॑ य॒क्षाणि॒ पर्व॑तान्।
स॒मु॒द्रा न॒द्योऽ वेश॒न्तास्ते नो॑ मुञ्च॒न्त्वंह॑सः ॥१०॥

Divam brumo nakshatrani bhumim yakshani parvatan
Samudra nadyo veshantaste no munchantvanhasah

6.11

स॒प्त॒र्षीन् वा इ॒दं ब्रू॑मो॒ऽपो दे॒वीः प्र॒जाप॑तिम्।
पि॒तॄन् य॒मश्रे॑ष्ठान् ब्रूम॒स्ते नो॑ मुञ्च॒न्त्वंह॑सः ॥११॥

Saptarshin va idam brumopo devih prajapatim
Pitrin yamashreshthan brumaste no munchantvanhasah

6.12

ये दे॒वा दि॑वि॒षदो॑ अन्तरिक्ष॒सद॑श्च॒ ये।
पृ॒थि॒व्यां श॒क्रा ये श्रि॒तास्ते नो॑ मुञ्च॒न्त्वंह॑सः ॥१२॥

Ye deva divishado antarikshasadashcha ye
Prithivyam shakra ye shritaste no munchantvanhasah

6.13

आ॒दि॒त्या रु॒द्रा वस॑वो दि॒वि दे॒वा अथ॑र्वाणः।
अङ्गि॑रसो मनी॒षिण॒स्ते नो॑ मुञ्च॒न्त्वंह॑सः ॥१३॥

Aditya rudra vasavo divi deva atharvanah
Angiraso manishinaste no munchantvanhasah

6.14

य॒ज्ञं ब्रू॑मो॒ यज॑मान॒मृचः॒ सामा॑नि भेष॒जा।
यजूं॑षि॒ होत्रा॑ ब्रूम॒स्ते नो॑ मुञ्च॒न्त्वंह॑सः ॥१४॥

Yagyam brumo yajamanamrichah samani bheshaja
Yajunshi hotra brumaste no munchantvanhasah

6.15

पञ्च॑ रा॒ज्यानि॑ वी॒रुधां॒ सोम॑श्रेष्ठानि ब्रूमः ।
द॒र्भो भङ्गो यवः॒ सह॒स्ते नो॑ मुञ्च॒न्त्वंह॑सः ॥१५॥

Pancha rajyani virudham somashreshthani brumah
Darbho bhango yavah sahaste no munchantvanhasah

6.16

अ॒राया॑न् ब्रूमो॒ रक्षां॑सि स॒र्पान् पु॑ण्यज॒नान् पि॒तृन्।
मृ॒त्यूनेक॑शतं ब्रूम॒स्ते नो॑ मुञ्च॒न्त्वंह॑सः ॥१६॥

Arayan brumo rakshansi sarpan punyajanan pitrin
Mrityunekashatam brumaste no munchantvanhasah

6.17

ऋ॒तून् ब्रू॑म ऋतु॒पती॑नार्त॒वानु॒त हा॑य॒नान्।
समाः॑ संवत्स॒रान् मासां॒स्ते नो॑ मुञ्च॒न्त्वंह॑सः ॥१७॥

Ritun bruma ritupatinartavanuta hayanan
Samah sanvatsaran masanste no munchantvanhasah

6.18

एत॑ देवा दक्षिण॒तः प॒श्चात् प्राञ्च॑ उ॒देत॑ ।
पु॒रस्ता॑दुत्त॒राच्छ॒क्रा विश्वे॑ दे॒वाः स॒मेत्य॒ ते नो॑ मुञ्च॒न्त्वंह॑सः ॥१८॥

Eta deva dakshinatah pashchat prancha udeta
Purastaduttarachchhakra vishve devah sametya te no munchantvanhasah

6.19

विश्वा॑न् दे॒वानि॒दं ब्रू॑मः स॒त्यसं॑धानृता॒वृधः॑ ।
विश्वा॑भिः॒ पत्नी॑भिः स॒ह ते नो॑ मुञ्च॒न्त्वंह॑सः ॥१९॥

Vishvan devanidam brumah satyasandhanritavridhah
Vishvabhih patnibhih saha te no munchantvanhasah

6.20

सर्वा॑न् दे॒वानि॒दं ब्रू॑मः स॒त्यसं॑धानृता॒वृधः॑ ।
सर्वा॑भिः॒ पत्नी॑भिः स॒ह ते नो॑ मुञ्च॒न्त्वंह॑सः ॥२०॥

Sarvan devanidam brumah satyasandhanritavridhah
Sarvabhih patnibhih saha te no munchantvanhasah

6.21

भू॒तं ब्रू॑मो भूत॒पतिं॑ भू॒ताना॑मु॒त यो व॒शी।
भू॒तानि॒ सर्वा॑ सं॒गत्य॒ ते नो॑ मुञ्च॒न्त्वंह॑सः ॥२१॥

Bhutam brumo bhutapatim bhutanamuta yo vashi
Bhutani sarva sangatya te no munchantvanhasah

6.22

या दे॒वीः पञ्च॑ प्र॒दिशो॒ ये दे॒वा द्वाद॑श॒र्तवः॑ ।
सं॒व॒त्स॒रस्य॒ ये दंष्ट्रा॒स्ते नः॑ सन्तु॒ सदा॑ शि॒वाः ॥२२॥

Ya devih pancha pradisho ye deva dvadashartavah
Sanvatsarasya ye danshtraste nah santu sada shivah

6.23

यन्मात॑ली रथक्री॒तम॒मृतं॒ वेद॑ भेष॒जम्।
तदिन्द्रो॑ अ॒प्सु प्रावे॑शय॒त् तदापो॑ दत्त भेष॒जम् ॥२३॥

Yanmatali rathakritamamritam veda bheshajam
Tadindro apsu praveshayat tadapo datta bheshajam