সূক্ত 4

4.1

প্রাণঃ। ১-২৬ ভার্গবো বৈদর্ভিঃ। প্রাণঃ। অনুষ্টুপ্, ১ শঙ্কুমতী, ৮ পথ্যাপঙ্ক্তিঃ, ১৪ নিচৃৎ, ১৫ ভুরিক্, ২০ অনুষ্টুগর্ভা ত্রিষ্টুপ্, ২১ মধ্যেজ্যোতির্জগতী, ২২ ত্রিষ্টুপ্, ২৬ বৃহতীগর্ভা।

প্রাণায় নমো যস্য সর্বমিদং বশে ।
যো ভূতঃ সর্বস্যেশ্বরো যস্মিন্ত্সর্বং প্রতিষ্ঠিতম্ ॥১॥

4.2

নমস্তে প্রাণ ক্রন্দায় নমস্তে স্তনয়িত্নবে ।
নমস্তে প্রাণ বিদ্যুতে নমস্তে প্রাণ বর্ষতে ॥২॥

4.3

যৎ প্রাণ স্তনয়িত্নুনাভিক্রন্দত্যোষধীঃ ।
প্র বীয়ন্তে গর্ভান্ দধতেঽথো বহ্বীর্বি জায়ন্তে ॥৩॥

4.4

যৎ প্রাণ ঋতাবাগতেঽভিক্রন্দত্যোষধীঃ ।
সর্বং তদা প্র মোদতে যৎ কিং চ ভূম্যামধি ॥৪॥

4.5

যদা প্রাণো অভ্যবর্ষীদ্ বর্ষেণ পৃথিবীং মহীম্।
পশবস্তৎ প্র মোদন্তে মহো বৈ নো ভবিষ্যতি ॥৫॥

4.6

অভিবৃষ্টা ওষধয়ঃ প্রাণেন সমবাদিরন্।
আয়ুর্বৈ নঃ প্রাতীতরঃ সর্বা নঃ সুরভীরকঃ ॥৬॥

4.7

নমস্তে অস্ত্বায়তে নমো অস্তু পরায়তে।
নমস্তে প্রাণ তিষ্ঠত আসীনায়োত তে নমঃ ॥৭॥

4.8

নমস্তে প্রাণ প্রাণতে নমো অস্ত্বপানতে।
পরাচীনায় তে নমঃ প্রতীচীনায় তে নমঃ সর্বস্মৈ ত ইদং নমঃ ॥৮॥

4.9

যা তে প্রাণ প্রিয়া তনূর্যো তে প্রাণ প্রেয়সী ।
অথো যদ্ ভেষজং তব তস্য নো ধেহি জীবসে ॥৯॥

4.10

প্রাণঃ প্রজা অনু বস্তে পিতা পুত্রমিব প্রিয়ম্।
প্রাণো হ সর্বস্যেশ্বরো যচ্চ প্রাণতি যচ্চ ন ॥১০॥

4.11

প্রাণো মৃত্যুঃ প্রাণস্তক্মা প্রাণং দেবা উপাসতে ।
প্রাণো হ সত্যবাদিনমুত্তমে লোক আ দধৎ ॥১১॥

4.12

প্রাণো বিরাট্ প্রাণো দেষ্ট্রী প্রাণং সর্ব উপাসতে ।
প্রাণো হ সূর্যশ্চন্দ্রমাঃ প্রাণমাহুঃ প্রজাপতিম্ ॥১২॥

4.13

প্রাণাপানৌ ব্রীহিয়বাবনড্বান্ প্রাণ উচ্যতে ।
যবে হ প্রাণ আহিতোঽপানো ব্রীহিরুচ্যতে ॥১৩॥

4.14

অপানতি প্রাণতি পুরুষো গর্ভে অন্তরা।
যদা ত্বং প্রাণ জিন্বস্যথ স জায়তে পুনঃ ॥১৪॥

4.15

প্রাণমাহুর্মাতরিশ্বানং বাতো হ প্রাণ উচ্যতে ।
প্রাণে হ ভূতং ভব্যং চ প্রাণে সর্বং প্রতিষ্ঠিতম্ ॥১৫॥

4.16

আথর্বণীরাঙ্গিরসীর্দৈবীর্মনুষ্যজা উত।
ওষধয়ঃ প্র জায়ন্তে যদা ত্বং প্রাণ জিন্বসি ॥১৬॥

4.17

যদা প্রাণো অভ্যবর্ষীদ্ বর্ষেণ পৃথিবীং মহীম্।
ওষধয়ঃ প্র জায়ন্তেঽথো যাঃ কাশ্চ বীরুধঃ ॥১৭॥

4.18

যস্তে প্রাণেদং বেদ যস্মিংশ্চাসি প্রতিষ্ঠিতঃ ।
সর্বে তস্মৈ বলিং হরানমুষ্মিংল্লোক উত্তমে ॥১৮॥

4.19

যথা প্রাণ বলিহৃতস্তুভ্যং সর্বাঃ প্রজা ইমাঃ ।
এবা তস্মৈ বলিং হরান্ যস্ত্বা শৃণবৎ সুশ্রবঃ ॥১৯॥

4.20

অন্তর্গর্ভশ্চরতি দেবতাস্বাভূতো ভূতঃ স উ জায়তে পুনঃ ।
স ভূতো ভব্যং ভবিষ্যৎ পিতা পুত্রং প্র বিবেশা শচীভিঃ ॥২০॥

4.21

একং পাদং নোত্খিদতি সলিলাদ্ধংস উচ্চরন্।
যদঙ্গ স তমুত্খিদেন্নৈবাদ্য ন শ্বঃ স্যান্ন রাত্রী নাহঃ স্যান্ন ব্যুঽছেৎ কদা চন ॥২১॥

4.22

অষ্টাচক্রং বর্তত একনেমি সহস্রাক্ষরং প্র পুরো নি পশ্চা।
অর্ধেন বিশ্বং ভুবনং জজান যদস্যার্ধং কতমঃ স কেতুঃ ॥২২॥

4.23

যো অস্য বিশ্বজন্মন ঈশে বিশ্বস্য চেষ্টতঃ ।
অন্যেষু ক্ষিপ্রধন্বনে তস্মৈ প্রাণ নমোঽস্তু তে ॥২৩॥

4.24

যো অস্য সর্বজন্মন ঈশে সর্বস্য চেষ্টতঃ ।
অতন্দ্রো ব্রহ্মণা ধীরঃ প্রাণো মানু তিষ্ঠাতু ॥২৪॥

4.25

ঊর্ধ্বঃ সুপ্তেষু জাগার ননু তির্যঙ্ নি পদ্যতে ।
ন সুপ্তমস্য সুপ্তেষ্বনু শুশ্রাব কশ্চন ॥২৫॥

4.26

প্রাণ মা মৎ পর্যাবৃতো ন মদন্যো ভবিষ্যসি ।
অপাং গর্ভমিব জীবসে প্রাণ বধ্নামি ত্বা ময়ি ॥২৬॥