সূক্ত 8

8.1

জ্যেষ্ঠব্রহ্মবর্ণনম্। ১-৪৪ কুত্সঃ। আত্মা। ত্রিষ্টুপ্, ১ উপরিষ্টাদ্বিরাড্বৃহতী, ২ বৃহতীগর্ভানুষ্টুপ্, ৫ ভুরিগনুষ্টুপ্, ৬, ১৪, ১৯-২১, ২৩, ২৫, ২৯, ৩১-৩৪, ৩৭-৩৮, ৪১, ৪৩ অনুষ্টুপ্, ৭ পরাবৃহতী, ১০ অনুষ্টুব্গর্ভা, ১১ জগতী, ১২ পুরোবৃহতী ত্রিষ্টুব্গর্ভাঽঽর্ষী পঙ্ক্তিঃ, ১৫, ২৭ ভুরিগ্বৃহতী, ২২ পুর উষ্ণিক্, ২৬ দ্ব্যুষ্ণিগ্গর্ভানুষ্টুপ্, ৩০ ভুরিক্, ৩৯ বৃহতীগর্ভা, ৪২ বিরাড্ গায়ত্রী।

যো ভূতং চ ভব্যং চ সর্বং যশ্চাধিতিষ্ঠতি ।
স্ব১র্যস্য চ কেবলং তস্মৈ জ্যেষ্ঠায় ব্রহ্মণে নমঃ ॥১॥

8.2

স্কম্ভেনেমে বিষ্টভিতে দ্যৌশ্চ ভূমিশ্চ তিষ্ঠতঃ ।
স্কম্ভ ইদং সর্বমাত্মন্বদ্ যৎ প্রাণন্নিমিষচ্চ যৎ ॥২॥

8.3

তিস্রো হ প্রজা অত্যায়মায়ন্ ন্য১ন্যা অর্কমভিতোঽবিশন্ত ।
বৃহন্ হ তস্থৌ রজসো বিমানো হরিতো হরিণীরা বিবেশ ॥৩॥

8.4

দ্বাদশ প্রধয়শ্চক্রমেকং ত্রীণি নভ্যানি ক উ তচ্চিকেত ।
তত্রাহতাস্ত্রীণি শতানি শঙ্কবঃ ষষ্টিশ্চ খীলা অবিচাচলা যে ॥৪॥

8.5

ইদং সবিতর্বি জানীহি ষড্ যমা এক একজঃ ।
তস্মিন্ হাপিত্বমিছন্তে য এষামেক একজঃ ॥৫॥

8.6

আবিঃ সন্নিহিতং গুহা জরন্নাম মহৎ পদম্।
তত্রেদং সর্বমার্পিতমেজৎ প্রাণৎ প্রতিষ্ঠিতম্ ॥৬॥

8.7

একচক্রং বর্তত একনেমি সহস্রাক্ষরং প্র পুরো নি পশ্চা ।
অর্ধেন বিশ্বং ভুবনং জজান যদস্যার্ধং ক্ব১তদ্ বভূব ॥৭॥

8.8

পঞ্চবাহী বহত্যগ্রমেষাং প্রষ্টয়ো যুক্তা অনুসংবহন্তি ।
অয়াতমস্য দদৃশে ন যাতং পরং নেদীয়োঽবরং দবীয়ঃ ॥৮॥

8.9

তির্যগ্বিলশ্চমস ঊর্ধ্ববুধ্নস্তস্মিন্ যশো নিহিতং বিশ্বরূপম্।
তদাসত ঋষয়ঃ সপ্ত সাকং যে অস্য গোপা মহতো বভূবুঃ ॥৯॥

8.10

যা পুরস্তাদ্ যুজ্যতে যা চ পশ্চাদ্ যা বিশ্বতো যুজ্যতে যা চ সর্বতঃ ।
যয়া যজ্ঞঃ প্রাঙ্ তায়তে তাং ত্বা পৃছামি কতমা সর্চাম্ ॥১০॥

8.11

যদেজতি পততি যচ্চ তিষ্ঠতি প্রাণদপ্রাণন্নিমিষচ্চ যদ্ ভুবৎ।
তদ্ দাধার পৃথিবীং বিশ্বরূপং তৎ সংভূয় ভবত্যেকমেব ॥১১॥

8.12

অনন্তং বিততং পুরুত্রানন্তমন্তবচ্চা সমন্তে ।
তে নাকপালশ্চরতি বিচিন্বন্ বিদ্বান্ ভূতমুত ভব্যমস্য ॥১২॥

8.13

প্রজাপতিশ্চরতি গর্ভে অন্তরদৃশ্যমানো বহুধা বি জায়তে ।
অর্ধেন বিশ্বং ভুবনং জজান যদস্যার্ধং কতমঃ স কেতুঃ ॥১৩॥

8.14

ঊর্ধ্বং ভরন্তমুদকং কুম্ভেনেবোদহার্যঽম্।
পশ্যন্তি সর্বে চক্ষুষা ন সর্বে মনসা বিদুঃ ॥১৪॥

8.15

দূরে পূর্ণেন বসতি দূর ঊনেন হীয়তে ।
মহদ্ যক্ষং ভুবনস্য মধ্যে তস্মৈ বলিং রাষ্ট্রভৃতো ভরন্তি ॥১৫॥

8.16

যতঃ সূর্যঃ উদেত্যস্তং যত্র চ গচ্ছতি ।
তদেব মন্যেঽহং জ্যেষ্ঠং তদু নাত্যেতি কিং চন ॥১৬॥

8.17

যে অর্বাঙ্ মধ্য উত বা পুরাণং বেদং বিদ্বাংসমভিতো বদন্তি ।
আদিত্যমেব তে পরি বদন্তি সর্বে অগ্নিং দ্বিতীয়ং ত্রিবৃতং চ হংসম্ ॥১৭॥

8.18

সহস্রাহ্ণ্যং বিয়তাবস্য পক্ষৌ হরের্হংসস্য পততঃ স্বর্গম্।
স দেবান্ত্সর্বানুরস্যুপদদ্য সংপশ্যন্ যাতি ভুবনানি বিশ্বা ॥১৮॥

8.19

সত্যেনোর্ধ্বস্তপতি ব্রহ্মণার্বাঙ্ বি পশ্যতি ।
প্রাণেন তির্যঙ্ প্রাণতি যস্মিন্ জ্যেষ্ঠমধি শ্রিতম্ ॥১৯॥

8.20

যো বৈ তে বিদ্যাদরণী যাভ্যাং নির্মথ্যতে বসু ।
স বিদ্বান্ জ্যেষ্ঠং মন্যেত স বিদ্যাদ্ ব্রাহ্মণং মহৎ ॥২০॥

8.21

অপাদগ্রে সমভবৎ সো অগ্রে স্ব১রাভরৎ।
চতুষ্পাদ্ ভূত্বা ভোগ্যঃ সর্বমাদত্ত ভোজনম্ ॥২১॥

8.22

ভোগ্যো ভবদথো অন্নমদদ্ বহু।
যো দেবমুত্তরাবন্তমুপাসাতৈ সনাতনম্ ॥২২॥

8.23

সনাতনমেনমাহুরুতাদ্য স্যাৎ পুনর্ণবঃ ।
অহোরাত্রে প্র জায়েতে অন্যো অন্যস্য রূপয়োঃ ॥২৩॥

8.24

শতং সহস্রময়ুতং ন্যঽর্বুদমসংখ্যেয়ং স্বমস্মিন্ নিবিষ্টম্।
তদস্য ঘ্নন্ত্যভিপশ্যত এব তস্মাদ্ দেবো রোচত এষ এতৎ ॥২৪॥

8.25

বালাদেকমণীয়স্কমুতৈকং নেব দৃশ্যতে ।
ততঃ পরিষ্বজীয়সী দেবতা সা মম প্রিয়া ॥২৫॥

8.26

ইয়ং কল্যাণ্য১জরা মর্ত্যস্যামৃতা গৃহে।
যস্মৈ কৃতা শয়ে স যশ্চকার জজার সঃ ॥২৬॥

8.27

ত্বং স্ত্রী ত্বং পুমানসি ত্বং কুমার উত বা কুমারী॥
ত্বং জীর্ণো দণ্ডেন বঞ্চসি ত্বং জাতো ভবসি বিশ্বতোমুখঃ ॥২৭॥

8.28

উতৈষাং পিতোত বা পুত্র এষামুতৈষাং জ্যেষ্ঠ উত বা কনিষ্ঠঃ ।
একো হ দেবো মনসি প্রবিষ্টঃ প্রথমো জাতঃ স উ গর্ভে অন্তঃ ॥২৮॥

8.29

পূর্ণাৎ পূর্ণমুদচতি পূর্ণং পূর্ণেন সিচ্যতে ।
উতো তদদ্য বিদ্যাম যতস্তৎ পরিষিচ্যতে ॥২৯॥

8.30

এষা সনত্নী সনমেব জাতৈষা পুরাণী পরি সর্বং বভূব ।
মহী দেব্যু১ষসো বিভাতী সৈকেনৈকেন মিষতা বি চষ্টে ॥৩০॥

8.31

অবির্বৈ নাম দেবতর্তেনাস্তে পরীবৃতা ।
তস্যা রূপেণেমে বৃক্ষা হরিতা হরিতস্রজঃ ॥৩১॥

8.32

অন্তি সন্তং ন জহাত্যন্তি সন্তং ন পশ্যতি ।
দেবস্য পশ্য কাব্যং ন মমার ন জীর্যতি ॥৩২॥

8.33

অপূর্বেণেষিতা বাচস্তা বদন্তি যথায়থম্।
বদন্তীর্যত্র গচ্ছন্তি তদাহুর্ব্রাহ্মণং মহৎ ॥৩৩॥

8.34

যত্র দেবাশ্চ মনুষ্যাঽশ্চারা নাভাবিব শ্রিতাঃ ।
অপাং ত্বা পুষ্পং পৃচ্ছামি যত্র তন্মায়য়া হিতম্ ॥৩৪॥

8.35

যে ভির্বাত ইষিতঃ প্রবাতি যে দদন্তে পঞ্চ দিশঃ সধ্রীচীঃ ।
য আহুতিমত্যমন্যন্ত দেবা অপাং নেতারঃ কতমে ত আসন্ ॥৩৫॥

8.36

ইমামেষাং পৃথিবীং বস্ত একোঽন্তরিক্ষং পর্যেকো বভূব ।
দিবমেষাং দদতে যো বিধর্তা বিশ্বা আশাঃ প্রতি রক্ষন্ত্যেকে ॥৩৬॥

8.37

যো বিদ্যাৎ সূত্রং বিততং যস্মিন্নোতাঃ প্রজা ইমাঃ ।
সূত্রং সূত্রস্য যো বিদ্যাদ্ স বিদ্যাদ্ ব্রাহ্মণং মহৎ ॥৩৭॥

8.38

বেদাহং সূত্রং বিততং যস্মিন্নোতাঃ প্রজা ইমাঃ ।
সূত্রং সূত্রস্যাহং বেদাথো যদ্ ব্রাহ্মণং মহৎ ॥৩৮॥

8.39

যদন্তরা দ্যাবাপৃথিবী অগ্নিরৈৎ প্রদহন্ বিশ্বদাব্যঃ ।
যত্রাতিষ্ঠন্নেকপত্নীঃ পরস্তাৎ ক্বেঽবাসীন্মাতরিশ্বা তদানীম্ ॥৩৯॥

8.40

অপ্স্বাঽসীন্মাতরিশ্বা প্রবিষ্টঃ প্রবিষ্টা দেবাঃ সলিলান্যাসন্॥
বৃহন্ হ তস্থৌ রজসো বিমানঃ পবমানো হরিত আ বিবেশ ॥৪০॥

8.41

উত্তরেণেব গায়ত্রীমমৃতেঽধি বি চক্রমে ।
সাম্না যে সাম সংবিদুরজস্তদ্ দদৃশে ক্বঽ ॥৪১॥

8.42

নিবেশনঃ সংগমনো বসূনাং দেব ইব সবিতা সত্যধর্মা ।
ইন্দ্রো ন তস্থৌ সমরে ধনানাম্ ॥৪২॥

8.43

পুণ্ডরীকং নবদ্বারং ত্রিভির্গুণেভিরাবৃতম্।
তস্মিন্ যদ্ যক্ষমাত্মন্বৎ তদ্ বৈ ব্রহ্মবিদো বিদুঃ ॥৪৩॥

8.44

অকামো ধীরো অমৃতঃ স্বয়ংভূ রসেন তৃপ্তো ন কুতশ্চনোনঃ ।
তমেব বিদ্বান্ ন বিভায় মৃত্যোরাত্মানং ধীরমজরং যুবানম্ ॥৪৪॥