Sukta 8

8.1

Jyeshthabrahmavarnanam, 1-44 kutsah, atma, trishtup, 1 uparishtadviradbrihati, 2 brihatigarbhanushtup, 5 bhuriganushtup, 6, 14, 19-21, 23, 25, 29, 31-34, 37-38, 41, 43 anushtup, 7 parabrihati, 10 anushtubgarbha, 11 jagati, 12 purobrihati trishtubgarbharshi panktih, 15, 27 bhurigbrihati, 22 pura ushnik, 26 dvyushniggarbhanushtup, 30 bhurik, 39 brihatigarbha, 42 virad gayatri

यो भू॒तं च॒ भव्यं॑ च॒ सर्वं॒ यश्चा॑धि॒तिष्ठ॑ति ।
स्व॑१र्यस्य॑ च॒ केव॑लं॒ तस्मै॑ ज्ये॒ष्ठाय॒ ब्रह्म॑णे॒ नमः॑ ॥१॥

Yo bhutam cha bhavyam cha sarvam yashchadhitishthati
Sva1ryasya cha kevalam tasmai jyeshthaya brahmane namah

8.2

स्क॒म्भेने॒मे विष्ट॑भिते॒ द्यौश्च॒ भूमि॑श्च तिष्ठतः ।
स्क॒म्भ इ॒दं सर्व॑मात्म॒न्वद् यत् प्रा॒णन्नि॑मि॒षच्च॒ यत् ॥२॥

Skambheneme vishtabhite dyaushcha bhumishcha tishthatah
Skambha idam sarvamatmanvad yat pranannimishachcha yat

8.3

ति॒स्रो ह॑ प्र॒जा अ॑त्या॒यमा॑य॒न् न्य॑१न्या अ॒र्कम॒भितो॑ऽविशन्त ।
बृ॒हन् ह॑ तस्थौ॒ रज॑सो वि॒मानो॒ हरि॑तो॒ हरि॑णी॒रा वि॑वेश ॥३॥

Tisro ha praja atyayamayan nya1nya arkamabhitovishanta
Brihan ha tasthau rajaso vimano harito harinira vivesha

8.4

द्वाद॑श प्र॒धय॑श्च॒क्रमेकं॒ त्रीणि॒ नभ्या॑नि॒ क उ॒ तच्चि॑केत ।
तत्राह॑ता॒स्त्रीणि॑ श॒तानि॑ श॒ङ्कवः॑ ष॒ष्टिश्च॒ खीला॒ अवि॑चाचला॒ ये ॥४॥

Dvadasha pradhayashchakramekam trini nabhyani ka u tachchiketa
Tatrahatastrini shatani shankavah shashtishcha khila avichachala ye

8.5

इ॒दं स॑वित॒र्वि जा॑नीहि॒ षड् य॒मा एक॑ एक॒जः ।
तस्मि॑न् हापि॒त्वमि॑छन्ते॒ य ए॑षा॒मेक॑ एक॒जः ॥५॥

Idam savitarvi janihi shad yama eka ekajah
Tasmin hapitvamichhante ya eshameka ekajah

8.6

आ॒विः सन्निहि॑तं॒ गुहा॒ जर॒न्नाम॑ म॒हत् प॒दम्।
तत्रे॒दं सर्व॒मार्पि॑त॒मेज॑त् प्रा॒णत् प्रति॑ष्ठितम् ॥६॥

Avih sannihitam guha jarannama mahat padam
Tatredam sarvamarpitamejat pranat pratishthitam

8.7

एक॑चक्रं वर्तत॒ एक॑नेमि स॒हस्रा॑क्षरं॒ प्र पु॒रो नि प॒श्चा ।
अ॒र्धेन॒ विश्वं॒ भुव॑नं ज॒जान॒ यद॑स्या॒र्धं क्व॑१तद् ब॑भूव ॥७॥

Ekachakram vartata ekanemi sahasraksharam pra puro ni pashcha
Ardhena vishvam bhuvanam jajana yadasyardham kva1tad babhuva

8.8

प॒ञ्च॒वा॒ही व॑ह॒त्यग्र॑मेषां॒ प्रष्ट॑यो यु॒क्ता अ॑नु॒संव॑हन्ति ।
अया॑तमस्य ददृ॒शे न या॒तं परं॒ नेदी॒योऽव॑रं॒ दवी॑यः ॥८॥

Panchavahi vahatyagramesham prashtayo yukta anusanvahanti
Ayatamasya dadrishe na yatam param nediyovaram daviyah

8.9

ति॒र्यग्बि॑लश्चम॒स ऊ॒र्ध्वबु॑ध्न॒स्तस्मि॒न् यशो॒ निहि॑तं वि॒श्वरू॑पम्।
तदा॑सत॒ ऋष॑यः स॒प्त सा॒कं ये अ॒स्य गो॒पा म॑ह॒तो ब॑भू॒वुः ॥९॥

Tiryagbilashchamasa urdhvabudhnastasmin yasho nihitam vishvarupam
Tadasata rishayah sapta sakam ye asya gopa mahato babhuvuh

8.10

या पु॒रस्ता॑द् यु॒ज्यते॒ या च॑ प॒श्चाद् या वि॒श्वतो॑ यु॒ज्यते॒ या च॑ स॒र्वतः॑ ।
यया॑ य॒ज्ञः प्राङ् ता॒यते॒ तां त्वा॑ पृछामि कत॒मा सर्चाम् ॥१०॥

Ya purastad yujyate ya cha pashchad ya vishvato yujyate ya cha sarvatah
Yaya yagyah prang tayate tam tva prichhami katama sarcham

8.11

यदेज॑ति॒ पत॑ति॒ यच्च॒ तिष्ठ॑ति प्रा॒णदप्रा॑णन्निमि॒षच्च॒ यद् भुव॑त्।
तद् दा॑धार पृथि॒वीं वि॒श्वरू॑पं॒ तत् सं॒भूय॑ भ॒वत्येक॑मे॒व ॥११॥

Yadejati patati yachcha tishthati pranadapranannimishachcha yad bhuvat
Tad dadhara prithivim vishvarupam tat sambhuya bhavatyekameva

8.12

अ॒न॒न्तं वित॑तं पुरु॒त्रान॒न्तमन्त॑वच्चा॒ सम॑न्ते ।
ते ना॑कपा॒लश्च॑रति विचि॒न्वन् वि॒द्वान् भू॒तमु॒त भव्य॑मस्य ॥१२॥

Anantam vitatam purutranantamantavachcha samante
Te nakapalashcharati vichinvan vidvan bhutamuta bhavyamasya

8.13

प्र॒जाप॑तिश्चरति॒ गर्भे॑ अ॒न्तरदृ॑श्यमानो बहु॒धा वि जा॑यते ।
अ॒र्धेन॒ विश्वं॒ भुव॑नं ज॒जान॒ यद॑स्या॒र्धं क॑त॒मः स के॒तुः ॥१३॥

Prajapatishcharati garbhe antaradrishyamano bahudha vi jayate
Ardhena vishvam bhuvanam jajana yadasyardham katamah sa ketuh

8.14

ऊ॒र्ध्वं भर॑न्तमुद॒कं कु॒म्भेने॑वोदहा॒र्यऽम्।
पश्य॑न्ति॒ सर्वे॒ चक्षु॑षा॒ न सर्वे॒ मन॑सा विदुः ॥१४॥

Urdhvam bharantamudakam kumbhenevodaharyam
Pashyanti sarve chakshusha na sarve manasa viduh

8.15

दू॒रे पू॒र्णेन॑ वसति दू॒र ऊ॒नेन॑ हीयते ।
म॒हद् य॒क्षं भुव॑नस्य॒ मध्ये॒ तस्मै॑ ब॒लिं रा॑ष्ट्र॒भृतो॑ भरन्ति ॥१५॥

Dure purnena vasati dura unena hiyate
Mahad yaksham bhuvanasya madhye tasmai balim rashtrabhrito bharanti

8.16

यतः॒ सूर्यः॑ उ॒देत्यस्तं॒ यत्र॑ च॒ गच्छ॑ति ।
तदे॒व म॑न्ये॒ऽहं ज्ये॒ष्ठं तदु॒ नात्ये॑ति॒ किं च॒न ॥१६॥

Yatah suryah udetyastam yatra cha gachchhati
Tadeva manyeham jyeshtham tadu natyeti kim chana

8.17

ये अ॒र्वाङ् मध्य॑ उ॒त वा॑ पुरा॒णं वेदं॑ वि॒द्वांस॑म॒भितो॒ वद॑न्ति ।
आ॒दि॒त्यमे॒व ते परि॑ वदन्ति॒ सर्वे॑ अ॒ग्निं द्वि॒तीयं॑ त्रि॒वृतं॑ च हं॒सम् ॥१७॥

Ye arvang madhya uta va puranam vedam vidvansamabhito vadanti
Adityameva te pari vadanti sarve agnim dvitiyam trivritam cha hansam

8.18

स॒ह॒स्रा॒ह्ण्यं विय॑तावस्य प॒क्षौ हरे॑र्हं॒सस्य॒ पत॑तः स्व॒र्गम्।
स दे॒वान्त्सर्वा॒नुर॑स्युप॒दद्य॑ सं॒पश्य॑न् याति॒ भुव॑नानि॒ विश्वा॑ ॥१८॥

Sahasrahnyam viyatavasya pakshau harerhansasya patatah svargam
Sa devantsarvanurasyupadadya sampashyan yati bhuvanani vishva

8.19

स॒त्येनो॒र्ध्वस्त॑पति॒ ब्रह्म॑णा॒र्वाङ् वि प॑श्यति ।
प्रा॒णेन॑ ति॒र्यङ् प्राण॑ति॒ यस्मि॑न् ज्ये॒ष्ठमधि॑ श्रि॒तम् ॥१९॥

Satyenordhvastapati brahmanarvang vi pashyati
Pranena tiryang pranati yasmin jyeshthamadhi shritam

8.20

यो वै ते वि॒द्याद॒रणी॒ याभ्यां॑ निर्म॒थ्यते॒ वसु॑ ।
स वि॒द्वान् ज्ये॒ष्ठं म॑न्येत॒ स वि॑द्या॒द् ब्राह्म॑णं म॒हत् ॥२०॥

Yo vai te vidyadarani yabhyam nirmathyate vasu
Sa vidvan jyeshtham manyeta sa vidyad brahmanam mahat

8.21

अ॒पादग्रे॒ सम॑भव॒त् सो अग्रे॒ स्व॑१राभ॑रत्।
चतु॑ष्पाद् भू॒त्वा भोग्यः॒ सर्व॒माद॑त्त॒ भोज॑नम् ॥२१॥

Apadagre samabhavat so agre sva1rabharat
Chatushpad bhutva bhogyah sarvamadatta bhojanam

8.22

भोग्यो॑ भव॒दथो॒ अन्न॑मदद् ब॒हु।
यो दे॒वमु॑त्त॒राव॑न्तमु॒पासा॑तै सना॒तन॑म् ॥२२॥

Bhogyo bhavadatho annamadad bahu
Yo devamuttaravantamupasatai sanatanam

8.23

स॒ना॒तन॑मेनमाहुरु॒ताद्य स्या॒त् पुन॑र्णवः ।
अ॒हो॒रा॒त्रे प्र जा॑येते अ॒न्यो अ॒न्यस्य॑ रू॒पयोः॑ ॥२३॥

Sanatanamenamahurutadya syat punarnavah
Ahoratre pra jayete anyo anyasya rupayoh

8.24

श॒तं स॒हस्र॑म॒युतं॒ न्यऽर्बुदमसंख्ये॒यं स्वम॑स्मि॒न् निवि॑ष्टम्।
तद॑स्य घ्नन्त्यभि॒पश्य॑त ए॒व तस्मा॑द् दे॒वो रो॑चत ए॒ष ए॒तत् ॥२४॥

Shatam sahasramayutam nyarbudamasankhyeyam svamasmin nivishtam
Tadasya ghnantyabhipashyata eva tasmad devo rochata esha etat

8.25

बाला॒देक॑मणीय॒स्कमु॒तैकं॒ नेव॑ दृश्यते ।
ततः॒ परि॑ष्वजीयसी दे॒वता॒ सा मम॑ प्रि॒या ॥२५॥

Baladekamaniyaskamutaikam neva drishyate
Tatah parishvajiyasi devata sa mama priya

8.26

इ॒यं क॑ल्या॒ण्य॑१जरा॒ मर्त्य॑स्या॒मृता॑ गृ॒हे।
यस्मै॑ कृ॒ता शये॒ स यश्च॒कार॑ ज॒जार॒ सः ॥२६॥

Iyam kalyanya1jara martyasyamrita grihe
Yasmai krita shaye sa yashchakara jajara sah

8.27

त्वं स्त्री त्वं पुमा॑नसि॒ त्वं कु॑मा॒र उ॒त वा॑ कुमा॒री॥
त्वं जी॒र्णो द॒ण्डेन॑ वञ्चसि॒ त्वं जा॒तो भ॑वसि वि॒श्वतो॑मुखः ॥२७॥

Tvam stri tvam pumanasi tvam kumara uta va kumari
Tvam jirno dandena vanchasi tvam jato bhavasi vishvatomukhah

8.28

उ॒तैषां॑ पि॒तोत वा॑ पु॒त्र ए॑षामु॒तैषां॑ ज्ये॒ष्ठ उ॒त वा॑ कनि॒ष्ठः ।
एको॑ ह दे॒वो मन॑सि॒ प्रवि॑ष्टः प्रथ॒मो जा॒तः स उ॒ गर्भे॑ अ॒न्तः ॥२८॥

Utaisham pitota va putra eshamutaisham jyeshtha uta va kanishthah
Eko ha devo manasi pravishtah prathamo jatah sa u garbhe antah

8.29

पू॒र्णात् पू॒र्णमुद॑चति पू॒र्णं पू॒र्णेन॑ सिच्यते ।
उ॒तो तद॒द्य वि॑द्याम॒ यत॒स्तत् प॑रिषि॒च्यते॑ ॥२९॥

Purnat purnamudachati purnam purnena sichyate
Uto tadadya vidyama yatastat parishichyate

8.30

ए॒षा स॒नत्नी॒ सन॑मे॒व जा॒तैषा पु॑रा॒णी परि॒ सर्वं॑ बभूव ।
म॒ही दे॒व्यु॑१षसो॑ विभा॒ती सैके॑नैकेन मिष॒ता वि च॑ष्टे ॥३०॥

Esha sanatni sanameva jataisha purani pari sarvam babhuva
Mahi devyu1shaso vibhati saikenaikena mishata vi chashte

8.31

अवि॒र्वै नाम॑ दे॒वत॒र्तेना॑स्ते॒ परी॑वृता ।
तस्या॑ रू॒पेणे॒मे वृ॒क्षा हरि॑ता॒ हरि॑तस्रजः ॥३१॥

Avirvai nama devatartenaste parivrita
Tasya rupeneme vriksha harita haritasrajah

8.32

अन्ति॒ सन्तं॒ न ज॑हा॒त्यन्ति॒ सन्तं॒ न प॑श्यति ।
दे॒वस्य॑ पश्य॒ काव्यं॒ न म॑मार॒ न जी॑र्यति ॥३२॥

Anti santam na jahatyanti santam na pashyati
Devasya pashya kavyam na mamara na jiryati

8.33

अ॒पू॒र्वेणे॑षि॒ता वाच॒स्ता व॑दन्ति यथाय॒थम्।
वद॑न्ती॒र्यत्र गच्छ॑न्ति॒ तदा॑हु॒र्ब्राह्म॑णं म॒हत् ॥३३॥

Apurveneshita vachasta vadanti yathayatham
Vadantiryatra gachchhanti tadahurbrahmanam mahat

8.34

यत्र॑ दे॒वाश्च॑ मनु॒ष्याऽश्चा॒रा नाभा॑विव श्रि॒ताः ।
अ॒पां त्वा॒ पुष्पं॑ पृच्छामि॒ यत्र॒ तन्मा॒यया॑ हि॒तम् ॥३४॥

Yatra devashcha manushyashchara nabhaviva shritah
Apam tva pushpam prichchhami yatra tanmayaya hitam

8.35

ये भि॒र्वात॑ इषि॒तः प्र॒वाति॒ ये दद॑न्ते॒ पञ्च॒ दिशः॑ स॒ध्रीचीः॑ ।
य आहु॑तिम॒त्यम॑न्यन्त दे॒वा अ॒पां ने॒तारः॑ कत॒मे त आ॑सन् ॥३५॥

Ye bhirvata ishitah pravati ye dadante pancha dishah sadhrichih
Ya ahutimatyamanyanta deva apam netarah katame ta asan

8.36

इ॒मामे॑षां पृथि॒वीं वस्त॒ एको॒ऽन्तरि॑क्षं॒ पर्ये॑को॑ बभूव ।
दिव॑मेषां ददते॒ यो वि॑ध॒र्ता विश्वा॒ आशाः॒ प्रति॑ रक्ष॒न्त्येके॑ ॥३६॥

Imamesham prithivim vasta ekontariksham paryeko babhuva
Divamesham dadate yo vidharta vishva ashah prati rakshantyeke

8.37

यो वि॒द्यात् सूत्रं॒ वित॑तं॒ यस्मि॒न्नोताः॑ प्र॒जा इ॒माः ।
सूत्रं॒ सूत्र॑स्य॒ यो वि॒द्याद् स वि॑द्या॒द् ब्राह्म॑णं म॒हत् ॥३७॥

Yo vidyat sutram vitatam yasminnotah praja imah
Sutram sutrasya yo vidyad sa vidyad brahmanam mahat

8.38

वेदा॒हं सूत्रं॒ वित॑तं॒ यस्मि॒न्नोताः॑ प्र॒जा इ॒माः ।
सूत्रं॒ सूत्र॑स्या॒हं वे॒दाथो॒ यद् ब्राह्म॑णं म॒हत् ॥३८॥

Vedaham sutram vitatam yasminnotah praja imah
Sutram sutrasyaham vedatho yad brahmanam mahat

8.39

यद॑न्त॒रा द्यावा॑पृथि॒वी अ॒ग्निरैत् प्र॒दह॑न् विश्वदा॒व्यः ।
यत्राति॑ष्ठ॒न्नेक॑पत्नीः प॒रस्ता॒त् क्वेऽवासीन्मात॒रिश्वा॑ त॒दानी॑म् ॥३९॥

Yadantara dyavaprithivi agnirait pradahan vishvadavyah
Yatratishthannekapatnih parastat kvevasinmatarishva tadanim

8.40

अ॒प्स्वाऽसीन्मात॒रिश्वा॒ प्रवि॑ष्टः॒ प्रवि॑ष्टा दे॒वाः स॑लि॒लान्या॑सन्॥
बृ॒हन् ह॑ तस्थौ॒ रज॑सो वि॒मानः॒ पव॑मानो ह॒रित॒ आ वि॑वेश ॥४०॥

Apsvasinmatarishva pravishtah pravishta devah salilanyasan
Brihan ha tasthau rajaso vimanah pavamano harita a vivesha

8.41

उत्त॑रेणेव गाय॒त्रीम॒मृतेऽधि॒ वि च॑क्रमे ।
साम्ना॒ ये साम॑ संवि॒दुर॒जस्तद् द॑दृशे॒ क्वऽ ॥४१॥

Uttareneva gayatrimamritedhi vi chakrame
Samna ye sama sanvidurajastad dadrishe kva

8.42

नि॒वेश॑नः सं॒गम॑नो॒ वसू॑नां दे॒व इ॑व सवि॒ता स॒त्यध॑र्मा ।
इन्द्रो॒ न त॑स्थौ सम॒रे धना॑नाम् ॥४२॥

Niveshanah sangamano vasunam deva iva savita satyadharma
Indro na tasthau samare dhananam

8.43

पु॒ण्डरी॑कं॒ नव॑द्वारं त्रि॒भिर्गु॒णेभि॒रावृ॑तम्।
तस्मि॒न् यद् य॒क्षमा॑त्म॒न्वत् तद् वै ब्र॑ह्म॒विदो॑ विदुः ॥४३॥

Pundarikam navadvaram tribhirgunebhiravritam
Tasmin yad yakshamatmanvat tad vai brahmavido viduh

8.44

अ॒का॒मो धीरो॑ अ॒मृतः॑ स्वयं॒भू रसे॑न तृ॒प्तो न कुत॑श्च॒नोनः॑ ।
तमे॒व वि॒द्वान् न बि॑भाय मृ॒त्योरा॒त्मानं॒ धीर॑म॒जरं॒ युवा॑नम् ॥४४॥

Akamo dhiro amritah svayambhu rasena tripto na kutashchanonah
Tameva vidvan na bibhaya mrityoratmanam dhiramajaram yuvanam