Sukta 9

9.1

Shataudana gauh, 1-27 atharva, shataudana, anushtup, 1 trishtup, 12 pathyapanktih, 25 dvyushniggarbhanushtup, 26 panchapada brihatyanushtubushniggarbha jagati, 27 panchapadatijagatanushtabgarbha shakvari

अ॒घा॒य॒तामपि॑ नह्या॒ मुखा॑नि स॒पत्ने॑षु॒ वज्र॑मर्पयै॒तम्।
इन्द्रे॑ण द॒त्ता प्र॑थ॒मा श॒तौद॑ना भ्रातृव्य॒घ्नी यज॑मानस्य गा॒तुः ॥१॥

Aghayatamapi nahya mukhani sapatneshu vajramarpayaitam
Indrena datta prathama shataudana bhratrivyaghni yajamanasya gatuh

9.2

वेदि॑ष्टे॒ चर्म॑ भवतु ब॒र्हिर्लोमा॑नि॒ यानि॑ ते ।
ए॒षा त्वा॑ रश॒नाग्र॑भी॒द् ग्रावा॑ त्वै॒षोऽधि॑ नृत्यतु ॥२॥

Vedishte charma bhavatu barhirlomani yani te
Esha tva rashanagrabhid grava tvaishodhi nrityatu

9.3

बाला॑स्ते॒ प्रोक्ष॑णीः सन्तु जी॒ह्वा सं मा॑र्ष्ट्वघ्न्ये ।
शु॒द्धा त्वं य॒ज्ञिया॑ भू॒त्वा दिवं॒ प्रेहि॑ शतौदने ॥३॥

Balaste prokshanih santu jihva sam marshtvaghnye
Shuddha tvam yagyiya bhutva divam prehi shataudane

9.4

यः श॒तौद॑नां॒ पच॑ति काम॒प्रेण॒ स क॑ल्पते ।
प्री॒ता ह्यऽस्य॒र्त्विजः॒ सर्वे॒ यन्ति॑ यथाय॒थम् ॥४॥

Yah shataudanam pachati kamaprena sa kalpate
Prita hyasyartvijah sarve yanti yathayatham

9.5

स स्व॒र्गमा रो॑हति॒ यत्रा॒दस्त्रि॑दि॒वं दि॒वः ।
अ॒पू॒पना॑भिं कृ॒त्वा यो ददा॑ति श॒तौद॑नाम् ॥५॥

Sa svargama rohati yatradastridivam divah
Apupanabhim kritva yo dadati shataudanam

9.6

स तांल्लो॒कान्त्समा॑प्नोति॒ ये दि॒व्या ये च॒ पार्थि॑वाः ।
हिर॑ण्यज्योतिषं कृ॒त्वा यो ददा॑ति श॒तौद॑नाम् ॥६॥

Sa tanllokantsamapnoti ye divya ye cha parthivah
Hiranyajyotisham kritva yo dadati shataudanam

9.7

ये ते॑ देवि शमि॒तारः॑ प॒क्तारो॒ ये च॑ ते॒ जनाः॑ ।
ते त्वा॒ सर्वे॑ गोप्स्यन्ति॒ मैभ्यो॑ भैषीः शतौदने ॥७॥

Ye te devi shamitarah paktaro ye cha te janah
Te tva sarve gopsyanti maibhyo bhaishih shataudane

9.8

वस॑वस्त्वा दक्षिण॒त उ॑त्त॒रान्म॒रुत॑स्त्वा ।
आ॒दि॒त्याः प॒श्चाद् गो॑प्स्यन्ति॒ साग्नि॑ष्टो॒ममति॑ द्रव ॥८॥

Vasavastva dakshinata uttaranmarutastva
Adityah pashchad gopsyanti sagnishtomamati drava

9.9

दे॒वाः पि॒तरो॑ मनु॒ष्याऽ गन्धर्वाप्स॒रस॑श्च॒ ये।
ते त्वा॒ सर्वे॑ गोप्स्यन्ति॒ साति॑रा॒त्रमति॑ द्रव ॥९॥

Devah pitaro manushya gandharvapsarasashcha ye
Te tva sarve gopsyanti satiratramati drava

9.10

अ॒न्तरि॑क्षं॒ दिवं॒ भूमि॑मादि॒त्यान् म॒रुतो॒ दिशः॑ ।
लो॒कान्त्स सर्वा॑नाप्नोति॒ यो ददा॑ति श॒तौद॑नाम् ॥१०॥

Antariksham divam bhumimadityan maruto dishah
Lokantsa sarvanapnoti yo dadati shataudanam

9.11

घृ॒तं प्रो॒क्षन्ती॑ सु॒भगा॑ दे॒वी दे॒वान् ग॑मिष्यति ।
प॒क्तार॑मघ्न्ये॒ मा हिं॑सी॒र्दिवं॒ प्रेहि॑ शतौदने ॥११॥

Ghritam prokshanti subhaga devi devan gamishyati
Paktaramaghnye ma hinsirdivam prehi shataudane

9.12

ये दे॒वा दि॑वि॒षदो॑ अन्तरिक्ष॒सद॑श्च॒ ये ये चे॒मे भूम्या॒मधि॑ ।
तेभ्य॒स्त्वं धु॑क्ष्व सर्व॒दा क्षी॒रं स॒र्पिरथो॒ मधु॑ ॥१२॥

Ye deva divishado antarikshasadashcha ye ye cheme bhumyamadhi
Tebhyastvam dhukshva sarvada kshiram sarpiratho madhu

9.13

यत् ते॒ शिरो॒ यत् ते॒ मुखं॒ यौ कर्णौ॒ ये च॑ ते॒ हनू॑ ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१३॥

Yat te shiro yat te mukham yau karnau ye cha te hanu
Amiksham duhratam datre kshiram sarpiratho madhu

9.14

यौ त॒ ओष्ठौ॒ ये नासि॑के॒ ये शृङ्गे॒ ये च॒ तेऽक्षि॑णी ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१४॥

Yau ta oshthau ye nasike ye shringe ye cha tekshini
Amiksham duhratam datre kshiram sarpiratho madhu

9.15

यत् ते क्लो॒मा यद्धृद॑यं पुरी॒तत् स॒हक॑ण्ठिका ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१५॥

Yat te kloma yaddhridayam puritat sahakanthika
Amiksham duhratam datre kshiram sarpiratho madhu

9.16

यत् ते॒ यकृ॒द् ये मत॑स्ने यदा॒न्त्रं याश्च॑ ते॒ गुदाः॑ ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१६॥

Yat te yakrid ye matasne yadantram yashcha te gudah
Amiksham duhratam datre kshiram sarpiratho madhu

9.17

यस्ते॑ प्ला॒शिर्यो व॑नि॒ष्ठुर्यौ कु॒क्षी यच्च॒ चर्म॑ ते ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१७॥

Yaste plashiryo vanishthuryau kukshi yachcha charma te
Amiksham duhratam datre kshiram sarpiratho madhu

9.18

यत् ते॑ म॒ज्जा यदस्थि॒ यन्मां॒सं यच्च॒ लोहि॑तम्।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१८॥

Yat te majja yadasthi yanmansam yachcha lohitam
Amiksham duhratam datre kshiram sarpiratho madhu

9.19

यौ ते॑ बा॒हू ये दो॒षणी॒ यावंसौ॒ या च॑ ते क॒कुत्।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥१९॥

Yau te bahu ye doshani yavansau ya cha te kakut
Amiksham duhratam datre kshiram sarpiratho madhu

9.20

यास्ते॑ ग्री॒वा ये स्क॒न्धा याः पृ॒ष्टीर्याश्च॒ पर्श॑वः ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥२०॥

Yaste griva ye skandha yah prishtiryashcha parshavah
Amiksham duhratam datre kshiram sarpiratho madhu

9.21

यौ त॑ उ॒रू अ॑ष्ठी॒वन्तौ॒ ये श्रोणी॒ या च॑ ते भ॒सत्।
आ॑मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥२१॥

Yau ta uru ashthivantau ye shroni ya cha te bhasat
Amiksham duhratam datre kshiram sarpiratho madhu

9.22

यत् ते॒ पुच्छं॒ ये ते॒ बाला॒ यदूधो॒ ये च॑ ते॒ स्तनाः॑ ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥२२॥

Yat te puchchham ye te bala yadudho ye cha te stanah
Amiksham duhratam datre kshiram sarpiratho madhu

9.23

यास्ते॒ जङ्घाः॒ याः कुष्ठि॑का ऋ॒च्छरा॒ ये च॑ ते श॒फाः ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥२३॥

Yaste janghah yah kushthika richchhara ye cha te shaphah
Amiksham duhratam datre kshiram sarpiratho madhu

9.24

यत् ते॒ चर्म॑ शतौदने॒ यानि॒ लोमा॑न्यघ्न्ये ।
आ॒मिक्षां॑ दुह्रतां दा॒त्रे क्षी॒रं स॒र्पिरथो॒ मधु॑ ॥२४॥

Yat te charma shataudane yani lomanyaghnye
Amiksham duhratam datre kshiram sarpiratho madhu

9.25

क्रो॒डौ ते॑ स्तां पुरो॒डाशा॒वाज्ये॑ना॒भिघा॑रितौ ।
तौ प॒क्षौ दे॑वि कृ॒त्वा सा प॒क्तारं दिवं॑ वह ॥२५॥

Krodau te stam purodashavajyenabhigharitau
Tau pakshau devi kritva sa paktaram divam vaha

9.26

उ॒लूख॑ले॒ मुस॑ले॒ यश्च॒ चर्म॑णि यो वा॒ शूर्पे॑ तण्डु॒लः कणः॑ ।
यं वा॒ वातो॑ मात॒रिश्वा॒ पव॑मानो म॒माथा॒ग्निष्टद्धोता॒ सुहु॑तं कृणोतु ॥२६॥

Ulukhale musale yashcha charmani yo va shurpe tandulah kanah
Yam va vato matarishva pavamano mamathagnishtaddhota suhutam krinotu

9.27

अ॒पो दे॒वी र्मधु॑मतीर्घृत॒श्चुतो॑ ब्र॒ह्मणां॒ हस्ते॑षु प्रपृ॒थक् सा॑दयामि ।
यत् का॑म इ॒दम॑भिषि॒ञ्चामि॑ वो॒ऽहं तन्मे॒ सर्वं॒ सं प॑द्यतां व॒यं स्या॑म॒ पत॑यो रयी॒णाम् ॥२७॥

Apo devi rmadhumatirghritashchuto brahmanam hasteshu praprithak sadayami
Yat kama idamabhishinchami voham tanme sarvam sam padyatam vayam syama patayo rayinam