সূক্ত 7

7.1

সর্বাধারবর্ণনম্। ১-৪৪ অথর্বা। স্কম্ভঃ আত্মা বা। ত্রিষ্টুপ্, ১ বিরাড্ জগতী, ২, ৮ ভুরিক্, ৭, ১৩ পরোষ্ণিক্,১০, ১৪, ১৬, ১৮-১৯ উপরিষ্টাদ্ বৃহতী, ১১-১২, ১৫, ২০, ২২, ৩৯ উপরিষ্টাজ্জ্যোতির্জগতী, ১৭ ত্র্যবসানা ষট্-পদা জগতী, ২১ বৃহতীগর্ভানুষ্টুপ্, ২৩-৩০, ৩৭, ৪০ অনুষ্টুপ্ , ৩১ মধ্যেজ্যোতির্জগতী, ৩২, ৩৪, ৩৬ উপরিষ্টাদ্বিরাড্বৃহতী, ৩৩ পরাবিরাডনুষ্টুপ্, ৩৫ চতুষ্পদা জগতী, ৩৮, ৪২-৪৩ ত্রিষ্টুপ্, ৪১ আর্ষী ত্রিপদা গায়ত্রী, ৪৪ একা. আর্চ্যনুষ্টুপ্।

কস্মিন্নঙ্গে তপো অস্যাধি তিষ্ঠতি কস্মিন্নঙ্গ ঋতমস্যাধ্যাহিতম্।
ক্বঽ ব্রতং ক্বঽ শ্রদ্ধাস্য তিষ্ঠতি কস্মিন্নঙ্গে সত্যমস্য প্রতিষ্ঠিতম্ ॥১॥

7.2

কস্মাদঙ্গাদ্ দীপ্যতে অগ্নিরস্য কস্মাদঙ্গাৎ পবতে মাতরিশ্বা ।
কস্মাদঙ্গাদ্ বি মিমীতেঽধি চন্দ্রমা মহ স্কম্ভস্য মিমানো অঙ্গম্ ॥২॥

7.3

কস্মিন্নঙ্গে তিষ্ঠতি ভূমিরস্য কস্মিন্নঙ্গে তিষ্ঠত্যন্তরিক্ষম্।
কস্মিন্নঙ্গে তিষ্ঠত্যাহিতা দ্যৌঃ কস্মিন্নঙ্গে তিষ্ঠত্যুত্তরং দিবঃ ॥৩॥

7.4

ক্ব১ প্রেপ্সন্ দীপ্যত ঊর্ধ্বো অগ্নিঃ ক্ব১প্রেপ্সন্ পবতে মাতরিশ্বা ।
যত্র প্রেপ্সন্তীরভিয়ন্ত্যাবৃতঃ স্কম্ভং তং ব্রূহি কতমঃ স্বিদেব সঃ ॥৪॥

7.5

ক্বাঽর্ধমাসাঃ ক্বঽ যন্তি মাসাঃ সংবত্সরেণ সহ সংবিদানাঃ ।
যত্র যন্ত্যৃতবো যত্রার্তবাঃ স্কম্ভং তং ব্রূহি কতমঃ স্বিদেব সঃ ॥৫॥

7.6

ক্ব১প্রেপ্সন্তী যুবতী বিরূপে অহোরাত্রে দ্রবতঃ সংবিদানে।
যত্র প্রেপ্সন্তীরভিয়ন্ত্যাপঃ স্কম্ভং তং ব্রূহি কতমঃ স্বিদেব সঃ ॥৬॥

7.7

যস্মিন্ত্স্তব্ধ্বা প্রজাপতির্লোকান্ত্সর্বাঁ অধারয়ৎ।
স্কম্ভং তং ব্রূহি কতমঃ স্বিদেব সঃ ॥৭॥

7.8

যৎ পরমমবমং যচ্চ মধ্যমং প্রজাপতিঃ সসৃজে বিশ্বরূপম্।
কিয়তা স্কম্ভঃ প্র বিবেশ তত্র যন্ন প্রাবিশৎ কিয়ৎ তদ্ বভূব ॥৮॥

7.9

কিয়তা স্কম্ভঃ প্র বিবেশ ভূতং কিয়দ্ ভবিষ্যদন্বাশয়েঽস্য ।
একং যদঙ্গমকৃণোৎ সহস্রধা কিয়তা স্কম্ভঃ প্র বিবেশ তত্র ॥৯॥

7.10

যত্র লোকাংশ্চ কোশাংশ্চাপো ব্রহ্ম জনা বিদুঃ ।
অসচ্চ যত্র সচ্চান্ত স্কম্ভং তং ব্রূহি কতমঃ স্বিদেব সঃ ॥১০॥

7.11

যত্র তপঃ পরাক্রম্য ব্রতং ধারয়ত্যুত্তরম্।
ঋতং চ যত্র শ্রদ্ধা চাপো ব্রহ্ম সমাহিতাঃ স্কম্ভং তং ব্রূহি কতমঃ স্বিদেব সঃ ॥১১॥

7.12

যস্মিন্ ভূমিরন্তরিক্ষং দ্যৌর্যস্মিন্নধ্যাহিতা ।
যত্রাগ্নিশ্চন্দ্রমাঃ সূর্যো বাতস্তিষ্ঠন্ত্যার্পিতাঃ স্কম্ভং তং ব্রূহি কতমঃ স্বিদেব সঃ ॥১২॥

7.13

যস্য ত্রয়স্ত্রিংশদ্ দেবা অঙ্গে সর্বে সমাহিতাঃ ।
স্কম্ভং তং ব্রূহি কতমঃ স্বিদেব সঃ ॥১৩॥

7.14

যত্র ঋষয়ঃ প্রথমজা ঋচঃ সাম যজুর্মহী।
একর্ষির্যস্মিন্নার্পিতঃ স্কম্ভং তং ব্রূহি কতমঃ স্বিদেব সঃ ॥১৪॥

7.15

যত্রামৃতং চ মৃত্যুশ্চ পুরুষেঽধি সমাহিতে ।
সমুদ্রো যস্য নাড্যঃ১ পুরুষেঽধি সমাহিতাঃ স্কম্ভং তং ব্রূহি কতমঃ স্বিদেব সঃ ॥১৫॥

7.16

যস্য চতস্রঃ প্রদিশো নাড্য১স্তিষ্ঠন্তি প্রথমাঃ ।
যজ্ঞো যত্র পরাক্রান্তঃ স্কম্ভং তং ব্রূহি কতমঃ স্বিদেব সঃ ॥১৬॥

7.17

যে পুরুষে ব্রহ্ম বিদুস্তে বিদুঃ পরমেষ্ঠিনম্।
যো বেদ পরমেষ্ঠিনং যশ্চ বেদ প্রজাপতিম্।
জ্যেষ্ঠং যে ব্রাহ্মণং বিদুস্তে স্কম্ভমনুসংবিদুঃ ॥১৭॥

7.18

যস্য শিরো বৈশ্বানরশ্চক্ষুরঙ্গিরসোঽভবন্।
অঙ্গানি যস্য যাতবঃ স্কম্ভং তং ব্রূহি কতমঃ স্বিদেব সঃ ॥১৮॥

7.19

যস্য ব্রহ্ম মুখমাহুর্জিহ্বাং মধুকশামুত।
বিরাজমূধো যস্যাহুঃ স্কম্ভং তং ব্রূহি কতমঃ স্বিদেব সঃ ॥১৯॥

7.20

যস্মাদৃচো অপাতক্ষন্ যজুর্যস্মাদপাকষন্।
সামানি যস্য লোমান্যথর্বাঙ্গিরসো মুখং স্কম্ভং তং ব্রূহি কতমঃ স্বিদেব সঃ ॥২০॥

7.21

অসচ্ছাখাং প্রতিষ্ঠন্তীং পরমমিব জনা বিদুঃ ।
উতো সন্মন্যন্তেঽবরে যে তে শাখামুপাসতে ॥২১॥

7.22

যত্রাদিত্যাশ্চ রুদ্রাশ্চ বসবশ্চ সমাহিতাঃ ।
ভূতং চ যত্র ভব্যং চ সর্বে লোকাঃ প্রতিষ্ঠিতাঃ স্কম্ভং তং ব্রূহি কতমঃ স্বিদেব সঃ ॥২২॥

7.23

যস্য ত্রয়স্ত্রিংশদ্ দেবা নিধিং রক্ষন্তি সর্বদা।
নিধিং তমদ্য কো বেদ যং দেবা অভিরক্ষথ ॥২৩॥

7.24

যত্র দেবা ব্রহ্মবিদো ব্রহ্ম জ্যেষ্ঠমুপাসতে ।
যো বৈ তান্ বিদ্যাৎ প্রত্যক্ষং স ব্রহ্মা বেদিতা স্যাৎ ॥২৪॥

7.25

বৃহন্তো নাম তে দেবা যেঽসতঃ পরি জজ্ঞিরে।
একং তদঙ্গং স্কম্ভস্যাসদাহুঃ পরো জনাঃ ॥২৫॥

7.26

যত্র স্কম্ভঃ প্রজনয়ন্ পুরাণং ব্যবর্তয়ৎ।
একং তদঙ্গং স্কম্ভস্য পুরাণমনুসংবিদুঃ ॥২৬॥

7.27

যস্য ত্রয়স্ত্রিংশদ্ দেবা অঙ্গে গাত্রা বিভেজিরে।
তান্ বৈ ত্রয়স্ত্রিংশদ্ দেবানেকে ব্রহ্মবিদো বিদুঃ ॥২৭॥

7.28

হিরণ্যগর্ভং পরমমনত্যুদ্যং জনা বিদুঃ ।
স্কম্ভস্তদগ্রে প্রাসিঞ্চদ্ধিরণ্যং লোকে অন্তরা ॥২৮॥

7.29

স্কম্ভে লোকাঃ স্কম্ভে তপঃ স্কম্ভেঽধ্যৃতমাহিতম্।
স্কম্ভ ত্বা বেদ প্রত্যক্ষমিন্দ্রে সর্বং সমাহিতম্ ॥২৯॥

7.30

ইন্দ্রে লোকা ইন্দ্রে তপ ইন্দ্রেঽধ্যৃতমাহিতম্।
ইন্দ্রং ত্বা বেদ প্রত্যক্ষং স্কম্ভে সর্বং প্রতিষ্ঠিতম্ ॥৩০॥

7.31

নাম নাম্না জোহবীতি পুরা সূর্যাৎ পুরোষসঃ ।
যদজঃ প্রথমং সংবভূব স হ তৎ স্বরাজ্যমিয়ায় যস্মান্নান্যৎ পরমস্তি ভূতম্ ॥৩১॥

7.32

যস্য ভূমিঃ প্রমান্তরিক্ষমুতোদরম্।
দিবং যশ্চক্রে মূর্ধানং তস্মৈ জ্যেষ্ঠায় ব্রহ্মণে নমঃ ॥৩২॥

7.33

যস্য সূর্যশ্চক্ষুশ্চন্দ্রমাশ্চ পুনর্ণবঃ ।
অগ্নিং যশ্চক্র আস্যং তস্মৈ জ্যেষ্ঠায় ব্রহ্মণে নমঃ ॥৩৩॥

7.34

যস্য বাতঃ প্রাণাপানৌ চক্ষুরঙ্গিরসোঽভবন্।
দিশো যশ্চক্রে প্রজ্ঞানীস্তস্মৈ জ্যেষ্ঠায় ব্রহ্মণে নমঃ ॥৩৪॥

7.35

স্কম্ভো দাধার দ্যাবাপৃথিবী উভে ইমে স্কম্ভো দাধারোর্ব১ন্তরিক্ষম্।
স্কম্ভো দাধার প্রদিশঃ ষডুর্বীঃ স্কম্ভ ইদং বিশ্বং ভুবনমা বিবেশ ॥৩৫॥

7.36

যঃ শ্রমাৎ তপসো জাতো লোকান্ত্সর্বান্ত্সমানশে।
সোমং যশ্চক্রে কেবলং তস্মৈ জ্যেষ্ঠায় ব্রহ্মণে নমঃ ॥৩৬॥

7.37

কথং বাতো নেলয়তি কথং ন রমতে মনঃ ।
কিমাপঃ সত্যং প্রেপ্সন্তীর্নেলয়ন্তি কদা চন ॥৩৭॥

7.38

মহদ্ যক্ষং ভুবনস্য মধ্যে তপসি ক্রান্তং সলিলস্য পৃষ্ঠে।
তস্মিন্ছ্রয়ন্তে য উ কে চ দেবা বৃক্ষস্য স্কন্ধঃ পরিত ইব শাখাঃ ॥৩৮॥

7.39

যস্মৈ হস্তাভ্যাং পাদাভ্যাং বাচা শ্রোত্রেণ চক্ষুষা ।
যস্মৈ দেবাঃ সদা বলিং প্রয়চ্ছন্তি বিমিতেঽমিতং স্কম্ভং তং ব্রূহি কতমঃ স্বিদেব সঃ ॥৩৯॥

7.40

অপ তস্য হতং তমো ব্যাবৃত্তঃ স পাপ্মনা ।
সর্বাণি তস্মিন্ জ্যোতীংষি যানি ত্রীণি প্রজাপতৌ ॥৪০॥

7.41

যো বেতসং হিরণ্যয়ং তিষ্ঠন্তং সলিলে বেদ । স বৈ গুহ্যঃ প্রজাপতিঃ ॥৪১॥

7.42

তন্ত্রমেকে যুবতী বিরূপে অভ্যাক্রামং বয়তঃ ষণ্ময়ূখম্।
প্রান্যা তন্তূংস্তিরতে ধত্তে অন্যা নাপ বৃঞ্জাতে ন গমাতো অন্তম্ ॥৪২॥

7.43

তয়োরহং পরিনৃত্যন্ত্যোরিব ন বি জানামি যতরা পরস্তাৎ।
পুমানেনদ্ বয়ত্যুদ্গৃণন্তি পুমানেনদ্ বি জভারাধি নাকে ॥৪৩॥

7.44

ইমে ময়ূখা উপ তস্তভুর্দিবং সামানি চক্রুস্তসরাণি বাতবে ॥৪৪॥