UtshovAdhyaya 26
26.1
अ॒ग्निश्च॑ पृथि॒वी च॒ सन्न॑ते॒ ते मे॒ सं न॑मताम॒दो वा॒युश्चा॒न्तरि॑क्षं च॒ सन्न॑ते॒ ते मे॒ सं न॑मताम॒द
आ॑दि॒त्यश्च द्यौश्च॒ सन्न॑ते॒ ते मे॒ सं न॑मताम॒द आप॑श्च॒ वरु॑णश्च॒ सन्न॑ते॒ ते मे॒ सं न॑मताम॒दः ।
स॒प्त स॒ᳪसदो॑ अष्ट॒मी भू॑त॒साध॑नी । सका॑माँ॒२अध्व॑नस्कुरु सं॒ज्ञान॑मस्तु मे॒ऽमुना॑ ॥१॥
Agnishcha prithivi cha sannate te me sam namatamado vayushchantariksham cha sannate te me sam namatamada
Adityashcha dyaushcha sannate te me sam namatamada apashcha varunashcha sannate te me sam namatamadah
Sapta sansado ashtami bhutasadhani, sakaman2adhvanaskuru sangyanamastu memuna
26.2
यथे॒मां वाचं॑ कल्या॒णीमा॒वदा॑नि॒ जने॑भ्यः ।
ब्र॒ह्म॒रा॒ज॒न्या॒भ्याᳪ शू॒द्राय॒ चार्या॑य च॒ स्वाय॒ चार॑णाय च ।
प्रि॒यो दे॒वानां॒ दक्षि॑णायै दा॒तुरि॒ह भू॑यासम॒यं मे॒ काम॒ः समृ॑ध्यता॒मुप॑ मा॒दो न॑मतु ॥२॥
Yathemam vacham kalyanimavadani janebhyah
Brahmarajanyabhyam shudraya charyaya cha svaya charanaya cha
Priyo devanam dakshinayai daturiha bhuyasamayam me kamah samridhyatamupa mado namatu
26.3
बृह॑स्पते॒ अति॒ यद॒र्यो अर्हा॑द् द्यु॒मद्वि॒भाति॒ क्रतु॑म॒ज्जने॑षु ।
यद्दी॒दय॒च्छव॑स ऋतप्रजात॒ तद॒स्मासु॒ द्रवि॑णं धेहि चि॒त्रम् ।
उ॒प॒या॒मगृ॑हीतोऽसि॒ बृह॒स्पत॑ये त्वै॒ष ते॒ योनि॒र्बृह॒स्पत॑ये त्वा ॥३॥
Brihaspate ati yadaryo arhad dyumadvibhati kratumajjaneshu
Yaddidayachchhavasa ritaprajata tadasmasu dravinam dhehi chitram
Upayamagrihitosi brihaspataye tvaisha te yonirbrihaspataye tva
26.4
इन्द्र॒ गोम॑न्नि॒हा या॑हि॒ पिबा॒ सोम॑ᳪ शतक्रतो । वि॒द्यद्भि॒र्ग्राव॑भिः सु॒तम् ।
उ॒प॒या॒मगृ॑हीतो॒ऽसीन्द्रा॑य त्वा॒ गोम॑त ए॒ष ते॒ योनि॒रिन्द्रा॑य त्वा॒ गोम॑ते ॥४॥
Indra gomanniha yahi piba somam shatakrato, vidyadbhirgravabhih sutam
Upayamagrihitosindraya tva gomata esha te yonirindraya tva gomate
26.5
इन्द्रा या॑हि वृत्रह॒न्पिबा॒ सोम॑ᳪ शतक्रतो । गोम॑द्भि॒र्ग्राव॑भिः सु॒तम् ।
उ॒प॒या॒मगृ॑हीतो॒ऽसीन्द्रा॑य त्वा॒ गोम॑त ए॒ष ते॒ योनि॒रिन्द्रा॑य त्वा॒ गोम॑ते ॥५॥
Indra yahi vritrahanpiba somam shatakrato, gomadbhirgravabhih sutam
Upayamagrihitosindraya tva gomata esha te yonirindraya tva gomate
26.6
ऋ॒तावा॑नं वैश्वान॒रमृ॒तस्य॒ ज्योति॑ष॒स्पति॑म् । अज॑स्रं घ॒र्ममी॑महे ।
उ॒प॒या॒मगृ॑हीतोऽसि वैश्वान॒राय॑ त्वै॒ष ते॒ योनि॑र्वैश्वान॒राय॑ त्वा ॥६॥
Ritavanam vaishvanaramritasya jyotishaspatim, ajasram gharmamimahe
Upayamagrihitosi vaishvanaraya tvaisha te yonirvaishvanaraya tva
26.7
वै॒श्वा॒न॒रस्य॑ सुम॒तौ स्या॑म॒ राजा॒ हि कं॒ भुव॑नानामभि॒श्रीः ।
इ॒तो जा॒तो विश्व॑मि॒दं वि च॑ष्टे वैश्वान॒रो य॑तते॒ सूर्ये॑ण ।
उ॒प॒या॒मगृ॑हीतोऽसि वैश्वान॒राय॑ त्वै॒ष ते॒ योनि॑र्वैश्वान॒राय॑ त्वा ॥७॥
Vaishvanarasya sumatau syama raja hi kam bhuvananamabhishrih
Ito jato vishvamidam vi chashte vaishvanaro yatate suryena
Upayamagrihitosi vaishvanaraya tvaisha te yonirvaishvanaraya tva
26.8
वै॒श्वा॒न॒रो न ऊ॒तय॒ आ प्र या॑तु परा॒वत॑ः । अ॒ग्निरु॒क्थेन॒ वाह॑सा ।
उ॒प॒या॒मगृ॑हीतोऽसि वैश्वान॒राय॑ त्वै॒ष ते॒ योनि॑र्वैश्वान॒राय॑ त्वा ॥८॥
Vaishvanaro na utaya a pra yatu paravatah, agnirukthena vahasa
Upayamagrihitosi vaishvanaraya tvaisha te yonirvaishvanaraya tva
26.9
अ॒ग्निरृषि॒ः पव॑मान॒ः पाञ्च॑जन्यः पु॒रोहि॑तः । तमी॑महे महाग॒यम् ।
उ॒प॒या॒मगृ॑हीतोऽस्य॒ग्नये॑ त्वा॒ वर्च॑स ए॒ष ते॒ योनि॑र॒ग्नये॑ त्वा॒ वर्च॑से ॥९॥
Agnirrishih pavamanah panchajanyah purohitah, tamimahe mahagayam
Upayamagrihitosyagnaye tva varchasa esha te yoniragnaye tva varchase
26.10
म॒हाँ२ इन्द्रो॒ वज्र॑हस्तः षोड॒शी शर्म॑ यच्छतु । हन्तु॑ पा॒प्मानं॒ योऽस्मान्द्वेष्टि॑ ।।
उ॒प॒या॒मगृ॑हीतोऽसि महे॒न्द्राय॑ त्वै॒ष ते॒ योनि॑र्महे॒न्द्राय॑ त्वा ॥१०॥
Mahan2 indro vajrahastah shodashi sharma yachchhatu, hantu papmanam yosmandveshti
Upayamagrihitosi mahendraya tvaisha te yonirmahendraya tva
26.11
तं वो॑ द॒स्ममृ॑ती॒षहं॒ वसो॑र्मन्दा॒नमन्ध॑सः । अ॒भि व॒त्सं न स्वस॑रेषु धे॒नव॒ इन्द्रं॑ गी॒र्भिर्न॑वामहे ॥११॥
Tam vo dasmamritishaham vasormandanamandhasah, abhi vatsam na svasareshu dhenava indram girbhirnavamahe
26.12
यद्वाहि॑ष्ठं॒ तद॒ग्नये॑ बृ॒हद॑र्च विभावसो । महि॑षीव॒ त्वद्र॒यिस्त्वद्वाजा॒ उदी॑रते ॥१२॥
Yadvahishtham tadagnaye brihadarcha vibhavaso, mahishiva tvadrayistvadvaja udirate
26.13
एह्यू॒ षु ब्रवा॑णि॒ तेऽग्न॑ इ॒त्थेत॑रा॒ गिर॑ः । ए॒भिर्व॑र्धास॒ इन्दु॑भिः ॥१३॥
Ehyu shu bravani tegna itthetara girah, ebhirvardhasa indubhih
26.14
ऋ॒तव॑स्ते य॒ज्ञं वि त॑न्वन्तु॒ मासा॒ रक्ष॑न्तु ते॒ हवि॑ः ।
सं॒व॒त्स॒रस्ते॑ य॒ज्ञं द॑धातु नः प्र॒जां च॒ परि॑ पातु नः ॥१४॥
Ritavaste yagyam vi tanvantu masa rakshantu te havih
Sanvatsaraste yagyam dadhatu nah prajam cha pari patu nah
26.15
उ॒प॒ह्व॒रे गि॑री॒णाᳪ स॑ङ्ग॒मे च॑ न॒दी॒ना॑म् । धि॒या विप्रो॑ अजायत ॥१५॥
Upahvare girinam sangame cha nadinam, dhiya vipro ajayata
26.16
उ॒च्चा ते॑ जा॒तमन्ध॑सो दि॒वि सद्भूम्या द॑दे । उ॒ग्रᳪ शर्म॒ महि॒ श्रव॑ः ॥१६॥
Uchcha te jatamandhaso divi sadbhumya dade, ugram sharma mahi shravah
26.17
स न॒ इन्द्रा॑य॒ यज्य॑वे॒ वरु॑णाय म॒रुद्भ्य॑ः । व॒रि॒वो॒वित्परि॑ स्रव ॥१७॥
Sa na indraya yajyave varunaya marudbhyah, varivovitpari srava
26.18
ए॒ना विश्वा॑न्य॒र्य आ द्यु॒म्नानि॒ मानु॑षाणाम् । सिषा॑सन्तो वनामहे ॥१८॥
Ena vishvanyarya a dyumnani manushanam, sishasanto vanamahe
26.19
अनु॑ वीरै॒रनु॑ पुष्यास्म॒ गोभि॒रन्वश्वै॒रनु॒ सर्वे॑ण पु॒ष्टैः ।
अनु॒ द्विप॒दाऽनु॒ चतु॑ष्पदा व॒यं दे॒वा नो॑ य॒ज्ञमृ॑तु॒था न॑यन्तु ॥१९॥
Anu virairanu pushyasma gobhiranvashvairanu sarvena pushtaih
Anu dvipadanu chatushpada vayam deva no yagyamritutha nayantu
26.20
अग्ने॒ पत्नी॑रि॒हा व॑ह दे॒वाना॑मुश॒तीरुप॑ । त्वष्टा॑र॒ᳪ सोम॑पीतये ॥२०॥
Agne patniriha vaha devanamushatirupa, tvashtaram somapitaye
26.21
अ॒भि य॒ज्ञं गृ॑णीहि नो॒ ग्नावो॒ नेष्ट॒ः पिब॑ ऋ॒तुना॑ ।
त्वᳪ हि र॑त्न॒धा असि॑ ॥२१॥
Abhi yagyam grinihi no gnavo neshtah piba rituna
Tvam hi ratnadha asi
26.22
द्र॒वि॒णो॒दाः पि॑पीषति जु॒होत॒ प्र च॑ तिष्ठत । ने॒ष्ट्रादृ॒तुभि॑रिष्यत ॥२२॥
Dravinodah pipishati juhota pra cha tishthata, neshtradritubhirishyata
26.23
तवा॒यᳪ सोम॒स्त्वमेह्य॒र्वाड् श॑श्वत्त॒मᳪ सु॒मना॑ अ॒स्य पा॑हि ।
अ॒स्मिन् य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इन्दु॑मिन्द्र ॥२३॥
Tavayam somastvamehyarvad shashvattamam sumana asya pahi
Asmin yagye barhishya nishadya dadhishvemam jathara indumindra
26.24
अ॒मेव॑ नः सुहवा॒ आ हि गन्त॑न॒ नि ब॒र्हिषि॑ सदतना॒ रणि॑ष्टन ।
अथा॑ मन्दस्व जुजुषा॒णो अन्ध॑स॒स्त्वष्ट॑र्दे॒वेभि॒र्जनि॑भिः सु॒मद्ग॑णः ॥२४॥
Ameva nah suhava a hi gantana ni barhishi sadatana ranishtana
Atha mandasva jujushano andhasastvashtardevebhirjanibhih sumadganah
26.25
स्वादि॑ष्ठया॒ मदि॑ष्ठया॒ पव॑स्व सोम॒ धार॑या । इन्द्रा॑य॒ पात॑वे सु॒तः ॥२५॥
Svadishthaya madishthaya pavasva soma dharaya, indraya patave sutah
26.26
र॒क्षो॒हा वि॒श्वच॑र्षणिर॒भि योनि॒मयो॑हते । द्रोणे॑ स॒धस्थ॒मास॑दत् ॥२६॥
Rakshoha vishvacharshanirabhi yonimayohate, drone sadhasthamasadat