UtshovAdhyaya 25
25.1
शादं॑ द॒द्भिरव॑कां दन्तमूलै॒र्मृदं॒ बर्स्वै॑स्ते॒गान्दᳪष्ट्रा॑भ्या॒ᳪ सर॑स्वत्या अग्रजि॒ह्वं जि॒ह्वाया॑ उत्सा॒दम॑वक्र॒न्देन॒ तालु॒ वाज॒ᳪ हनु॑भ्याम॒प आ॒स्ये॒न॒ वृष॑णमा॒ण्डाभ्या॑मादि॒त्याँ श्मश्रु॑भि॒ः पन्था॑नं भ्रू॒भ्यां द्यावा॑पृथि॒वी वर्तो॑भ्यां वि॒द्युतं॑ क॒नीन॑काभ्याᳪ शु॒क्लाय॒ स्वाहा॑ कृ॒ष्णाय॒ स्वाहा॒ पार्या॑णि॒ पक्ष्मा॑ण्यवा॒र्या॒ इ॒क्षवो॑ऽवा॒र्या॒णि॒ पक्ष्मा॑णि॒ पार्या॑ इ॒क्षव॑ः ॥१॥
Shadam dadbhiravakam dantamulairmridam barsvaistegandanshtrabhyam sarasvatya agrajihvam jihvaya utsadamavakrandena talu vajam hanubhyamapa asyena vrishanamandabhyamadityam shmashrubhih panthanam bhrubhyam dyavaprithivi vartobhyam vidyutam kaninakabhyam shuklaya svaha krishnaya svaha paryani pakshmanyavarya ikshavovaryani pakshmani parya ikshavah
25.2
वातं॑ प्रा॒णेना॑पा॒नेन॒ नासि॑के उपया॒ममध॑रे॒णौष्ठे॑न॒ सदुत्त॑रेण प्रका॒शेनान्त॑रमनूका॒शेन॒ बाह्यं॑ निवे॒ष्यं मू॒र्ध्ना स्त॑नयि॒त्नुं नि॑र्बा॒धेना॒शनिं॑ म॒स्तिष्के॑ण वि॒द्युतं॑ क॒नीन॑काभ्यां॒ कर्णा॑भ्या॒ᳪ श्रोत्रँ॒ श्रोत्रा॑भ्यां॒ कर्णौ॑ तेद॒नीम॑धरक॒ण्ठेना॒पः शु॑ष्कक॒ण्ठेन॑ चि॒त्तं मन्या॑भि॒रदि॑तिᳪ शी॒र्ष्णा निरृ॑तिं॒ निर्ज॑र्जल्येन शी॒र्ष्णा सं॑क्रोशैः प्रा॒णान् रेष्माण॑ᳪ स्तु॒पेन॑ ॥२॥
Vatam pranenapanena nasike upayamamadharenaushthena saduttarena prakashenantaramanukashena bahyam niveshyam murdhna stanayitnum nirbadhenashanim mastishkena vidyutam kaninakabhyam karnabhyam shrotram shrotrabhyam karnau tedanimadharakanthenapah shushkakanthena chittam manyabhiraditim shirshna nirritim nirjarjalyena shirshna sankroshaih pranan reshmanam stupena
25.3
म॒शका॒न् केशै॒रिन्द्र॒ᳪ स्वप॑सा॒ वहे॑न॒ बृह॒स्पति॑ᳪ शकुनिसा॒देन॑ कू॒र्माञ्छ॒फैरा॒क्रम॑णᳪ स्थू॒राभ्या॑मृ॒क्षला॑भिः क॒पिञ्ज॑लाञ्ज॒वं जङ्घा॑भ्या॒मध्वा॑नं बा॒हुभ्यां॒ जाम्बी॑ले॒नार॑ण्यम॒ग्निम॑ति॒रुग्भ्यां॑ पू॒षणं॑ दो॒र्भ्याम॒श्विना॒वᳪसा॑भ्याᳪ रु॒द्रᳪ रोरा॑भ्याम् ॥३॥
Mashakan keshairindram svapasa vahena brihaspatim shakunisadena kurmanchhaphairakramanam sthurabhyamrikshalabhih kapinjalanjavam janghabhyamadhvanam bahubhyam jambilenaranyamagnimatirugbhyam pushanam dorbhyamashvinavansabhyam rudram rorabhyam
25.4
अ॒ग्नेः प॑क्ष॒तिर्वा॒योर्निप॑क्षति॒रिन्द्र॑स्य तृ॒तीया॒ सोम॑स्य चतु॒र्थ्यदि॑त्यै पञ्च॒मीन्द्रा॒ण्यै ष॒ष्ठी म॒रुता॑ᳪ सप्त॒मी बृह॒स्पते॑रष्ट॒म्य॒र्य॒म्णो न॑व॒मी धा॒तुर्द॑श॒मीन्द्र॑स्यैकाद॒शी वरु॑णस्य द्वाद॒शी य॒मस्य॑ त्रयोद॒शी ॥४॥
Agneh pakshatirvayornipakshatirindrasya tritiya somasya chaturthyadityai panchamindranyai shashthi marutam saptami brihaspaterashtamyaryamno navami dhaturdashamindrasyaikadashi varunasya dvadashi yamasya trayodashi
25.5
इ॒न्द्रा॒ग्न्योः प॑क्ष॒तिः सर॑स्वत्यै॒ निप॑क्षतिर्मि॒त्रस्य॑ तृ॒तीया॒पां च॑तु॒र्थी निरृ॑त्यै पञ्च॒म्यग्नीषोम॑योः ष॒ष्ठी स॒र्पाणा॑ᳪ सप्त॒मी विष्णो॑रष्ट॒मी पू॒ष्णो न॑व॒मी त्वष्टु॑र्दश॒मीन्द्र॑स्यैकाद॒शी वरु॑णस्य द्वाद॒शी य॒म्यै त्र॑योद॒शी द्यावा॑पृथि॒व्योर्दक्षि॑णं पा॒र्श्वं विश्वे॑षां दे॒वाना॒मुत्त॑रम् ॥५॥
Indragnyoh pakshatih sarasvatyai nipakshatirmitrasya tritiyapam chaturthi nirrityai panchamyagnishomayoh shashthi sarpanam saptami vishnorashtami pushno navami tvashturdashamindrasyaikadashi varunasya dvadashi yamyai trayodashi dyavaprithivyordakshinam parshvam vishvesham devanamuttaram
25.6
म॒रुता॑ᳪ स्कन्धा॒ विश्वे॑षां दे॒वानां॑ प्रथ॒मा कीक॑सा रु॒द्राणां॑ द्वि॒तीया॑ऽऽदि॒त्यानां॑ तृ॒तीया॑ वा॒योः पुच्छ॑म॒ग्नीषोम॑यो॒र्भास॑दौ॒ क्रुञ्चौ॒ श्रोणि॑भ्या॒मिन्द्रा॒बृह॒स्पती॑ ऊ॒रुभ्यां॑ मि॒त्रावरु॑णाव॒ल्गाभ्या॑मा॒क्रम॑णᳪ स्थू॒राभ्यां॒ बलं॒ कुष्ठा॑भ्याम् ॥६॥
Marutam skandha vishvesham devanam prathama kikasa rudranam dvitiyadityanam tritiya vayoh puchchhamagnishomayorbhasadau krunchau shronibhyamindrabrihaspati urubhyam mitravarunavalgabhyamakramanam sthurabhyam balam kushthabhyam
25.7
पू॒षणं॑ वनि॒ष्ठुना॑ऽन्धा॒हीन्त्स्थू॑लगु॒दया॑ स॒र्पान्गुदा॑भिर्वि॒ह्रुत॑ आ॒न्त्रैर॒पो व॒स्तिना॒ वृष॑णमा॒ण्डाभ्यां॒ वाजि॑न॒ᳪ शेपे॑न प्र॒जाᳪ रेत॑सा॒ चाषा॑न् पि॒त्तेन॑ प्रद॒रान् पा॒युना॑ कू॒श्माञ्छ॑कपिण्डैः ॥७॥
Pushanam vanishthunandhahintsthulagudaya sarpangudabhirvihruta antrairapo vastina vrishanamandabhyam vajinam shepena prajam retasa chashan pittena pradaran payuna kushmanchhakapindaih
25.8
इन्द्र॑स्य क्री॒डोऽदि॑त्यै पाज॒स्यं॒ दि॒शां ज॒त्रवोऽदि॑त्यै भ॒सज्जी॒मूता॑न् हृदयौप॒शेना॒न्तरि॑क्षं पुरी॒तता॒ नभ॑ उद॒र्ये॒ण चक्रवा॒कौ मत॑स्नाभ्यां॒ दिवं॑ वृ॒क्काभ्यां॑ गि॒रीन् प्ला॒शिभि॒रुप॑लान् प्ली॒ह्ना व॒ल्मीका॑न् क्लो॒मभि॑र्ग्लौ॒भिर्गुल्मा॑न् हि॒राभि॒ः स्रव॑न्तीर्ह्र॒दान् कु॒क्षिभ्या॑ᳪ समु॒द्रमु॒दरे॑ण वैश्वान॒रं भस्म॑ना ॥८॥
Indrasya kridodityai pajasyam disham jatravodityai bhasajjimutan hridayaupashenantariksham puritata nabha udaryena chakravakau matasnabhyam divam vrikkabhyam girin plashibhirupalan plihna valmikan klomabhirglaubhirgulman hirabhih sravantirhradan kukshibhyam samudramudarena vaishvanaram bhasmana
25.9
विधृ॑तिं॒ नाभ्या॑ धृ॒तᳪ रसे॑ना॒पो यू॒ष्णा मरी॑चीर्वि॒प्रुड्भि॑र्नीहा॒रमू॒ष्मणा॑ शी॒नं वस॑या॒ प्रुष्वा॒ अश्रु॑भिर्ह्रा॒दुनी॑र्दू॒षीका॑भिर॒स्ना रक्षा॑ᳪसि चि॒त्राण्यङ्गै॒र्नक्ष॑त्राणि रू॒पेण॑ पृथि॒वीं त्व॒चा जु॑म्ब॒काय॒ स्वाहा॑ ॥९॥
Vidhritim nabhya dhritam rasenapo yushna marichirviprudbhirniharamushmana shinam vasaya prushva ashrubhirhradunirdushikabhirasna rakshansi chitranyangairnakshatrani rupena prithivim tvacha jumbakaya svaha
25.10
हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् ।
स दा॑धार पृथि॒वीं द्यामु॒तेमां कस्मै॑ दे॒वाय॑ ह॒विषा॑ विधेम ॥१०॥
Hiranyagarbhah samavartatagre bhutasya jatah patireka asit
Sa dadhara prithivim dyamutemam kasmai devaya havisha vidhema
25.11
यः प्रा॑ण॒तो नि॑मिष॒तो म॑हित्वैक॒ इद्राजा॒ जग॑तो ब॒भूव॑ ।
य ईशे॑ अ॒स्य द्वि॒पद॒श्चतु॑ष्पद॒ः कस्मै॑ दे॒वाय॑ ह॒विषा॑ विधेम ॥११॥
Yah pranato nimishato mahitvaika idraja jagato babhuva
Ya ishe asya dvipadashchatushpadah kasmai devaya havisha vidhema
25.12
यस्ये॒मे हि॒मव॑न्तो महि॒त्वा यस्य॑ समु॒द्रᳪ र॒सया॑ स॒हाहुः ।
यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम ॥१२॥
Yasyeme himavanto mahitva yasya samudram rasaya sahahuh
Yasyemah pradisho yasya bahu kasmai devaya havisha vidhema
25.13
य आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ॥१३॥
Ya atmada balada yasya vishva upasate prashisham yasya devah
Yasya chhayamritam yasya mrityuh kasmai devaya havisha vidhema
25.14
आ नो॑ भ॒द्राः क्रत॑वो यन्तु वि॒श्वतोऽद॑ब्धासो॒ अप॑रीतास उ॒द्भिद॑ः ।
दे॒वा नो॒ यथा॒ सद॒मिद् वृ॒धे अस॒न्नप्रा॑युवो रक्षि॒तारो॑ दि॒वे – दि॑वे ॥१४॥
A no bhadrah kratavo yantu vishvatodabdhaso aparitasa udbhidah
Deva no yatha sadamid vridhe asannaprayuvo rakshitaro dive – dive
25.15
दे॒वानां॑ भ॒द्रा सु॑म॒तिरृ॑जूय॒तां दे॒वाना॑ᳪ रा॒तिर॒भि नो॒ निव॑र्तताम् ।
दे॒वाना॑ᳪ स॒ख्यमुप॑सेदिमा व॒यं दे॒वा न॒ आयु॒ः प्रति॑रन्तु जी॒वसे॑ ॥१५॥
Devanam bhadra sumatirrijuyatam devanam ratirabhi no nivartatam
Devanam sakhyamupasedima vayam deva na ayuh pratirantu jivase
25.16
तान्पूर्व॑या नि॒विदा॑ हूमहे व॒यं भगं॑ मि॒त्रमदि॑तिं॒ दक्ष॑म॒स्रिध॑म् ।
अ॒र्य॒मणं॒ वरु॑ण॒ᳪ सोम॑म॒श्विना॒ सर॑स्वती नः सु॒भगा॒ मय॑स्करत् ॥१६॥
Tanpurvaya nivida humahe vayam bhagam mitramaditim dakshamasridham
Aryamanam varunam somamashvina sarasvati nah subhaga mayaskarat
25.17
तन्नो॒ वातो॑ मयो॒भु वा॑तु भेष॒जं तन्मा॒ता पृ॑थि॒वी तत्पि॒ता द्यौ॑ः ।
तद् ग्रावा॑णः सोम॒सुतो॑ मयो॒भुव॒स्तद॑श्विना शृणुतं धिष्ण्या यु॒वम् ॥१७॥
Tanno vato mayobhu vatu bheshajam tanmata prithivi tatpita dyauh
Tad gravanah somasuto mayobhuvastadashvina shrinutam dhishnya yuvam
25.18
तमीशा॑नं॒ जग॑तस्त॒स्थुष॒स्पतिं॑ धियञ्जि॒न्वमव॑से हूमहे व॒यम् ।
पू॒षा नो॒ यथा॒ वेद॑सा॒मस॑द् वृ॒धे र॑क्षि॒ता पा॒युरद॑ब्धः स्व॒स्तये॑ ॥१८॥
Tamishanam jagatastasthushaspatim dhiyanjinvamavase humahe vayam
Pusha no yatha vedasamasad vridhe rakshita payuradabdhah svastaye
25.19
स्व॒स्ति न॒ इन्द्रो॑ वृ॒द्धश्र॑वाः स्व॒स्ति न॑ः पू॒षा वि॒श्ववे॑दाः ।
स्व॒स्ति न॒स्तार्क्ष्यो॒ अरि॑ष्टनेमिः स्व॒स्ति नो॒ बृह॒स्पति॑र्दधातु ॥१९॥
Svasti na indro vriddhashravah svasti nah pusha vishvavedah
Svasti nastarkshyo arishtanemih svasti no brihaspatirdadhatu
25.20
पृष॑दश्वा म॒रुत॒ः पृश्नि॑मातरः शुभं॒यावा॑नो वि॒दथे॑षु॒ जग्म॑यः ।
अ॒ग्नि॒जि॒ह्वा मन॑व॒ः सूर॑चक्षसो॒ विश्वे॑ नो दे॒वा अव॒साग॑मन्नि॒ह ॥२०॥
Prishadashva marutah prishnimatarah shubhanyavano vidatheshu jagmayah
Agnijihva manavah surachakshaso vishve no deva avasagamanniha
25.21
भ॒द्रं कर्णे॑भिः शृणुयाम देवा भ॒द्रं प॑श्येमा॒क्षभि॑र्यजत्राः ।
स्थि॒रैरङ्गै॑स्तुष्टु॒वाᳪस॑स्त॒नूभि॒र्व्य॒शेमहि दे॒वहि॑तं॒ यदायु॑ः ॥२१॥
Bhadram karnebhih shrinuyama deva bhadram pashyemakshabhiryajatrah
Sthirairangaistushtuvansastanubhirvyashemahi devahitam yadayuh
25.22
श॒तमिन्नु श॒रदो॒ अन्ति॑ देवा॒ यत्रा॑ नश्च॒क्रा ज॒रसं॑ त॒नूना॑म् ।
पु॒त्रासो॒ यत्र॑ पि॒तरो॒ भव॑न्ति॒ मा नो॑ म॒ध्या री॑रिष॒तायु॒र्गन्तो॑ः ॥२२॥
Shataminnu sharado anti deva yatra nashchakra jarasam tanunam
Putraso yatra pitaro bhavanti ma no madhya ririshatayurgantoh
25.23
अदि॑तिर्द्यौ॒रदि॑तिर॒न्तरि॑क्ष॒मदि॑तिर्मा॒ता स पि॒ता स पु॒त्रः ।
विश्वे॑ दे॒वा अदि॑ति॒ः पञ्च॒ जना॒ अदि॑तिर्जा॒तमदि॑ति॒र्जनि॑त्वम् ॥२३॥
Aditirdyauraditirantarikshamaditirmata sa pita sa putrah
Vishve deva aditih pancha jana aditirjatamaditirjanitvam
25.24
मा नो॑ मि॒त्रो वरु॑णो अर्य॒मायुरिन्द्र॑ ऋभु॒क्षा म॒रुत॒ः परि॑ ख्यन् ।
यद्वा॒जिनो॑ दे॒वजा॑तस्य॒ सप्ते॑ः प्रव॒क्ष्यामो॑ वि॒दथे॑ वी॒र्या॒णि ॥२४॥
Ma no mitro varuno aryamayurindra ribhuksha marutah pari khyan
Yadvajino devajatasya sapteh pravakshyamo vidathe viryani
25.25
यन्नि॒र्णिजा॒ रेक्ण॑सा॒ प्रावृ॑तस्य रा॒तिं गृ॑भी॒तां मु॑ख॒तो नय॑न्ति ।
सुप्रा॑ङ॒जो मेम्य॑द्वि॒श्वरू॑प इन्द्रापू॒ष्णोः प्रि॒यमप्ये॑ति॒ पाथ॑ः ॥२५॥
Yannirnija reknasa pravritasya ratim gribhitam mukhato nayanti
Suprangajo memyadvishvarupa indrapushnoh priyamapyeti pathah
25.26
ए॒ष छाग॑ः पु॒रो अश्वे॑न वा॒जिना॑ पू॒ष्णो भा॒गो नी॑यते वि॒श्वदे॑व्यः ।
अ॒भि॒प्रियं॒ यत्पु॑रो॒डाश॒मर्व॑ता॒ त्वष्टेदे॑नᳪ सौश्रव॒साय॑ जिन्वति ॥२६॥
Esha chhagah puro ashvena vajina pushno bhago niyate vishvadevyah
Abhipriyam yatpurodashamarvata tvashtedenam saushravasaya jinvati
25.27
यद्ध॑वि॒ष्य॒मृतु॒शो दे॑व॒यानं॒ त्रिर्मानु॑षा॒ः पर्यश्वं॒ नय॑न्ति ।
अत्रा॑ पू॒ष्णः प्र॑थ॒मो भा॒ग ए॑ति य॒ज्ञं दे॒वेभ्य॑ः प्रतिवे॒दय॑न्न॒जः ॥२७॥
Yaddhavishyamritusho devayanam trirmanushah paryashvam nayanti
Atra pushnah prathamo bhaga eti yagyam devebhyah prativedayannajah
25.28
होता॑ध्व॒र्युराव॑या अग्निमि॒न्धो ग्रा॑वग्रा॒भ उ॒त शᳪस्ता॒ सुवि॑प्रः ।
तेन॑ य॒ज्ञेन॒ स्व॒रंकृतेन॒ स्वि॒ष्टेन व॒क्षणा॒ आ पृ॑णध्वम् ॥२८॥
Hotadhvaryuravaya agnimindho gravagrabha uta shansta suviprah
Tena yagyena svarankritena svishtena vakshana a prinadhvam
25.29
यू॒प॒व्र॒स्का उ॒त ये यू॑पवा॒हाश्च॒षालं॒ ये अ॑श्वयू॒पाय॒ तक्ष॑ति ।
ये चार्व॑ते॒ पच॑नᳪ स॒म्भर॑न्त्यु॒तो तेषा॑म॒भिगू॑र्तिर्न इन्वतु ॥२९॥
Yupavraska uta ye yupavahashchashalam ye ashvayupaya takshati
Ye charvate pachanam sambharantyuto teshamabhigurtirna invatu
25.30
उप॒ प्रागा॑त्सु॒मन्मे॑ऽधायि॒ मन्म॑ दे॒वाना॒माशा॒ उप॑ वी॒तपृ॑ष्ठः ।
अन्वे॑नं॒ विप्रा॒ ऋष॑यो मदन्ति दे॒वानां॑ पु॒ष्टे च॑कृमा सु॒बन्धु॑म् ॥३०॥
Upa pragatsumanmedhayi manma devanamasha upa vitaprishthah
Anvenam vipra rishayo madanti devanam pushte chakrima subandhum
25.31
यद्वा॒जिनो॒ दाम॑ स॒न्दान॒मर्व॑तो॒ या शी॑र्ष॒ण्या॒ रश॒ना रज्जु॑रस्य ।
यद्वा॑ घास्य॒ प्रभृ॑तमा॒स्ये तृण॒ᳪ सर्वा॒ ता ते॒ अपि॑ दे॒वेष्व॑स्तु ॥३१॥
Yadvajino dama sandanamarvato ya shirshanya rashana rajjurasya
Yadva ghasya prabhritamasye trinam sarva ta te api deveshvastu
25.32
यदश्व॑स्य क्र॒विषो॒ मक्षि॒काश॒ यद्वा॒ स्वरौ॒ स्वधि॑तौ रि॒प्तमस्ति॑ ।
यद्धस्त॑योः शमि॒तुर्यन्न॒खेषु॒ सर्वा॒ ता ते॒ अपि॑ दे॒वेष्व॑स्तु ॥३२॥
Yadashvasya kravisho makshikasha yadva svarau svadhitau riptamasti
Yaddhastayoh shamituryannakheshu sarva ta te api deveshvastu
25.33
यदूव॑ध्यमु॒दर॑स्याप॒वाति॒ य आ॒मस्य॑ क्र॒विषो॑ ग॒न्धो अस्ति॑ ।
सु॒कृ॒ता तच्छ॑मि॒तार॑ः कृण्वन्तू॒त मेध॑ᳪ शृत॒पाकं॑ पचन्तु ॥३३॥
Yaduvadhyamudarasyapavati ya amasya kravisho gandho asti
Sukrita tachchhamitarah krinvantuta medham shritapakam pachantu
25.34
यत्ते॒ गात्रा॑द॒ग्निना॑ प॒च्यमा॑नाद॒भि शूलं॒ निह॑तस्याव॒धाव॑ति ।
मा तद्भूम्या॒माश्रि॑ष॒न्मा तृणे॑षु दे॒वेभ्य॒स्तदु॒शद्भ्यो॑ रा॒तम॑स्तु ॥३४॥
Yatte gatradagnina pachyamanadabhi shulam nihatasyavadhavati
Ma tadbhumyamashrishanma trineshu devebhyastadushadbhyo ratamastu
25.35
ये वा॒जिनं॑ परि॒पश्य॑न्ति प॒क्वं य ई॑मा॒हुः सु॑र॒भिर्निर्ह॒रेति॑ ।
ये चार्व॑तो माᳪसभि॒क्षामु॒पास॑त उ॒तो तेषा॑म॒भिगू॑र्तिर्न इन्वतु ॥३५॥
Ye vajinam paripashyanti pakvam ya imahuh surabhirnirhareti
Ye charvato mansabhikshamupasata uto teshamabhigurtirna invatu
25.36
यन्नीक्ष॑णं माँ॒स्पच॑न्या उ॒खाया॒ या पात्रा॑णि यू॒ष्ण आ॒सेच॑नानि ।
ऊ॒ष्म॒ण्या॒पि॒धाना॑ चरू॒णाम॒ङ्काः सू॒नाः परि॑ भूष॒न्त्यश्व॑म् ॥३६॥
Yannikshanam manspachanya ukhaya ya patrani yushna asechanani
Ushmanyapidhana charunamankah sunah pari bhushantyashvam
25.37
मा त्वा॒ऽग्निर्ध्व॑नयीद्धू॒मग॑न्धि॒र्मोखा भ्राज॑न्त्य॒भि वि॑क्त॒ जघ्रि॑ः ।
इ॒ष्टं वी॒तम॒भिगू॑र्तं॒ वष॑ट्कृतं॒ तं दे॒वास॒ः प्रति॑ गृभ्ण॒न्त्यश्व॑म् ॥३७॥
Ma tvagnirdhvanayiddhumagandhirmokha bhrajantyabhi vikta jaghrih
Ishtam vitamabhigurtam vashatkritam tam devasah prati gribhnantyashvam
25.38
नि॒क्रम॑णं नि॒षद॑नं वि॒वर्त॑नं॒ यच्च॒ पड्वी॑श॒मर्व॑तः ।
यच्च॑ पपौ॒ यच्च॑ घा॒सिं ज॒घास॒ सर्वा॒ ता ते॒ अपि॑ दे॒वेष्व॑स्तु ॥३८॥
Nikramanam nishadanam vivartanam yachcha padvishamarvatah
Yachcha papau yachcha ghasim jaghasa sarva ta te api deveshvastu
25.39
यदश्वा॑य॒ वास॑ उपस्तृ॒णन्त्य॑धीवा॒सं या हिर॑ण्यान्यस्मै ।
स॒न्दान॒मर्व॑न्तं॒ पड्वी॑शं प्रि॒या दे॒वेष्वा या॑मयन्ति ॥३९॥
Yadashvaya vasa upastrinantyadhivasam ya hiranyanyasmai
Sandanamarvantam padvisham priya deveshva yamayanti
25.40
यत्ते॑ सा॒दे मह॑सा॒ शूकृ॑तस्य॒ पार्ष्ण्या॑ वा॒ कश॑या वा तु॒तोद॑ ।
स्रु॒चेव॒ ता ह॒विषो॑ अध्व॒रेषु॒ सर्वा॒ ता ते॒ ब्रह्म॑णा सूदयामि ॥४०॥
Yatte sade mahasa shukritasya parshnya va kashaya va tutoda
Srucheva ta havisho adhvareshu sarva ta te brahmana sudayami
25.41
चतु॑स्त्रिᳪशद्वा॒जिनो॑ दे॒वब॑न्धो॒र्वङ्क्री॒रश्व॑स्य॒ स्वधि॑ति॒ः समे॑ति ।
अच्छि॑द्रा॒ गात्रा॑ व॒युना॑ कृणोत॒ परु॑ष्परुरनु॒घुष्या॒ विश॑स्त ॥४१॥
Chatustrinshadvajino devabandhorvankrirashvasya svadhitih sameti
Achchhidra gatra vayuna krinota parushparuranughushya vishasta
25.42
एक॒स्त्वष्टु॒रश्व॑स्या विश॒स्ता द्वा य॒न्तारा॑ भवत॒स्तथ॑ ऋ॒तुः ।
या ते॒ गात्रा॑णामृतु॒था कृ॒णोमि॒ ता-ता॒ पिण्डा॑नां॒ प्र जु॑होम्यग्नौ ॥४२॥
Ekastvashturashvasya vishasta dva yantara bhavatastatha rituh
Ya te gatranamritutha krinomi ta-ta pindanam pra juhomyagnau
25.43
मा त्वा॑ तपत्प्रि॒य आ॒त्माऽपि॒यन्तं॒ मा स्वधि॑तिस्त॒न्व आ ति॑ष्ठिपत्ते ।
मा ते॑ गृ॒ध्नुर॑विश॒स्ताऽति॒हाय॑ छि॒द्रा गात्रा॑ण्य॒सिना॒ मिथू॑ कः ॥४३॥
Ma tva tapatpriya atmapiyantam ma svadhitistanva a tishthipatte
Ma te gridhnuravishastatihaya chhidra gatranyasina mithu kah
25.44
न वा उ॑ ए॒तन्म्रि॑यसे॒ न रि॑ष्यसि दे॒वाँ२ इदे॑षि प॒थिभि॑ः सु॒गेभि॑ः ।
हरी॑ ते॒ युञ्जा॒ पृष॑ती अभूता॒मुपा॑स्थाद्वा॒जी धु॒रि रास॑भस्य ॥४४॥
Na va u etanmriyase na rishyasi devan2 ideshi pathibhih sugebhih
Hari te yunja prishati abhutamupasthadvaji dhuri rasabhasya
25.45
सु॒गव्यं॑ नो वा॒जी स्वश्व्यं॑ पु॒ᳪसः पु॒त्राँ२ उ॒त वि॑श्वा॒पुष॑ᳪ र॒यिम् ।
अ॒ना॒गा॒स्त्वं नो॒ अदि॑तिः कृणोतु क्ष॒त्रं नो॒ अश्वो॑ वनताᳪ ह॒विष्मा॑न् ॥४५॥
Sugavyam no vaji svashvyam punsah putran2 uta vishvapusham rayim
Anagastvam no aditih krinotu kshatram no ashvo vanatam havishman
25.46
इ॒मा नु कं॒ भुव॑ना सीषधा॒मेन्द्र॑श्च॒ विश्वे॑ च दे॒वाः ।
आ॒दि॒त्यैरिन्द्र॒ः सग॑णो म॒रुद्भि॑र॒स्मभ्यं॑ भेष॒जा क॑रत् ।
य॒ज्ञं च॑ नस्त॒न्वं॒ च प्र॒जां चा॑दित्यै॒रिन्द्र॑ः स॒ह सी॑षधाति ॥४६॥
Ima nu kam bhuvana sishadhamendrashcha vishve cha devah
Adityairindrah sagano marudbhirasmabhyam bheshaja karat
Yagyam cha nastanvam cha prajam chadityairindrah saha sishadhati
25.47
अग्ने॒ त्वं नो॒ अन्त॑म उ॒त त्रा॒ता शि॒वो भ॑व वरू॒थ्य॒ः ।
वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑मᳪ र॒यिं दा॑ः ।
तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ॥४७॥
Agne tvam no antama uta trata shivo bhava varuthyah
Vasuragnirvasushrava achchha nakshi dyumattamam rayim dah
Tam tva shochishtha didivah sumnaya nunamimahe sakhibhyah