Utshovঅধ্যায় 25
25.1
শাদং দদ্ভিরবকাং দন্তমূলৈর্মৃদং বর্স্বৈস্তেগান্দংষ্ট্রাভ্যাং সরস্বত্যা অগ্রজিহ্বং জিহ্বায়া উত্সাদমবক্রন্দেন তালু বাজং হনুভ্যামপ আস্যেন বৃষণমাণ্ডাভ্যামাদিত্যাঁ শ্মশ্রুভিঃ পন্থানং ভ্রূভ্যাং দ্যাবাপৃথিবী বর্তোভ্যাং বিদ্যুতং কনীনকাভ্যাং শুক্লায় স্বাহা কৃষ্ণায় স্বাহা পার্যাণি পক্ষ্মাণ্যবার্যা ইক্ষবোঽবার্যাণি পক্ষ্মাণি পার্যা ইক্ষবঃ ॥১॥
25.2
বাতং প্রাণেনাপানেন নাসিকে উপয়ামমধরেণৌষ্ঠেন সদুত্তরেণ প্রকাশেনান্তরমনূকাশেন বাহ্যং নিবেষ্যং মূর্ধ্না স্তনয়িত্নুং নির্বাধেনাশনিং মস্তিষ্কেণ বিদ্যুতং কনীনকাভ্যাং কর্ণাভ্যাং শ্রোত্রঁ শ্রোত্রাভ্যাং কর্ণৌ তেদনীমধরকণ্ঠেনাপঃ শুষ্ককণ্ঠেন চিত্তং মন্যাভিরদিতিং শীর্ষ্ণা নিরৃতিং নির্জর্জল্যেন শীর্ষ্ণা সংক্রোশৈঃ প্রাণান্ রেষ্মাণং স্তুপেন ॥২॥
25.3
মশকান্ কেশৈরিন্দ্রং স্বপসা বহেন বৃহস্পতিং শকুনিসাদেন কূর্মাঞ্ছফৈরাক্রমণং স্থূরাভ্যামৃক্ষলাভিঃ কপিঞ্জলাঞ্জবং জঙ্ঘাভ্যামধ্বানং বাহুভ্যাং জাম্বীলেনারণ্যমগ্নিমতিরুগ্ভ্যাং পূষণং দোর্ভ্যামশ্বিনাবংসাভ্যাং রুদ্রং রোরাভ্যাম্ ॥৩॥
25.4
অগ্নেঃ পক্ষতির্বায়োর্নিপক্ষতিরিন্দ্রস্য তৃতীয়া সোমস্য চতুর্থ্যদিত্যৈ পঞ্চমীন্দ্রাণ্যৈ ষষ্ঠী মরুতাং সপ্তমী বৃহস্পতেরষ্টম্যর্যম্ণো নবমী ধাতুর্দশমীন্দ্রস্যৈকাদশী বরুণস্য দ্বাদশী যমস্য ত্রয়োদশী ॥৪॥
25.5
ইন্দ্রাগ্ন্যোঃ পক্ষতিঃ সরস্বত্যৈ নিপক্ষতির্মিত্রস্য তৃতীয়াপাং চতুর্থী নিরৃত্যৈ পঞ্চম্যগ্নীষোময়োঃ ষষ্ঠী সর্পাণাং সপ্তমী বিষ্ণোরষ্টমী পূষ্ণো নবমী ত্বষ্টুর্দশমীন্দ্রস্যৈকাদশী বরুণস্য দ্বাদশী যম্যৈ ত্রয়োদশী দ্যাবাপৃথিব্যোর্দক্ষিণং পার্শ্বং বিশ্বেষাং দেবানামুত্তরম্ ॥৫॥
25.6
মরুতাং স্কন্ধা বিশ্বেষাং দেবানাং প্রথমা কীকসা রুদ্রাণাং দ্বিতীয়াঽঽদিত্যানাং তৃতীয়া বায়োঃ পুচ্ছমগ্নীষোময়োর্ভাসদৌ ক্রুঞ্চৌ শ্রোণিভ্যামিন্দ্রাবৃহস্পতী ঊরুভ্যাং মিত্রাবরুণাবল্গাভ্যামাক্রমণং স্থূরাভ্যাং বলং কুষ্ঠাভ্যাম্ ॥৬॥
25.7
পূষণং বনিষ্ঠুনাঽন্ধাহীন্ত্স্থূলগুদয়া সর্পান্গুদাভির্বিহ্রুত আন্ত্রৈরপো বস্তিনা বৃষণমাণ্ডাভ্যাং বাজিনং শেপেন প্রজাং রেতসা চাষান্ পিত্তেন প্রদরান্ পায়ুনা কূশ্মাঞ্ছকপিণ্ডৈঃ ॥৭॥
25.8
ইন্দ্রস্য ক্রীডোঽদিত্যৈ পাজস্যং দিশাং জত্রবোঽদিত্যৈ ভসজ্জীমূতান্ হৃদয়ৌপশেনান্তরিক্ষং পুরীততা নভ উদর্যেণ চক্রবাকৌ মতস্নাভ্যাং দিবং বৃক্কাভ্যাং গিরীন্ প্লাশিভিরুপলান্ প্লীহ্না বল্মীকান্ ক্লোমভির্গ্লৌভির্গুল্মান্ হিরাভিঃ স্রবন্তীর্হ্রদান্ কুক্ষিভ্যাং সমুদ্রমুদরেণ বৈশ্বানরং ভস্মনা ॥৮॥
25.9
বিধৃতিং নাভ্যা ধৃতং রসেনাপো যূষ্ণা মরীচীর্বিপ্রুড্ভির্নীহারমূষ্মণা শীনং বসয়া প্রুষ্বা অশ্রুভির্হ্রাদুনীর্দূষীকাভিরস্না রক্ষাংসি চিত্রাণ্যঙ্গৈর্নক্ষত্রাণি রূপেণ পৃথিবীং ত্বচা জুম্বকায় স্বাহা ॥৯॥
25.10
হিরণ্যগর্ভঃ সমবর্ততাগ্রে ভূতস্য জাতঃ পতিরেক আসীৎ ।
স দাধার পৃথিবীং দ্যামুতেমাং কস্মৈ দেবায় হবিষা বিধেম ॥১০॥
25.11
যঃ প্রাণতো নিমিষতো মহিত্বৈক ইদ্রাজা জগতো বভূব ।
য ঈশে অস্য দ্বিপদশ্চতুষ্পদঃ কস্মৈ দেবায় হবিষা বিধেম ॥১১॥
25.12
যস্যেমে হিমবন্তো মহিত্বা যস্য সমুদ্রং রসয়া সহাহুঃ ।
যস্যেমাঃ প্রদিশো যস্য বাহূ কস্মৈ দেবায় হবিষা বিধেম ॥১২॥
25.13
য আত্মদা বলদা যস্য বিশ্ব উপাসতে প্রশিষং যস্য দেবাঃ ।
যস্য ছায়ামৃতং যস্য মৃত্যুঃ কস্মৈ দেবায় হবিষা বিধেম ॥১৩॥
25.14
আ নো ভদ্রাঃ ক্রতবো যন্তু বিশ্বতোঽদব্ধাসো অপরীতাস উদ্ভিদঃ ।
দেবা নো যথা সদমিদ্ বৃধে অসন্নপ্রায়ুবো রক্ষিতারো দিবে – দিবে ॥১৪॥
25.15
দেবানাং ভদ্রা সুমতিরৃজূয়তাং দেবানাং রাতিরভি নো নিবর্ততাম্ ।
দেবানাং সখ্যমুপসেদিমা বয়ং দেবা ন আয়ুঃ প্রতিরন্তু জীবসে ॥১৫॥
25.16
তান্পূর্বয়া নিবিদা হূমহে বয়ং ভগং মিত্রমদিতিং দক্ষমস্রিধম্ ।
অর্যমণং বরুণং সোমমশ্বিনা সরস্বতী নঃ সুভগা ময়স্করৎ ॥১৬॥
25.17
তন্নো বাতো ময়োভু বাতু ভেষজং তন্মাতা পৃথিবী তত্পিতা দ্যৌঃ ।
তদ্ গ্রাবাণঃ সোমসুতো ময়োভুবস্তদশ্বিনা শৃণুতং ধিষ্ণ্যা যুবম্ ॥১৭॥
25.18
তমীশানং জগতস্তস্থুষস্পতিং ধিয়ঞ্জিন্বমবসে হূমহে বয়ম্ ।
পূষা নো যথা বেদসামসদ্ বৃধে রক্ষিতা পায়ুরদব্ধঃ স্বস্তয়ে ॥১৮॥
25.19
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ ।
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ॥১৯॥
25.20
পৃষদশ্বা মরুতঃ পৃশ্নিমাতরঃ শুভংয়াবানো বিদথেষু জগ্ময়ঃ ।
অগ্নিজিহ্বা মনবঃ সূরচক্ষসো বিশ্বে নো দেবা অবসাগমন্নিহ ॥২০॥
25.21
ভদ্রং কর্ণেভিঃ শৃণুয়াম দেবা ভদ্রং পশ্যেমাক্ষভির্যজত্রাঃ ।
স্থিরৈরঙ্গৈস্তুষ্টুবাংসস্তনূভির্ব্যশেমহি দেবহিতং যদায়ুঃ ॥২১॥
25.22
শতমিন্নু শরদো অন্তি দেবা যত্রা নশ্চক্রা জরসং তনূনাম্ ।
পুত্রাসো যত্র পিতরো ভবন্তি মা নো মধ্যা রীরিষতায়ুর্গন্তোঃ ॥২২॥
25.23
অদিতির্দ্যৌরদিতিরন্তরিক্ষমদিতির্মাতা স পিতা স পুত্রঃ ।
বিশ্বে দেবা অদিতিঃ পঞ্চ জনা অদিতির্জাতমদিতির্জনিত্বম্ ॥২৩॥
25.24
মা নো মিত্রো বরুণো অর্যমায়ুরিন্দ্র ঋভুক্ষা মরুতঃ পরি খ্যন্ ।
যদ্বাজিনো দেবজাতস্য সপ্তেঃ প্রবক্ষ্যামো বিদথে বীর্যাণি ॥২৪॥
25.25
যন্নির্ণিজা রেক্ণসা প্রাবৃতস্য রাতিং গৃভীতাং মুখতো নয়ন্তি ।
সুপ্রাঙজো মেম্যদ্বিশ্বরূপ ইন্দ্রাপূষ্ণোঃ প্রিয়মপ্যেতি পাথঃ ॥২৫॥
25.26
এষ ছাগঃ পুরো অশ্বেন বাজিনা পূষ্ণো ভাগো নীয়তে বিশ্বদেব্যঃ ।
অভিপ্রিয়ং যত্পুরোডাশমর্বতা ত্বষ্টেদেনং সৌশ্রবসায় জিন্বতি ॥২৬॥
25.27
যদ্ধবিষ্যমৃতুশো দেবয়ানং ত্রির্মানুষাঃ পর্যশ্বং নয়ন্তি ।
অত্রা পূষ্ণঃ প্রথমো ভাগ এতি যজ্ঞং দেবেভ্যঃ প্রতিবেদয়ন্নজঃ ॥২৭॥
25.28
হোতাধ্বর্যুরাবয়া অগ্নিমিন্ধো গ্রাবগ্রাভ উত শংস্তা সুবিপ্রঃ ।
তেন যজ্ঞেন স্বরংকৃতেন স্বিষ্টেন বক্ষণা আ পৃণধ্বম্ ॥২৮॥
25.29
যূপব্রস্কা উত যে যূপবাহাশ্চষালং যে অশ্বয়ূপায় তক্ষতি ।
যে চার্বতে পচনং সম্ভরন্ত্যুতো তেষামভিগূর্তির্ন ইন্বতু ॥২৯॥
25.30
উপ প্রাগাত্সুমন্মেঽধায়ি মন্ম দেবানামাশা উপ বীতপৃষ্ঠঃ ।
অন্বেনং বিপ্রা ঋষয়ো মদন্তি দেবানাং পুষ্টে চকৃমা সুবন্ধুম্ ॥৩০॥
25.31
যদ্বাজিনো দাম সন্দানমর্বতো যা শীর্ষণ্যা রশনা রজ্জুরস্য ।
যদ্বা ঘাস্য প্রভৃতমাস্যে তৃণং সর্বা তা তে অপি দেবেষ্বস্তু ॥৩১॥
25.32
যদশ্বস্য ক্রবিষো মক্ষিকাশ যদ্বা স্বরৌ স্বধিতৌ রিপ্তমস্তি ।
যদ্ধস্তয়োঃ শমিতুর্যন্নখেষু সর্বা তা তে অপি দেবেষ্বস্তু ॥৩২॥
25.33
যদূবধ্যমুদরস্যাপবাতি য আমস্য ক্রবিষো গন্ধো অস্তি ।
সুকৃতা তচ্ছমিতারঃ কৃণ্বন্তূত মেধং শৃতপাকং পচন্তু ॥৩৩॥
25.34
যত্তে গাত্রাদগ্নিনা পচ্যমানাদভি শূলং নিহতস্যাবধাবতি ।
মা তদ্ভূম্যামাশ্রিষন্মা তৃণেষু দেবেভ্যস্তদুশদ্ভ্যো রাতমস্তু ॥৩৪॥
25.35
যে বাজিনং পরিপশ্যন্তি পক্বং য ঈমাহুঃ সুরভির্নির্হরেতি ।
যে চার্বতো মাংসভিক্ষামুপাসত উতো তেষামভিগূর্তির্ন ইন্বতু ॥৩৫॥
25.36
যন্নীক্ষণং মাঁস্পচন্যা উখায়া যা পাত্রাণি যূষ্ণ আসেচনানি ।
ঊষ্মণ্যাপিধানা চরূণামঙ্কাঃ সূনাঃ পরি ভূষন্ত্যশ্বম্ ॥৩৬॥
25.37
মা ত্বাঽগ্নির্ধ্বনয়ীদ্ধূমগন্ধির্মোখা ভ্রাজন্ত্যভি বিক্ত জঘ্রিঃ ।
ইষ্টং বীতমভিগূর্তং বষট্কৃতং তং দেবাসঃ প্রতি গৃভ্ণন্ত্যশ্বম্ ॥৩৭॥
25.38
নিক্রমণং নিষদনং বিবর্তনং যচ্চ পড্বীশমর্বতঃ ।
যচ্চ পপৌ যচ্চ ঘাসিং জঘাস সর্বা তা তে অপি দেবেষ্বস্তু ॥৩৮॥
25.39
যদশ্বায় বাস উপস্তৃণন্ত্যধীবাসং যা হিরণ্যান্যস্মৈ ।
সন্দানমর্বন্তং পড্বীশং প্রিয়া দেবেষ্বা যাময়ন্তি ॥৩৯॥
25.40
যত্তে সাদে মহসা শূকৃতস্য পার্ষ্ণ্যা বা কশয়া বা তুতোদ ।
স্রুচেব তা হবিষো অধ্বরেষু সর্বা তা তে ব্রহ্মণা সূদয়ামি ॥৪০॥
25.41
চতুস্ত্রিংশদ্বাজিনো দেববন্ধোর্বঙ্ক্রীরশ্বস্য স্বধিতিঃ সমেতি ।
অচ্ছিদ্রা গাত্রা বয়ুনা কৃণোত পরুষ্পরুরনুঘুষ্যা বিশস্ত ॥৪১॥
25.42
একস্ত্বষ্টুরশ্বস্যা বিশস্তা দ্বা যন্তারা ভবতস্তথ ঋতুঃ ।
যা তে গাত্রাণামৃতুথা কৃণোমি তা-তা পিণ্ডানাং প্র জুহোম্যগ্নৌ ॥৪২॥
25.43
মা ত্বা তপত্প্রিয় আত্মাঽপিয়ন্তং মা স্বধিতিস্তন্ব আ তিষ্ঠিপত্তে ।
মা তে গৃধ্নুরবিশস্তাঽতিহায় ছিদ্রা গাত্রাণ্যসিনা মিথূ কঃ ॥৪৩॥
25.44
ন বা উ এতন্ম্রিয়সে ন রিষ্যসি দেবাঁ২ ইদেষি পথিভিঃ সুগেভিঃ ।
হরী তে যুঞ্জা পৃষতী অভূতামুপাস্থাদ্বাজী ধুরি রাসভস্য ॥৪৪॥
25.45
সুগব্যং নো বাজী স্বশ্ব্যং পুংসঃ পুত্রাঁ২ উত বিশ্বাপুষং রয়িম্ ।
অনাগাস্ত্বং নো অদিতিঃ কৃণোতু ক্ষত্রং নো অশ্বো বনতাং হবিষ্মান্ ॥৪৫॥
25.46
ইমা নু কং ভুবনা সীষধামেন্দ্রশ্চ বিশ্বে চ দেবাঃ ।
আদিত্যৈরিন্দ্রঃ সগণো মরুদ্ভিরস্মভ্যং ভেষজা করৎ ।
যজ্ঞং চ নস্তন্বং চ প্রজাং চাদিত্যৈরিন্দ্রঃ সহ সীষধাতি ॥৪৬॥
25.47
অগ্নে ত্বং নো অন্তম উত ত্রাতা শিবো ভব বরূথ্যঃ ।
বসুরগ্নির্বসুশ্রবা অচ্ছা নক্ষি দ্যুমত্তমং রয়িং দাঃ ।
তং ত্বা শোচিষ্ঠ দীদিবঃ সুম্নায় নূনমীমহে সখিভ্যঃ ॥৪৭॥