UtshovSarga 107
107.1
।
। आदित्यहृदयप्रारम्भः ।।ततो युद्धपरिश्रन्तं समरे चिन्तया स्थितम् ।रावणं चाग्रतो दृष्ट्वा युद्धाय समुपस्थितम् ।। ६.१०७.१ ।।
, Adityahridayaprarambhah, tato yuddhaparishrantam samare chintaya sthitam, ravanam chagrato drishtva yuddhaya samupasthitam
107.2
दैवतैश्च समागम्य द्रष्टुमभ्यागतो रणम् ।
उपागम्याब्रवीद्राममगस्त्यो भगवानृषिः ।। ६.१०७.२ ।।
Daivataishcha samagamya drashtumabhyagato ranam
Upagamyabravidramamagastyo bhagavanrishih
107.3
राम राम महाबाहो शृणु गुह्यं सनातनम् ।
येन सर्वानरीन् वत्स समरे विजयिष्यसि ।। ६.१०७.३ ।।
Rama rama mahabaho shrinu guhyam sanatanam
Yena sarvanarin vatsa samare vijayishyasi
107.4
आदित्यहृदयं पुण्यं सर्वशत्रुविनाशनम् ।
जयावहं जपेन्नित्यमक्षय्यं परमं शिवम् ।। ६.१०७.४ ।।
Adityahridayam punyam sarvashatruvinashanam
Jayavaham japennityamakshayyam paramam shivam
107.5
सर्वमङ्गलमङ्गल्यं सर्वपापप्रणाशनम् ।
चिन्ताशोकप्रशमनमायुर्वर्धनमुत्तमम् ।। ६.१०७.५ ।।
Sarvamangalamangalyam sarvapapapranashanam
Chintashokaprashamanamayurvardhanamuttamam
107.6
रश्मिमन्तं समुद्यन्तं देवासुरनमस्कृतम् ।
पूजयस्व विवस्वन्तं भास्करं भुवनेश्वरम् ।। ६.१०७.६ ।।
Rashmimantam samudyantam devasuranamaskritam
Pujayasva vivasvantam bhaskaram bhuvaneshvaram
107.7
सर्वदेवात्मको ह्येष तेजस्वी रश्मिभावनः ।
एष देवासुरगणान् लोकान् पाति गभिस्तिभिः ।। ६.१०७.७ ।।
Sarvadevatmako hyesha tejasvi rashmibhavanah
Esha devasuraganan lokan pati gabhistibhih
107.8
एष ब्रह्मा च विष्णुश्च शिवः स्कन्दः प्रजापतिः ।
महेन्द्रो धनदः कालो यमः सोमो ह्यपां पतिः ।। ६.१०७.८ ।।
Esha brahma cha vishnushcha shivah skandah prajapatih
Mahendro dhanadah kalo yamah somo hyapam patih
107.9
पितरो वसवः साध्या ह्यश्विनौ मरुतो मनुः ।
वायुर्वह्निः प्रजापाण ऋतुकर्ता प्रभाकरः ।। ६.१०७.९ ।।
Pitaro vasavah sadhya hyashvinau maruto manuh
Vayurvahnih prajapana ritukarta prabhakarah
107.10
आदित्यः सविता सूर्यः खगः पूषा गभस्तिमान् ।
सुवर्णसदृशो भानुर्हिरण्यरेता दिवाकरः ।। ६.१०७.१० ।।
Adityah savita suryah khagah pusha gabhastiman
Suvarnasadrisho bhanurhiranyareta divakarah
107.11
हरिदश्वः सहस्रार्चिः सप्तसप्तिर्मरीचिमान् ।
तिमिरोन्मथनः शम्भुस्त्वष्टा मार्तण्ड अंशुमान् ।। ६.१०७.११ ।।
Haridashvah sahasrarchih saptasaptirmarichiman
Timironmathanah shambhustvashta martanda anshuman
107.12
हिरण्यगर्भः शिशिरस्तपनो भास्करो रविः ।
अग्निगर्भो ऽदितेः पुत्रः शङ्खः शिशिरनाशनः ।। ६.१०७.१२ ।।
Hiranyagarbhah shishirastapano bhaskaro ravih
Agnigarbho diteh putrah shankhah shishiranashanah
107.13
व्योमनाथस्तमोभेदी ऋग्यजुस्सामपारगः ।
घनवृष्टिरपां मित्रो विन्ध्यवीथीप्लवङ्गमः ।। ६.१०७.१३ ।।
Vyomanathastamobhedi rigyajussamaparagah
Ghanavrishtirapam mitro vindhyavithiplavangamah
107.14
आतपी मण्डली मृत्युः पिङ्गलः सर्वतापनः ।
कविर्विश्वो महातेजा रक्तः सर्वभवोद्भवः ।। ६.१०७.१४ ।।
Atapi mandali mrityuh pingalah sarvatapanah
Kavirvishvo mahateja raktah sarvabhavodbhavah
107.15
नक्षत्रग्रहताराणामधिपो विश्वभावनः ।
तेजसामपि तेजस्वी द्वादशात्मन्नमो ऽस्तु ते ।। ६.१०७.१५ ।।
Nakshatragrahataranamadhipo vishvabhavanah
Tejasamapi tejasvi dvadashatmannamo stu te
107.16
नमः पूर्वाय गिरये पश्चिमे गिरये नमः ।
ज्योतिर्गणानां पतये दिनाधिपतये नमः ।। ६.१०७.१६ ।।
Namah purvaya giraye pashchime giraye namah
Jyotirgananam pataye dinadhipataye namah
107.17
जयाय जयभद्राय हर्यश्वाय नमो नमः ।
नमो नमः सहस्रांशो आदित्याय नमो नमः ।। ६.१०७.१७ ।।
Jayaya jayabhadraya haryashvaya namo namah
Namo namah sahasransho adityaya namo namah
107.18
नम उग्राय वीराय सारङ्गाय नमो नमः ।
नमः पद्मप्रबोधाय मार्ताण्डाय नमो नमः ।। ६.१०७.१८ ।।
Nama ugraya viraya sarangaya namo namah
Namah padmaprabodhaya martandaya namo namah
107.19
ब्रह्मोशानाच्युतेशाय सूर्यायादित्यवर्चसे ।
भास्वते सर्वभक्षाय रौद्राय वपुषे नमः ।। ६.१०७.१९ ।।
Brahmoshanachyuteshaya suryayadityavarchase
Bhasvate sarvabhakshaya raudraya vapushe namah
107.20
तमोघ्नाय हिमध्नाय शत्रुघ्नायामितात्मने ।
कृतघ्नघ्नाय देवाय ज्योतिषां पतये नमः ।। ६.१०७.२० ।।
Tamoghnaya himadhnaya shatrughnayamitatmane
Kritaghnaghnaya devaya jyotisham pataye namah
107.21
तप्तचामीकराभाय वह्नये विश्वकर्मणे ।
नमस्तमोभिनिघ्नाय रुचये लोकसाक्षिणे ।। ६.१०७.२१ ।।
Taptachamikarabhaya vahnaye vishvakarmane
Namastamobhinighnaya ruchaye lokasakshine
107.22
नाशयत्येष वै भूतं तदेव सृजति प्रभुः ।
पायत्येष तपत्येष वर्षत्येष गभस्तिभिः ।। ६.१०७.२२ ।।
Nashayatyesha vai bhutam tadeva srijati prabhuh
Payatyesha tapatyesha varshatyesha gabhastibhih
107.23
एष सुप्तेषु जागर्ति भूतेषु परिनिष्ठितः ।
एष एवाग्निहोत्रं च फलं चैवाग्निहोत्रिणाम् ।। ६.१०७.२३ ।।
Esha supteshu jagarti bhuteshu parinishthitah
Esha evagnihotram cha phalam chaivagnihotrinam
107.24
वेदाश्च क्रतवश्चैव क्रतूनां फलमेव च ।
यानि कृत्यानि लोकेषु सर्व एष रविः प्रभुः ।। ६.१०७.२४ ।।
Vedashcha kratavashchaiva kratunam phalameva cha
Yani krityani lokeshu sarva esha ravih prabhuh
107.25
एनमापत्सु कृच्छ्रेषु कान्तारेषु भयेषु च ।
कीर्तयन् पुरुषः कश्चिन्नावसीदति राघव ।। ६.१०७.२५ ।।
Enamapatsu krichchhreshu kantareshu bhayeshu cha
Kirtayan purushah kashchinnavasidati raghava
107.26
पूजयस्वैनमेकाग्रो देवदेवं जगत्पतिम् ।
एतत्रिगुणितं जप्त्वा युद्धेषु विजयिष्यसि ।। ६.१०७.२६ ।।
Pujayasvainamekagro devadevam jagatpatim
Etatrigunitam japtva yuddheshu vijayishyasi
107.27
अस्मिन् क्षणे महाबाहो रावणं त्वं वधिष्यसि ।
एवमुक्त्वा तदा ऽगस्त्यो जगाम च यथागतम् ।। ६.१०७.२७ ।।
Asmin kshane mahabaho ravanam tvam vadhishyasi
Evamuktva tada gastyo jagama cha yathagatam
107.28
एतच्छुत्वा महातेजा नष्टशोको ऽभवत्तदा ।
धारयामास सुप्रीतो राघवः प्रयतात्मवान् ।। ६.१०७.२८ ।।
Etachchhutva mahateja nashtashoko bhavattada
Dharayamasa suprito raghavah prayatatmavan
107.29
आदित्यं प्रेक्ष्य जप्त्वा तु परं हर्षमवाप्तवान् ।
त्रिराचम्य शुचिर्भूत्वा धनुरादाय वीर्यवान् ।। ६.१०७.२९ ।।
Adityam prekshya japtva tu param harshamavaptavan
Trirachamya shuchirbhutva dhanuradaya viryavan
107.30
रावणं प्रेक्ष्य हृष्टात्मा युद्धाय समुपागमत् ।
सर्वयत्नेन महता वधे तस्य धृतो ऽभवत् ।। ६.१०७.३० ।।
Ravanam prekshya hrishtatma yuddhaya samupagamat
Sarvayatnena mahata vadhe tasya dhrito bhavat
107.31
अथ रविरवदन्निरीक्ष्य रामं मुदितमनाः परमं प्रहृष्यमाणः ।
निशिचरपतिसङ्क्षयं विदित्वा सुरगणमध्यगतो वचस्त्वरेति ।। ६.१०७.३१ ।।
Atha raviravadannirikshya ramam muditamanah paramam prahrishyamanah
Nishicharapatisankshayam viditva suraganamadhyagato vachastvareti
107.32
इत्यार्षे श्रीमद्रामायणे वाल्मीकीये आदिकाव्ये श्रीमद्युद्धकाण्डे सप्तोत्तरशततमः सर्गः ।
। १०७ ।।
Ityarshe shrimadramayane valmikiye adikavye shrimadyuddhakande saptottarashatatamah sargah