Sukta 22

22.1

7 kashyaposito devalo va, pavamanah somah, gayatri

ए॒ते सोमा॑स आ॒शवो॒ रथा॑ इव॒ प्र वा॒जिन॑ः । सर्गा॑ः सृ॒ष्टा अ॑हेषत ॥१॥

Ete somasa ashavo ratha iva pra vajinah, sargah srishta aheshata

ए॒ते वाता॑ इवो॒रव॑ः प॒र्जन्य॑स्येव वृ॒ष्टय॑ः । अ॒ग्नेरि॑व भ्र॒मा वृथा॑ ॥२॥

Ete vata ivoravah parjanyasyeva vrishtayah, agneriva bhrama vritha

ए॒ते पू॒ता वि॑प॒श्चित॒ः सोमा॑सो॒ दध्या॑शिरः । वि॒पा व्या॑नशु॒र्धिय॑ः ॥३॥

Ete puta vipashchitah somaso dadhyashirah, vipa vyanashurdhiyah

ए॒ते मृ॒ष्टा अम॑र्त्याः ससृ॒वांसो॒ न श॑श्रमुः । इय॑क्षन्तः प॒थो रज॑ः ॥४॥

Ete mrishta amartyah sasrivanso na shashramuh, iyakshantah patho rajah

ए॒ते पृ॒ष्ठानि॒ रोद॑सोर्विप्र॒यन्तो॒ व्या॑नशुः । उ॒तेदमु॑त्त॒मं रज॑ः ॥५॥

Ete prishthani rodasorviprayanto vyanashuh, utedamuttamam rajah

तन्तुं॑ तन्वा॒नमु॑त्त॒ममनु॑ प्र॒वत॑ आशत । उ॒तेदमु॑त्त॒माय्य॑म् ॥६॥

Tantum tanvanamuttamamanu pravata ashata, utedamuttamayyam

त्वं सो॑म प॒णिभ्य॒ आ वसु॒ गव्या॑नि धारयः । त॒तं तन्तु॑मचिक्रदः ॥७॥

Tvam soma panibhya a vasu gavyani dharayah, tatam tantumachikradah