Sukta 110

110.1

12 tryarunastraivrishnah, trasadasyuh paurukutsyah, pavamanah somah, 1-3 pipilikamadhya anushtup, 4-9 urdhvabrihati, 10-12 virat

पर्यू॒ षु प्र ध॑न्व॒ वाज॑सातये॒ परि॑ वृ॒त्राणि॑ स॒क्षणि॑ः । द्वि॒षस्त॒रध्या॑ ऋण॒या न॑ ईयसे ॥१॥

Paryu shu pra dhanva vajasataye pari vritrani sakshanih, dvishastaradhya rinaya na iyase

अनु॒ हि त्वा॑ सु॒तं सो॑म॒ मदा॑मसि म॒हे स॑मर्य॒राज्ये॑ । वाजाँ॑ अ॒भि प॑वमान॒ प्र गा॑हसे ॥२॥

Anu hi tva sutam soma madamasi mahe samaryarajye, vajam abhi pavamana pra gahase

अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पय॑ः । गोजी॑रया॒ रंह॑माण॒ः पुरं॑ध्या ॥३॥

Ajijano hi pavamana suryam vidhare shakmana payah, gojiraya ranhamanah purandhya

अजी॑जनो अमृत॒ मर्त्ये॒ष्वाँ ऋ॒तस्य॒ धर्म॑न्न॒मृत॑स्य॒ चारु॑णः । सदा॑सरो॒ वाज॒मच्छा॒ सनि॑ष्यदत् ॥४॥

Ajijano amrita martyeshvam ritasya dharmannamritasya charunah, sadasaro vajamachchha sanishyadat

अ॒भ्य॑भि॒ हि श्रव॑सा त॒तर्दि॒थोत्सं॒ न कं चि॑ज्जन॒पान॒मक्षि॑तम् । शर्या॑भि॒र्न भर॑माणो॒ गभ॑स्त्योः ॥५॥

Abhyabhi hi shravasa tatardithotsam na kam chijjanapanamakshitam, sharyabhirna bharamano gabhastyoh

आदीं॒ के चि॒त्पश्य॑मानास॒ आप्यं॑ वसु॒रुचो॑ दि॒व्या अ॒भ्य॑नूषत । वारं॒ न दे॒वः स॑वि॒ता व्यू॑र्णुते ॥६॥

Adim ke chitpashyamanasa apyam vasurucho divya abhyanushata, varam na devah savita vyurnute

त्वे सो॑म प्रथ॒मा वृ॒क्तब॑र्हिषो म॒हे वाजा॑य॒ श्रव॑से॒ धियं॑ दधुः । स त्वं नो॑ वीर वी॒र्या॑य चोदय ॥७॥

Tve soma prathama vriktabarhisho mahe vajaya shravase dhiyam dadhuh, sa tvam no vira viryaya chodaya

दि॒वः पी॒यूषं॑ पू॒र्व्यं यदु॒क्थ्यं॑ म॒हो गा॒हाद्दि॒व आ निर॑धुक्षत । इन्द्र॑म॒भि जाय॑मानं॒ सम॑स्वरन् ॥८॥

Divah piyusham purvyam yadukthyam maho gahaddiva a niradhukshata, indramabhi jayamanam samasvaran

अध॒ यदि॒मे प॑वमान॒ रोद॑सी इ॒मा च॒ विश्वा॒ भुव॑ना॒भि म॒ज्मना॑ ।
यू॒थे न नि॒ःष्ठा वृ॑ष॒भो वि ति॑ष्ठसे ॥९॥

Adha yadime pavamana rodasi ima cha vishva bhuvanabhi majmana
Yuthe na nihshtha vrishabho vi tishthase

सोम॑ः पुना॒नो अ॒व्यये॒ वारे॒ शिशु॒र्न क्रीळ॒न्पव॑मानो अक्षाः । स॒हस्र॑धारः श॒तवा॑ज॒ इन्दु॑ः ॥१०॥

Somah punano avyaye vare shishurna krilanpavamano akshah, sahasradharah shatavaja induh

ए॒ष पु॑ना॒नो मधु॑माँ ऋ॒तावेन्द्रा॒येन्दु॑ः पवते स्वा॒दुरू॒र्मिः । वा॒ज॒सनि॑र्वरिवो॒विद्व॑यो॒धाः ॥११॥

Esha punano madhumam ritavendrayenduh pavate svadururmih, vajasanirvarivovidvayodhah

स प॑वस्व॒ सह॑मानः पृत॒न्यून्त्सेध॒न्रक्षां॒स्यप॑ दु॒र्गहा॑णि । स्वा॒यु॒धः सा॑स॒ह्वान्त्सो॑म॒ शत्रू॑न् ॥१२॥

Sa pavasva sahamanah pritanyuntsedhanrakshansyapa durgahani, svayudhah sasahvantsoma shatrun