Sukta 111

111.1

3 ananatah paruchchhepih, pavamanah somah, atyashtih

अ॒या रु॒चा हरि॑ण्या पुना॒नो विश्वा॒ द्वेषां॑सि तरति स्व॒युग्व॑भि॒ः सूरो॒ न स्व॒युग्व॑भिः ।
धारा॑ सु॒तस्य॑ रोचते पुना॒नो अ॑रु॒षो हरि॑ः । विश्वा॒ यद्रू॒पा प॑रि॒यात्यृक्व॑भिः स॒प्तास्ये॑भि॒ॠक्व॑भिः ॥१॥

Aya rucha harinya punano vishva dveshansi tarati svayugvabhih suro na svayugvabhih
Dhara sutasya rochate punano arusho harih, vishva yadrupa pariyatyrikvabhih saptasyebhirikvabhih

111.2

त्वं त्यत्प॑णी॒नां वि॑दो॒ वसु॒ सं मा॒तृभि॑र्मर्जयसि॒ स्व आ दम॑ ऋ॒तस्य॑ धी॒तिभि॒र्दमे॑ ।
प॒रा॒वतो॒ न साम॒ तद्यत्रा॒ रण॑न्ति धी॒तय॑ः । त्रि॒धातु॑भि॒ररु॑षीभि॒र्वयो॑ दधे॒ रोच॑मानो॒ वयो॑ दधे ॥२॥

Tvam tyatpaninam vido vasu sam matribhirmarjayasi sva a dama ritasya dhitibhirdame
Paravato na sama tadyatra rananti dhitayah, tridhatubhirarushibhirvayo dadhe rochamano vayo dadhe

111.3

पूर्वा॒मनु॑ प्र॒दिशं॑ याति॒ चेकि॑त॒त्सं र॒श्मिभि॑र्यतते दर्श॒तो रथो॒ दैव्यो॑ दर्श॒तो रथ॑ः ।
अग्म॑न्नु॒क्थानि॒ पौंस्येन्द्रं॒ जैत्रा॑य हर्षयन् । वज्र॑श्च॒ यद्भव॑थो॒ अन॑पच्युता स॒मत्स्वन॑पच्युता ॥३॥

Purvamanu pradisham yati chekitatsam rashmibhiryatate darshato ratho daivyo darshato rathah
Agmannukthani paunsyendram jaitraya harshayan, vajrashcha yadbhavatho anapachyuta samatsvanapachyuta