Sukta 109

109.1

22 agnayo dhishnya aishvarayah, pavamanah somah, dvipada virat

परि॒ प्र ध॒न्वेन्द्रा॑य सोम स्वा॒दुर्मि॒त्राय॑ पू॒ष्णे भगा॑य। १
इन्द्र॑स्ते सोम सु॒तस्य॑ पेया॒ः क्रत्वे॒ दक्षा॑य॒ विश्वे॑ च दे॒वाः ॥१॥

Pari pra dhanvendraya soma svadurmitraya pushne bhagaya, 1
Indraste soma sutasya peyah kratve dakshaya vishve cha devah

ए॒वामृता॑य म॒हे क्षया॑य॒ स शु॒क्रो अ॑र्ष दि॒व्यः पी॒यूष॑ः। ३
पव॑स्व सोम म॒हान्त्स॑मु॒द्रः पि॒ता दे॒वानां॒ विश्वा॒भि धाम॑ ॥२॥

Evamritaya mahe kshayaya sa shukro arsha divyah piyushah, 3
Pavasva soma mahantsamudrah pita devanam vishvabhi dhama

शु॒क्रः प॑वस्व दे॒वेभ्य॑ः सोम दि॒वे पृ॑थि॒व्यै शं च॑ प्र॒जायै॑। ५
दि॒वो ध॒र्तासि॑ शु॒क्रः पी॒यूष॑ः स॒त्ये विध॑र्मन्वा॒जी प॑वस्व ॥३॥

Shukrah pavasva devebhyah soma dive prithivyai sham cha prajayai, 5
Divo dhartasi shukrah piyushah satye vidharmanvaji pavasva

पव॑स्व सोम द्यु॒म्नी सु॑धा॒रो म॒हामवी॑ना॒मनु॑ पू॒र्व्यः। ७
नृभि॑र्येमा॒नो ज॑ज्ञा॒नः पू॒तः क्षर॒द्विश्वा॑नि म॒न्द्रः स्व॒र्वित् ॥४॥

Pavasva soma dyumni sudharo mahamavinamanu purvyah, 7
Nribhiryemano jagyanah putah ksharadvishvani mandrah svarvit

इन्दु॑ः पुना॒नः प्र॒जामु॑रा॒णः कर॒द्विश्वा॑नि॒ द्रवि॑णानि नः। ९
पव॑स्व सोम॒ क्रत्वे॒ दक्षा॒याऽश्वो॒ न नि॒क्तो वा॒जी धना॑य ॥५॥

Induh punanah prajamuranah karadvishvani dravinani nah, 9
Pavasva soma kratve dakshayashvo na nikto vaji dhanaya

तं ते॑ सो॒तारो॒ रसं॒ मदा॑य पु॒नन्ति॒ सोमं॑ म॒हे द्यु॒म्नाय॑ । ११
शिशुं॑ जज्ञा॒नं हरिं॑ मृजन्ति प॒वित्रे॒ सोमं॑ दे॒वेभ्य॒ इन्दु॑म् ॥६॥

Tam te sotaro rasam madaya punanti somam mahe dyumnaya, 11
Shishum jagyanam harim mrijanti pavitre somam devebhya indum

इन्दु॑ः पविष्ट॒ चारु॒र्मदा॑या॒ऽपामु॒पस्थे॑ क॒विर्भगा॑य १३
बिभ॑र्ति॒ चार्विन्द्र॑स्य॒ नाम॒ येन॒ विश्वा॑नि वृ॒त्रा ज॒घान॑ ॥७॥

Induh pavishta charurmadayapamupasthe kavirbhagaya 13
Bibharti charvindrasya nama yena vishvani vritra jaghana

पिब॑न्त्यस्य॒ विश्वे॑ दे॒वासो॒ गोभि॑ः श्री॒तस्य॒ नृभि॑ः सु॒तस्य॑ । १५
प्र सु॑वा॒नो अ॑क्षाः स॒हस्र॑धारस्ति॒रः प॒वित्रं॒ वि वार॒मव्य॑म् ॥८॥

Pibantyasya vishve devaso gobhih shritasya nribhih sutasya, 15
Pra suvano akshah sahasradharastirah pavitram vi varamavyam

स वा॒ज्य॑क्षाः स॒हस्र॑रेता अ॒द्भिर्मृ॑जा॒नो गोभि॑ः श्रीणा॒नः । १७
प्र सो॑म या॒हीन्द्र॑स्य कु॒क्षा नृभि॑र्येमा॒नो अद्रि॑भिः सु॒तः ॥९॥

Sa vajyakshah sahasrareta adbhirmrijano gobhih shrinanah, 17
Pra soma yahindrasya kuksha nribhiryemano adribhih sutah

अस॑र्जि वा॒जी ति॒रः प॒वित्र॒मिन्द्रा॑य॒ सोम॑ः स॒हस्र॑धारः । १९
अ॒ञ्जन्त्ये॑नं॒ मध्वो॒ रसे॒नेन्द्रा॑य॒ वृष्ण॒ इन्दुं॒ मदा॑य ॥१०॥

Asarji vaji tirah pavitramindraya somah sahasradharah, 19
Anjantyenam madhvo rasenendraya vrishna indum madaya

दे॒वेभ्य॑स्त्वा॒ वृथा॒ पाज॑से॒ऽपो वसा॑नं॒ हरिं॑ मृजन्ति । २१
इन्दु॒रिन्द्रा॑य तोशते॒ नि तो॑शते श्री॒णन्नु॒ग्रो रि॒णन्न॒पः ॥११॥

Devebhyastva vritha pajasepo vasanam harim mrijanti, 21
Indurindraya toshate ni toshate shrinannugro rinannapah