Sukta 4

4.1

21 devatithih kanvah, indrah, 15 -18 pusha va, 19 -21 kurungah, pragathah = ( vishama brihati, sama satobrihati ), 21 pura ushnik

यदि॑न्द्र॒ प्रागपा॒गुद॒ङ्न्य॑ग्वा हू॒यसे॒ नृभि॑ः । सिमा॑ पु॒रू नृषू॑तो अ॒स्यान॒वेऽसि॑ प्रशर्ध तु॒र्वशे॑ ॥१॥

Yadindra pragapagudannyagva huyase nribhih, sima puru nrishuto asyanavesi prashardha turvashe

4.2

यद्वा॒ रुमे॒ रुश॑मे॒ श्याव॑के॒ कृप॒ इन्द्र॑ मा॒दय॑से॒ सचा॑ ।
कण्वा॑सस्त्वा॒ ब्रह्म॑भि॒ः स्तोम॑वाहस॒ इन्द्रा य॑च्छ॒न्त्या ग॑हि ॥२॥

Yadva rume rushame shyavake kripa indra madayase sacha
Kanvasastva brahmabhih stomavahasa indra yachchhantya gahi

4.3

यथा॑ गौ॒रो अ॒पा कृ॒तं तृष्य॒न्नेत्यवेरि॑णम् । आ॒पि॒त्वे न॑ः प्रपि॒त्वे तूय॒मा ग॑हि॒ कण्वे॑षु॒ सु सचा॒ पिब॑ ॥३॥

Yatha gauro apa kritam trishyannetyaverinam, apitve nah prapitve tuyama gahi kanveshu su sacha piba

4.4

मन्द॑न्तु त्वा मघवन्नि॒न्द्रेन्द॑वो राधो॒देया॑य सुन्व॒ते । आ॒मुष्या॒ सोम॑मपिबश्च॒मू सु॒तं ज्येष्ठं॒ तद्द॑धिषे॒ सह॑ः ॥४॥

Mandantu tva maghavannindrendavo radhodeyaya sunvate, amushya somamapibashchamu sutam jyeshtham taddadhishe sahah

4.5

प्र च॑क्रे॒ सह॑सा॒ सहो॑ ब॒भञ्ज॑ म॒न्युमोज॑सा । विश्वे॑ त इन्द्र पृतना॒यवो॑ यहो॒ नि वृ॒क्षा इ॑व येमिरे ॥५॥

Pra chakre sahasa saho babhanja manyumojasa, vishve ta indra pritanayavo yaho ni vriksha iva yemire

4.6

स॒हस्रे॑णेव सचते यवी॒युधा॒ यस्त॒ आन॒ळुप॑स्तुतिम् । पु॒त्रं प्रा॑व॒र्गं कृ॑णुते सु॒वीर्ये॑ दा॒श्नोति॒ नम॑उक्तिभिः ॥६॥

Sahasreneva sachate yaviyudha yasta analupastutim, putram pravargam krinute suvirye dashnoti namauktibhih

4.7

मा भे॑म॒ मा श्र॑मिष्मो॒ग्रस्य॑ स॒ख्ये तव॑ । म॒हत्ते॒ वृष्णो॑ अभि॒चक्ष्यं॑ कृ॒तं पश्ये॑म तु॒र्वशं॒ यदु॑म् ॥७॥

Ma bhema ma shramishmograsya sakhye tava, mahatte vrishno abhichakshyam kritam pashyema turvasham yadum

4.8

स॒व्यामनु॑ स्फि॒ग्यं॑ वावसे॒ वृषा॒ न दा॒नो अ॑स्य रोषति । मध्वा॒ सम्पृ॑क्ताः सार॒घेण॑ धे॒नव॒स्तूय॒मेहि॒ द्रवा॒ पिब॑ ॥८॥

Savyamanu sphigyam vavase vrisha na dano asya roshati, madhva sampriktah saraghena dhenavastuyamehi drava piba

4.9

अ॒श्वी र॒थी सु॑रू॒प इद्गोमाँ॒ इदि॑न्द्र ते॒ सखा॑ । श्वा॒त्र॒भाजा॒ वय॑सा सचते॒ सदा॑ च॒न्द्रो या॑ति स॒भामुप॑ ॥९॥

Ashvi rathi surupa idgomam idindra te sakha, shvatrabhaja vayasa sachate sada chandro yati sabhamupa

4.10

ऋश्यो॒ न तृष्य॑न्नव॒पान॒मा ग॑हि॒ पिबा॒ सोमं॒ वशाँ॒ अनु॑ । नि॒मेघ॑मानो मघवन्दि॒वेदि॑व॒ ओजि॑ष्ठं दधिषे॒ सह॑ः ॥१०॥

Rishyo na trishyannavapanama gahi piba somam vasham anu, nimeghamano maghavandivediva ojishtham dadhishe sahah

4.11

अध्व॑र्यो द्रा॒वया॒ त्वं सोम॒मिन्द्र॑ः पिपासति । उप॑ नू॒नं यु॑युजे॒ वृष॑णा॒ हरी॒ आ च॑ जगाम वृत्र॒हा ॥११॥

Adhvaryo dravaya tvam somamindrah pipasati, upa nunam yuyuje vrishana hari a cha jagama vritraha

4.12

स्व॒यं चि॒त्स म॑न्यते॒ दाशु॑रि॒र्जनो॒ यत्रा॒ सोम॑स्य तृ॒म्पसि॑ ।
इ॒दं ते॒ अन्नं॒ युज्यं॒ समु॑क्षितं॒ तस्येहि॒ प्र द्र॑वा॒ पिब॑ ॥१२॥

Svayam chitsa manyate dashurirjano yatra somasya trimpasi
Idam te annam yujyam samukshitam tasyehi pra drava piba

4.13

र॒थे॒ष्ठाया॑ध्वर्यव॒ः सोम॒मिन्द्रा॑य सोतन । अधि॑ ब्र॒ध्नस्याद्र॑यो॒ वि च॑क्षते सु॒न्वन्तो॑ दा॒श्व॑ध्वरम् ॥१३॥

Ratheshthayadhvaryavah somamindraya sotana, adhi bradhnasyadrayo vi chakshate sunvanto dashvadhvaram

4.14

उप॑ ब्र॒ध्नं वा॒वाता॒ वृष॑णा॒ हरी॒ इन्द्र॑म॒पसु॑ वक्षतः । अ॒र्वाञ्चं॑ त्वा॒ सप्त॑योऽध्वर॒श्रियो॒ वह॑न्तु॒ सव॒नेदुप॑ ॥१४॥

Upa bradhnam vavata vrishana hari indramapasu vakshatah, arvancham tva saptayodhvarashriyo vahantu savanedupa

4.15

प्र पू॒षणं॑ वृणीमहे॒ युज्या॑य पुरू॒वसु॑म् । स श॑क्र शिक्ष पुरुहूत नो धि॒या तुजे॑ रा॒ये वि॑मोचन ॥१५॥

Pra pushanam vrinimahe yujyaya puruvasum, sa shakra shiksha puruhuta no dhiya tuje raye vimochana

4.16

सं न॑ः शिशीहि भु॒रिजो॑रिव क्षु॒रं रास्व॑ रा॒यो वि॑मोचन । त्वे तन्न॑ः सु॒वेद॑मु॒स्रियं॒ वसु॒ यं त्वं हि॒नोषि॒ मर्त्य॑म् ॥१६॥

Sam nah shishihi bhurijoriva kshuram rasva rayo vimochana, tve tannah suvedamusriyam vasu yam tvam hinoshi martyam

4.17

वेमि॑ त्वा पूषन्नृ॒ञ्जसे॒ वेमि॒ स्तोत॑व आघृणे । न तस्य॑ वे॒म्यर॑णं॒ हि तद्व॑सो स्तु॒षे प॒ज्राय॒ साम्ने॑ ॥१७॥

Vemi tva pushannrinjase vemi stotava aghrine, na tasya vemyaranam hi tadvaso stushe pajraya samne

4.18

परा॒ गावो॒ यव॑सं॒ कच्चि॑दाघृणे॒ नित्यं॒ रेक्णो॑ अमर्त्य । अ॒स्माकं॑ पूषन्नवि॒ता शि॒वो भ॑व॒ मंहि॑ष्ठो॒ वाज॑सातये ॥१८॥

Para gavo yavasam kachchidaghrine nityam rekno amartya, asmakam pushannavita shivo bhava manhishtho vajasataye

4.19

स्थू॒रं राध॑ः श॒ताश्वं॑ कुरु॒ङ्गस्य॒ दिवि॑ष्टिषु । राज्ञ॑स्त्वे॒षस्य॑ सु॒भग॑स्य रा॒तिषु॑ तु॒र्वशे॑ष्वमन्महि ॥१९॥

Sthuram radhah shatashvam kurungasya divishtishu, ragyastveshasya subhagasya ratishu turvasheshvamanmahi

4.20

धी॒भिः सा॒तानि॑ का॒ण्वस्य॑ वा॒जिन॑ः प्रि॒यमे॑धैर॒भिद्यु॑भिः । ष॒ष्टिं स॒हस्रानु॒ निर्म॑जामजे॒ निर्यू॒थानि॒ गवा॒मृषि॑ः ॥२०॥

Dhibhih satani kanvasya vajinah priyamedhairabhidyubhih, shashtim sahasranu nirmajamaje niryuthani gavamrishih

4.21

वृ॒क्षाश्चि॑न्मे अभिपि॒त्वे अ॑रारणुः । गां भ॑जन्त मे॒हनाऽश्वं॑ भजन्त मे॒हना॑ ॥२१॥

Vrikshashchinme abhipitve araranuh, gam bhajanta mehanashvam bhajanta mehana