Sukta 3

3.1

Medhyatithih kanvah, indrah, 21 -24 kaurayanah pakasthama, pragatha : = ( vishama brihati, sama satobrihati ), 21 anushtup, 22 -23 gayatri, 24 brihati

पिबा॑ सु॒तस्य॑ र॒सिनो॒ मत्स्वा॑ न इन्द्र॒ गोम॑तः । आ॒पिर्नो॑ बोधि सध॒माद्यो॑ वृ॒धे॒३ऽस्माँ अ॑वन्तु ते॒ धिय॑ः ॥१॥

Piba sutasya rasino matsva na indra gomatah, apirno bodhi sadhamadyo vridhe3smam avantu te dhiyah

3.2

भू॒याम॑ ते सुम॒तौ वा॒जिनो॑ व॒यं मा न॑ः स्तर॒भिमा॑तये । अ॒स्माञ्चि॒त्राभि॑रवताद॒भिष्टि॑भि॒रा न॑ः सु॒म्नेषु॑ यामय ॥२॥

Bhuyama te sumatau vajino vayam ma nah starabhimataye, asmanchitrabhiravatadabhishtibhira nah sumneshu yamaya

3.3

इ॒मा उ॑ त्वा पुरूवसो॒ गिरो॑ वर्धन्तु॒ या मम॑ । पा॒व॒कव॑र्णा॒ः शुच॑यो विप॒श्चितो॒ऽभि स्तोमै॑रनूषत ॥३॥

Ima u tva puruvaso giro vardhantu ya mama, pavakavarnah shuchayo vipashchitobhi stomairanushata

3.4

अ॒यं स॒हस्र॒मृषि॑भि॒ः सह॑स्कृतः समु॒द्र इ॑व पप्रथे । स॒त्यः सो अ॑स्य महि॒मा गृ॑णे॒ शवो॑ य॒ज्ञेषु॑ विप्र॒राज्ये॑ ॥४॥

Ayam sahasramrishibhih sahaskritah samudra iva paprathe, satyah so asya mahima grine shavo yagyeshu viprarajye

3.5

इन्द्र॒मिद्दे॒वता॑तय॒ इन्द्रं॑ प्रय॒त्य॑ध्व॒रे । इन्द्रं॑ समी॒के व॒निनो॑ हवामह॒ इन्द्रं॒ धन॑स्य सा॒तये॑ ॥५॥

Indramiddevatataya indram prayatyadhvare, indram samike vanino havamaha indram dhanasya sataye

3.6

इन्द्रो॑ म॒ह्ना रोद॑सी पप्रथ॒च्छव॒ इन्द्र॒ः सूर्य॑मरोचयत् । इन्द्रे॑ ह॒ विश्वा॒ भुव॑नानि येमिर॒ इन्द्रे॑ सुवा॒नास॒ इन्द॑वः ॥६॥

Indro mahna rodasi paprathachchhava indrah suryamarochayat, indre ha vishva bhuvanani yemira indre suvanasa indavah

3.7

अ॒भि त्वा॑ पू॒र्वपी॑तय॒ इन्द्र॒ स्तोमे॑भिरा॒यव॑ः । स॒मी॒ची॒नास॑ ऋ॒भव॒ः सम॑स्वरन्रु॒द्रा गृ॑णन्त॒ पूर्व्य॑म् ॥७॥

Abhi tva purvapitaya indra stomebhirayavah, samichinasa ribhavah samasvaranrudra grinanta purvyam

3.8

अ॒स्येदिन्द्रो॑ वावृधे॒ वृष्ण्यं॒ शवो॒ मदे॑ सु॒तस्य॒ विष्ण॑वि । अ॒द्या तम॑स्य महि॒मान॑मा॒यवोऽनु॑ ष्टुवन्ति पू॒र्वथा॑ ॥८॥

Asyedindro vavridhe vrishnyam shavo made sutasya vishnavi, adya tamasya mahimanamayavonu shtuvanti purvatha

3.9

तत्त्वा॑ यामि सु॒वीर्यं॒ तद्ब्रह्म॑ पू॒र्वचि॑त्तये । येना॒ यति॑भ्यो॒ भृग॑वे॒ धने॑ हि॒ते येन॒ प्रस्क॑ण्व॒मावि॑थ ॥९॥

Tattva yami suviryam tadbrahma purvachittaye, yena yatibhyo bhrigave dhane hite yena praskanvamavitha

3.10

येना॑ समु॒द्रमसृ॑जो म॒हीर॒पस्तदि॑न्द्र॒ वृष्णि॑ ते॒ शव॑ः । स॒द्यः सो अ॑स्य महि॒मा न सं॒नशे॒ यं क्षो॒णीर॑नुचक्र॒दे ॥१०॥

Yena samudramasrijo mahirapastadindra vrishni te shavah, sadyah so asya mahima na sannashe yam kshoniranuchakrade

3.11

श॒ग्धी न॑ इन्द्र॒ यत्त्वा॑ र॒यिं यामि॑ सु॒वीर्य॑म् । श॒ग्धि वाजा॑य प्रथ॒मं सिषा॑सते श॒ग्धि स्तोमा॑य पूर्व्य ॥११॥

Shagdhi na indra yattva rayim yami suviryam, shagdhi vajaya prathamam sishasate shagdhi stomaya purvya

3.12

श॒ग्धी नो॑ अ॒स्य यद्ध॑ पौ॒रमावि॑थ॒ धिय॑ इन्द्र॒ सिषा॑सतः ।
श॒ग्धि यथा॒ रुश॑मं॒ श्याव॑कं॒ कृप॒मिन्द्र॒ प्राव॒ः स्व॑र्णरम् ॥१२॥

Shagdhi no asya yaddha pauramavitha dhiya indra sishasatah
Shagdhi yatha rushamam shyavakam kripamindra pravah svarnaram

3.13

कन्नव्यो॑ अत॒सीनां॑ तु॒रो गृ॑णीत॒ मर्त्य॑ः । न॒ही न्व॑स्य महि॒मान॑मिन्द्रि॒यं स्व॑र्गृ॒णन्त॑ आन॒शुः ॥१३॥

Kannavyo atasinam turo grinita martyah, nahi nvasya mahimanamindriyam svargrinanta anashuh

3.14

कदु॑ स्तु॒वन्त॑ ऋतयन्त दे॒वत॒ ऋषि॒ः को विप्र॑ ओहते ।
क॒दा हवं॑ मघवन्निन्द्र सुन्व॒तः कदु॑ स्तुव॒त आ ग॑मः ॥१४॥

Kadu stuvanta ritayanta devata rishih ko vipra ohate
Kada havam maghavannindra sunvatah kadu stuvata a gamah

3.15

उदु॒ त्ये मधु॑मत्तमा॒ गिर॒ः स्तोमा॑स ईरते । स॒त्रा॒जितो॑ धन॒सा अक्षि॑तोतयो वाज॒यन्तो॒ रथा॑ इव ॥१५॥

Udu tye madhumattama girah stomasa irate, satrajito dhanasa akshitotayo vajayanto ratha iva

3.16

कण्वा॑ इव॒ भृग॑व॒ः सूर्या॑ इव॒ विश्व॒मिद्धी॒तमा॑नशुः । इन्द्रं॒ स्तोमे॑भिर्म॒हय॑न्त आ॒यव॑ः प्रि॒यमे॑धासो अस्वरन् ॥१६॥

Kanva iva bhrigavah surya iva vishvamiddhitamanashuh, indram stomebhirmahayanta ayavah priyamedhaso asvaran

3.17

यु॒क्ष्वा हि वृ॑त्रहन्तम॒ हरी॑ इन्द्र परा॒वत॑ः । अ॒र्वा॒ची॒नो म॑घव॒न्त्सोम॑पीतय उ॒ग्र ऋ॒ष्वेभि॒रा ग॑हि ॥१७॥

Yukshva hi vritrahantama hari indra paravatah, arvachino maghavantsomapitaya ugra rishvebhira gahi

3.18

इ॒मे हि ते॑ का॒रवो॑ वाव॒शुर्धि॒या विप्रा॑सो मे॒धसा॑तये । स त्वं नो॑ मघवन्निन्द्र गिर्वणो वे॒नो न शृ॑णुधी॒ हव॑म् ॥१८॥

Ime hi te karavo vavashurdhiya vipraso medhasataye, sa tvam no maghavannindra girvano veno na shrinudhi havam

3.19

निरि॑न्द्र बृह॒तीभ्यो॑ वृ॒त्रं धनु॑भ्यो अस्फुरः । निरर्बु॑दस्य॒ मृग॑यस्य मा॒यिनो॒ निः पर्व॑तस्य॒ गा आ॑जः ॥१९॥

Nirindra brihatibhyo vritram dhanubhyo asphurah, nirarbudasya mrigayasya mayino nih parvatasya ga ajah

3.20

निर॒ग्नयो॑ रुरुचु॒र्निरु॒ सूर्यो॒ निः सोम॑ इन्द्रि॒यो रस॑ः । निर॒न्तरि॑क्षादधमो म॒हामहिं॑ कृ॒षे तदि॑न्द्र॒ पौंस्य॑म् ॥२०॥

Niragnayo ruruchurniru suryo nih soma indriyo rasah, nirantarikshadadhamo mahamahim krishe tadindra paunsyam

3.21

यं मे॒ दुरिन्द्रो॑ म॒रुत॒ः पाक॑स्थामा॒ कौर॑याणः । विश्वे॑षां॒ त्मना॒ शोभि॑ष्ठ॒मुपे॑व दि॒वि धाव॑मानम् ॥२१॥

Yam me durindro marutah pakasthama kaurayanah, vishvesham tmana shobhishthamupeva divi dhavamanam

3.22

रोहि॑तं मे॒ पाक॑स्थामा सु॒धुरं॑ कक्ष्य॒प्राम् । अदा॑द्रा॒यो वि॒बोध॑नम् ॥२२॥

Rohitam me pakasthama sudhuram kakshyapram, adadrayo vibodhanam

3.23

यस्मा॑ अ॒न्ये दश॒ प्रति॒ धुरं॒ वह॑न्ति॒ वह्न॑यः । अस्तं॒ वयो॒ न तुग्र्य॑म् ॥२३॥

Yasma anye dasha prati dhuram vahanti vahnayah, astam vayo na tugryam

3.24

आ॒त्मा पि॒तुस्त॒नूर्वास॑ ओजो॒दा अ॒भ्यञ्ज॑नम् ।
तु॒रीय॒मिद्रोहि॑तस्य॒ पाक॑स्थामानं भो॒जं दा॒तार॑मब्रवम् ॥२४॥

Atma pitustanurvasa ojoda abhyanjanam
Turiyamidrohitasya pakasthamanam bhojam dataramabravam