Sukta 9

9.1

6 maitravarunirvasishthah, agnih, trishtup

अबो॑धि जा॒र उ॒षसा॑मु॒पस्था॒द्धोता॑ म॒न्द्रः क॒वित॑मः पाव॒कः ।
दधा॑ति के॒तुमु॒भय॑स्य ज॒न्तोर्ह॒व्या दे॒वेषु॒ द्रवि॑णं सु॒कृत्सु॑ ॥१॥

Abodhi jara ushasamupasthaddhota mandrah kavitamah pavakah
Dadhati ketumubhayasya jantorhavya deveshu dravinam sukritsu

स सु॒क्रतु॒र्यो वि दुर॑ः पणी॒नां पु॑ना॒नो अ॒र्कं पु॑रु॒भोज॑सं नः ।
होता॑ म॒न्द्रो वि॒शां दमू॑नास्ति॒रस्तमो॑ ददृशे रा॒म्याणा॑म् ॥२॥

Sa sukraturyo vi durah paninam punano arkam purubhojasam nah
Hota mandro visham damunastirastamo dadrishe ramyanam

अमू॑रः क॒विरदि॑तिर्वि॒वस्वा॑न्त्सुसं॒सन्मि॒त्रो अति॑थिः शि॒वो न॑ः ।
चि॒त्रभा॑नुरु॒षसां॑ भा॒त्यग्रे॒ऽपां गर्भ॑ः प्र॒स्व१ आ वि॑वेश ॥३॥

Amurah kaviraditirvivasvantsusansanmitro atithih shivo nah
Chitrabhanurushasam bhatyagrepam garbhah prasva1 a vivesha

ई॒ळेन्यो॑ वो॒ मनु॑षो यु॒गेषु॑ समन॒गा अ॑शुचज्जा॒तवे॑दाः ।
सु॒सं॒दृशा॑ भा॒नुना॒ यो वि॒भाति॒ प्रति॒ गाव॑ः समिधा॒नं बु॑धन्त ॥४॥

Ilenyo vo manusho yugeshu samanaga ashuchajjatavedah
Susandrisha bhanuna yo vibhati prati gavah samidhanam budhanta

अग्ने॑ या॒हि दू॒त्यं१ मा रि॑षण्यो दे॒वाँ अच्छा॑ ब्रह्म॒कृता॑ ग॒णेन॑ ।
सर॑स्वतीं म॒रुतो॑ अ॒श्विना॒पो यक्षि॑ दे॒वान्र॑त्न॒धेया॑य॒ विश्वा॑न् ॥५॥

Agne yahi dutyan1 ma rishanyo devam achchha brahmakrita ganena
Sarasvatim maruto ashvinapo yakshi devanratnadheyaya vishvan

त्वाम॑ग्ने समिधा॒नो वसि॑ष्ठो॒ जरू॑थं ह॒न्यक्षि॑ रा॒ये पुरं॑धिम् ।
पु॒रु॒णी॒था जा॑तवेदो जरस्व यू॒यं पा॑त स्व॒स्तिभि॒ः सदा॑ नः ॥६॥

Tvamagne samidhano vasishtho jarutham hanyakshi raye purandhim
Purunitha jatavedo jarasva yuyam pata svastibhih sada nah