Sukta 10

10.1

5, maitravarunirvasishthah, agnih, trishtup

उ॒षो न जा॒रः पृ॒थु पाजो॑ अश्रे॒द्दवि॑द्युत॒द्दीद्य॒च्छोशु॑चानः ।
वृषा॒ हरि॒ः शुचि॒रा भा॑ति भा॒सा धियो॑ हिन्वा॒न उ॑श॒तीर॑जीगः ॥१॥

Usho na jarah prithu pajo ashreddavidyutaddidyachchhoshuchanah
Vrisha harih shuchira bhati bhasa dhiyo hinvana ushatirajigah

स्व१र्ण वस्तो॑रु॒षसा॑मरोचि य॒ज्ञं त॑न्वा॒ना उ॒शिजो॒ न मन्म॑ ।
अ॒ग्निर्जन्मा॑नि दे॒व आ वि वि॒द्वान्द्र॒वद्दू॒तो दे॑व॒यावा॒ वनि॑ष्ठः ॥२॥

Sva1rna vastorushasamarochi yagyam tanvana ushijo na manma
Agnirjanmani deva a vi vidvandravadduto devayava vanishthah

अच्छा॒ गिरो॑ म॒तयो॑ देव॒यन्ती॑र॒ग्निं य॑न्ति॒ द्रवि॑णं॒ भिक्ष॑माणाः ।
सु॒सं॒दृशं॑ सु॒प्रती॑कं॒ स्वञ्चं॑ हव्य॒वाह॑मर॒तिं मानु॑षाणाम् ॥३॥

Achchha giro matayo devayantiragnim yanti dravinam bhikshamanah
Susandrisham supratikam svancham havyavahamaratim manushanam

इन्द्रं॑ नो अग्ने॒ वसु॑भिः स॒जोषा॑ रु॒द्रं रु॒द्रेभि॒रा व॑हा बृ॒हन्त॑म् ।
आ॒दि॒त्येभि॒रदि॑तिं वि॒श्वज॑न्यां॒ बृह॒स्पति॒मृक्व॑भिर्वि॒श्ववा॑रम् ॥४॥

Indram no agne vasubhih sajosha rudram rudrebhira vaha brihantam
Adityebhiraditim vishvajanyam brihaspatimrikvabhirvishvavaram

म॒न्द्रं होता॑रमु॒शिजो॒ यवि॑ष्ठम॒ग्निं विश॑ ईळते अध्व॒रेषु॑ ।
स हि क्षपा॑वाँ॒ अभ॑वद्रयी॒णामत॑न्द्रो दू॒तो य॒जथा॑य दे॒वान् ॥५॥

Mandram hotaramushijo yavishthamagnim visha ilate adhvareshu
Sa hi kshapavam abhavadrayinamatandro duto yajathaya devan