Sukta 8

8.1

7 maitravarunirvasishthah, agnih, trishtup

इ॒न्धे राजा॒ सम॒र्यो नमो॑भि॒र्यस्य॒ प्रती॑क॒माहु॑तं घृ॒तेन॑ ।
नरो॑ ह॒व्येभि॑रीळते स॒बाध॒ आग्निरग्र॑ उ॒षसा॑मशोचि ॥१॥

Indhe raja samaryo namobhiryasya pratikamahutam ghritena
Naro havyebhirilate sabadha agniragra ushasamashochi

अ॒यमु॒ ष्य सुम॑हाँ अवेदि॒ होता॑ म॒न्द्रो मनु॑षो य॒ह्वो अ॒ग्निः ।
वि भा अ॑कः ससृजा॒नः पृ॑थि॒व्यां कृ॒ष्णप॑वि॒रोष॑धीभिर्ववक्षे ॥२॥

Ayamu shya sumaham avedi hota mandro manusho yahvo agnih
Vi bha akah sasrijanah prithivyam krishnapaviroshadhibhirvavakshe

कया॑ नो अग्ने॒ वि व॑सः सुवृ॒क्तिं कामु॑ स्व॒धामृ॑णवः श॒स्यमा॑नः ।
क॒दा भ॑वेम॒ पत॑यः सुदत्र रा॒यो व॒न्तारो॑ दु॒ष्टर॑स्य सा॒धोः ॥३॥

Kaya no agne vi vasah suvriktim kamu svadhamrinavah shasyamanah
Kada bhavema patayah sudatra rayo vantaro dushtarasya sadhoh

प्रप्रा॒यम॒ग्निर्भ॑र॒तस्य॑ शृण्वे॒ वि यत्सूर्यो॒ न रोच॑ते बृ॒हद्भाः ।
अ॒भि यः पू॒रुं पृत॑नासु त॒स्थौ द्यु॑ता॒नो दैव्यो॒ अति॑थिः शुशोच ॥४॥

Praprayamagnirbharatasya shrinve vi yatsuryo na rochate brihadbhah
Abhi yah purum pritanasu tasthau dyutano daivyo atithih shushocha

अस॒न्नित्त्वे आ॒हव॑नानि॒ भूरि॒ भुवो॒ विश्वे॑भिः सु॒मना॒ अनी॑कैः ।
स्तु॒तश्चि॑दग्ने शृण्विषे गृणा॒नः स्व॒यं व॑र्धस्व त॒न्वं॑ सुजात ॥५॥

Asannittve ahavanani bhuri bhuvo vishvebhih sumana anikaih
Stutashchidagne shrinvishe grinanah svayam vardhasva tanvam sujata

इ॒दं वच॑ः शत॒साः संस॑हस्र॒मुद॒ग्नये॑ जनिषीष्ट द्वि॒बर्हा॑ः ।
शं यत्स्तो॒तृभ्य॑ आ॒पये॒ भवा॑ति द्यु॒मद॑मीव॒चात॑नं रक्षो॒हा ॥६॥

Idam vachah shatasah sansahasramudagnaye janishishta dvibarhah
Sham yatstotribhya apaye bhavati dyumadamivachatanam rakshoha

नू त्वाम॑ग्न ईमहे॒ वसि॑ष्ठा ईशा॒नं सू॑नो सहसो॒ वसू॑नाम् ।
इषं॑ स्तो॒तृभ्यो॑ म॒घव॑द्भ्य आनड्यू॒यं पा॑त स्व॒स्तिभि॒ः सदा॑ नः ॥७॥

Nu tvamagna imahe vasishtha ishanam suno sahaso vasunam
Isham stotribhyo maghavadbhya anadyuyam pata svastibhih sada nah