Sukta 86

86.1

8 maitravarunirvasishthah, varunah, trishtup

धीरा॒ त्व॑स्य महि॒ना ज॒नूंषि॒ वि यस्त॒स्तम्भ॒ रोद॑सी चिदु॒र्वी ।
प्र नाक॑मृ॒ष्वं नु॑नुदे बृ॒हन्तं॑ द्वि॒ता नक्ष॑त्रं प॒प्रथ॑च्च॒ भूम॑ ॥१॥

Dhira tvasya mahina janunshi vi yastastambha rodasi chidurvi
Pra nakamrishvam nunude brihantam dvita nakshatram paprathachcha bhuma

86.2

उ॒त स्वया॑ त॒न्वा॒३ सं व॑दे॒ तत्क॒दा न्व१न्तर्वरु॑णे भुवानि ।
किं मे॑ ह॒व्यमहृ॑णानो जुषेत क॒दा मृ॑ळी॒कं सु॒मना॑ अ॒भि ख्य॑म् ॥२॥

Uta svaya tanva3 sam vade tatkada nva1ntarvarune bhuvani
Kim me havyamahrinano jusheta kada mrilikam sumana abhi khyam

86.3

पृ॒च्छे तदेनो॑ वरुण दि॒दृक्षूपो॑ एमि चिकि॒तुषो॑ वि॒पृच्छ॑म् ।
स॒मा॒नमिन्मे॑ क॒वय॑श्चिदाहुर॒यं ह॒ तुभ्यं॒ वरु॑णो हृणीते ॥३॥

Prichchhe tadeno varuna didrikshupo emi chikitusho viprichchham
Samanaminme kavayashchidahurayam ha tubhyam varuno hrinite

86.4

किमाग॑ आस वरुण॒ ज्येष्ठं॒ यत्स्तो॒तारं॒ जिघां॑ससि॒ सखा॑यम् ।
प्र तन्मे॑ वोचो दूळभ स्वधा॒वोऽव॑ त्वाने॒ना नम॑सा तु॒र इ॑याम् ॥४॥

Kimaga asa varuna jyeshtham yatstotaram jighansasi sakhayam
Pra tanme vocho dulabha svadhavova tvanena namasa tura iyam

86.5

अव॑ द्रु॒ग्धानि॒ पित्र्या॑ सृजा॒ नोऽव॒ या व॒यं च॑कृ॒मा त॒नूभि॑ः ।
अव॑ राजन्पशु॒तृपं॒ न ता॒युं सृ॒जा व॒त्सं न दाम्नो॒ वसि॑ष्ठम् ॥५॥

Ava drugdhani pitrya srija nova ya vayam chakrima tanubhih
Ava rajanpashutripam na tayum srija vatsam na damno vasishtham

86.6

न स स्वो दक्षो॑ वरुण॒ ध्रुति॒ः सा सुरा॑ म॒न्युर्वि॒भीद॑को॒ अचि॑त्तिः ।
अस्ति॒ ज्याया॒न्कनी॑यस उपा॒रे स्वप्न॑श्च॒नेदनृ॑तस्य प्रयो॒ता ॥६॥

Na sa svo daksho varuna dhrutih sa sura manyurvibhidako achittih
Asti jyayankaniyasa upare svapnashchanedanritasya prayota

86.7

अरं॑ दा॒सो न मी॒ळ्हुषे॑ कराण्य॒हं दे॒वाय॒ भूर्ण॒येऽना॑गाः ।
अचे॑तयद॒चितो॑ दे॒वो अ॒र्यो गृत्सं॑ रा॒ये क॒वित॑रो जुनाति ॥७॥

Aram daso na milhushe karanyaham devaya bhurnayenagah
Achetayadachito devo aryo gritsam raye kavitaro junati

86.8

अ॒यं सु तुभ्यं॑ वरुण स्वधावो हृ॒दि स्तोम॒ उप॑श्रितश्चिदस्तु ।
शं न॒ः क्षेमे॒ शमु॒ योगे॑ नो अस्तु यू॒यं पा॑त स्व॒स्तिभि॒ः सदा॑ नः ॥८॥

Ayam su tubhyam varuna svadhavo hridi stoma upashritashchidastu
Sham nah ksheme shamu yoge no astu yuyam pata svastibhih sada nah