Sukta 87

87.1

7 maitravarunirvasishthah, varunah, trishtup

रद॑त्प॒थो वरु॑ण॒ः सूर्या॑य॒ प्रार्णां॑सि समु॒द्रिया॑ न॒दीना॑म् ।
सर्गो॒ न सृ॒ष्टो अर्व॑तीॠता॒यञ्च॒कार॑ म॒हीर॒वनी॒रह॑भ्यः ॥१॥

Radatpatho varunah suryaya prarnansi samudriya nadinam
Sargo na srishto arvatiritayanchakara mahiravanirahabhyah

आ॒त्मा ते॒ वातो॒ रज॒ आ न॑वीनोत्प॒शुर्न भूर्णि॒र्यव॑से सस॒वान् ।
अ॒न्तर्म॒ही बृ॑ह॒ती रोद॑सी॒मे विश्वा॑ ते॒ धाम॑ वरुण प्रि॒याणि॑ ॥२॥

Atma te vato raja a navinotpashurna bhurniryavase sasavan
Antarmahi brihati rodasime vishva te dhama varuna priyani

परि॒ स्पशो॒ वरु॑णस्य॒ स्मदि॑ष्टा उ॒भे प॑श्यन्ति॒ रोद॑सी सु॒मेके॑ ।
ऋ॒तावा॑नः क॒वयो॑ य॒ज्ञधी॑रा॒ः प्रचे॑तसो॒ य इ॒षय॑न्त॒ मन्म॑ ॥३॥

Pari spasho varunasya smadishta ubhe pashyanti rodasi sumeke
Ritavanah kavayo yagyadhirah prachetaso ya ishayanta manma

उ॒वाच॑ मे॒ वरु॑णो॒ मेधि॑राय॒ त्रिः स॒प्त नामाघ्न्या॑ बिभर्ति ।
वि॒द्वान्प॒दस्य॒ गुह्या॒ न वो॑चद्यु॒गाय॒ विप्र॒ उप॑राय॒ शिक्ष॑न् ॥४॥

Uvacha me varuno medhiraya trih sapta namaghnya bibharti
Vidvanpadasya guhya na vochadyugaya vipra uparaya shikshan

ति॒स्रो द्यावो॒ निहि॑ता अ॒न्तर॑स्मिन्ति॒स्रो भूमी॒रुप॑रा॒ः षड्वि॑धानाः ।
गृत्सो॒ राजा॒ वरु॑णश्चक्र ए॒तं दि॒वि प्रे॒ङ्खं हि॑र॒ण्ययं॑ शु॒भे कम् ॥५॥

Tisro dyavo nihita antarasmintisro bhumiruparah shadvidhanah
Gritso raja varunashchakra etam divi prenkham hiranyayam shubhe kam

अव॒ सिन्धुं॒ वरु॑णो॒ द्यौरि॑व स्थाद्द्र॒प्सो न श्वे॒तो मृ॒गस्तुवि॑ष्मान् ।
ग॒म्भी॒रशं॑सो॒ रज॑सो वि॒मान॑ः सुपा॒रक्ष॑त्रः स॒तो अ॒स्य राजा॑ ॥६॥

Ava sindhum varuno dyauriva sthaddrapso na shveto mrigastuvishman
Gambhirashanso rajaso vimanah suparakshatrah sato asya raja

यो मृ॒ळया॑ति च॒क्रुषे॑ चि॒दागो॑ व॒यं स्या॑म॒ वरु॑णे॒ अना॑गाः ।
अनु॑ व्र॒तान्यदि॑तेॠ॒धन्तो॑ यू॒यं पा॑त स्व॒स्तिभि॒ः सदा॑ नः ॥७॥

Yo mrilayati chakrushe chidago vayam syama varune anagah
Anu vratanyaditeridhanto yuyam pata svastibhih sada nah