Sukta 85

85.1

5 maitravarunirvasishthah, indravarunau, trishtup

पु॒नी॒षे वा॑मर॒क्षसं॑ मनी॒षां सोम॒मिन्द्रा॑य॒ वरु॑णाय॒ जुह्व॑त् ।
घृ॒तप्र॑तीकामु॒षसं॒ न दे॒वीं ता नो॒ याम॑न्नुरुष्यताम॒भीके॑ ॥१॥

Punishe vamarakshasam manisham somamindraya varunaya juhvat
Ghritapratikamushasam na devim ta no yamannurushyatamabhike

स्पर्ध॑न्ते॒ वा उ॑ देव॒हूये॒ अत्र॒ येषु॑ ध्व॒जेषु॑ दि॒द्यव॒ः पत॑न्ति ।
यु॒वं ताँ इ॑न्द्रावरुणाव॒मित्रा॑न्ह॒तं परा॑च॒ः शर्वा॒ विषू॑चः ॥२॥

Spardhante va u devahuye atra yeshu dhvajeshu didyavah patanti
Yuvam tam indravarunavamitranhatam parachah sharva vishuchah

आप॑श्चि॒द्धि स्वय॑शस॒ः सद॑ःसु दे॒वीरिन्द्रं॒ वरु॑णं दे॒वता॒ धुः ।
कृ॒ष्टीर॒न्यो धा॒रय॑ति॒ प्रवि॑क्ता वृ॒त्राण्य॒न्यो अ॑प्र॒तीनि॑ हन्ति ॥३॥

Apashchiddhi svayashasah sadahsu devirindram varunam devata dhuh
Krishtiranyo dharayati pravikta vritranyanyo apratini hanti

स सु॒क्रतु॑ॠत॒चिद॑स्तु॒ होता॒ य आ॑दित्य॒ शव॑सा वां॒ नम॑स्वान् ।
आ॒व॒वर्त॒दव॑से वां ह॒विष्मा॒नस॒दित्स सु॑वि॒ताय॒ प्रय॑स्वान् ॥४॥

Sa sukraturitachidastu hota ya aditya shavasa vam namasvan
Avavartadavase vam havishmanasaditsa suvitaya prayasvan

इ॒यमिन्द्रं॒ वरु॑णमष्ट मे॒ गीः प्राव॑त्तो॒के तन॑ये॒ तूतु॑जाना ।
सु॒रत्ना॑सो दे॒ववी॑तिं गमेम यू॒यं पा॑त स्व॒स्तिभि॒ः सदा॑ नः ॥५॥

Iyamindram varunamashta me gih pravattoke tanaye tutujana
Suratnaso devavitim gamema yuyam pata svastibhih sada nah