Sukta 55

55.1

8 maitravarunirvasishthah, vastoshpatih, 2- 8 indrah( 2-8 prasvapini upanishad ), 1 gayatri, 2-4 uparishtadbrihati, 5-8 anushtup

अ॒मी॒व॒हा वा॑स्तोष्पते॒ विश्वा॑ रू॒पाण्या॑वि॒शन् । सखा॑ सु॒शेव॑ एधि नः ॥१॥

Amivaha vastoshpate vishva rupanyavishan, sakha susheva edhi nah

यद॑र्जुन सारमेय द॒तः पि॑शङ्ग॒ यच्छ॑से । वी॑व भ्राजन्त ऋ॒ष्टय॒ उप॒ स्रक्वे॑षु॒ बप्स॑तो॒ नि षु स्व॑प ॥२॥

Yadarjuna sarameya datah pishanga yachchhase, viva bhrajanta rishtaya upa srakveshu bapsato ni shu svapa

स्ते॒नं रा॑य सारमेय॒ तस्क॑रं वा पुनःसर । स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प ॥३॥

Stenam raya sarameya taskaram va punahsara, stotrinindrasya rayasi kimasmanduchchhunayase ni shu svapa

त्वं सू॑क॒रस्य॑ दर्दृहि॒ तव॑ दर्दर्तु सूक॒रः । स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प ॥४॥

Tvam sukarasya dardrihi tava dardartu sukarah, stotrinindrasya rayasi kimasmanduchchhunayase ni shu svapa

सस्तु॑ मा॒ता सस्तु॑ पि॒ता सस्तु॒ श्वा सस्तु॑ वि॒श्पति॑ः । स॒सन्तु॒ सर्वे॑ ज्ञा॒तय॒ः सस्त्व॒यम॒भितो॒ जन॑ः ॥५॥

Sastu mata sastu pita sastu shva sastu vishpatih, sasantu sarve gyatayah sastvayamabhito janah

य आस्ते॒ यश्च॒ चर॑ति॒ यश्च॒ पश्य॑ति नो॒ जन॑ः । तेषां॒ सं ह॑न्मो अ॒क्षाणि॒ यथे॒दं ह॒र्म्यं तथा॑ ॥६॥

Ya aste yashcha charati yashcha pashyati no janah, tesham sam hanmo akshani yathedam harmyam tatha

स॒हस्र॑शृङ्गो वृष॒भो यः स॑मु॒द्रादु॒दाच॑रत् । तेना॑ सह॒स्ये॑ना व॒यं नि जना॑न्त्स्वापयामसि ॥७॥

Sahasrashringo vrishabho yah samudradudacharat, tena sahasyena vayam ni janantsvapayamasi

प्रो॒ष्ठे॒श॒या व॑ह्येश॒या नारी॒र्यास्त॑ल्प॒शीव॑रीः । स्त्रियो॒ याः पुण्य॑गन्धा॒स्ताः सर्वा॑ः स्वापयामसि ॥८॥

Proshtheshaya vahyeshaya nariryastalpashivarih, striyo yah punyagandhastah sarvah svapayamasi