Sukta 4

4.1

10 maitravarunirvasishthah, agnih, trishtup

प्र व॑ः शु॒क्राय॑ भा॒नवे॑ भरध्वं ह॒व्यं म॒तिं चा॒ग्नये॒ सुपू॑तम् ।
यो दैव्या॑नि॒ मानु॑षा ज॒नूंष्य॒न्तर्विश्वा॑नि वि॒द्मना॒ जिगा॑ति ॥१॥

Pra vah shukraya bhanave bharadhvam havyam matim chagnaye suputam
Yo daivyani manusha janunshyantarvishvani vidmana jigati

स गृत्सो॑ अ॒ग्निस्तरु॑णश्चिदस्तु॒ यतो॒ यवि॑ष्ठो॒ अज॑निष्ट मा॒तुः ।
सं यो वना॑ यु॒वते॒ शुचि॑द॒न्भूरि॑ चि॒दन्ना॒ समिद॑त्ति स॒द्यः ॥२॥

Sa gritso agnistarunashchidastu yato yavishtho ajanishta matuh
Sam yo vana yuvate shuchidanbhuri chidanna samidatti sadyah

अ॒स्य दे॒वस्य॑ सं॒सद्यनी॑के॒ यं मर्ता॑सः श्ये॒तं ज॑गृ॒भ्रे ।
नि यो गृभं॒ पौरु॑षेयीमु॒वोच॑ दु॒रोक॑म॒ग्निरा॒यवे॑ शुशोच ॥३॥

Asya devasya sansadyanike yam martasah shyetam jagribhre
Ni yo gribham paurusheyimuvocha durokamagnirayave shushocha

अ॒यं क॒विरक॑विषु॒ प्रचे॑ता॒ मर्ते॑ष्व॒ग्निर॒मृतो॒ नि धा॑यि ।
स मा नो॒ अत्र॑ जुहुरः सहस्व॒ः सदा॒ त्वे सु॒मन॑सः स्याम ॥४॥

Ayam kavirakavishu pracheta marteshvagniramrito ni dhayi
Sa ma no atra juhurah sahasvah sada tve sumanasah syama

आ यो योनिं॑ दे॒वकृ॑तं स॒साद॒ क्रत्वा॒ ह्य१ग्निर॒मृताँ॒ अता॑रीत् ।
तमोष॑धीश्च व॒निन॑श्च॒ गर्भं॒ भूमि॑श्च वि॒श्वधा॑यसं बिभर्ति ॥५॥

A yo yonim devakritam sasada kratva hya1gniramritam atarit
Tamoshadhishcha vaninashcha garbham bhumishcha vishvadhayasam bibharti

ईशे॒ ह्य१ग्निर॒मृत॑स्य॒ भूरे॒रीशे॑ रा॒यः सु॒वीर्य॑स्य॒ दातो॑ः ।
मा त्वा॑ व॒यं स॑हसावन्न॒वीरा॒ माप्स॑व॒ः परि॑ षदाम॒ मादु॑वः ॥६॥

Ishe hya1gniramritasya bhurerishe rayah suviryasya datoh
Ma tva vayam sahasavannavira mapsavah pari shadama maduvah

प॒रि॒षद्यं॒ ह्यर॑णस्य॒ रेक्णो॒ नित्य॑स्य रा॒यः पत॑यः स्याम ।
न शेषो॑ अग्ने अ॒न्यजा॑तम॒स्त्यचे॑तानस्य॒ मा प॒थो वि दु॑क्षः ॥७॥

Parishadyam hyaranasya rekno nityasya rayah patayah syama
Na shesho agne anyajatamastyachetanasya ma patho vi dukshah

न॒हि ग्रभा॒यार॑णः सु॒शेवो॒ऽन्योद॑र्यो॒ मन॑सा॒ मन्त॒वा उ॑ ।
अधा॑ चि॒दोक॒ः पुन॒रित्स ए॒त्या ऽऽनो॑ वा॒ज्य॑भी॒षाळे॑तु॒ नव्य॑ः ॥८॥

Nahi grabhayaranah sushevonyodaryo manasa mantava u
Adha chidokah punaritsa etya no vajyabhishaletu navyah

त्वम॑ग्ने वनुष्य॒तो नि पा॑हि॒ त्वमु॑ नः सहसावन्नव॒द्यात् ।
सं त्वा॑ ध्वस्म॒न्वद॒भ्ये॑तु॒ पाथ॒ः सं र॒यिः स्पृ॑ह॒याय्य॑ः सह॒स्री ॥९॥

Tvamagne vanushyato ni pahi tvamu nah sahasavannavadyat
Sam tva dhvasmanvadabhyetu pathah sam rayih sprihayayyah sahasri

ए॒ता नो॑ अग्ने॒ सौभ॑गा दिदी॒ह्यपि॒ क्रतुं॑ सु॒चेत॑सं वतेम ।
विश्वा॑ स्तो॒तृभ्यो॑ गृण॒ते च॑ सन्तु यू॒यं पा॑त स्व॒स्तिभि॒ः सदा॑ नः ॥१०॥

Eta no agne saubhaga didihyapi kratum suchetasam vatema
Vishva stotribhyo grinate cha santu yuyam pata svastibhih sada nah